UNFC Vs WGEC: Tulio an Dirhmun Zohfiannak

By Salai Van Lian Thang

Biadomhnak : Ramtang Tlangcung hriamtlai phu 11 funtu “United Nationalities Federal Council– UNFC” nih Tlangcung miphun tonnak “Ethnic Conference” an kawh i nai July 2013 thla ah hlawhtling ngaiin kan lim, tiah ca pakhat an hun chuah. Hi thawng a than saling ah thawng pakhat tulio a hun ringmi cu “Working Group for Ethnic Coordination– WGEC” nih Kawlram chungah “Ethnic Conference” kawh an itim cuahmah ve, timi a hun thang. Cu nih tulio Tlangcung miphun dohthlennak “Revolutionary World” ah “zeikodah a cang hnga” timi kha ruahawk a hun lianter.

UNFC le WGEC

UNFC cu November 2010 an dirh i hriamtlai phu 11 an itel. CNF, KIO, KNU, KNPP, NMSP, SSPP, LDU, NUPA/ANC, PNLO, PSLF/TNLA, WNO kha UNFC member an si hna. KIO nih Chairman a tlaih. NMSP nih GS a tuan. Kawl Cozah he an i chon cang. Hi UNFC phu ah a lut lomi hriamtlai phu 19 hrong an um than. EBO nih cun “UNFC ralkap thazaang hi fonh dih ahcun 20,800 hrong a si hnga i UNFC ah a umlomi hriamtlai phu dihlak thazaang hi 56,200 hrong a si ve lai” tiah a tuak.

Thein Sein Cozah nih “Peace Talk” sawmnak a thanh thla 6 ah Tlangmi Khawmpi cu Feb 2012 ah an rak kawh. Hriamtlai phu 17 an rak kai. UNFC phu 11 zong an itel. Cu tonnak bia bang “Working Group for Ethnic Coordination” cu Kawlram Tlangcung Pyine 7 aiawhtu hna le ruahnak petu hna, tiah an dirh. UNFC zong an i tel. Hriamtlai lo zong an i tel len. ENC hruaitu hna zong an i tel. Cun Sept 2012 ah hriamtlai phu le hriamtlai lo komhin “Ethnic Conference” an kawhti i Cozah he biakchonh tikah lamthluan “ Six-point Road Map” hnatlaknak an hun serti. Ramkhel biakchonhnak tungtlang “Framework for Political dialogue” tialtu le remdaihnak kongkau ruatkhangtu “WGEC” phu zong cu lian deuhin an hun ser chap i minobu, nubu, mirunphu tiang kau deuhin an hun dirh. WGEC meeting cu thlakhat voikhat an ngei i remdaihnak kalpidan cu an ceih tawn. EBO nih phaisa a bomh. WGEC nih “Framework for Political dialogue” cu a tial dih i UPWC Vice Chairman Vuanci U Aung Min sin ah June 2013 ah an chanh.

Zeitin an buai!

March 2013 WGEC meeting lio ah Tlangmi dihlak aiawh in C ozah biakchonhtu “Negotiation Teams” dirh a hau, tiah WGEC hruaitu nih biatung an dirh. Nain, UNFC nih “WGEC tu hi hrawh siseh” tiah bia a khin ve. UNFC nih ai tlaihmi cu “WGEC cu framework sernak tiang long rian a ngei i framework ai lim cun a dir a hau ti lo” ti khi a si. WGEC hruaitu dang nih “WGEC phu kan hrawh zongah Tlangmi funtomtu phu pakhat cu a hau thiamthiam ko caah, framework zong hmunkhat tein kan serti bang hmunkhat tein Negotiation Team zong serti uh sih” an ti ve. Cu tikah UNFC nih “UNFC nih Negotiation Team sercia kan ngei cang, cucu kan hrawk kho lo” an ti ve. Cu cangka KNU nih “UNFC Negotiation Team ah ai telmi KNU upa nih KNU bu ai a awh kho lo” an hun ti colh. Cuti sicun, hriamtlai bukip hruaitu bikbik nih phisin dingin tonnak tuah siseh, an hun ti tikah UNFC nih “hruaitu bikbik nih an ceihfel zongah UNFC nih biachahnak a tuah thiamthiam a hau ” an hun ti than. Cutin an buai i June ah UNFC nih “WGEC chungin ka chuak” tiah a thanh. July 2013 an mah tein “Ethnic Conference” cu an hun kawh colh, WGEC nih tuahti ding an timi cu an duh lo. Cu tikah KNU nih palai a thlah duh ve ti lo. Tlawmpal ah WGEC zong nih a dang tein “Ethnic Conference” ramchung ah kawh ve an timh cuahmah, ti a hun thang.

