Tulio Peace Talk: ENC maw UNFC

Salai Van Lian Thang

( 30 May 2012)

Laimi kan pa pakhat Pu Lian Uk hi a catial mi tete an tha tuk tawn i ro ah tampi cu an rak tang te hna lai. Tutan ah ENC le UNFC kong belte voihnih a tialmi ka rel i ka sia a rem deuh lo ngai. Mi zaapi rel ding in a thlah cang caah mipi zong phun dang deuh in kan lung a tuaitam sual hna lai ti phannak ka hung ngei fawn. Cucaah tlawmte ka hmuhning ka rak tial ve hi a si. 

ENC le UNFC ttthen thiam a si lo

Taktak ahcun ENC le UNFC tiah tthenthiam an si lo. UNFC dirhnak ah a sulsutu Dr. Sui Khar cu tulio ENC Secretary General a si. Tulio Cozah chonhnak ah CNF chief negotiator a si rih. Mit khat leiin kan zoh ahcun ENC hmanh khi Cozah nih an chonh cuahmah cang ti deuh awk hmanh a si. UNFC  hi voikhat hmanh an chon bal taktak rih lo.

KNU peace talk hruaitu David Taw khi ENC GS a rak si ve i ENC hruaitu a si. KNPP peace talk hruaitu Khu Oo Reh zong ENC a um pengmi  upa a si. ENC Negotation Workshop in a chuakmi: Bochohci Mutu, Khu Oo Reh, Dr. Sui Khar, David Taw, Solomon Thang Ding tbt vialte hi tulio Peace Talk ah hruaitu longte an si dih. NMSP hruaitu zong ENC a tthu dir peng, an si. Cun ENC dirhtu ah ai tel vemi le ENC hruaitu a si vemi Khun Okker cu tulio UNFC Joint General Secretary thiamthiam a si. PLNO Chairman zong a si. Cun naite Bochohci Soe Win he ai chonmi SSA peace-talk ah hmaitlang a thu ve mi khi ENC hruaitu adviser Harn Yawnghwe a si rih. SSA nih an thluakpi ah an hman. Cucaah 'ENC zei an rel hna lo i UNFC long an chonh' timi hi ruah deuh a haumi a si lai tiah ka ruah. 

UNFC nih ENC policy ai tlaih peng

Tthen thiam an si lo long si loin tulio UNFC policy cu ENC policy sercia kha ai tlaih. Tulio UNFC political roadmap cu: 1. UNFC palai le Cozah palai i chonh 2. Preliminary-stage political dialogue 3. Ethnic Conference with non-UNFC forces 4. Convening National Convention 5. Signing National Accord 6. Continuing works according to National Accord, ti a si. Hihi UNFC nih a thar in a  sermi roadmap a si lo. Taktak ahcun ENC nih 2003 lio tein a rak aupi diam cangmi ENC Roadmap hlun kha UNFC nih an hun i tlaih than khi a si ko. Federal phung in ram ser timi phung lengah 'political means' in Kawlram buainak phisin timi ENC principle vialte kha pakhat hmanh hlot loin UNFC nih ai tlaih than peng. 

Chonhnak Lam Vittu hi ENC an si

Cu long a si lo. ENC policy ah political dialogue cu a ruangruh a si bang tulio UNFC le Cozah chonhnak caah lam a vit hmasa mi zong ENC thiamthiam an si. ENC  hruaitu Harn Yawnghwe kha Yangon ah Cozah nih an sawm i hriamtlai phu chonhnak kongah Cozah nih a ruahnak an hal hmasa. Cozah nih a ruahnak cu tha an ti caah Tlangmi hriamtlai phu he tonnak lam kan kawlpiak tiah an nawl. Cucaah Harn nih hriamtlai vialte cu a sawm hna i Aung Min zong Thailand tiang a va hruai. Hriamtlai phu khat hnu phukhat in Aung Min cu an ton cio. Harn Yawnghwe nih a tlangtlak hna. Cheukhat chonh peh ding an hna a tla colh. Cheukhat tck. CNF cu Hakha kalin minthut hmanh rem an ti colh. Cu ti cun a hun i peh thlauhmah i tuchun Union Level Peace Talk tiang a hung phan. Cucaah tulio chonhnak lam a vittu zong hi ENC thiamthiam an si kan ti khawh. (Note: KIO bel hi cu an i kahnak in chonhnak an lut, KNU, CNF, NMSP, KNPP, SSA tbt vialte cu hi ENC process in a lutmi an si) 

