THLANGLEI LAIRAM HMAWNG THIAMTU HNA

Biahram domhnak

“Hmawng thiamtu hna” ti tikah kan Pa le hna chan lawngah si loin atu zongah Thlanglei Laitlang hmun zeimaw ahcun Tuupi a chah ngaingai rih i Ramthar Rian a tuanmi hna nih Hmawng an thiam rih caah a si. Hmuh khawhmi Hmawng-Tupi nakin hmuh khawh lomi Tupi-Hmawng a chah deuhnak hmun a um len rih. Khuahrum-Siasal biaknak thlarau nih a zelh rih hna. Zei  biaknak dah nan biak kan ti tik hna ah Nat-Buddah an ti. A phung men in Buddhist kan si an ti i an tuahmi taktak cu a hlan Khuamhrum  an biak ningte khan a si.

Hmawng thiam cu a har hringhran ko. Thingkung a lian tuk i a hau a har tuk. Ni hlawh tampi pek a hau, asinain a hnu ahcun Vawlei thatnak a si caah Fangvoi, Aalu, Fang, Mai/Zil, Makphek, Antam tbt pawl kan cin tikah a vah a har bang a hnu ahcun Vawlei a that caah Theitlai tampi a chuak. Mission Hmawng thiam tikah a thawkka ahcun kan ba tuk ko. Asinain a hnu ah a Theipar a hung langh tikah cun kan thabat vialte kha kan philh dih i lunglawmhnak in kan khat than. Jesuh nih a tuhtu le a Zuntu kha  Hmunkhatte ah an i Lawm tti lai a timi hi a hman taktak. (John 4:36).

Laimi hna nih Laimi kan unau hna sin ah Jesuh Thawngtha bia kan chim hi 1944 kum in a si i a hmun cu Matu ram Nganleng khua ah a rak si. Hmawng thiamtu kan pa cu Rev. That Dun a si i amah hi Thantlang peng, Tluangram khua mi a si. Thlanglei Laitlang-Matu ram ah Pathian Thawng- tha a chim hmasa bik tu a si. Rev. That Dun Golden Jubilee –Makazin ah Rev. Dr. David Van Bik nih hi tin a rak tial.” Laimi Krihfa nih Laimi sinah a hmasa bik an thlahmi Laimi Saingbawi Krihfa sal  Rev. That Dun ka ruah paoh ah Mihme ka si kha a ka hngalhter zungzal. Pa raltha sin ahcun pa ralchia zong hi kan ral a rak tha ngam ve ko”. Rev. That Dun hi Matu Khrihfa hrinsor hna nih kan PA an ti. (Patam That Dun an ti, Matu nih Paham an ti mi asullam cu kan Pa bk tinak a si).

Thantlang peng -Vuangtu, Tluangram,Belhar khua hna hi a hlan ah HBA, a tu ah TABC le ZPBA, ram ah a ummi hna an si. Tipi kam ah an um hna i Mizoram –ramri pawngah a ummi khua an si. Khua kildeng an si ko. A hlan HBA ram ah Khrihfa a si hmasa mi khua zong an si fawn lo. Zeiruang ah dah Pathian nih hi khuate pa 3 hi Thlanglei Laitlang kan unau hna sin ah Thawngthabia phuan dingah a fial hna hnga?. Ka lungchung ah a um pengmi cu Profet Mikah 5:2 ah Bethlehem Efrath nangmah cu Judah ramchung ah a hme bik khua hna lakah naa tel ve nain nangmah chungin Israel uktu a chuak lai a timi hi a si. Thantlangpeng a kildeng ah a ummi hi khuate hna hin Jesuh Khamhnak thawngtha Thlanglei kan unau hna sin ah aa phuang. Pathian Saltha hna That Dun, Caih Kio, Lung Tum hna. An Nunnak pek in Ramthar rian an tuan, anmah cu an um ti lo asinain an Riantuanmi theipar nihin ah a lang cang. Hmawng an thiammi ah Theipar an par cang. Asinain Hmawng tampi a taang rih. Kan nih LCC zong cu ka hmun ah Pathian nih riantuan ding ah Kutka kaupi in a kan onpiak caah Bawipa min ka thangthat ngaingai.

Thlanglei Lairam, Hmawng Thiamtu Hmasa Bik Kan Pale Hna

Khuaruahar Pakhat a simi cu Matu, Mindat, Kanpetlet ram Hmawng thiamtu hna hi kan mah Laimi bak kan rak si hmasa hna. A kalmi hi Mirum, Mithiam, Bible Sianginn sang ah Degree a hmumi an si lo. Mi sawsawhte bak an si hna (Ordinary man an Extra Ordinary life) an nunnak ah a si khawh chung in an i zuam i Pathian  thawngtha an chim. Zaanghlei an cawimi cu an nun lio nakin an thih hnu ah a THEIPAR an hung lang. An riantuannak kan zoh tikah a can ahcun Rawl loin an um, Khuachung ah luh an sianh hna lo i Khua hauka ah an riak. A can ah an tlaih hna i thong an thlak hna. Meithal in an kah hna i a puak lo tbt a phunphun harnak  an tong. Thlanglei Lairam ah Mission riantuannak kan zoh tikah kan pale hnu ah ZBC- CCOC a hung si, 1983 in thawk a si. Atu ahcun Partnership in Mission (Kutsih bu in a bu in Hmunkhat ah Ramthar riantuantti nakin Ramthar riantuan a si. Hmawng thiamtu hmasa kan pale hna kong tlawmte in kan zoh lai.

