NU LE PA HNA HI FALE CAAH CEUNAK MEI VANG TU KAN SI.

  NU LE PA HNA HI FALE CAAH CEUNAK MEI VANG TU KAN SI.

Bible caangthim : Phungthlukbia 22:6
 “A zulh awk a si mi lam kha hngakchia cu cawnpiak law mah cu cu a upat tikah a pial tak ti lai lo”.

Vulei cung mifim hna an tuan bia kan zoh tikah  an hngakchiat lio tein nu lei pa nih tha tein zohkhenh le kilkawi mi lawngte an si. A tu le bang ahcun Siangpahrang thimnak an tuah tikah- Church School a kai maw? A nu le a pa a tha mi an si maw? ti hi a si. Cu caah nu le pa nih fale cawnpiak hi a bia tuk. A cheukhat nu le pa nih cun kan fale hna hi cawnpiak loin a lomh in kan lomh hna i,  an duh paoh in kan tlonter tawn hna. Cu caah cun pei John Grun nih cun  " Kan fa le hna hi an duh na loin kan firter tawn hna i, hlawh kan hlan ter tawn hna." ati. A chim duh mi cu kan fale hna hi an hngakchiat lio tein kan cawnpiak hna lo caah a si a ti. D. L Moody nih cun " ka nu nih a ka thithruai bantuk in nu nih hin an fale hi zohkhenh cio hna sehlaw, thong inn hi um a herh  lai lo" tiah a ti. Voikhat ah tlangvaal pa thah ding mi pa hi a hodah hmuh na duh bik tiah an hal. A nih nih cun ka nu hmuh ka duh bik tiah a leh hna. A nu cu an kawh piak i a nu cu a mitthli tla buin a ra. A nu sin ah a chimmi cu “a tu ahhin biaceih zung biaceihtu ruangah thah ka si lo, nangmah ka nu hrimhrim nih na ka thah” tiah a ti. Ka hngakchiat lio i, thil ka hmuh tiah inn i ka rak tlunh tawn mi kha na rak ka lomh i cu nih cun fir thinlung a ka putter. Cu caah ka fir i, thah tiang ka huah nak hi a si a ti.A nu caah  tlai tuk cang. A poi ngai ko".Hngakchia thlahthlam mi nih cun nu le pa ningzahnak a phakter tawn" tiah phungthlukbia 29:15 ah kan hmuh mi hi a hman ngaingai ko.

Kan inn hi kan fale hna caah Sianginn tha bik a si. Zeicatiah cun Sianginn taktak nak in kan inn ah kan fale hna hi an um deuh caah a si. Saya/mah te sin nakin nu le pa sinah sau deuh an um i cawnpiaknak caan tam ngeih khawh a si. Hngakchia pa pakhat belte a pa pawng ah a um ter duh lo i a nupi he caan hmuh peng a du caah a phenhei peng. Inn zongah ihnak khan a dang tein a tuah piak i, a nu le pa sinah a um tawn lo. Cucaah a nu le a pa nih sualnak a tuah zong an hngal tawn lo. Khualu khuataw aa chawk tawn.  A nu le pa sin i um a duh tawn mi kha a um ngam ti lo i vah vaih in aa la cang. Zuu a ding phe aa kah a duh paoh in aa nuam cang. Cucaah a nu sinah a chim mi cu " ka nu ka pa hi chim te a mah loin um ka thiam tuk cang, hi hnu ahcun hung ka chim hmanh u law nan ka chim kho ti lai lo." a tiah a ti.
 