Thil pahnih ruah awk!

Hi phu hnih tthennak hi UNFC le WGEC kar buainak long si loin hriamtlai phu hna an bu chung “leadership problems” nih a hun kahmi zong a si, UNFC chung dirhmun ikhahlonak ruang zong a si, hruaitu pakhat le pakhat ihmuh thiamlonak zong ai tel, cun a fakbik pakhat cu dohthlennak tuahtu hriamtlai phu hna le hriamtlai lo phu hna kar “zuamcawhnak” zong a um. Tu ahcun ramchung lei ramkhel party phunphun zong hi buainak chung hun kuaih chih dawh in a um lengah Kawlram democracy movement tiang zong “effect” dingin a hung um. Hitin a kal ziahmah ahcun thil pahnih ruah awk ngai a um.

Pakhatnak cu chanbia nih zeitindah a rak record te hnga, ti kha a si. 1961 Tawngyi Conference “or Federal Movement” ah Tlangcung hruaitu dihlak an rak ipumkhom hna i 1947 Union Constitution cu lungrual tein remh siseh, tiah min an rak thutti dih khawh lio ahkhan Tlangmi hruaitu nganpi pathum: Chin in Za Hre Lian, Karen in Aye Soe Myin, Kachin in Sama Duwa Sinwanaung cu an hoi le he ifun duh loin lam an rak pial. U Nu Cozah lei tu an rak tang. Chanbia a tan ning ahcun a mui a chia deuh ko in a lang tawn. Cun pakhat rih cu Kawlram independence laknak kongah 27 Jan 1947 ah U Saw le Thakhin Basein nih Aung San– Attlee agreement minthu duh loin an delegation chungin an kuai ve i an hoi le he ifun duh loin lam an rak pial ve kha a si. Hi thil pahnih nih a kan hmuhsak mi cu ram thlennak le sernak nganpi “struggle” pakhat lungrual tein namti lioah hoikom rual he fun khawh loin lam a pialmi an um tikah chanbia ah zohchia in an tang lengmang. Tulio Burma Democracy Movement chungah UNFC le WFEC kuainak hi kan chimfel khawh lo sual cun chanbia nih zeitin khin a va tial te lai, ti ruahah lung a tha deuh lo.