Rev. Paham That Dun 

  1906, September 7 ni ah Pu Do Tum le Pi Doi Par nih Thantlang peng Tluangram khua ah an rak hrinmi a si. India ram Asam District Serkawn khua ah tang 4 tiang a kai. Amah phaisate in Mizo Khrihfa Hla Cauk aa cawk, i an khua ah Mino pawl hla a chimh hna. A no liote in Pathian a duh tukmi a si. 1924 kum ah Khrihfa ah a lut i December 25, 1933 ni ah Rev. Leng Kham nih Tipilnak a pek. 1944 kum ah Matu ram ah a kal i  Ngaleng khua ah a um. Johson Siangbawipa nih a rak tuahmi Baibal Sianginn ah kum 3 a rak kaimi a si (1948 kum). Matu ram ah kal a duhnak aa thawhnak cu Matu ram ah Cawng Saya rian a tuanmi hna;  Saya Lian Kar (Surkhua)  Saya Sa Khawng (Aibur) hna nih Matu ram ah Thawngtha chim a herh tuk tiah HBA civuipi ah an chimmi nih a lung a suh tuk caah a si. Hi kan pale pahnih Siang Saya hna hi Thlanglei Laitlang a daw taktaktu an si. Amah hnu ah Hla a thiam ngaingaimi Rev. Pa Hrek (Thantlangpeng Thlualam khua mi) nih a rak zulh i Matu ram Changpiang khua ah a um. An unau in Pathian rian an tuan. Kum zeimaw a rauh hnu ah a theipar an hung lang, Zumtu thar an hmuh tik hna ah an pahnih in a Mitthli a tla (Ps 126:5).

Voi khat cu Dairam ah Mi an i thah ruangah Palik Tawkawt nih nangmah cu Japan  Mi Cekhlattu na si  ve lai a ti i a tlaih i Hakha khua ah a thil a phurhter i a kalpi. Lampi a kal lio ah Tawkawt nih Meithal in kah a zalh. Baibal cauk aa chuah i ka kap ko na ngamh ahcun a ti. Tawkawt Meithal a puak kho lo. Zotungram lungngo in Lotaw khua an phan.  Cu khua ah Captain Carson  a rak um lio a si i a hmuh tikah fak pi in Tawkawt cu a sik. Hi pa hi Missionary Pathian phungchim a si a ti. Tawkawt nih Matupi ah a kirpi than. (Hi kong ah Captain Carson nih Japan ral pawl an um rih caah tih a nung, na khua ah kir ko a ti a duh lo i a umnak khua Ngaleng ah a kir than) a hnu ah Taw Kawt  cu Khrihfa a si i ngaihthiamnak  a hal. Hi pa hi Fa a ngei kho lomi a si. Rev. That Dun nih thla a campiak i Fa a ngei. Rev.That Dun a thih lio a ruak cung ah Pu Taw Kawt nihcun a cunglei bia hna hi a chim i a tang aa cum i fakpi in a tap.                                                                                                                                           

Voikhat cu Zotung ram ah Phungchim ah aa thawh. Khua a phak tikah na rak i kenmite Thawngtha na timi Pathian kong hi na chim khawhnak caah kan i Pai lai i na kan tei ahcun na chim lai, kan in tei ahcun na chim kho lai lo an ti. Fakpi in Thla a cam i an i Pai hna. An zapite in a tei dih hna caah Pathian kong chimnak nawl a hmuh. A hnu ah Khrihfa ah an cang hna. Thih tiang Matu ram ah Pathian rian a tuan i Matupi khua ah an vui, amah Philhlonak ah Baptist Biakinn lianpi an sak, nihin ah a thlan zoh khawh a si.Taksa in a thi. Asinain a Kut, Keneh dawh hna cu nihin ah a  nung i bia an chim.