UNFC cu ENC hrinmi a si

Cu long hlah. UNFC cu ENC nih hrinmi a si. Dr. Lian Sakhong nih 'Ka Me A rem Ve cang Lai' timi capar ah' tlangcung mi meithal a tlai mi vialte a thar in timhtuahnak kan ngeih a herh, tiah kan ruah i, ENC nih meithal athlaimi vilate tawnnak “meeting” kan rak auh piak hna. Cuti cun, 2010 September thla ah khan, “Commtittee for Emergence Federal union” (CEFU) tiah, meithal atlai mi ca long ah “bu” thar kan rak dirh. CEFU cu 2011 kum thawk kaa te ah khan, “United Nationalities Federal Council” (UNFC) tiah thlen ahung si' tiah a tial. Cucaah UNFC cu taktak cun ENC hrin mi hmanh a si ti khawh a si lai. Tlangmi Conference ah Tlangmi zapi aiawh sawm in UNFC cu dirh a rak si. Hriamtlai phu long conference kaiin dirhmi a si lo. Cun UNFC cu BGF policy nih a den ruangah pakhat khat kan ton sual cun tiah a hun i funmi hriamtlai phu tonnak 'military wing' an si. ENC cu 7-State-based in hriamtlai + political party+ civil society vialte a kan funtu 'political wing' an si.  Cucaah UNFC  a dir cu a tha tuk tiah 'common goals, diverse actions' tiin welcome statement ENC nih an chuahmi kha a si. UNFC GS Nai Hang Thar zong nih 'we must speak one voice' tiah Mizzima interview ah a ti vemi kha a si. Tulio UNFC Joint Secretary Khun Okker zongnih ' UNFC and ENC might be accused as having one foot on two gunwales. But both gunwales are of the same boat, not of difference boats' tiah a fianh vemi hi a si. 

Thazaang Dernak zawn in Chonh cu Cozah pawlasi a si

Taktak ahcun ENC khi zei a rel hna lo ruangah a chonh lomi hna a si lo bang UNFC khi an tih deuh caah an chonhmi zong a si lo. Cozah lei pawlasi le sining ai thlen cang ruangah an chonhmi deuh a si. ENC a ttha a tthawnnak cu 'politik' ah a si deuh zungzal bang UNFC a ttha a thawnnak cu 'hriamnam thazang' ah a si ve. Cu ve bang, Thein Sein Cozah an thazang a tthawnnak cu hriamnam ah a si i an thazang a dernak zawn cu politik ah a si ve. Political talk hi an tih caah kum 60 chung politik ceih cu an hrial peng. Meithal tu an tthawnter i a kan uk. Cucaah an tthawnnak zon a si caah ENC nakin UNFC zuanhnawh cu an ngamh deuh peng lai tihi a fiang. Kan dernak zawn in zuanhnawh cu teinak lam a fawi timi cu Cozah pawlasi a si. Tei zong a kan tei taktak i kum 60 a kan uk kho. Kan nih kan tthawnnak zawn politik in rak kan zuanhnawh sehlaw cu kan rak tei ve diam cang hnga i kum 50 chung democracy kan rak hmang ve cang men lai. Cucaah Ralkap ting 5 deng a ngeimi Cozah nih ralkap thong 30 hrong a ngeimi UNFC kha a tih tuk caah a chonhmi a si lo. ENC kha zei a rel lo caah chonh loin a hrialmi zong a si lo. Cozah pawlasi le sining dirhmun ruangah UNFC an chonh deuhmi a si. 

