CHIN HOLH ZEIZAT DAH A UM

Ca`ial tikah Anthropology, History, Legal idea, Literature,  Logic ti mi hi ruah tonh dih in hmuh ning phunphun a um khomi purhdah tonhchunh in `ial izuammi asi. Cucaah vuikhat article relnak in ruahnak tampi a pawimi ca si kho seh ti hi kan izuam ngai. Cu long silo in atu hi holh kong bantuk ah rak theih aherh ve ngai mi Chinram township pa kua le Mizoram, Asho Chin lak, Naga lak i cawhmeih in um lio, a kenza Laimi nunning le khuaruah ning zazat le holh hman ning practical ton cangmi cungah hngat in, `ialmi deuh asi. Cucaah hi capar cu ramrian khelnak ah lunglut ngai in theihduhnak a ngeimi mipawl nih rel awk `ha ngai in ka hmuh piak hna. Lairam chung ramuknak ah zapi ca siarem deuh dingin le fawi deuh dingin rak tuahmi, atu ah Tedim-Tonzang peng timi Mirang chan lio  Tedim Sub Division rak timi ah khin;

            • Zo holh, 

            • Teizang holh,

            • Kamhau-Sukte holh,

            • Sizaang holh, 

            • Khuano pawl le, Dim pawl holh hi aw dang in an chim ahcun Chinmi holh `eng tete hi an rak um cio hna.

**

Cawn loin itheihkhawh mi maw, rau lo te ah itheih khawhmi holh `eng longte an si. Manipur i Paite holh le Kuki holh timi khi Tedim holh he hin cawn loin maw, rau lote ah maw itheih khawh mi holh an si. Abik in Tedim khua holh rak timi (Kamhau-Sukte) holh hi Tonzang Tedim peng Sianginn ah Mirang chan in independent hnu tiang cawn an i-hrawmmi asi. Cucaah an peng hnih in an thiam dih, an holh khawh dih. Tedim holh tiin holh khat ah chiah khawh an si.

Atu lio Falam peng timi Mirang chan lio Falam Sub Division ah hin;

            • Ngon holh,

            • Zaniat holh,

            • Tlaisun holh,

            • Hualngo holh,

            • Hlawnceu tlang Laizo-Sim-Zahau                               hna holh hrawm,

            • Khualsim holh, ti an um.

**Cawn loin itheih khawhmi holh longte an si. Mirang chan in Falam peng chung vialte sianginn ah Hlawnceu tlang Laizo holh hi ihrawm dih in cawnmi asi. Cucaah a peng chung zapi an thiam dihmi asi i, Falam holh tiin holh khat ah chiah khawh dih an si.

Nihin ni Matupi peng, Thantlang peng, Haka peng thum timi Mirangchan lio

Haka Sub division timi ah hin;

            • Haka holh,

            • Tluanglo khuatlang holh. Hi holh hi                                       zeimawzat tein Haka holh he aa                                  dang deuhmi te asi.

(Tluanglo ti cu Zolo zong asi lo, Lailo zong asi lo, Facang cin khawhnak vulei umnak ti khi asi. Thantlang Cinzah bawi rak uknak hmunhma a rak tam caah hlan lio ah Thantlang peng ti zong arak si `heu ko. Asinain atu chan Thantlang peng ti tikah hlanlio hmunhma ning si ti loin a kau deuh cang. Cucaah Haka- Thantlang holh aa neih ko bu ah dannak a um ve ning, Kaa dang Matupi, Thantlang, Haka pengmi nih rak theih ve awk `ha asi ve. Cucaah tu hlan lio kawh ning ah “Tluanglo lei holh”  tiin vunkawh zong hi duh khawhmi ngai a hung si.),

            • Zotungtlang holh, 

            • Zopheitlang holh,

            • Laututlang holh,

            • Maratlang holh,

            • Senthangtlang holh.

Matupi khuatlang pawl holh chung ve ah;

            • Cintlang holh,

            • Ngala holh,

            • Dium or Ta-ua holh,

            • Dai holh ti hi an rak um.