Rev. Caih Kio :   Amah hi Thantlang peng, Belhar khua mi a si. 1920 kum ah Belhar khua mi Pu Tin Kio le Pi Sal Par hna nih an rak hrinmi a si. 1942 kum ah Tikir khua Primary Sianginn in Tang 4 a awng. Kum 15 a si ah Rev. Leng Kham (Thau Pastor) nih Tipilnak a pek. 1952 kum November thla ah Mindat peng Cawnnam khua ah Pathian riantuan dingin a phan. ZBC nih 1962 kum, Khuasak khua ah Ordination an pek.1965 kum ah Kanpetlet khua a phan. Kanpetlet a phanhnak kong ah theihtlei pakhat te a um. Hi lio caan ah Kanpetlet khua i Sibawi cu Dr. Khai Ming a si. A kuttang riantuan dingah Hakha khuami Midwife Tin Pen  Cozah nih a hun chiah. Sayamah Tin Pen cu Pathian a duh ngai ngaimi a si, Siangbawinu Elizabath kuttang ah a thangmi a si. Amah hi Hakha miphun ah Midwife a hma sa bik  a si. Sayamah nih Zarhpini caan paoh ah Chang a reu i a rak eimi hna  kha Jesuh kong a chimh hna. An duh ngaingai. Siizung ah rian a tuanmi (Ward-Servant) U Aung Thein le Matu mi Mah Ling Nuai hna hi a duh khunmi an si. Hi lio can ah ZBC ah General Secretary a tuanmi cu Rev. Con Bil a si. Con Bil le Tin Pen hi cacawng timi hawikom tha ngaingai an rak si i Sayamah nih ZBC-GS sin ah Pumpakte in ca a tial. Kanpetlet ram ah Missionary kan herh tuk..a ran nakin kan thlahpiak uh a ti. A hawipa  Rev. Con Bil zong a lung a suk tuk ve i Mindat ah Pastor rian a tuan liomi Rev. Caih Kio  kha  Kanpetlet kal dingin thawng a thanh . Rev. Caih Kio cu kanpetlet kal dingah Mindat in aa thawh i, 1965 kum April ni 30 ni ah Kanpetlet khua a phan. Sayamah Tin Pen le a hawi le nih an rak don hna. Rev. Caih Kio nih a hmasa bik aa zuammi rian cu Pathian Biaknak Inn sak le hmun khuar a si. Pe 18/14 a kaumi Canphio a cungcihmi Thinginn- in Biakinn thiang cu a sak i May 19, 1968 kum ah Pathian sin apnak an tuah, a hmsa bik Kanpetlet Baptist Church a si. Pathian nih Zumtu hmasa bik a min ah Pu Nai Tam(Ohphu khua mi) 1965 kum dongh lei ah a pek i cu kum ah Tipilnak a pek. Pu Nai Tam hi Ohphu Ramuk bawi a si. Sia, Caw, Meheh tampi a ngeimi a si. Amah Khrihfa a can caah Kanpetlet khua tangte ah a ummi Ohphu khua cu Khrihfa khua ah an cang dih i Rev. Caih Kio riantuannak ah a bawm biktu khua an si. Rev. Caih Kio hi anmah Kanpetlet holh(Cho) te in Thla a cam kho i Phungzong a chim khawh. An nu nih a rian tampi a bomh khawh. An pahnihte in Hla an satti tawn. Phungchim aa thawh tikah a can ah cun an khuachung ah a lut kho lo i an Hauka ah a riak tawn. Voi khat cu Kanpetlet Biakinn kulhchung ah thing an haumi a nge nih Ngakchiapate a nenh sual i a thi. Hi caan ah Rev. Caih Kio cu a um lo..a thimi i a pa nih Lehrul kan in cham hna lai a t ii Rev. Caih Kio nih phaisa Ks. 250 a pek hnu ah an kir than. Rev. Caih Kio hi Pa raltha ngaingai a si. Mindat peng Hlatui khua a um lio ah Nu hna nih an hmai ah an i tialhmi Mawcik kha fakpi in a doh. Pathian nih a sermi hmai no hi bantuk in hrawh phung a si lo a ti hi a hnu ah a doh khawh, Khrihfabu chung ah (Hi kong ah Dr. Cope nih a rak tialmi cu Kawl Siangpahrang nih an Fanule kha Nupi caah a fir tawnhna i an fanule khamhnak caah Hmaitial (Mawcik) hi an tuah a ti (a hnu ah an Nunphung ah a cang). Hi Hmaitialnak kong ah Rev. Caih Kio nih a chim ningah cun Nu Kum 12/13 hna hi Lo ah an kalpi hna i Pherzual in an zual hna i an hngawng tiang. Cu hnu ah Hriphi Hlingzum in an hmai ah an chunh hna i cu a thi a chuakmi an hmai ah cun Ngahlu ti mi Ramhnah, Leibel in an chumhmi a hang (A nak dih, Mawcik hang kan ti lai) in an hmai ah an thuh hna. A hnu ah an hmai hma cu a por i a phing dih. Cun a dam tikah anak mite te an chunhnak hna hmape ah a tang .Cu ticun an i tuah ning a si a ti. A fah tuk caah Pherzual in an zualnak hna a si. A cheu nu ngakchia tete cu an hma ruangah a thimi hna an um a ti. Khrihfa a si hnutu ah cun Pathian sermi aa dawhmi Muisam hrawh lo dingin cawnpiak an si i an mak.(Hi kong ah an Tar nu pawl lungput ah. A Hmai ai tialh lomi cu Pa a kawlmi Hlawhhlang nu tinak a si ti a si). Catialtu zong hi Mindat a um lio ah a hmuhmi hna a si. Cozah nih nan fanule an hmai nan tialh hna ahcun Ks 70 dan kan in tat hna lai ti a si.An fanule cu Kuli an phorhter hna i Ks.70 an hlawh hnu ah an i tialh than. (Pathian Dawtnak thawng in atu ah cun Khrihfa chung lawng si loin an zapite in an maak dih cang. Chantiluan nih a kaltak ve cang). Rev. Caih Kio nih hi thil fakpi in a rak doh caah a umnak Inn hi zan ah Lung in an cheh lengmang. Pathian nih thi lo in a khamh hna. Rev. Caih Kio hi a nunnak Kanpetlet caah a petu a si. KTBA( Kanpetlet Township of Baptist Association) nih Silver Jubilee Kum 1990 kum March 23-25 ni ah an tuahpiak i KTBA nih kan Pa le Kan Nu an timi hna Rev. Caih Kio le Sayamah Tin Pen zong an i tel kho ve. ZBC nih Penson tha tein an pek hnu ah Kanpetlet Baptist Church ah Bawipa Zanriah a pek peng hna hnu ah  December 10, 1997 ah Pathian sinah aa din. A Ruak cu KBC Compound ah an vui i atu ah a thlan zoh khawh a si. “Amah cu a thi. Asinain a Zumhnak cu a nung”. Kanpetlet Baptist Church ah Rev Caih Kio hnu ah Pastor a tuanmi hna cu  Caih Kio -1965-74, Bawi Kung-1974, Yaw Law-1974-76, Za Hmung-1976-77, Hrang Cin -1977 -82, Saw Aye Aung-1982-83, Zaw Bah Kim- 1983-85, Bawi Lian Thawng- 1985-88, S/M Nem Khaw Cing- 1984-87, Richard- 1990-91, Thang Naing 1991, Luan Thang, Ma Na Hleh,Ma Na Kui, S/M Sui Cin Tial hna an si. An tam an ti i an daw ti lo. A hnu ah Mizoram ah Hlawhfa rian tuan dingin a kal. A Hmasa nih November 1, 1920 kum ah an hrinmi a si. 1936 kum ah Rev. Sang Ling nih Tipil a pek. A chungle nih an Inn ah Thlacam an sianh lo. Kan Khothlaban nih a duh lo an ti i muilai paoh ah hauleng ah aRev. Timothy Lung Tum    Thantlang peng Vuangtu khua ah  Pu Thawng Hmung le Pi Hrang Zing hna kal  i  thla a cam tawn. A hnu ah Khuabawi tlangpi nih Lung Tum Khrihfa a si caah kan khua chung ah mithi an tam an t ii an dawi ti lo.  A hnu ah Mizoram ah hlawhfa tuan ding in a kal.

