Zuun T'hing A Caam Lai Lungrawn Ah (Dal-1nk)

Semnak lungrawn khuate nih tthal khuapau hung chuah cun panh chialmal tein ai hlau tawn.Khuasik thla a hung dihka tthal caan march thla a hung det kaa hrawng semnak lungrawn khuate ah kei bang lileng le zuun ngai in a hram mi val an rak um cio hnga maw.?

Zinglei niceu dawh te cu Ngunlo lu tlang khin a hung kai ziahmah,zingnu kut chuak cerhlian ninu ceu dawh te nih duhsak tein semnak lungrawn khuate cu "Good morning" tiin a van ti.Semnak khuate zong ni ceu dawh te lawm in zaihla a sa.

Zinglei thaithawh ei hlan a chungah a leng mi hna cheu khat manh lo ngai in rawl an chuamchuang.Tlaidep sang ah a um mi tlangval pawl cheukhat nitlang to ding in Lal Ruat pa inn hmai ah ngal rual run bang a phuphu in an hung choi.Cheukhat nih ngapih hmui cur in an kio mi rim cu hnarkua chung ah duhsak tein a hung lut,mi cheu vok rawl pe ding in "kur kur,kiir kiir" tiin a au khuang mi an tam,kawmtang le chiarchak lei in vokpi rawlttam tuar in a hung ngek len cang, nu le pa nih rawlei ding ah auh-khuan mi pa hngakchia inn an hlam pah cang hna. A thaw maw thaw lo ti zong tuak lemlo in zinglei thaithawh ei cu kan i lim cio hna.

Zinglei rawlei khim bak in Chinchin le a hawi le tlangval pathum Khualtu tiva ah ngahring dawi ding in chuk lei ah an zuan thluahmah ko khi innleng in ka hei hmuh hna.Micheu tlangval cheukhat vate (tiva te) thehrawt ding in Ngunlo va lei ah a kal na,Caamva lei ah a kal na,khuaiva chuak lei ah a kal na an si.Nutung tlaitlong cheukhat zong Khualtu tiva ah ti ngahring lungdum ding in cheukhat nih vasum le an panh i cheukhat nih vahna lei an panh in an hawi le kom innpa chakthlang cio he ttuai in an kal hna.

Cheukhat rian ngei lo pawl khanhot hrih in an i la ve,an liang cung ah meithal iput in cheukhat patar deuh pawl muallai ah an hung chuak thluahmah.Meithal ngeilo cheukhat zong a hottu si ding in namte le zal iken in an hung chuak len cang. Ramvai pakhat nih Ngalva kam hrawng i ngalrual neh a hmuh mi cu hnabeisei tak in a van chim.Ramvai pa pakhat nih Sungsung pa lo kam i thingcang chung i saza neh a hmuh mi cu hnabeisei tak in a van chim ve tthan.Cuticun hnabeiseinak lianpi he tlangliam lopil lei ah cheukhat sakap ding in an kal hna.

Kei, zei rianttuan ding ka ngei tuk lemlo.Inn chung ah muko magazine tlawmpal ka rel i tthutdan sau ah ka zau sawhsawh. Zinglei ninu cu dinlo tein a kai lengmang i a lin ziahmanh cang.Ni a van i mer zialmal in cun innpawng thingkung cung in theng le va te ruun hna nih lungleng in zaihla an sa. Arla nih a duh mi arkhong kawl in chiarchak ah zaihla he ai ciah ve.Vanlai mupi nih rawlttam in cung lei van khin kan zuat ar hna a van ngiat len hna i arpi nih a thintur he a fa le cu inn tang ah a lutpi zokzok hna.

Kan inn chak thingkung pi par cung in fiakfaifa nih lungleng in "fiakfairawk"tiah a dawt mi a tlangval pa a auh nak caan a sau tuk cang.Bongte ruun rawl hna nih thingpar cung in khuazakip an cuan.

Semnak lungrawn khuate ah thlizil thiang te a hung hrang chialmal,phusim nih leidip van cungah a phu tein a cawi hna i a her len hna. Kei,lungleng le umhar in inn chung le inn tual ka hlatnak caan a hung sau ruangmang.