Asinain Mirang chan in Independent hmuh hnu pi tiang Haka holh kha a peng thum chung sianginn vialte ah cawn an i hrawm dih. Cucaah Haka holh cherhchan in `ialmi holh kha atu lio Matupi/Thantlang/Haka pengthum in an rak theih an rak thiam dih ngot. Atu Haka/Thantlang pengchung khuami tampi nak in atu Matupi peng mi nih hin an ihrawm mi holh cu thiamdeuh ngai in an rak chim. Atu Haka he peng an `hen hnu ning Matupi Myonay umning in kan chim ahcun, Mara holh, Zotung holh, Cingtlang holh, Ta-ua or Dium holh, Daiholh, Ngala holh tiin a um.

Asinain Cintlang holh, Dium holh, Ngala holh, Daiholh hi cawn loin an itheih piak dih. Cucaah holh khat ah chiah khawh an si. An peng thum Haka, Thantlang, Matupi an zapi in Haka holh hi an pengthum ipeh tleihnak ah an hmanmi ngai asi. Cucaah Haka holh cherhchan in `ialmi ca cu an zapi holh ah chiah piak `heumi an si. Haka holh timi cu Haka holh long asi ti lo i, Matupi holh zong ti khawh mi asi, Thantlang holh zong ti khawh a si ko. Lungngo, Rezua holh zong ti khawh si i, Lailempi holh zong Zophai holh zong Mara holh ti khawhmi asi dih.

Atu Kanpetlet-Mindat peng hnih hi Mirang Chan lioin Kanpetlet Sub Division timi a si ve. Hika hin;

            • Cindwe holh,

            • Dai holh,

            • M’kang holh,

            • Muin holh,

            • Roung`u holh ti arak um.

Asinain Muin timi Mindat holh kan timi cu an zapi an theih dih. Mirang chan ah Muin holh hi (Bongholh bik cherhchan in `ialmi) kha sianginn ah rak chimh balmi asi. An i neih tuk dih caah dik Mindat holh timi hi an theih dih. Cucaah holh khat ah Mindat/Kanpetlet holh tiin chiah khawh asi.

Paletwa Sub Division timi ah hin;

            • Khumi holh,

            • Mro holh,

            • Daiholh ah ruah deuhmi Lemru va                              hrawn holh ti hi a um.

            • Mara holh a chimmi khuazong                                   tlawmpal an um ve.

** Asinain Khumi holh hi an phu zapi in theih dihmi asi. Khumi cazong hi an peng pumpi in cawnmi arak si. Cucaah Paletwa holh tiah pakhat in chiah khawhmi asi.

Lairam pumpuluk ah Tedim holh, Falam holh, Haka holh, Mindat-Kanpetlet holh, Paletwah holh ti cu amah le a peng cio ah theih dih ciomi ihrawmmi holh panga ah ruahmi ngai an si ko cang. A peng chung cio holh `engdang zong nih hi holh panga an thiam cio ko bu ah  anmah le an khua le khuatlang holh kha hman khawh rih `hiam asi. Zapi nih theihmi holh deuh ti ruahnak he hi holh pa-nga hi a hleice in chim deuhmi asi. Cu ti ruah ning cu ahohmanh nih kan pom khawh lo awk a um lomi asi.

-  Asho Chin holh hi Rawn Laimi lak ahcun hman bikmi a si. Kanpetlet peng chung Cindwe holh he hin cawn loin maw, rau lote ah maw i theih khawhmi asi caah holh khat in chiah khawh asi.

- Mro holh timi hi Arakan lei Chinmi ah cun hman ngaimi asi ve. Matupi peng chung Rengkheng lei Ta-ua holh he hin aa neih ngai. Cawn loin maw rau lote ah  itheihpiak khawhmi holh an si caah holh khat in chiah khawh asi.

Mizoram lei holhmi Hmar holh le Duhlian holh cu Falam peng, Hualngo holh he cawn lo in theih khawhminak hmanh in aa khat mi lawngte ti khawh an si ve ko. Cucaah Duhlian holh khat in chiah khawh asi.