 Hriamtlai phu hrawh hi Cozah pawlasi a si

Thein Sein Cozah nih Tlangmi buainak daihter an duh i  political solution kawlpi a kan duh ruangah UNFC an chonhmi a si lo. UNFC an chonhnak cu hriamtlai phu vialte a nemnak in hrawh dih an duh caah a si. Khat lei in chim ahcun political issue si loin military issues hi phisin hau in an ruah caah UNFC an chonh. Cucaah Thein Sein roadmap hrimah

1.Hriamtlai hrawh dih in Party dirhter.

 2.Thimnak luhter in Palimen chungin Phunghram an remh duh cun remhter

3.Tatmadaw pakhat long um 'one arm force' pawlasi, cu an tlaihtung 'pre-condition' ah an ser hmasa i politik chung taktak an luh hlanah cucu pawmter hmasa hna an i zuam. Hi conditions hi UNFC nih an pawm duh locun politik chung taktak an luhpi duh te hna hnga maw tihi chim a har ngai lio a si.

 Hitin hraimtlai phu hrawhnak lam an ser hi a ruang tampi a um lai nain pakhatnak cu: zabu 21 tiangah tupung nih thawhhnawh pengmi ram si peng cu democracy Cozah kan si ve cang caah zoh a chia tuk. Pahnihnak cu: 2013 ah Asian Games don ding kan si, 2014 ah Asian Chairman a tlai rih ding kan si, Russia le USA President tiang a ra ding an si caah mikhual hmai ah innchung khar kar ah thisen i luanh in i nawn peng cu mualpho a si.

 Pathumnak cu: nitlak ram nih sipuazi dantatnak hri an phoih duhnak caah cun hriamtlai pawl he kahdaihnak tuah a hau cang.

 Palinak cu: Phunghram kan ngei cang ko i dirhmun a fek tuk ko cang caah zeimaw 'mah ten i tawlrelnak' cu tlawmpal kan cheuh bang ko hna zongah a pawinak a um ti lo.

Panganak cu: 2008 Phunghram ah Tatmadaw pakhat long a um lai ti a si caah phung he an i kalh cang tung i ramri cawng BGF thlen an duh fawn lo tikah a kah in kahnak chacun a chonh in chonh in nem tein hrawhnak lam dap hi a tha deuh, tiah an ruah caah hriamtlai phu an chonh deuh hi a si men lai.

 UNFC phukomh cun an i lungrual lai i det an har lai tiah pikpak in a tthek hna hnuah a dang cio in an chonh hna i hriam chiahter pawlasi pawmter hmasa a timh. Cu tin an pawm duhnak caah 'special economic zone' timi upadii thar an ser hmasa i cu pawlasi chungah poision a pin ngaimi 'development' timi sivai an thlak. Cu sivai cun politik kan duhnak ci duhsah in kan thah hna lai i rumnak he huham he company he phaisa a tomtom in kan cheh chih hna ahcun cangvat lak ramtang va kir than cu an duh nemmam ti lai lo, an lung an tthumh ruangmang te ko lai, tiah an ruah. Cucaah political solution kawl duh le Tlangmi kan halmi pek duh ruangah si lem loin hriamtlai phu hrawh duh hrimhrim ruangah tutan a kan chonh hi a si tiah ka ruah. 

ENC Pawlasi  in chonhnak a kal lio a si

Thein Sein nih kan i chon lai tiah 'official offer' a thanh hnuah UNFC le ENC meeting an thu colh i zeitin kan kalpi lai tiah an ceihti. ENC nih cun 'State cio in i chonh hmasa zong a tha ko', tiah an ruah. UNFC chung zongah phu tampi an hna a tla. Mahbelte, UNFC chungah lunghak deuh phu an um ve len caah 'UNFC bukomh hrimhrim in kan i chon lai, ramkulh cip in pikpak chonh kan duh lo' timi an dirpi. Cucaah ENC ruahnak in bia a rak tla kho lo. Mahbelte, Thein Sein te nih UNFC min in chonh an duh lo.