Mi thathu kan timi hna zong hi furpi caan ahcun rianttuan an zuam lo nain tthal caan a hung chuah hincun an lungleng an thlakaam i inn ah an um zuam lo-tiva kal le rap chiah,zeimaw zeimaw tbt tuah rumro an hmang. Keimah lawng ka umhar tuk cang,Sungsung tal a um hnga ma?tiah Sungsung te inn lei ah hnabeisei lemlo in duhsah tein ka kal.

Sungsung cu manhlo ngai in inn chung a rak thianh cuahmah ko.Sungsung,na um ko maw,kan leng lai aw-"Aw Patling rak ka leng hih,cikkhat te kai manh deuh lo i nangmah lawng innpi ah rak tthu chung ko rih muh,ka ruatthiam rih ko"tiah Sungsung awka nem te nih ka thinlung le nunnak chung ah fak tuk in rian a ttuan,ka umhar le lunglen vialte cikkhat ah an tlau dih.

Tlawmpal ah Sungsung cu a van i manh in a thil a van ithleng i zihmui rim thawng te he ka pawng teah cun a hung tthu."U tling tuni zei na tuah lemlo,tukhar hrawng na mui kan hmu bak ti lo,na kan leng duh bak ti lo ee,khoika dek kua nai hmuh rua..heeeee"timi Sungsung awka nem te le hmaipanh te nih ka thinlung khuaihliti a van dinh.Hmaipanh tein a nih pah in a van ka zoh ahcun a mit a ka ttheh chih rua,a ka uar bak la tiin kai ruah.

Tlawmpal bia kan i ruah i biaruah ding ka thei ti lo,ka thin a tur i umtuzia ka thiam lo. Ka mawh lo.( Zeitlukin ralkap bawi paral ttha le Doctor sang pipi hna zong khi an duhdawt mi hna pawng te i an tthut ah khin an thin a tur cio ko an ti).

Sungsung hi ka helh hnga maw..??...Ka duhnak le ka dawtnak hi a sinah ka phuang hnga maw...tiin a thli tein keimah lawng holh loin khua ka ruat len.Sungsung nih "Holh pah hme,na zin tuk eh,nang hi cu" a van ka ti chih.Cikkhat a thin a hung lau, ka chim la ka timi bia vialte Sungsung mui ka zoh ah ka philh dih. Cuticun,suimilam cheu chung hrawng ka duhdawt tuk mi Sungsung sinah duhdawtnak bia chim loin ka caan ttha cu liam ai zal cang.

Sungsung na umhar tuk rua,tlang ah kai usih hme,Cingril tlang ah kan kai lai i kehthei le chokhlei par hna kan ttawt lai cu na huam maw tiah "mitchinh kamseh"bak in ka van sawm ko.A duh lai ti cu ka zum bak lo." Nangmah le keimah lawng cu a"tiah a ka zum deuh ziar rua lo nain ka van hnek chih peng i "ee ne,kai ko usih ca tiah a thil a van i thleng i an innka tawh kan hrenh dih in 'Cingril tlang'lei panh cun cho leiah duhsak tein kan kai lengmang.

Kan kalnak lam cu tlanglam si kaw lam bite a si."Patling nihhin ruahlopi in lam thlang leiah a ka nam lai i a ka kolh sual lai" ti phang sehlaw ka dawh ter ngai-Sungsung a mit-au le a hoiher ka zoh i ka ngait ah a dih lo,ai ralring tuk mi le ai veng tuk mi a lo.[ A ngaingai ah cubantuk phun pawl cu kaphnih lungtling lo cun khoika hmunhma le zeibantuk caan hmanh ah tuah kai timh mi a si bal lo,ka lung chung ah chuak in thathawhnak hmanh ngei ning law kaphnih lungtling te lo cun tuah ka duh bal mi a si lo] [Sungsung nih a hngalthiam hnga maw,a ka hngalthiamlo sual lai ti ka phang-cubantuk leikap ah mu].

Cutincun biazaza iruah pah in minute 20 hrawng kan kal hnuah kan khualu tlang "Cingril tlang"kan itinh mi hmun cu kan phan.