John Randolp nih cun "Ka nu nih ka kut pahnih in a ka tlaih i zingchiar te Bawipa thlacamnak in a ka cawnpiak caah ni hin ni i Khrihfa ka si nak hi a si a ti. Cu lo ahcun Pathian a um lo a ti tu ka si hnga" tiah a ti. Cucaah cun pei Napolian zong nih "kan herh bik mi cu nu tha hi a si. Nu tha pakhat cu Saya tha zakhat he an i tluk "tiah a rak ti.  Fa le cawnpiaknak kong ahhin  Mahadamah Gandhi hi ka uar ngaingai. Gandhi hi South Africa a um lio ah a fapa Arun kha zungah ka kai lai i na Motor hin hung ka thlah. Cun Workshop na Motor kha na va remh lai i zanlei Suimilam 5:00pm ah na ka don te lai tiah a ti. Arun nih cun a pa a thlah khawh in  Motor cu Workshop ah a va remh ter hna. Suimilam a zoh tikah caan tampi  a hlei rih Biscop puai khat a zoh i a dih hnu ah Suimilam a zoh i 3 lawng a si rih. Puaikhat a zoh than i a dih tikah cun Zanlei Suimilam 5:00pm a luan cang. Rian rang ngai in Motor cun a tli i a pa cu a va don. A pa cu lam kam ah a rak dir. Ka pa a tu nai te kha Motor an remh thlu tiah a hlen. A pa nih cun Workshop ah phone ka set cang hna Zanlei Suimilam 3:00pm ah kan lim cang tiah a ti. Hlen hmang mi fale ngeih cu kei mah palh a si. Cucaah na Motor kai cit lai lo tiah a ti i Gandhi cu a keden kha aa phoih Suimilam pathum chung ruahpi sur lakaha ke in  a kal. A fapa Arun nih cun a pa cu Motor mit in a ceuh i a hnu te cun a zulh  a pa a harsat tuk kha hmuh tikah Motor Stearing kha cumh pah buin ka pa ka hlen ti lai lo tiah a ti. Cucaah nu le pa hna, kan fale hlen an hman hi kan mah palh a si.

 Nu le pa hna hi fale hmailei an thatnak ding caah cun Lawng (Ship) mongtu bantuk kan si.  Christian Family catialtu Larry Christian nih cun America ram Biscope film pakhat an chuah i cu Biscope cu 1912 kum i Titanic lawngpi  Vur tlang pi a suk khut ruang i minung 2000 reng lo rili chung i an pil nak kong kha s i. A zohtu paoh nihcun a va poi ve! Hi lawngpi a mongtu hi a hodah a si hnga tiah an i ceih supmap ko. Cubantuk in  nu le pa hi fale hmailei an nunnak ding caah Lawngpi a mong mi bantuk kan si i fanu le fapa a pil tertu hna caah cun ngaihchia ngai a si.  Kan fale hna hi rawhralnak lei ah maw kan mongh, himnak lei ah dah ti hi nu le pa nih kan ruah ngaingai a herh cang.

Cubantuk tthiamtthiam in nu le pa hin fale caah ceunak meifar a vaangtu bantuk kan si.  Voikhat nupa hna nih fapa pahnih an ngeih hna. An fale cu an dawt tuk hringhren hna. A pa hi Atlantic rili i meivaangtu rian a ttuan mi pa a si. Voikhat cu a fale nih tiva ah kan kal lai tiah an ti i tiva ahcun an kal. Nikhua a dawm i tiva kha a rak lian deuh ngai. Nikhua a dawm caah tlun caan kha an i palh deuh sual i tlai deuh ah tlun an van i thawh. An tlun ballo caah an pa cu a lungre a thei tuk i a mei vannak rili kam inn te ahcun a thu i khua kha faktuk in a ruah caah a mei van kha tlolh sual. Cu tikah a fale cu an hung kir i khua a muih caah lawngthainak kha an i palh i, ti nih a fenh hna. An pa mei vannak inn cu an ruak nih a va suk khut. An pa cu a hung i hlau i a fale ruak cu a hmuh hna.  A ngeih a chia tuk i aw!......... ka fale nih hin kir caan an hngalh ko nain keimah nih meivan ka tlolh caah a si a ti i a ttap thluahmah nain san a tlai ti lo. Nu le pa hna nan fale hi hmailei ah karhlan i mifim thiam si an duh ko. Asinain khua caan a that lo ruangah sualnak ahhin an pial sual tawn. Cucaah kan rian a si mi kan fale caah thlacam, cawnpiak hi kan philh sual tawn. Nu le pa nih hin fale caah rian nganpi kan ngei ti hi kan philh lo a herh ngaingai tuzing caan fa a ngei mi nu le pa hna i chek cio hna u sih.

S.Tha Cung Lian