Lairam Cozah Vs Mizoram Cozah: Mipi Thim ding

Lairam Cozah Vs Mizoram Cozah: Mipi Thim ding  Van Lian Thang Biahramthok: Phunghram hi a phunphun in a um Unitary, Federal, Confederation tiah an um. Unitary chungah central nawlngeihnak a thawng deuhmi le a nem deuhmi tiah an um hawi. Federal zongah State Power a thawng taktak mi le Central a thawng deuhmi (Quasi-federal) phun zong an um. Federal sawh duhmi cu:  Federalism = Federal System = Pyidawngsuh = Ramkomh, a si ko. Kawlram ah Union = ramkomh tiah kan hman.  Pyine mahten uknak (self-rule) le Pyidawngsuh ah zapi hrom in uknak (share-rule) fonhmi kha Federal kalphung cu a si ko. Cozah phunphun an um i, Parliamentary le Presidential tiah a tlangpi in a um. Presidential chungah phunhnin in a um. Semi-Presidential tiah President cu min menmen (India etc..) a hmangmi le President (US etc)  nawlngeihnak sangtaktak a pe mi system zong an um. Politial Idiology zong a phun tampi a um lengluang ko. Cuchung ah kan i paih ve mi a si. America Constitution expert Prof David William nih US Congress nih Burma Policy kong hearing an ngeih lioah biachim an sawm i a chimmi cu: Kawlram Phunghram pi hi vawlei cung ka hmuhmi Phunghram vialte lakah a chiahbikmi a si, tiah a ti.  Nain cheukhat mifim nih Ralkap nih Political Role an lakmi vialte khi Phunghram chungin hlonh dih siseh law, 1947 Phunghram, 1974 Phunghram nak zongin a  let in a tha deuhmi Phunghram a si, tiah an ti ve thiamthiam. India Constitution cu quasi-federal system a si, tiah an sawisel. Tulio Kawlram phunghram hi strongly centralized federal system phun a si ve ko rua, tiah ka ruah. Cucaah India i, Mizoram le Lairam Cozah dirhmun tlawmpal tahchunh ka duh lengah mipi nih zeidah kan tuah lai timi chim ka duh. 1. Lairam Hluttaw Vs Mizoram Hluttaw: Chin Pyine Hluttaw caah Chin Mipi thimmi MLA seat (18) + (6) Ralkap MLA, zapi fonh seat (24) a um. Myone Township (9) kha MLA seat (2) cio an  phot i (18) a chuak. Ralkap nih 25%  Seat chiahpiah ding an i ham caah Lairam ah Seat (6) hi Ralbawibik nominate tuahmi an si lai.  Mizoram cu mipi thimmi MLA (40) a um. Lai Ramkulh in Mipi thimding MP seat Pyituh Hluttaw (9) + (12) Amyotha Hluttaw, zapi fonh MP seat ( 21) a um.  Pyituh Hluttaw MP seat kha Myone pakhat nih seat khat cio, Amyotha Hluttaw MP seat kha Falam le Tiddim nih seat (2) veve an tin i, a dang Myone nih pakhat cio an hmuh. Mizoram cu Pyituh Hluttaw caah (1) + (1) Amyotha Hluttaw, fonh MP seat (2) long an ngei. Tutan thimnak ah Lairam pumpi Legislators: MLA (18) + MP (21)= 45 legislators Lairam ah thim ding kan ngei. Ralkap (6) ka telh lo. Hihi Lairam pumpi ah candidate (80) nih an i cuh. Party (6) an um i, hehtiah an cawl. Nu (3) MP an i cuh tiah kan theih. Mizoram pumpi ah Legislators: MLA (40) + MP (2) = 42 legislators Mizoram mipi nih an thim ton.  Hihi Party (4) nih an i cuhbik. Nu hi MP candidate ah an tuah kan thei bal rih lo. MLA tu nu an tling bal cang. Nain tulio ah MLA (40) chungah nu pakhat hmanh an tling lo. Lairam Hluttaw nih Upadii tuahnak nawl (41) a ngei.  