Leklak kekthei kung ah a ka kaiter colh_a borbor in ka van thlak thluahmah_nungak fial kan ti cu a parzik tiang in a nge khiah ka timh dih_a parzik lei ka van neih deuh poah "Ai ai ai""Patling na tla sual lai" tiah ka tang in a hung au ve.Tang ah ka hung ttum i chokhlei an parnak lei ahcun kan kal tthan.

Dawtmi he ai dawh mi le a nuam mi tlangthluan cung ah kan caan ttha suimilam zeimawzat chung a hung liam cang.

Chokhlei par te cu ka van khiah i Ka dawtmi Sungsung cu ka van pek_Sungsung nih ai dawhtuk mi a hnar in a rim te cu a van hnimh pah in chokhlei par sen te cu a hmur in a van kiss pah.

Ai dawh mi Chokhlei par tang ah khuaza cuan in Sungsung he kan tthu tti.Pasal atu bantuk caan ttha hi ka hmuh ti lai maw tiin dawtnak bia phuan hram ka thok ve cang. Ka voikhatnak bak a si_ka thin drum tuk bang ka chung lei in a tur thluahmah_ Sungsung ka duhdawtnak nih second pakhat chung ah a let in ai chap chin lengmang.

Lungfim tein:Sungsung biaruah ding kan ngei,caan na ka pe kho hnga ma?tiah ka van hal hmasa. "Aw..ngah ko ee,Patling chim ko"tiah a nih bu tein a van ka ti. [Ka voikhatnak a si caah biachim zia zong ka rak thiam lo].

Sungsung vawlei cungah hin par phuntling an par_an i dawhnak iang an ngei cio hna i an mah sining cio in colour (muici) phuntling in an par cio hna.Cu par hnalak ah keimah nih ai dawhbik i ka duh bik mi le ka dawtbik mi par cu "atu ka pawng teah a tthu mi"nangmah hi na si ee.Ka thinlung le nunnak dihlak in kan duhdawt,a taktak a simi kan duhdawtnak hi atu chim ka duh bik mi cu a si.Cu duhdawtnak a ngeitu kei zong nih na duhdawtnak co loin ka um kho lo,kei nih kan duhdawt bantuk tein na ka duhdaw ve maw tiah dangkharh lengmang in ka van phuan ko.

"Patling cubantuk cu ruat rih hlah law,a tuan tuk rih lo maw,atu tanghra result chuah pei kan hngah rih hi,tanghra ka awn ahcun collage pei kai ka duh cu,tlangval ngeih kai tim rih lo,ka ruatthiam ko,hawikom komh tuin kan i kom lai mu..Nang zong sianginn kai lioah nu cu ruat rih hlah,a caan tamtuk rih ko"tiin Sungsung awnem te nih ka thinlung cu daar-um bang a van khuai.

Ka dawttuk mi nih a kan dawt ve lo ruangah ngaihchiatnak le lungkuainak nih tichum bang a ka zelh cang.

Tlangpar cungah thlizil thiang te vingving in a hrang,Sungsung sam thlitu nih a van hranh mi samfa hna ka liang cungah an hung kai,a hmai ah thlitu nih a van thlak mi safa pawl Sungsung nih a lu cung cho lei ah a van hlih,ai dawh hringhran,a biangki sen nawn tein..

Kan pawng thinghluaimin cung in va phuntling zaihla an sa_Thlitu nih a hranh mi thinghnak pawl an i thui len,thingkung cung ah a nunnak a dih cang mi thinghnak car duhsah tein vawlei ah an ttil.Choklei par le vaurawng par tlan in va te phuntling nih nuam in zaihla an sa.

Amah te lawng thingpar cungah tthu in a ttap lengmang mi fiakfaiva te bang Sungsung pawng teah lungkuai in ka tthut caan a sau ruangmang.

Zingnu kutchuak ninu zanlei ni a hung phan cang,ai dawt tlangthluan le pardawh phunkip an parnak fingtlang thluan ah kan caan ttha a liam zuahmah.

Sungsung nih "Patling ttin cang usih,a tlai pah cang i zanriah chumh hna ka tloh sual lai,ni dang ah kan rak ra tthan te lai"a ti i ka ban in a ka dawh i ka duh lo nabu le icenet lo huaha in semnak lungrawn khua lei ah kan tlung..

(Ka peh tthan te lai).

By; Andrew Tum Tling