Hi Laimi holh vialte kan hman cio mi hi a thlungpi ahcun Tibeto-Burman language tiah holh lei lawngte cawnnak kaupi angeimi hna nih an `ial. Cu Tibeto-Burman holh a chimmi atu Kawlram bupi chung a ummi hi aa neih deuhmi cio in vunkop dih cio tikah phu hnih ah kop asi. Chin-Kachin holh kop phukhat le Kawl-Danu-Yaw-Yakhaing holh ti kop phu khat in chiah tikah phu hnih in `hen asi. Khi phu hnih ahhin Linguistic pawl nih an `ial ning ahcun;

    Chin-Kachin Group cu a vun i`hen `han tikah Kachin group le Chin-Naga group ah aa `hen`han. Naga holh lakah hin Tangkhul holh le An-gami holh hna khi cu Chin State chung holh he aa neih ngai i, Chin State chung holh dang he hin a dang in `hen awk ah ahar ve mi in hmuh asi. An-gami Naga nih khin Ka pa = father ti cu “a po” an ti i, Senthangtlang, Zophaitlang he adik ciah in an ikhat kho ngai hna.

Acunglei Tedim holh group, Falam holh group, Haka-Matupi holh group, Kanpetlet -Mindat holh group, Paletwa holh group timi vialte chung holh hi Chin holh pakhat chung ah Chin holh dang tampi aa cawh meihmi holh lawngte a si. Cu chungah Falam peng ah khin Zahau, Sim, Hlawnceu tlang, Khualsim ti pawl khi Haka holh he cawn loin itheih khawh veve mi holh an si. Cawn loin  itheih khawhmi holh cu mutually intelligible dialects an ti. Cu holh he a vun ineih rih mi rau lote ah theihkhawh thiamkhawhmi holh cu Zaniat le Tlaisun holh asi. Mah hna he aa neih ngaimi rau lote ah theihkhawh thiamkhawh cawlhmi cu Duhlian holh khi asi.

Cu holh hna he awchuahning aa khat i, consonant (cafangtung) timi biafang a thawknak cafang aa dang nain a aw a dong lei aa khatmi holh ah Tedim le Kuki holh khi an si i, Falam/Haka he an i neih ning phun dangte asi ve. Cu hna he an aw chuah a vun ikhat  rihmi ah Matupi pawl an holh le Paletwa Khumi holh le Mro holh khi an si. Hi hna he hin kan holh kan ithiampiak tikah kan aw a pei dih kho veve lai lo.

Zeicahtiah a phonetics awchuah an ikhahnak atam ngai. Paletwa holh ca Anglican Missionary nih an ser tikah a aw aa lawhnak atam ruangah Haka  ca `ial cu an lak i Haka nih angeih lomi aw lawng an chap piak hna. Paletwa peng Middle School ah Head-master in Saya rian ka `uan lioah ka siangngakchia cawn awk ah a sin i Paletwa Lai carel ka va cawk lio ah Paletwa Anglican Missionary Canon Francis nih a rak ka chimh balmi asi.

Cu hna he a vun ineih rihmi cu Mindat peng chung hmanmi le Daipawl hmanmi le ~aung`ha timi Roungtu holh timi an si. Roungtu pawl nih hin Haka nih Caw timi khi Caw an ti i, naa timihi naa an ti ve. Anmah he kan holh kan ithiampiak veve ahcun kan holh awchuah a pei veve kho lai lo. Hi ti awchuah aa khah caah Bongkhua holh cherhchan in Muin holh an `ialmi zong Rev.Cope nih chaklei Tedim, Falam, Haka ca `ialning ca fangkomh ning cherhchan in `ialmi arak si ve. Mindat pengchung cawnmi Bong Muin holh he an peng chungah aa dangmi holh cikpak tete a um len nain Mindat holh khi khuate lei tiang nih an theih dih ngot an holh aa khah caah asi

