KA NU KAN NGAI TUK!

     A ttangnem ah panh sirsiar in a ka pomtu

A hnukthlum a ka dinhtu

A paw a ttam lai ti a ruattu

Ka nu kan ngai tuk!

Lokal caan ah tlunzoh a ka phurhtu

Amah nih ei hmasa a sianglotu

Mahte kalter a ka sianglotu

Ka nu kan ngai tuk!

Hawi zoh a hngar lai ti a ruattu

Fenh-aih tthattha a ka cawkpiaktu

Meh thaw a ka hoihtu

Ka nu kan ngai tuk!

Hawithiam a thiam sual lai lo ti a phangtu

Salrian ttuan in sianginn a kaitertu

Ningzah ruat loin mido a ka cawipiaktu

Ka nu kan ngai tuk!

Sahrang le hmunking a ttih lotu

Hlingchunh le Caangvat a ttih lotu

Nilin le ruahsur a ttih lotu

Ka nu kan ngai tuk!

Sianginn kai kal lio lungdonh tiang a ka thlahtu

Dong hngal loin Cungcung/ka fa tiah a viuh pengtu

Na liam cang maw? Ka fa dam te’n a ka titu

Ka nu kan ngai tuk!

Ka nu tuchun cu keimah lawng un-peih ram ah

Midawt hngal lo un-peih  miphun pawl

Siaherh ngei lo, Mizawn ruat lo

Dawtu ngei loin na fa kei lawng

Ka nu ka rual hawi hna cu, Rose par dawh he

Sunghno an nu Rose par tonh hna lai…

Kei a hodah ka tonh lai?

Ka rose par cu kai put ko hih!

Rung lang tthan law, na fahniang sinah

Ka rual hawi sinah, lawmhnak par tlan ve ning

Na thlan lung ah maw ka rose par cu ka chiah ne lai?

Na thei lai maw ka nu, rak zoh te mu ka chiah ko hih!

Ka nolh ko rih lai, ka nu kan ngaituk!

Ziah hme na fa ka daw lo maw?

Na sia na ka herh lo maw?

Kan ngai tuk hih ka nu!

Ka nu kan ngai tuk!

By ; Na fa hniang