Pahnihnak cu “peace process” hi zeidah a va lawh te hnga, tihi a si. Hnulei kum 50 ramkhel tiluan kan cuanh tikah Kawl Cozah nih Tlangcung miphun hlawhtling ngaiin a kan tei khawhnak hnga a hman tawnmi strategy cu “tthencheu in uk– divide and rule” timi le “four–cut strategy” timi pahnih komh kha an si. Ramtang hriamtlai funtu NDF a rak khuai. CPB phu nganpi kha phu fatete in a cheu dih. KNU phuthum in a tthek. KNPP le KNPLA a cheu. KIO, KSC, KNO tiin a cheu. “Divide and rule strategy” in kan thazaang bupi kha a khuai hnuah tthencheu hnu a uk khawh lomi phu kha “four–cut strategy” hmangin an lu dip tein rial rih aa zuam. Tthencheu hnu a uk khawhmi phu kha thazaang ah a ser hna i cu thazaang in National Convention a kawh i 2008 Constitution hi a suai. Cuticun kum 50 chung “Burma revolution” kha a lu tung kho ngaingai loin a nemnak he a hrannak he a rak sawksam. 2009 ah tulio KNU Chairman General Mutu nih Negotiation Workshop kan kai lioah a ka timi cu “ kafa, Karen cu zilpum riam in a kan riam ziahmah i a kan ei duahmah ko cang, Chin cu nan van a tha tuk rih hih” a rak ka ti. Cozah nih tuchun “peace talk” timi pawlasi an hun kalpi tikah dirnak hmun tlaihmi “position” fekte in an ser hmasa, fawi tein tthum an tim lo. Cu dirhmun cungah fektein an dir i tlawttlau lo tein lungrual tein heh an kan nam cuahmah, a herh ahcun hriam phunphun hman hnawh te zong kan fawi i, chonhbiaknak in ral nganpi an kan tuk cuahmah. Ngaingai cun “chonhbiaknak” hi Tlangmi nih kum 50 chung kan duhmi le halmi “strategy” a si. 1994 UN resolution zong a si. Nain, Cozah nih biatak tein a hun kan chonh hnik tak tikah kan mah le kan mah lila kan iseh i kan i cheu. Thein Sein nih a pu le zia kha tampi a kal tak nain a thlah dih lo. UNFC bukomh in chonh loin a phuphu tete in chonh, timi “divide and talk strategy” kha a rak hman thiamthiam ko. Fonh i chonh ahcun an cak lai, tthen i chonh ahcun an der lai, ti khi a si. Nain, hlan a pu le tlukin a zual hma rih lo. Nain, a zual hma te lai lo, a pu le zia a chuah te lai lo, tiah hohmanh nih kan chim kho hrim ve lo. Chonhbiaknak in ral an hun tuk tikah bia a har deuh te ahcun hriam phunkip “strategy and tactics” an hman te lai, ticu zumh an um. Phan awk ngaingai a simi cu tulio caante ah Ne Win, Saw Maung, Than Swe chan an pu le zia “divide and rule” le “four cut strategy” timi pahnih komh kha kan hman hnawh sual hna seh law zeikhidik kan va lawh hnga, ti ahcun ruah ngam awkin kan um lo. Thil a fiangmi cu tulio “peace process” vialte hi a rawk than kho i Kawlram caah sunghnak nganpi a chuahpi kho, ti kha a si.

UNFC cachuah!

31 July 2013 ah UNFC nih a kawhmi Ethnic Conference Statement kha kan rel ahcun thil pakhat hnih cu a taktak in a si kho ngaingai hnga maw timi ruah awk an um pah, tiah ka hmuh.

Pakhatnak cu tulio Kawl Cozah sermi 2008 Constitution cu hnawmpung ah hlonh dih i “Union of Burma Constitution” a thar lawlaw in kan tial lai, a timi dirhmun kha a si. 2008 phunghram cu Tlangmi caah a tha lomi a um len ko, ti kha kan pom dih. Nain, tutan UNFC ramkhel dirhmun “political stance” hi cu a taktak in tlaih awk a si deuh lomi “unrealistic political position” a si, tiah ka hmuh. Kawl Cozah nih zeitikhmanh an cohlanpi khawh bal lo dingmi khi a theih ko nain ai tlaih hramhram, tiah ka ruah. 2008 Constitution hi kan duh locaah “genuine federal system” in kan remh than lai, timi dirhmun tu UNFC nih ai tlaih deuh ahcun tulio Palimen nih a dirhmi “2008 Phunghram Zohthan Phu” he bia ai vai tong te men hnga i, cu longah Tlangcung miphun kan duhmi taktak kha a kan khenpi deuh te hnga! UNFC dirhmun hi chelcan cun a hak deuh ngaingai tawn ko i, a taktak in a si khomi itlaihnak lungput “pragmatic attitude” tu kan ngeihpi kho tawn seh law duh a um ngaingai lai.