Cubantuk cun Paletwa Peng zongah khin Khumi holh hi an theih dih. Mro holh he hin chik khat ah an ithei lo nain, caan tawite ah an itheih kho cawlh dih. Cun aw chuah dang Haka aw chuah he aa khatmi Senthang holh ah Khuapi, Sakta, Buanlung, Dongva, Thor holh  ti pawl hi Haka aw he aa neih i Haka holh chim tikah an aw chuah a fawi deuh. Atu Haka ca spelling `ialning hin `ial khawh an sidih ngawt. Senthang holh ah Surkhua, Lungtar, Phaipha, Phaizong, Lungrang, cun Zophaitlang holh, Maratlang, Laututlang, Zothung khuatlang holh vialte le Haka holh hi an bia hramthawk Consonant ah Haka he aa khat na in vowel ah dannak a ngeimi an um ve dih hna. Haka aw he holh ithiam piak veve tikah aw chuah kan iharh deuh kho ve ve. Atu Haka holh `ialnak spelling hin an holh `ial khawh awk a zo dih kho lo. Cucaah international phonetics chung in vowel aw dang lak piak chap an hau. Asho Chin holh hi Senthang, Zophai holh he aa khatmi atam na in Mindat Matupi aw deuh an si caah Haka he holh ithiam piak veve tikah aw chuah kan iharh veve lo ding khi asi. Khuaruahhar ngai asi mi cu Salai /Mai ti hna hi Zophai holh he an rak ikhat.

Chinmi holh vialte a muru aa lo dih. Cucaah Chinmi nih Chin holh a cawn ahcun Chin asi lomi holhnak in a thiam an i awlh deuh. Chin mi holh pakhat cu Chinmi holh tampi aa cawh mi holh asi ruang hrim ahhin Chinmi holh panga hrawng `ha tein theih ahcun Chinmi holh dang theih an ifawih ngai cang. Laimi aw dang cawimi nuva aa ummi vialte nih fanau le cu Lai holh pa hnih thum cio inn chungkhar ah thiamter dih i zuam ding hi forh le tha peek duhmi ngai asi. Asi kho tukmi asi. Rev. Kip Thian Pao le an nu hi Tedim le Falam awcawi hmang an si. An nu nih amah Falam holh aw in a fa le a chawnh zungzal hna. An pa nih amah Tedim lei khua holh aw in a fa le a chawnh zungzal hna. An fa le nih khual an umnak ah an hoi he an umnak khua poh holh in an i chawn hna i an fa le nih a nu holh he a pa holh he an umnak khua holh he holh thum li an upat tiang mother tongue in an thiammi `han pi i, an thiam thai.

Pu Vum Son te unau chung khi an pa cozah rian`uan in Falam ah an hmette in  a ummi an si caah Falam/Haka holh cu mother tongue in Tedim lei holh he aa khat in a chimmi an si tikah Duhlian holh zong an thiam an theih an ifawih tuk hna. Cu bantukin Falam/Haka nih Tedim holh an theih an thiam ahcun Duhlian holh theih le thiam an i olh deuh ve.

Washington DC ah Mary nu le Mary pa hi an pa Mara aw cawi, an nu Thantlang aw cawi an si. An nu le an pa le nih an khua holh aw veve in an fa le kha an chawnh hna. An fa le nih Mara aw holh, Thantlang aw holh, Mirang holh an khual ngeihmi nih Kawl holh an chim caah Kawl holh tiah holh pali an fa le nih an thiam kho.

Falam khua ah Sui Thluai nu le pa hi a khuapi in upat le dawt aa hlawh ngaimi chungkhar an si. An nu he an pa he Haka/Thantlang holh chim an si. Asinain an nu hi Mizoram Thingsai ah WWII lio arak `hangmi asi. Cucaah Mizo holh cu a mother tongue Thantlang-Haka holh bantukin a chimmi asi. Cucaah an fale nih holh kip thiam hna seh tiah a nu nih a fa le kha ‘Mizo holh peng in  a chawnh hna. A pa nih Haka/Thantlang holh peng in a fa le kha a chawnh ve hna. Anmah nuva zong cu Thantlang/Haka holh in an i chawn ko hna. An fa le nih a pa kha Haka aw holh in an chawnh peng i, a nu kha Mizo aw holh in an chawnh peng. Khua lak an hoi le he an umnak khua Falam aw holh in an upat tiang an hoi le he an ichawn peng. Cu caah Thantlang/Haka, Mizo, Falam aw holh azapi in an `hanpi i an thiam dih. Hi bantuk chungkhar hi Chinram ah an tam ngai. Kan  `ial `heumi cu Dawn khua hna ahcun nu nih Haka/Thantlang, Pa nih Mizo holh aw in innchungkhar chungah an chim ti hmanh asi.