Ahmas ah Lunglei khua ah Midum hau thlawhpiak bu in a um, a hnu ah Aizawl a phan i Lusei holh a cawng. Cun Zan can ah World Mission nih an tuahmi Bible a kai i “ Hriatreng na” timi Certificate an pek.1941 kum ah an khua Vuangtu ah a rak kir than i Mino pawl hla a chimh hna, Pathianbia a chimh hna. 1945 kum ah Ralkap ah a tla. Hi lio caan ah a leng in Ca a cawng. Tang 7 a awng i Ralkap in aa din i Insein Kawl Bible Sianginn ah Pathian riantuan dingin a kai. Cu lio caan an Principal cu Dr. Bah Han a rak si.  Aa lim in Pathian riantuan aa thawk.

1952 kum ah BBC(a tu MBC Myanmar Baptist Convention) General Secretary Rev. Soward nih Chin Hill Baptist Association hi min nan ngeih a hau hrimhrim cang..Minung i thim u law caih u law nan min rak ka pe uh tiah a ti hna. Falam khua ah MIN caah a hmasa bik Meeting an tuah. Rev. Hau Go nih a hruai hna. Minung 30 an si i Tlangval Lung Tum zong aa tel ve. Meeting an thawk i Lung Tum nih kan min ah cun Chin Baptist Convention kan ti lai. International a si a ti. Hau Go nih a duh lo pin ah, Hakha kan pa le zong nih an dirpi lo pinah an sik. Lungte Lungte, khawika hmun paoh ah hin Vaipuan dirpi i timhlah an ti. A pale nih Hau Go nih a timi cu Hakha kan pale pawl ziah! nan Laica cawnmi ah pei Zolo ka thlo rih lo nan ti kha. Zo cu a sannak, a zonak , tlangcung tinak a si ko tung a ti hna i Zomi timi nih Chin cu mee 29 in a rak tei i Tlangval Lung Tum cu a rak sung. Lung Tum nih a ti vemi cu hi hnu kum zakhat hlan ah cun CHIN a si te ko lai a ti. A tu ah a tling cang i ZBC kha CBC a si cang (April, 2013 ri in). Lung Tum hi Pa duh lo, Pa raltha a si caah Pathian nih a dang Missionary hna nakin a hman deuh ngaingai. 1953 kum December ni 5 ni ah Mindat a phan. Mindat peng ah 1945 kum ah U Ngun Uk, 1947 kum ah U Khoh Thung, 1952 kum ah Caih Kio, 1954  kum ah Kai Duai le Taw Uk hna nih Jesuh Thawngtha an rak chim .     

                                

Mindat  Biakinn hmun  caah Kanpetlet Sipin bawi U On sin ah voi 4 khengte a kal hnawh i U On nih Biaknak Vawlei garam bak in Ekah pa 3 a rak pek.  Mindat khua nih Electric Engin an hmuh i Zipeng Ning Ling nih hi Biakinn hmun hi khua lai a si, Electric seh pi hi kan chiah lai a ti. Lung Tum nih a si lo Bawipa Cozah nih cun Vawlei cu khoika paoh ah nan hmuh khawh ko a dang ah hi kan Biakinn hmun hi cu kan sianglo a ti. Asinain  NingLing nih a duh lo peng. Asinain a donghnak ah Vawlei hmun, Cozah nih Biaknak garam bak in a hmuhmi kha a piah i a chut kho thai lo. Nihin ni tiang, Mindat Baptist Church le MTBA(Association) nih cu hmun cu an hman...Biakinn sak a thawkpi hna i ZBC nih Ks 3000/- an bomh hna i amah nih Ks 3000/- an kawl i an sak. A cung Canphio, Thing inn in an sak. A min ah Immanuel Baptist Church  tiah a sak, Vok thau sum 6 le Arpi pa 5 in Biakinn luhnak cu 1957 kum December thla ah an tuah. Hi lio ah Upa dirkamhtu hna cu...Maj. Ha Sein, U That Nuai, Pu Thang Mang, le Pu Gin Za Cin hna an si.(atu ah cun MBC-Mindat Baptist Church tiah a min an thlen i Tlakrawh in an sak, AD Kum 2012 kum ah Onnak an tuah). ZBC nih April 7, 1957 kum, Pu Cong Kam Jubilee- Bual khua ah Ordination an pek.