Mizoram Hluttaw nih (69) an ngei. Tuning ahcun hihi an i za ngai ko. US Pyine pawl nih upadii tuahnak nawl (18) an ngei, tiah ka theih. Palh zong ka palh kho. Self Determination tiah kan ti tonmi hi zei dangpi khi a si lo. Hihi a muru bik pakhat a si ko, tiah ka ruah. Tlawm cu a tlawm nain Lairam Thanchonak Policy zeimazat Laimi nih kan ser cang lai. Cucu Mizoram ca zong a tha i, Laimi ca zong a thami a si. 2. Lairam Cozah Vs Mizoram Cozah Thimnak ah Seat tambik teitu Party nih Lairam Cozah ser phun a si lo. Multy Party System cu kan hmang, nain US bantukin Presidential Form of Government in a kan kalpi. UK bantukin Parliamentary Form of Government phun a si loh. Cucaah Union President nih Chief Minister a nominate lai Chin Pyine Hluttaw nih a pawmpi lo cun CM a si kho lo. Voikhat reject nak nawl na ngei. Hluttaw member chung a silomi zong nominate a tuah khawh. Cu Chief Minister thimmi nih Minister caah a duhmi nominate a tuah lai, Hluttaw nih an pawmpi lai. Reject nak nawl na ngeih thiam. Border and Security Affair Minister cu Ralbawi nih an nominate lai. Reject nak nawl na ngei rih. Cozah Minister a zat a chim lo. India cu Kawlram bantuk si lo in Parliamentary Form of Government an hmang. Cucaah Mizoram ah teitu Party nih Cozah ser a si. Party President cu Chief Minister an si colh theo. Chief Minister nih a duhmipoah Minister caah nominate a tuah. Party President hi nawl an ngeih tukcaah lungton an i zuam. Ralkap bantuk in an tih ve ko hna. Cucu Hluttaw nih an pawmpi ve ko. Nain Minister zat an khiah bak. Minister (12) hlei thim an khap. Minister pakhat nih department pahnih thum an tlaih dih. Department (10) deng a tlaimi zong an um. Lairam ah Chief Minister cu Preisident (Kawlpa) nih nominate a tuah. Chin Hluttaw nih kan pawmpi rih hih. Mizoram ah Head of State cu Governor a si. Cucu India President ( Kala Pa/nu) nih a duhmipoah direct in a thim colh. Mizoram Hluttaw nih an el kho lo. Hi Governor hi Mizoram Hluttaw zong phiatting (dissolve) nak nawl a ngei. Chief Minister in Minister vialte pawmpinak a tuah. Autonomous District Council (3) zong hi panih a control dih.  Lairam zongah Central nawl an ngei tuk. Mizoram zongah nawl an ngei tuk. Federal System kan hman zongah Union Government (Central) nawlngeihnak hi a tlawm le a tam longlong a si lai, Ramkomh kan um chung cu el awk a tha kho lo, ticu theih a tha. Central nawlngeihnak um lo lawlaw kan duh cun Independence khel lawlaw a hau cang. 3.  Vote le Vote lo le Boycott: Na Vote lo citcet cun: 1. Ralkap Party (18) + (6) Ralkap = 24 hi  Ralkap Uniforum he form lo he Ralkap thiamthiam an si dih lai. Tucu (18) hi na duhmi poah rak thim ve, tiah cuhnak caan an pek rih. Na cuh lo cun Ralkap 'surrender' dihnak khi a si. Cucu dirhkamh a hau. 2. MLA (18) hi Chief Minister ah nominate an tuah lo zongah, (18) nih Chief Minister hmanh reject nak nawl an ngei. Cozah Phaisa an eihmuarnak phochuahnak nawl an ngei. Mipi kilvennak nawl an ngei. Tlaihhrem/mithah/porter/ kingciah timi vialte dirhkamhnak nawl an ngei. Lairam Thanchonak Policy ceihnak nawl an ngei. Cucu na thim locun na sung dih cikcek. Ralkap 'mandate' na pek dih he ai lo. 3.  20% MPs nih lungtlin ahcun Phunghrampi remhnak a su (proposal) dirh peng khawh a si. Parliament chungah dohthlennak na tuah khawh. Na kutdong na sawh khawh. Hacang rial in na dak hnawh khawh. Mipi na dirhkamh khawh. 20% MP cu tlin a fawi tuk. Nain na thim locun na sung dih cikcek. Ralkap a sungh na khan a si. 4. Ramtang ah Lai Pasaltha hna an um rih. Nunnak (100) nih an pek cang. Cheukhat cu an ruak hmanh fim awk tha lo in zu le va nih. An tuarinnnak a sau tuk cang. Ramlengah tingkhat kan um. Inn tlun kan dawh tuk. Cu vialte cu Cozah a thar nih a tuah ding a si. Ralkap nih an kan tuahpiak lai lo. Na thimmi kuzale nih an aupi lai. Biatung an dirh lai. MP/MLA na thim locun hodah a chim ne hnga? Kan sung dih cikcek lai.  