INN CHUNG LAWNG HI NU HNA HMUN ASI LO

INN CHUNG LAWNG HI  NU HNA HMUN ASI LO

Nu le pa dirhmun tlukrual kan si ti hi a tlangpi in pawm cu asi. Asinain, nu le pa i tlukrualnak hi tlamtlinternak caah hmalaknak cu a tlawm ngaingai. Asia nichuah tlanglei ram hna ahcun ramkhel rian ah nu i tel ning hi 9.1% in 27.3% kar lawng asi. Thailand ram ahcun 10% lawng asi. Phung nih nu hi  ramkhelnak ah 30% tal cu i tel hna seh tiah duhsaknak ngeihmi he cun aa hlat tuk rih.

           

Thailand ram ah 2007 ah ramuk phung thar an rak ser. Diknak (Justice) a chuahpi deuh khawhnak ding le nu bu hna nih nu le pa thleidannak um loin, i rualnak a dirpi tu uknak phunglam kha ser le telh an duhmi cu asi. Nu hna an saduhthahmi chungah thil pakhat cu ramkhelnak rian ah nu le pa tlukrualnak a um khawhnak caah Quota system chiah kha asi. Cu ti Quota halnak cu “We Move” tiah theihmi nubu hmalaknak in kalpi asi. September 19, ah ram nawlngeihnak lak a si hnu in 2007 kum ah suai ding ram uknak phung ah nu hna covo a runveng tu asi aherh tiah an au pi. “We Move” chungtel pakhat asi mi Sutira nih ram phunghram ningin roreltu committee chung zongah nu le pa tlukrual tein si aherh tiah a dirpi.

           

Bianabia ah ram uknak phunghram  Dal (275) nih peng kip uknak lutlai hna cu mipi in thimmi an si lai tiah ati. Hi zawn ah “WE MOVE” nubu hna nihcun mipi thim ding palai thlahtu hna zong nu le pa aa zat co veve an si aherh tiah an chuahpi ve. Parliament chungin committee sernak zongah nu le pa tlukrual in tel aherh tiah tthanchonak research a tuahtu Sutira nih a chim. Amah hi  nu dirhmun tthancho ternak rian ah lutlai pakhat asi . Hi ti Quota nu caah halnak hi chanthar Democracy uknak ah nu hna ramkhel rian ah i telh khawh venak caah thazaang a pe bik ding lam pakhat asi tiah zumhnak cungah halmi asi. Nihin ni tiang ah vawlei cung ram (30) nih an ram thimnak phunghram ah Quota hi an chiah cang. Ram (60) chungin ramkhel party (200) leng nih mipi thimnak ah Quota hi an chiah cang. Hi ti a chiami paty chungah Sweden ram in Social Democratic Labour Party , Kiren Party hna nihcun nu 50, pa 50 tiah Quota an chiah. Norway ram in Liberal Party, Christian Public and Labour Party nih 40% hi nu caah Quota an chiah.

           

Asinain nu caah Quota chiahnak kong ah vawlei cungpi ceihhmainak ah Asia nichuah tlanglei ram hna ahcun a luancia mi kum (20) chungah thanchonak a tlawm tuk rih tiah Sutira nih a ti. Nu le pa tlukrual awk aherh zia hi mi tampi nih cohlan asi ko nain, a tak in thazaang peknak zawn ah tha a der tuk. Asia nichuahtlang ram hna ah ram ramkhel rian ah nu telnak hi 9.1% , in 27.3% karlak lawng asi rih. Thailand ram ah Quota chiah khawhnak caah donkhan tu thil hna cu :Pa nih teinak in hruainak Society asi caah ramkhel rian ah pa lawng nih hmunhma an lak, i thimnak a dihmi tangkaa a tamtuk mi, ramkhel bu hna nih nu tampi an i tel khawhnak caah hmalak piakmi a tlawm tuk tiah Surira nih ati. “Mi tampi nih cu hruaitu si loin zultu le ingtuartu men an ruahnak a um ruangah ram khelnak ah an  tel khawhnak thazang a derter. Asinain, nu hna hi ramkhel rian ah an i tel ve asi ahcun midang nih tuah khawh lomi thlennak thil lianngan an tuah khawh lai. Nu le pa kar ah  khahlonak hmuhnak kha an ngei. Cu ruangah nu hna nih an herhbaunak zawn le an covo hna runven khawhnak caah ramkhel rian ah an i tel ve hrim aherh”.