1961-62 kum ah Mindat in Meng 40 tluk aa hlatnak “RO” khua ah Missionary Sianginn a tuahpi hna. Hi lio caan ah dirkamtu Upa hna cu Zipeng Za Hu, Dr. Khup Za Pum , Maj Ha Sein le U Ro Ngai hna an si. U Vom Tu Maung sin ah Vomtu khua ah nawl atu le atu a va hal. U Vom Tu Maung nih a chim mi cu Laica Sianginn a herh lo, Kawlca kan cawng i a za ko, a ti. Asinain Lung Tum nih Laimi kan si caah kan holh (Cho) kan thiam lo ahcun Kawlholh nih a kan dolh lai ti in a chim lengmang ve i a hnu bik ah Politic aa tel loin va tuah uh tiah nawl a rak pek i Mindat/Kanpetlet ram ah a hmasa bik Missionary sianginn a rak dirhpi hna.

Ro khua ah Thawngtha a hmasa bik a rak chim lio ah Khuabawi nih a rak tlaih i Ni(3) chung Bangla ah hri in an hren, Rawl lo le Ti lo in an chiah . Ro khua a phanh caan hi zanlei  nitlak lai ah a si . Khuabawipa inn a hei fuh i cu lio ah Khuabawipa le a hawi le cu Zu an rak ding (Zupu) an hal i aho dah na si. Khrihfa Phungchim ka si a ti. Kan in zum lo. Cekhlattu na si ko lai an ti i a zal an dah tikah Mirang Bible hmete an hmuh. An zum ti lo i Bangla ah hri in an hren, nithum chung. Amah Lung Tum nih a ka chimhningte in Nearer My God to Thee timi hla khi ka sak i a dongh tiang ka sa kho lo i ka rawl a tam tuk caah ka tha a dong a ti. Cu ni te ahcun Ngakchia pa nih Lai Kawlhra  pahnih khi a vun i put i ka pawngah a ka ei hnawh a ti. Ka Banian kaa phoih i na Kawlhra kha kan thlen lai ka ti i Lunglawmte in a ka thlen i cu Kawlhra cu ka ei i ka nung tha a ti. Khuabawipa nih Mindat ah Report nak ca a tial i Palik an ra. Cu Palik a hruaitu hna Semthum pa hi. Mindat Immanuel Baptist Church Member a si. A hmuh tikah a lau a thin a hung tuk i Hipa hi Pathian Riantuantu a si. Hi bantuk inn an tuahmi hi a Pathian nih a thin a hun ahcun dan an tat hna lai. Ka Pastor a si. Zokzok in thlah u law Ngaihthiamnak tuah uh.Vok that uh a ti hna i Ngaihthiamnaktu an tuah. Ro khua ah a cam i Thawngthabia a chimh hna i U Om Ngai le a chungkhar nih Pathian an zumh. Aa lawm tuk i U Om Ngai cu Ro Ngai tiah a min a thlen. Mindat peng caah Abraham bantuk na si lai tiah a ti. A Hmasa bik Pathian nih a pekmi theipar a si.         

                                                                                                                              

T. Lung Tum hi Vision tampi a ngeimi a si.Thlanglei Lairam riantuan nakah anmah leimi kan herh ti hi fiangte in a hmuh caah Thlarau fapa pahnih Hlatui khua mi a lak hna. Hrung Hrawi le Cu Reng hna an si. Hrung Hrawi cu Bawi Kung tiah a min a thlen (Jesuh cu Bawi vialte lakah Bawikung bik a sinak aa chalmi a si). Cu Reng cu Za Hmun( Hmung) tiah a thlen (a sawm le a za ah a hmun dingmi tinak a si a ti). Hi hna pahnih hi Chaklei Laitlang a kir lio ah aa tlunpi hna i Za Hmung hi ZTC Falam ah Bible a kai ter i, Bawi Kung hi Insein Kawl Bible Sianginn ah a kai ter. A fapale pa hnih nih an pa rian an hun chawn khawh ve i Ordain an hmu veve, Penson an lak hnu hmanh ah an hman thiam thiam hna..Rev. Bawi Kung hi atu ah Cho Baptist Church min pu in Rangoon ah a um i Korea Mission Project in Doctor an pek ve. Rev. Za Hmung cu Mindatpeng Eye Sakhan ah Missionary rian in Church Pastor MTBA nih penson an pek hnu ah a tuan liomi a si. An Pa nih a thihtak cang hna in an Pa ai awh in Pathian rian an tuan  nihin ah T. Lung Tum hi Pathian rian a tuannak ah a ram a kau ngai ngai. Matu ram..Bungtla Tizor umnak Theicong khua tiang khi a ram a si. Theicong khua ah Mission rian a tuannak kong ah Tikhur a cawhpi hna, Zatlang lam a cawhpi hna. A hmasa ah cun Mi kan thi lai an ti i an duh lo. A hnu ahcun an i lawm tuk. Nihin ah cu khua te cu Khrihfa an cang dih, Bu dang um lo in Baptist bak an si dih hna. February 6-8, 2009 ah Theicong Golden Jubilee an tuah i Lung Tum tu le fa an sawm hna, keimah zong an ka sawm chih ve i ka va kal kho ve. A sunglawi ngaingai, an Pa Lung Tum an philh kho lo. Ahmasa bik Khrihfa a lutmi hna a cheu cu an nung rih. A mah a thi cang na in a Keneh pawl cu Bia an chim peng ko..Hi caan ah Hruaitu bik cu an Pastor Rev. Cang Toi a si.