Than Swe chan zong ah a buukomh cun chonh an duh bal lo. Cucaah UNFC bukomh in chonh ding timi UNFC pawlasi cu  a kal kho ti lo. Cucaah UNFC Chairman nih ca a chuah zok i 'pikpak ramkulh cio in rak chon cio ko cang hna uh law politik tucu UNFC min in awkhat in kan chim lai' tiah ca a kuat cio hna. Cucaah State level talk cu an tuah cio colh i tuchun dirhmun kan phanh cionak a si. Taktak ahcun ENC nih a rak dirpi ning thiamthiam khan a donghnak ahcun an hun tla than ko i tulio UNFC roadmap thar zong ENC roadmap hlun le ENC pawlasi thiamthiam kha a si ko hna in a lang. 

Political Talk ahcun Tlangmi awkhat in a kal ko lai

 Tutiang ahcun UNFC buukomh in chonhnak zong an kalpi taktak bal rih lo. Pikpak in phukhat cio in an i chonh lio a si. Cucaah UNFC an chonh, ENC an chon lo, ti khawh ngai zong khi a si rih lo. Tulio ah Thein Sein roadmap le UNFC roadmap hi 'compromise' har dawh ngaiin an um lio te a si. KIO nih a dirpi mi roadmap le UNFC he an i khat hoi lo. Cucaah hi zawn hi bia an tlakti dih kho sual hna lo a si ahcun UNFC min zong in chonhnak kalpi a har ngai te kho men. Mahbelte, hihi bia thaten an tlakti kho ko a si ahcun politik chung taktak ah a pil kho ding dirhmun an phan lai. Cu tin a si ahcun UNFC zongin an kal kho te men lai. Tlangmi politik chung taktak kan luh ahcun UNFC long nih ai a awh thlu kho lai lo. Tlangmi phu tampi (ENC+ UNLD+ UNA+ Brotherhood Forum) zong an i paih ve len a hau te lai. Tlangmi awkhat in kal dingah kan pa le nih an i timtuah ko lai tihi cu a fiang. 

            Taktak ahcun UNFC long a kal zongah ai phorh ding pawlasi cu ENC le Tlangmi vialte nih ronhmi bia thiam kha a si ko lai. ENC min in a kal zongah UNFC ai phorhmi bia thiamthiam kha an chim ve ko lai. Ho phu dah palai ah a kal i ho te pawl dah an kal ti kha a biapi lo. Thil biapimi cu hodah Tlangmi zapi ruahnak tha ten a tlakpi i fek tein a dirpi kho i a chim kho, timi kha a biapibik. Cu ve bang, CNF zong Union Level talk chung an luh thuk deuhdeuh i Politik muru an khel taktak tikah cun CNF a tuan pengmi long nih a zat ve te lo kho men.  Thein Sein Cozah zongnih cabuai hnu leiin mifim mi thiam tampi a hman hna bang Chin miphun chungin a chim kho ding kan mifim le kan mithiam tampi hna kha a herh ningin an hman ve te zong a hau ve te men lai. Cucaah tulio a kal cuahmah mi remdaihnak kong ahhin UNFC lengah ENC le Tlangmi kan zaapi a huap ko timi lungput ngeih kho tu hi a biapibik rua in a lang. 

Kawlram thongtla pawl an chuahthan hna

January ,2012 Cacawn ningani ah Kawlram zumhnak ruang I thongtla pawl minung 651 cu an chuah hna tiah mizzima thawngla nih an tial.

Cu chungah cun 88 Sianghngakchia hruaitu Ko Naing zong aa tel ve. Cun Shian mipi Democracy party hruaitu U Khun Htun Oo zong Tawng- Ngu thonginn in an chuah mi ah ai tel ve.

Cun Kalay thonginn in an chuah mi hna pawl cu, U Sai Lun, Ko Myo Aung Naing, U Tin Yin, U Kyaw Aung, U Kyaw Kyaw, Ko Soe Yazaphyu, Ko Phyu, Ko Min Min Thun, Ko Nai Lin, Ko The Aung le Ko Ne Lin Aung hna an si. Zing Suimilam 11:00am in Kalay Vanlawng in an umnak hmun lei ah an tlun pi hna.