Cucaah Chinram chung ah mi tambik hmanmi Tedim, Falam, Haka, Kanpetlet-Mindat, Paletwa le Duhlian holh hi Chinmi holh dang nak in an `ha deuh an chia deuh ti ruahnak si loin, Chinmi tambik thiammi holh an si. Cu ruangah hin fa le nih mah le nu le pa khua holh he mah le umnak khua holh he aa neih deuhmi hi holh paruk chungah pakhat maw pahnih maw mah le i awtmi holh hnih maw holh thum maw he thiamter dih hi izuam ding forh ngaimi asi. 

           

An thiamkhawh le thiamkhawh lo kong kha a cunglei ah chungkhar phu thum fale le chungkhar dang fale tampi nih kanmah mit hmuh hrim ah a thiam khomi an si kha tette `ha tuk kan vun langhter cang. Hi ka chungkhar min kan `ialmi hna nih an si taktak ning Chinmi dang nih an model an ilak cio nakhnga forhnak in kan `ialmi hi a ruah kan thiam piak hna seh ti zong nawlpat ngaimi asi. Zeicadah hi tin chungkhar fanau hna nih Chinmi holh ah mah khua holh le adang Chin holh thiam ding hi forh duhmi ngai asi ning cu, hi ti Laimi holh tamdeuh a theimi le a thiammi cu an thiammi holh a chimmi hna cu holh an thiammi Chinmi kaakip he hoikom ser khawhnak le zumhrei deuhnak ah hman khawhmi an si. Ramhruainak kong hna ah a lung a lutmi an si ahcun Chinram chung kaakip cu anmah khuami bantuk ah ruah khawh dihnak caah caan `ha ngai lak khawhnak hmunhma ngei ah an cang kho ngai hna.

Atu ralkap cozah nih Chinmi holh kong an `ialmi khi holh aa thuatmi min  dangdang in an `ialmi a um len. Cucaah Chinmi holh cu zat a um an timi khi a palh ngaimi asi. Kanmah Laimi in research tuahnak fund tangka kan ngeih i, Linguistics a lami nih Chinmi holh `eng aw dang dang cawimi hmun khat ah kawh in anmah le holh cio kha research tuah in holh aa khah ning a phun phun ser le zeitluk khat dah holh khat le holh khat aa khah ning percentage lak in holh zeizat ah dah `hen khawh asi ti tuah khawh tik lawngah a dikmi a chuak kho te ding si nih a dawh bik ko.

Language timi le dialects timi zong hi dialects cu language nak a bi deuh mi holh `eng deuh ah hmanmi an si. Cucaah Chin language a thlungpi cu a um i atu Chinmi kan chimmi holh teng vialte cu Chin language timi a thlungpi in a `eng, a nge dialects timi lawngte ah ruahmi cu asi. Hi Chinmi mi tamdeuh theih bikmi timi panga paruk zong hi Chin holh `eng `hiam an si ko hna. Mitam thiammi asi caah holh kungpi pa-nga ruk an si hlei lo.

America siangngakchia mino hi Iraq ral a um lingpi zongah ralkap ah an lut len ko. Zeicahtiah an upat tikah ralkap ah a rak `uan bal timi cu degree pakhat bantuk asi. Cu bantukin Chinmi mino siangngakchia lak zongah Chinmi holh `eng tampi a thiammi asi ti le Chinmi holh chaklei thlanglei holh a thiam timi cu degree pakhat bantuk a tu lio a si tuk rih lo hmanh ah a hung si cawlh te ding asi.Phuntungtu megazine chungin lakmi asi.