1961 kum Kawlram Cozah U Nuh nih Kawlram ah Buddhist Biaknak hi Cozah biaknak a si lai tiah thawng a thanhmi kongah a Lung a tling lo tuk i Mindat khua ah Sandah a piahpi hna. Matu pi in Rev. That Dun, Zotung ram in Salay le U Khua Ming, Mindat/Kanpetlet ram ah Pathian rian a tuanmi hna. An zapi ah minung 50 tluk  nih Mindat khuapi chung ah an i chawk i Sandah an piak. Kawlram dihlak ah Buddhist Biaknak a si lai ti kan duh lo tiah a aupi hna. An Baan ah Puansen an i Khih, an Lu ah Puanrang an i khih. A donghnak ah Zipeng zung an phan. Zipeng zungah Phungki pa khat le Rangoon in a rami Sihni pahnih nih bia an hal.  An duhlonak a chim. Thongtlak dingin ready te in a um nain zei hmanh a ti lo.(Hi lio caan ah Falam khuapi zong ah Rev. David Van Bik nih a hau hna i Sandah an rak piah ve). Rev. Lung Tum hi pa duh lo ngai a si. Mindat ram a rat tikah Kir than ding hi aa tim lo.  Voikhat cu Mindat cu Khuapi a si caah Church Pastor caah Bible Degree a hmumi lawng kan duh tiah ZBC ah ca an tial. A Lung a fak tuk i an khua Vuangtu ah a kir than( March 14, 1964 kum ah), a fapale pahnih Bawi Kung le Za Hmung zong aa kalpi hna.  

         

Vuangtu ah caan zeimawzat Pastor a tuanpiak hnu hna ah 1979 kum ah ZBC nih Chindwin Mission field ah Missionary in an thlah. KVBA nih Tanphu le Angteng ah Missionary in an thlah. 1983 kum ah Kalaymyo Township Tanphu khua ah Lai Baptist Church ti min pu in Khrihfabu a thawkpi hna i 1984 kum ah CBA timi Chin Baptist Association ah an lut. February 12, 1993 zan 7:30pm ah Pathian sin ah aa din i CBA nih a Lung an phun.  February 8-10,2013 kum, LBC-Tanphun  Biakinn Luhnak le Silver Jubilee nih Upatnak an pek, an Khua Vuangtu nih Silver Jubilee, Mindat nih  Golden Jubilee an tuah piakmi pa a si...a tlaih bikmi cu..Kawl holh in...” a na khan hmah..a ta san zah” ti hi a si. MBC zong nih Sui Medel an pekmi hna ah aa tel vemi a si(1992 kum ah). Atu ah a fapa Thawng Tum Hmung fapa Val Lal Bik Thang nih a Pu riantuannak MTBA Vanva khua ah Mission rian a tuan, kum 2013 in aa thawk.

Partnership in Mission Riantuannak (MTBA/KTBA/PBA)