 Cun a hleice in Thoh-Hlan-Zii a rak tlaimi hna le Kawlram uktu bawi General a rak tuan mi U Khin Ngunt zong an chuah ve. Khin Ngunt cu kum 73 a si I a tar ngai cang. Thonginn in a chuah bakah a chimmi cu a tu uktu pawl le Daw Aung San Suh Kyi I an riantuan ning a tha ko tiah mipi sinah a chim. Cun kei tu cu ramkhel rian tuannak ahcun kai tel ti lai lo a ti. A cheukhat nih cun an chuah mi hna hi ramkhel rian ruangah thongtla mi an si dih taktak hnga maw a timi zong an um ve. Asinain zei a si paoh, thongtla hi vialte an chuah mi hna cungah lunglomh tuk awk a si ko. Mizzima 13,1,2012

Kahnak A karh Ruangah Kachin minung 4000 tluk Loije in China lei ah An Zam     

Kachin News Group nih Loije Myo I a ummi Kachin mipi pawl cu Kawl ralkap le Kachin ralkap an I kah ning a fah ruangah China ram leiah an zam tiah an chim. I kahnak cu zaanlei suimilam 3:00pm tluk hrawngin aa awt I Kawl ralkap 200 renglo cu Loije khua ah an lut tiah mit in a hmu tu nih an ti. Kawl ralkap nih thah ding an phan caah an zam mi a si tiah an ti.

Hriam A Tlai Lomi Nu Pahnih  Cu Cozah Ralkap Nih An Thah Hna

Hriamnam zeihmanh a tlai lomi Kachin nu pahnih cu Kawl Ralkap nih, Kachin State Phakanh khua kam ah an kah hna. Mit in a hmutu hna chim ningah, Lawngawi Ying Wang kum (17) , Gawlu Sang kum (20) hna cu Nam Ya khua I market kai an kal lio ah an hna tiah an chim. Kachin News

Minung 100 Nih An Lungkhur An Zamtak

Phakanh khua pawng hrawng I lungkhur ah rian a tuan mi, minung 100 nih an riantuannak lungkhur in an zam tiah tiah Kachin News nih a tial. A ruang cu an riantuannak hrawng hi Kachin le Kawl Cozah an I kah a fah chin lengmang caah a si. Kachin News

Laimi Nih Kan Neihchun Wrestler Tial Thang Kong Tlawmpal

 Val Tial Thang cu Cyracuse City I a ummi  a si. Amah hi Cyracuse City School hna I Wrestling team ah chungtel pakhat a si ve.

A mah hi Hakha khua I Pu Tawk Cem Le Pi Mang Si hna I an fapa a si. June 2007 ah khan Malaysia in USA .Syracuse khua ah an phan. Cu tic un  New York I English holh a cawn lio ah , Tial Thang  nihhin Wrestling lentecelhnak nak hi  a hmuh. Cu lio ah cun H.W.Smith Sianginn ah tang 7 a cawn lio a si I, cu ka hmun in a rak I awtnak a si.

 A rak luh ka ahhin Junior Junior Varsity team pawl hi a rak phomh dih hna tiah Syracuse City I an Wrestler lutlai pa nih a chim. Cu le cangka in tang 9 ah an kai ter.

A tu ahcun a mah hi pound 152 a si I teinak zong tampi a hmu mi a si. Section III Championship ah teinak a hmuh ahcun State tournament ah ai vua ding a si. A mi thuat dan hi an uar ngaingai. Kan Lai paih le a dang phunphun cawh dawh a si I, a mah he aithua mi pawl nih a ralrin zia an thiam lo an ti. An hruaitu pa nih lung bantukin a hak mi ti tiangin a ti. A tu an I thuatnak zongah teinak a hmuh khawh nakhnga thlacamnak in rak bawm cio hna u sih.