           

Asinain, ramkhelnak ah nu cu Quota hal nak kong chimrel tik poah ah dohnak a um tawn. Party palai thlahnak ah nu hna telh ve hna ding tiah a luancia mi kum (10) ah rak pawn cang asi hnuin, nu bu rianttuantu hna nih biatak chuah in an nawr cuahmah ve. Ramkhel bu dihlak nih asi khawhnak bik in kan in zuam piak ko hna lai tiah ruahchannak cu a kan pek. Party pakhat nihcun party palai (5) thlah dingah pakhat cu nu si dingin an chim. Kanmah nihcun nu le pa i zat seh tiah kan hal hna. Kan i timhnak cu party palai cazine chungah nu hna telh lo awk an tthat lo zia le tlawm tuk lawng telh awk an si lo ning kha kan dirpi. Pengtleng caah uktu i thimnak dirhmun ahcun party chungtel si theng a herh lo timi ah nu hna caah lam ttha ngai asi. Cun Peng le tlang dirhmun in mipi hna ramkhelnak kongah ngeihniam deuh in an i tel khawh tiakah a dikmi le a hman mi biakhiahnak hna an vun tuah thiam cang lai. Cun, nu hna kha social le economy zawn ah biapi dirhmun ah dir ve kho lai. Income hmuhnak lei ah nu hna i telnak le hruainak in a kal cuahmah ve cang.

           

Mah le khua cio in Fund kawlnak cozah nih a tuah i Thai-batt 1 Million kawlnak chungtel thlahnak zawn ah nu le pa aa zat tein asi khawhnak caah i zuamnak cungah hlawhtlinnak sangbik a um. A hramthawk ahcun khua Fund kawlnak committee cu khau bawi hna nih inn lutlai pa bik hna kawh in chungtel 7-15 thim tawn asi. Asinain khua bawi hi 97% cu pa an si i, 75% innchungkhar lutlai hi pa an si. Nu le pa aa tlukrual in thanchonak bu chungtel nu bu (5) nih hi kongah siamrem aherh tthan zia kha, an ram uktu Prime Minsiter sincah ca in an kuat. Cu ruangah remh tthan dingin Prime Minister nih Commission pakhat adirh ter hna. Khua Fund kawlnak committee ah nu le pa aa zat tein i telnak covo cu cu ticun hun hmuh asi. Cu ti hlawhtlinnak kan hmuhmi nih nu hna hremnak hmun in zalawmnak caah kan i zawmnak he a lak in a liam lo ti kha a langhter . Cu caah nu hna nih pehzul in kan i zuam ko lai tiah ralttha ngai in Sutira nih a chim.

           

Hi ti nu hna dirhmun thanchonak caah kan i zuam cuahmah lio ah Indonisia le South Koria bantuk ram hna nih an ram uknak phunghram ah nu Quota hna an vun telh cang. Adang ram hna ahcun nu Quota hi chiah ding in ttanhma an lak lio pi asi. Quota hi tuah dingin ram phung nih fiang tein a lnaghter lo caah, thancohter nak caah cun ramkhel bu party hna cungah tampi aa hngat tiah Indonisia  nu bu rianttuantu asimi Anisugyt  nih ati.                                                                    

Hi nu bu hna nih nu hna thanchonak an hmuh khawhnak caah le nu hna nih covo an ngeih ning theih fian khawhnak caah rian an ttuan tiah a chim. Ramkhel bu party hruaitu hna nih rianttuan kho ding nu palai ttha hi za tawk in an um hrim lo ti mi an chim tawnmi cu aum. Party caah a caan le tangkka pek in rianttuan aa tim mi nu cu kawl ah hmuh an har lai tiah an ti asi. Nu hna cu party ah an lut duh lo. Ramkhelnak ah thinlung an ngei tak lo. Cun nu tampi cu mah le mah i cawisanternak caah an ral a ttha tak lo. Cucaah hi ram ah Quota chiah hi a tak in thlawhtlinnak a um rih lonak asi tiah ati. South Koria ram ahcun kum 1981 ah thimnak a tlingmi nu hi 2.5% asi i, kum 2004 ahcun 13% ah a hun kai. Pengtlang le ram pi huap in nu hna nih ramkhelnak ah hmunhma an lak khawhnak cu, thimnak caan ah nu hna i an chungkhar hna le nu bu hna nih tampi dirkamhnak thazaang le nu hna cungah mipi ruahnak aa thlen ruangah si ko. Hi zawnah a biapi mi thil hna cu: nu palai hna telnak thazaang a pe mi bu hna le phung han thlen asi ruanga le nu hna baitak tein an cawlcangh mi hna ruangah asi ko tiah Korian nu lei thanchonak rianttuan Wanhongkim nih a chim.                                                  