Hmawng thiamtu hna kan Pale chan hnu ah ZBC nih Mission Programme lian deuhmi Rev. C Hrang Tin Khum le Rev. J. Cuai Sang nih an kan hruai i tuah a si, a min ah CCOC ti a si. Hi hlan deuhte ah hin Mindat, kanpetlet le Gangaw ah . ZBC le BBC (a tu MBC) hna nih Joint in Action in Mission (JAM) ti in kum 10 chung rian an rak tuan bal. CCOC riantuannak kumthum a hung tlin tikah. Matupi ah Bual Cung, Kanpeltel ah Vung Khan Kham, Paletwah ah Cin Khaw Thawn, Chaklei Lairam, TABC Ram Phaikhua taw ah Ngai Za Siam hna nih an nunnak liam in. Thisen in Mission riantuan a hung si. CCOC cu Pathian nih Thluachuah a pek hringhran. Zumtu thar Tampi Pathian nih hi Programme in a kan pek. CCOC in CMC ah. Atu ahcun CMC kharnak tuah a hung si i ZBC—atu ah CBC nih. CBM(Chin Baptist Mission) min in  Association cio tuanvo a pek i Partnership in Mission riantuannak in Mission riantuan a si. Partnership timi biafang hi Ramthar riantuannak ah hmanmi biafang cu a si lem lo , Business pawl deuh nih hmanmi deuh a si. Mission kan timi zong hi. Biaknak nakin Cozah Ralkapbu pawl nih hmanmi biafang a si deuh. A zei a si hmanhah an sullam hi an tha, Ramthar riantuannak ah kan hman hnami an si ko. Kan theih cang bang in. Mission ti mi biafang hi Latin Missio in a rami a si i a sullam cu THLAH  ti a si ko (Jn 21:20). Partner  timi zong hi Anglo-French holh hlun Parcener in a rami a si ti a si i a sullam cu i hrawmti, Kutsih in riantuanti tinak a si. Atu lio Ecomenical chan ah cun an duh ngaingaimi biafang a si. Bible ah cun Ro Pathian Ro i hrawmti phun khi a si(co-heirship a si lo ah joint heirs) Rom 8:17, Eph 3:6 I Pet 3:7 Pathian nih a kan pek mi Ro mi hrawmh cu a sunglawi tukmi Rian a si. CCOC Mission riantuannak hi a that bang, a bau nak a um vemi cu Khuakhat ah Kumkhat. A siloah Kum 2/3 lawng kan um. Phung kan chim..a dang lei tam kan tuah kho lo. Khrihfa ah an hung cang i an Cut , hlan ah (An feh hlan ah) kan thialtak hna. Cu Khrihfa note cu a hnu ah Rawl petu tha a ngei lo i a thi than. Hi bantuk hi Mindat, kanpetlet le Paletwah ah tampi kan hmuh hna. Atu ah kan fiang ngaingai cang i, Khua pakhat kan i hlumh, i thial ti lo in Holistic Mission in riantuan a si. Partnership in Mission programme in a but e in rian kan tuan tikah hmai ah kan kal kho ngaingai. Thawngtha chim lawng si loin a dangdang riantuannak zong tuahchih a si. Health Ministry, Education Ministry, Development a phunphun in tuah a si. Abiana ah LBC, D.C, USA nih Mungchawng Tivapi ah Hlei donhnak ah Thirhri lian pipi an bomh hna i Khua mi hna he an donh. Hakha Zion Church nih Cohset chawng ah Thirhri hlei an donhpiak hna. Kalaymyo LBC nih Cohtaung khua ah Mini Hydro Electric an tuahpiak hna. Kaanlawng khua ah LBC DC, USA nih Motor Cycle lam an cawhpiak hna, Pingring khua ah Norway nih Motor Cycle lam an cawhpiak hna. Paletwah peng Mihsa Tit ah Boarding School (Norway nih) nih sakpiak le on a si. Macia khua ah JBC-Khampat nih Motor Cycle lam le Telephone an tuahpiak hna, Hmun tampi ah din ti Pipe saumi in lakpiak an si. Ca a cawngmi hna a cheu khat cu Thlahtu hna umnak  Chaklei laitlang ah nu le pa an kawlpiak hna i Ca an Cawnter hna..laiholh an thiam ngaingai hna. Bible Sianginn ah an kaiter hna i an dih hnu ah an khua ah Pathian rian an tuan than hna. Partnership in Mission riantuan hnu ah cun. Khrihfa a silo mi hmanh nih anmah Laikhat ngaingai ah an kan hmuh cang. Thlarau lei ah anmah chungin Bible Cawnpiak khotu hna an um ve cang i Bible Traing crusade le Camp hna tuah a si cang. Kawl le anmah Holh an thiam tikah Pathian Thawngtha chimh an fawi ngaingai ko. Ngaktah bomhnak le zohkhenhnak zong hi MTBA le KTBA le PBA ah tuah a si, KTBA hi a hmasa bik an si i hmai ah an kal kho ngaingai...Norway ram in Kanpetlet ram ah Zion Par ti in Nu Cacawnternak tuah a si. Zohkhenhnak kalnak lam ding ah Rev. Ceu Mang nih a kan suai piak..Mindat ah Esther Par ti in tuah an si hna. Nu (a bik in Nu/Pa a ngei lomi hna) Cacawn ternak le Thanchonak a si i Mi pa 20 Cacawnter an si. Tang 8,9,10 an si hna Mindat Esther par in Tang 10, pa hnih, Kanpetlet ZionPar in Tang 10 pa 3 an awng cang hna.

Partnership In Mission le Nihin Hmawng Thiamtu Hna

Hi Mission rian hi Mindat, Kanpetlet, Paletwah peng hna ah tuanmi a si i atu ah cun, Ram chung in siseh, Ramleng (Laimi) in siseh Kutsih bu in riantuan a si. Mindat peng ah a tlangpi in Khua 186 hrawng an um i Khrihfa tete umnak hi Khua 45 hrawng lawng ah a si. Population hi  48000  an si. Khrihfa hi  5745 an um. Kanpetlet peng ah a tlangpi in Khua 117 an um i Milu dihlak 17000 hrawng an si, Khrihfa hi 4664 an um. Paletwah peng ah a tlangpi in Khua 401 an um i Mulu hi 87276 an si, Khrihfa hi  10000 renglo  an si i Church of England an  tam bik, Baptist hi member 5913 an si.  Nihin ni ah a tlangpi in MTBA, KTBA, PBA ram ah Partnership in Mission rian a tuantu hna cu KTBA Ram ah Kanmah LCC , Delhi le CBC-Delhi, LBC, W.D.C, USA, Aizawl CBC, Malaysia, KL-CCF, Mesidonia Mission, Tluang Za Tler group, Do Khup te, Hakha Zion Baptist Church, CBC ram in, SBC, JBC, CBC le LBC, USA KCBC, TABC-Thantlang, Newzerland in Saw ah, SBA in Saw ah, HBA in Pazitchawng ah tuan a si.

LCC kan Khrihfabu te zong A Langte in Lam tantim ah a um liomi kan si ko nain Thlarau tlaumi a dawtu nan si caah Kan Unau hna sin ah Mission rian nan tuannak cungah Pathian ka thangthat tuk.  LCC  Mission riantuantu dingin  Rev. Chan Hmung cu  June 7, 2006 ah a lang in namhnenhnak an tuah i  2006 in 2007 tiang cu Kalay Valley ah kumkhat chung mission rian cu a rak tuan. March 2007 ah Delhi a rak ra ta i LCC Krihfabu he i ton le hnatlaknak an ngeih bantukin   2008 in 2009 tiang thlanglei laitlang ah mission riantuannak hmuhma a va kawl. Cuticun a takin Cinduai (Chinpung ram Buddhist ram) ram ah kan Missionary cu a innchungkhar he riantuan hram aa thawk  Cu hnu ah Pathian Ram caah Zaanghlei cawi ko usih kan ti i Mission field thar pakhat Apian khua ah tuah a si than i kan Missionary cu Saya Cho Naing Hung a si. September 17, 2009 in tuan hran aa thawk ve i  nihin ni ah Pathian dawtnak in hmai ah kan kal cuahmah ko. Naite ah Cinduai ah Mission Centre Pathian min in sak le On a si cang. Hi rian kong ah a kan hruaitu le a ba biktu cu LCC in kan Mission Secretary Upa Bawi Thiang a si. Amah Pumpak bak in Thlapa thla 3 dengmang a kan umpi. Harnak tampi lak in kan sak i a donghnak ah Pathian sunparnak caah Rev. Bawi Lian Thawng nih May 7, 2013 ni ah onnak le Pathian sin apnak a tuah. Cinduai ah LCC nih kan ngeihmi hna Pathian fale hna cu Minung pa 30 renglo an si ve cang i anmah Chinpung mi pa 2 kan ngei ve hna.   

