Daihnak Bawi Ni Buar-in Daihnak Ser!

Salai Van Lian Thang

9 March 2014

Tuni cu Zarhpi Ni asi. A nung Khuazing Pathian zumtu hna nih tuni cu "Ni Thiang Ni" tiah kan ulh; Zingnu caah humzualmi ni umchun a si caah cheukhat nih a fawinak in "Pathian Ni" ti zongin kan auh. Hi kan Pathian Ni ahcun kan thilpuan thiangbikbik hna kha kan ihruk i; kan rian le khai vialte chiahtak in; kan Pathian hmaiah cun kan rak chuak cio hna i kan biak; Kan conglomh; kan thangthat. Nithiang ni a si caah vawleicung cozah kip nih an hmaizah i; Zungkhar Ni (Public Holiday) ah an khiah!

Asinain; zoh tuah hmanh u!

- Kawlram uktu President Thein Sein le a hnuzul Vuanci pawl cu kan "Pathian Ni (16 Feb 13)" theng ahkhan Hakha khuahlipi ah a tomtom in an hung lut; kan Pathian Ni ah Khrihfa zumtu hna cu hehchet a kan pumhkhomh! Pathian bia thiam loin buaisup in vawlei thil an kan ceihpi!

- Kan pubik long a si lo; President zung Vuanci Soe Thein le Tin Naing Thein zong kha 22 Sept 2013 (Pathian Ni) thengah Hakha an hun tlong i; Hakha khuanu khuapa cu Pathian thangthat thiam loiin buaisup in an rak tuah hna!

- Zia deuh ve hlei hlah. Hluttaw Speaker Thura Shwe Mann le a hnuzul upadi serphu zong kha a ni an zoh an zoh i kan "Pathian Ni" thengmang 17 November ah Hakha an hun tlawng. Kan Pathian Ni ah biakinn panh thiam loin kakip um kha an kan pumhkhomh!

Hitin Kawlram Cozah nganbik hna nih kan Pathian ni thengmang an hun buar lengmang i; an hun thurhnomh hi: za-ah 95% Khrihfa a simi miphun hna kan biaknak kha "zei an rel lo le an nehsawh" a lawh ngai lengah Pathian biathiam loin an kan chiah cu kan zalawnnak an buar; kan covo an soksam; Pathian phung an buar long a silo; vawlei phung zong an buar chih, tiah ka ruah.

Hi long a si lo; zoh rih tuah u;

Remdaihnak khuakhangtu Cozah aiawh UPWC le Tlangmi aiawh NCCT nih Pathian Ni thengmang an buar kha a voi a tam pah ve cang!

- 3 Nov 2013 (Pathian Ni) thengah Myitgyina khuaah remnak khan dingin a tomtom in an kal. Khual an tlawng.

-15 Dec 2013 (Pathian Ni) thengah UPWC le NCCT hna cu Yangon ah remnak khua an khang.

- 29 Dec 2013 (Pathian Ni) thengah UPWC le NCCT cu Chiangmai ah remnak an khang.

- Tuni Pathian Ni (9 March 2014) theng zong ahhin UPWC le NCCT phu cu Yangon ah remnak an khang.

Tuni an itonnak ah UPWC phu in: Vuanci Aung Min, Khin Yi lengah du-buchohci Myint Soe, Thet Naing Win le duh-sihnichoh Htun Htun Oo, mithiam Dr. Than Myint-U le Tainghmu zeimazat le Hluttaw aiawhin Thein Zaw tbt. kan hmuh hna.

Tlangmi aiawh NCCT phu in: Leader U Naing Han Tha, Deputy Leader Padoh Kwe Htoo Win, member Col. Hkun Okker, Dr. Lian Sakhong le hruaitu tampi an lang ve.

Tlangtla phu MPC in: Hla Maung Shwe, Dr. Min Zaw Oo, Aung Naing Oo, Nyo Ohn Myint, Kyaw Yin Hlaing, Tin Maung Than le Andrew tbt. zong an hun lang.

Zeidah an bia le hla a lawh ti cu kan thei rih lo nain "Kawlram daihnak" kongah biatak an chuah ti kan hmuh tikah thinlung a dam. Asinain, biahalnak a ummi cu zeiruangah NCCT le UPWC nih "Pathian Ni" thengmang ah remnak khua an khan lengmang hnga timi cu ruahlo awk a tha ti lo. A voi a tam pah caah.

Hi remnak a khangmi chungah Buddhist an um lai, Khrihfa an um lai i, Muslim zong an um men lai. Milembia hna nih " Pathian Ni" zeite an rel lo kha cu a cunglei ah kan tial cang. Hmailei zongah zei an rel hlei lai lo; zeitiawk va tha tuk hlah. Asinain; milem bia nih "Pathian Ni" buar dingah an ni an tuk tikah Khrihfa zumtu hna nih an al hna hnga lo maw ti kha phuk tiah ruahawk a umter.

Taktak ahcun Zarhpi Ni long hi nithiangbik cu a si lo; a nisarih ning tein an zapi in an thiang dih. Zarhpi Ni ah zeihmanh vawlei thil kan khang lai lo tinak zong a si lo. "Sabbath ni ah mi damter phung a si maw?" tiah an hal tikah Zisuh nih "biana bia ah tuu pakhat kha Sabbath ni ah khorchung tla sual seh law chuah loin maw nan um ko lai, mi cu tuu nakin a letin a sung deuh; cucaah Sabbath ni ah thatnak cu tuahphung a si ko" tiah a leh hna. (Mtt 12:10).

Hi baible chung bia ningcun "Pathian Ni" thengah "Peace Talk" an tuahmi hi ram caah thatnak an khan a si caah Pathian hnatla a si ko hnga lo maw tikha chikkhat cu a hun ka ruahter. Asinain; Zisuh chimmi hi: Pathian ni ah zatlak puicimh vanchiat thil, zawtfah damlo harsatnak lakhruak thil he ai pehtlai deuh. Pathian Ni ah cu bantuk harnak a umcun chanhchuah awk a si ko a ti duhmi sinih a dawh. Ni tampi thimawk tha a um lengluang ko nain milem bia hna nih "Pathian Ni" zei an rel lo caah an buar phun he cun an idang!

Lai baibal ah "remnak" tiah a timi hi Mirang ahcun "peace" tiah a tial. Hi "peace" timi hi Laiholh dang ahcun "daihnak" ti zongin tial asi. Cucaah "peace" timi cu "remdaihnak" ti zongin auh khawh asi. Hi remdaihnak cu a man a fak tuk caah thisen tampi le phaisa tampi thapin harsa ngaiin kawl asi tawn.

Tuni cu Pathian Ni asi; cu Pathian kan timi cu:- vawlei uktu Bawi; fimchimtu; a thawngmi Pathian, Zungzal hmunmi Pa- "Daihnak Bawi- The Prince of Peace" ti zongin auh asi (Isaiah 9:6). Cu Daihnak Bawipa a nithiang ni cu atu le atu buarin milem bia hna nih "daihnak" kong heh an kan ceihpi lengmang. Tuchun ni zongah a si than.

"The Prince of Peace" a ni upat loin zeitindah "Peace" cu kan hmuh khawh hnga? "Daihnak" kan ser lai kan ti ahcun "Daihnak Bawipa" a ni buarlo izuam a tha hnga mu; ti kha tuni "Pathian Ni" ah daihnak a kawlmi hmanthlak ka hmuh in duk tiah ka lung a hun chuakmi asi.