Pahnihnak cu WGEC kha a chuahtak riangmang i ramchung um United Nationalities Alliance “UNA”he komhin Kawlram phunghrampi thar kan tial lai, a hun timi hi a si. Ngaingai ahcun UNA cu 1990 thimnak lio Tlangmi phu funtu UNLD kha Cozah nih a hrawh hnuah a hun dir chommi phu a si. UNA a dirnak hrampi cu “1990 election legitimacy and mandate” ah khan hram a bunh. Nain, 2010 election hnu Cozah thar a kai incun kha “mandate and legitimacy” kha a thi cang, ti khawh a si. NLD zong kha an rak thah i “register” tuah hnuin a hun nung than. Nain, UNA cu hram hrim a ngei ti lomi a lo. UNA hrampi member party hna kha an lo ngot cang. Tahchunhnak ah UNA member a simi CNLD cu ramchung ah a um hrim a um ti lo. MPP zong a um ti lo. ZNC zong ZCD in ai thleng cang. Cheukhat cu Party thar an dir i Tlangmi party komh NBF ah an ifun fon cang. Cu bantuk lioah UNA bu he Kawlram Phunghrampi a thar in kan tial lai, timi cu a taktak in zeitlukdah a kal khawh hnga, timi ruahawk a um. Cun Federal phungin Kawlram bupi phunghrampi cu NCUB nih 2nd draft tiang a rak tial cia a um. NCUB hin Tlangmi hruaitu tampi an an rak itel. FCDCC zong nih 2nd draft tiang a tialcia a rak um. Tlangcung hruaitu tampi an itel. Cun Tlangcung miphun ramkulh cio nih ENC hruainak tangah “State Constitution” zong an rak tial ciomi a um. Chinland Constitution hna cu “fifth draft” tiang zong a chuak cang. Cu vialte Tlangcung miphun rak cawlcanghnakpi kha theihpinak “recognize” duh lem loin UNFC le UNA nih “Burma Constitution” a thar kan tial lai, timi dirhmun hi cu a huapzau mi kalning a si lo caah a si kho ngai lai, zumh a um deuh lo.

Tlangkawmnak

Pi Suu Kyi nih tulio a chim ngaimi pakhat cu “chonhbiaknak in remnak ser kan thiam lo tuk” timi bia a si. Mirang in “Burma's political culture has been very weak in negotiated compromise” tiah voi tampi a nolh lengmang. Tulio “peace process” zoh tikah hi bia hi a hman ngai ti awkin a um tawn. Kan halmi bau loin a zongza in co dih kan duh. Deh khat zong tthumh kan itim lo. Ramkhel dirhmun hna a hak ngaingai in kan ser. Kan ral lei nih dirhmun fek tein an rak ser ve i, samfatia zong tthumh an itim ve hrimhrim lo. Duhmi co locun thil a rawh than dih zongah a pawi an chia hoi lo. Biahalnak a ummi cu khoi ka cundah “negotiated compromise” cu kan tuah ne lai, timi a si tawn. Hi harnak ruangah remnak cu voi tampi ceih a sitawn nain Ne Win chanin “ pre–conditions” ruangah a rak rawk than lengmang. Hlanchan ahcun Cozah ruangah a rawkbik deuh tawn nain tutan “peace process” tu cu Tlangcung miphun hna ruang hrimhrim ah a rawk dih kho, ti kha tutan thil a tlungmi nih a hun chim.

Thil a fiang ngai komi cu Tlangmi kar rualremnak fek kan ser ta khawh hmasa lo chung cu Cozah he remdaihnak fek taktak ser a har ngaingai ko lai, tihi a si. Cu ruangah tulio remdaihnak lamthluanpi “Burma peace process” tluang tein kal a hlan khawhnak hnga le Kawl Cozah he remdaihnak fek ser te khawh nakhnga ahcun tulio kan herhbikmi cu “UNFC le WGEC reconciliation” kha a si hmasa cang. Cutin rualremnak le ikomhnak tuah khawhnak caah tulio lam thabik cu UNFC le WGEC komhin “Ethnic Conference” kawhti kha a si. Cucu Kawlram Tlangcung miphun dihlak zawnruat in UNFC le WGEC nih an tuahti khawh awk hrimhrim a si hnga i UNFC nih a al awk hrimhrim a si lo, ti kha mizapi lungput a si lai, ka zumh. Tutan remdaih biakchonhnak nih a kalpimi lungput cu “phu khat tei bak cun, phukhat sungh bak” timi “win–lose solution” phun si loin “phu hnih in teinak buan co ti veve” timi “win–win solution” remnak phun a si kha, UNFC le WGEC nih langhter hmasa kho hram hna seh.