Apian khua ah zumtu pa 12  kan ngei ve cang, Kum 2013 ah pa 2 tipilnak kan pek hna. Pathian nih atu ah hin Apian khua ah Biakinn saknak hmun a kan pek cang i kum voi chung ah cun Mission Centre te tal in awt kho usih tiah kan saduh thahmi cu a si. Hi khua te kan luh khawhnak ah a kan bawmtu bik cu Missionary tleicia Pa James  a si. Amah hi Hakha khua mi a si i Kalaymyo ah Cozah rian a tuan i LBC-Kalay ah Member a si. Pathian kawhnak a theih hnu ah ZBC-CMC ah Kum 3 aa pe i cu hnu ah Kaanlawng Missionary in LBC-USA nih an hmanmi pa a si (Kanlawng le Apian cu meng khat le cheu lawng aa hlatmi a si). Pa James nih a va kal hnawh lengmangmi hna khua a si. Atu chanthar Hmawng thiamtu hna kong ah Pa James nih a Nunnak pek in KTBA ram ah rian a tuan. Kaanlawng khua ah Kum 6 khengte rian a tuan, Khrihfabu a dir, Member 100 leng an si, Inn 15 renglo an si i Mission Centre an sak dih hnu ah Kum 2011 kum ah LBC,WDC USA Nubu nih Biakinn an sak. Cu Biakinn te bel cu Pa James nih a hmu manh ti lo, saknak Thing lawng a ah tak manh. LCC kan Khrihfabu hi Phaisa ngeimi Mirum an si caah maw a si hnga asiloah Mission rian ah Mei a alh mi dah an si hnga ti hi ruah lo awk a tha lo. Voi hnih khengte an Mission field hi an hung zoh cang i, i cawn awk a tlak ngaingai. Mission riantuan tikah Thlahtu le Thlahmi Kutsih in rian an tuanti khawhlo ahcun cu Mission cu a nung kho lo i a hman kho fawn lo. Lungrualte in kan tuan tikah cun a nuam tuk a tha tuk. Pathian aa phuang i Jesuh nih a chim bang. Tuhtu le Zuntu cu hmunkhatte ah an i lawmti a timi khi a hman taktak.(Jn 4:36)

LCC kan Missionary Rev. Chan Hmung hi Pathian nih Mi damternak Laksawng a pekmi pa a si i a thlacam piaknak thawng in Mizaw tampi nih damnak an hmuh. Cinduai khua an phanh ka ah an Nu he Khuang an i tum i Cinduai khua an hel ti a si. Ciduai khua uktu khuachia an thawl. An khuaruah a har i an tih hna Cinduai mi nih Cinduai le a pawng kam ummi Khrihfabu hna le Pastor te hna nih hi khuachia phun hi an tih ngaingai. Asinain Rev. Chan Hmung a um hnu ahcun an tih ti lo. Cinduai khua cu aho paoh nih nan rak theih ko lai. Khrihfa mi hna nih a Phunmi VAILAMTAH an phurnak hmuh kha a  si. LCC kan Missionary pa hi, hi Vailam phun lio le an phur i an buai lio ah a ummi a si. Fekte in a rak dirpi hna i a hnu ahcun Cozah nih an rem hna. (Cinduai khua pawngah a ummi Dai Miphun hi a tam u cu Khrihfa an si hna. Tutan Vailamtah nak Thing a hrawh ahcun an ngaithiam ti hna lo i Dai Pa cang 80 leng lo nih Cinduai khua cu an kulh. Pa paohpaoh kan thah dih hna lai an ti i Cinduai pa pawl cu Lawngsi lei ah an zam. Siapi an thah i Sathi luanhte in  Dr Bah Maung a ra i Cozah min in Khrihfa pawl cu remnak a ser. A Hau mi Vailam cu Cinduai a phanmi paoh nih an va zoh lengmang i cu caah atu ahcun Mei in an khangh dih i a um ti lo.

LCC zong Pathian nih Chanthar Hmawng thiamtu ah Pathian nih a hman caah a sunglawi tuk. Pathian Lawmhnak taktak kan ti mi hi Biakinn lianpi kan sakmi te hna, Hall pipi kan sakmi te hna. Vawleicung ah Sunglawi ngai in thil kan tuah khawhmi te hna ah khin a si lem lo. A tlau mi Thlarau amah sin phanhpi hi Pathian aa lawmhnak bik a si (Luke 15 ). LCC kan Khrihfabu te zong Pathian Ramthar riantuannak ah zaanghlei nan cawimi nan laksawng hi Rungrul le Cirik nih a ei khawh lonak hmun Vancung khua ah Pathian nih an khonpiak ko hna. Tuhtu le Zuntu...Hmunkhat te ah an i lawmti lai timi hi nihin LCC ah a tling ve cang.

By  Rev. Bawi Lian Thawng,