Hi ka ah nu hna cawlcangh ning thazaang a ttha tuk. December thla ah President thimnak a voi (17)nak  le April 2008 ah tuahding Parliament thimnak ah nu palai hna (30%) hi thimnak ah i zuam ve dingin min pek dingin an hal ve. Nu bu hna nih i thimnak ah ramkhle bu hna nih nu palai hna nih covo an hmuh ve nak ding caah an forfial hna i, an cawlcang ve. Hi cawlcanghnak ah mipi nih nu hna ramkhelknak ah an i tel ve a herh zia kha thukkau deuh in an theih khawhnak caah an i zuam. Atu i ttuan cuahmah mi cu nu thanchonak caah rian a ttuanmi Korea nubu pawl le ram chung nu bu cheukhat nih ramkhelnak ah nu hna an i pekchanhnak kha me petu mipi le nu hna nih fiang tein an theih hmuh khawhnak caah asi.                                                                     

Ara laimi Thailand ramkhelnak boruak nih a ton ding cu nu hna hi ram kongah i telnak konglawng si loin, mipi rorelnak chung hrim ah nu hna hi pa he i tlukrual in an i tel khawhnak hnga thlenak kha asi. Hi thila a tling khawhnak caah cozah, ramkhelbu han , a tthawngmi bu hna le Media ( thawngzamhtu) han biatak in an i tel aherh ve. Anmah an i zuam bik ding cu ramuknak hmun a dot dot ah nu hna tam deuh in an i tel khawhnak lam kha serpiak asi tiah Sutira nih a chim. “ Bianabia ah ramuk phunhram ah nu lep atluk rual in palai thlahnak kha phungah suai asi ko hmanh ah , mah lawng khan a za dih rih lo. Milu rualnak sawhsawh in a tlamtling tak kho lo. Ramkhelnak rian ah nu hna kha biacat kho tu dirhmun le a tak in a tuan khotu an si nak caah thilti khomi nu ngeih aherh I, rianttuan khawhnak caah dirhmun kha a dangtein pek an herh. Nu hna nih nu le pa I tlukrualnak hi a tak in tlamtlin ternak caah timhnak le biachahnak ngei bu tein rianttuan aherh fawn.        

                                               

Atu ah Gender lei thanchonak caah rianttuan mi bu hna cu nu hna I thilhruainak ( Leadership) ah an tthawn kawhnak caah thazaang an chuah cuahmah. A hramtawk ahcun nu hna nih penguk ( Township) dirhmun in uktu le hruaitu hna an chuah khawhnak caah ttanhma an lai. Zohchun awktlak nu hna kha tum tin mintthanak laksawng an pek hna I, an rianttuannak nih mipi nun le khuatlang caah thil ttha tampi a chuahpi mi kha an phochuah piak hnaKanmah nih ti khawh chungin nu hna mipi thimnak ah tampi an i tel khawhnak ca le hruaitu an si khawhnak hnga , thil ti khomi an si khawhnak caah kan bawmh hna . MInthat nak lakzawng peknak kan tuahmi cu cozah rian ah thil ti khomi nu tampi an um nak kong kha phochuahnak caah asi. Nu le ap aa zat in ramkhelnak ah I telnak caah ttanhma laknak hi thil fawi asi lo rian asi zia ttha tein kan theih . Ahar ngaimi lam thluan kan zul cuahmah. Asinain , a donghnak ahcun Quota system hi kan phan te ko lai. Nu hna nih pa he I tlukmi sinak hi kan hmu hirm lai timi zumhnak kan ngie ko tiah Sutizra nih a chim.

2007 July 19, ah Krit Tiya nih Bankok Post ah “ Inn Chungkhar lawng hi Nu Hna Hmunhma asi lo “ timi capar aa tlak in lehmi asi.

Note: Phuntungtu chungin lakmi a si.