Fiakfairok Va

Fiakfairok vate hi hlan pupa chan lio in a awnh caan paoh ahcun an lung khawihtuk tawn hna i lunglen vahramthiam te tiah an kawh tawn mi a si. A ruang cu a pi nih a thihtak i loduahmi nih kangh hnik a zalh caah a thin a phan tuk pin a pi zuun a ngai tuk i tlangza cul in lungleng le thih zuuntuar in a hram kiarmar tawn caah hin mi thinlung a hlau khun i thennak a tongmi le thihnak a tongmi chungkhar hna nihhin a hram thawng an theih ah an tuar khun tawnnak a si.

Cucaah thennak a tong i zuuntlemmi hna nih a hram kiarmar tikah an lung a len a zualter chin hna caah zaihla hna an hlawi ve tawn.

“Fiakfai va aw… nah ram kiarmar, keibang na tuar ve maw? Rung chim ai law…. vanduai ka rei kiang ah, kan hramnak cuaibang kan tlai tti lai, kei cu tleicia zuunthing ka tlem ee…..” tiin an hlawi tawnnak a si. A ruang cu a hram an ngaih tikah tleicia zuunthlum pawl nih kanmah tuar ning he a turning hi ai lo ko lai ee……… tiin an ruah caah a si.

Fiakfairok vaa te hi tleicia a pi zuuntlem in februay ni 15 in a cunglei hrawng ah fing le tlang kip cul in hram le awnh hram ai thawk I august thla tiang hi a hram kiarmar tawn ee.. an ti. Hi thla ruk chung hrawng hi dawtmi fanu, fapa, nu le pa, pi le pu hna nih leidai tang ciamsertak ruang le dawtmi he thennak ton ruangah lungkuai in zuun a tlem I a taphram mi hna zuuntuar pi awk caah le a mah zong a dawt a pi he thennak a ton caah zuun tlem in fing le tlang kip a cul I a hramnak a si.. Cucaah a hramthawng ngeih ah lunglen a zualter khunnak a si ee an ti.

August thla a hung dih riangmang in cun leicung mi hna nih kan cinmi thlairawl kaw-awm hna an hung par cang I cucaah kaw-awm par kha an I cuk I mithi khua an vat lawn pah in an phurh hna I mithi pawl nih aw.!........leicung mi nih an cinmi thlairawl a za cang mu…..ti kha an theih tawn an ti.. Cucaah thlaruk chung hrawng hi mithi khua, mithi sinah khua an sa I an awnh a daihnak a si ee.. an ti. Cu ti a si caah fiakfairok vate hi a pi nih a thihtak I zuun a tlem lawng si loin lei minung hna le mithi mi hna karlak ah pehtlaihtertu palai a si caah a hram tikah milung a lenter khunnak a si ee… tiah pupa hna nih an rak chim tawnmi vate a si.