Boycott: 1. Phunghrampi cu hohmanh nih kan duh cio lo. Cu caah dohnak puai taktak (refrendum) ah um-ek in kan doh dihmi a si. Nain a kan tei cikcek. Tho kho loin a kan tengh bak. Cucah Phunghram cu an fehter cikcek (approve) cang. Fehter nolh lengmang a hau ti lo. Voikhat fehter a za diam. Hlluttaw an thut ni bak, na duh zong duh lo zongah, na support zong support lo zongah, Kawlram pumpi ah a tak in a nung lai. Thimnak hi fehter le fehterlo he ai seng nenmmam lo. Zeitin kan cawl lai, titu ruah a hau. 2.  Kawlram pumpi Mipi 50% vote thla lo dingin na fial khawh bak ahcun na tei bak than lai. Cutin na fial khawh ding a si cun zakhat ah zakhat in support kan duh. Zeitindah na fial khawh lai rak kan fianter tuah uh? Zakhat ah zakhat in a si kho lo tuk timi a fiang mi a si. USPD hmanh mipi 23 Million ka ngei, a ti.  50% an tling cang. Cucaah zakhat ah zakhat in 75% MP/MLA seat kan sungh dih cikcek, sungh lai theih ciami Strategy thi, i tlaihnak cha cun, mipi sifah retheih tlawmpal tal maw a zia lai, tiah thimnak i cuh i a lutmi kha ka support deuhmi hna cu a si. Ziah tiah thimnak hi a donghnak ( end game) a si lo. A hramthok (internal struggle) kan thoknak tu a si lai. Hi a tanglei pawl na duh cun Vote thla: 1.  Dictatorship in Ukpek mi kan si i, democracy practics nak caah: 2.  Hruaitu thimmi thong an kan thlak piak, ramdang an tli dih i, hruaitu kan ngei ti lo caah hruaitu thar thimthannak caah: 3.  Kum (20) chung thimnak a um ti lo, (1990) lio vote thla kho vialte an tar dih cang, kha lio mino an hung puitling dih cang. Cucaah Mipi thinlung zeidah a lawh hrimhrim lakthan nak caah: 3.  Parliament chungin ramdaihnak caah dohthlennak (internal struggle) tuahnak caah: 4.  A umchun tuahnak nawl vialte hmangin mipi sifahnak retheih nemter deuhnak caah le thanchonak Policy sernak caah: 5.  Cozah Minister pipi ah kan i tel lo zongah Cozah kilvengtu le mipi dirhkamh taktak thimnak caah:  Nain Ralkap party na Vote citcet cun na vote thlakmi umzia a ngei lai lo, Pokpalong a si dih ko lai.   Ralkap Party: Ralkap Party in a dirmi pawl hi mipi an daw lo, mitha lo, an si kan tinak a si lo. An mah pawl hi 1993 in NC ah a kaimi an tam. Kum (14) chung NC an kai. Ralkap Phunghrampi a tialtu, a dirpitu taktak cu an mah an si. Cucaah Ralkap Party chungin an i cuh kha mawhchiat ding an um lo. Ralkap nih kha vialte thengthunh ah a hman cangmi Ralkap Party in an i cuh ne lo ah, zeitindah Ralkap hmai an khah lai? Theipiak thiam an herh. Nain Phunghram a tialtu taktak an si caah an mah nih an dirhkamh ve ding rian an ngei. Ralkap Pawl tazacuai lonak, SLORC le SPDC riantuannak vialte hlat khawh lonak, ceihkhawhlonak, thlenkhawhlonak dingah Phunghram an tialmi hi Ralkap Party nih fakpi in an dirhkamh khawhnak caah helechet an i zuam ve mi hi a si. Cu pawl cu thim ding a si lo.   Chin Pyine i Ralkap Party (USDP) tavuankhan cu Bohmuchoke Thurah Aung Ko, a si, tiah ka theih.  Kalaymyo ah Dah-Kah-Sah-Hmu a tuanbal. Zei sual lio mipi hlawhling taktak in a hrem/ a thah khawh caah Thurah tiah ralthatnak hi hmuh dawh a si. Paletwah in MP ah a dir ve. Cupa control cikceknak tangah Ralkap Party cu an um dih ko lai. Dr. Ro Uk hmanh Media interview an sianh lo kha. An kut an ke an tem dih hna.  Hi Ralkap Party bawi pawl an chimmi kha lusuk in support ko loah tuah khawh mi a um lai lo. Cu pawl cu kan thim ding kan herh lo. Tulio Chin State Chairman Bohmuchoke Hung Ngai hi Mindate in MLA caah a dir ve. A tlin zong tlin lo zongah a ra laimi Lairam Cozah CM caah timhtuah dawh in a lang.  Cucaah hi Ralbawi pa Hluttaw ah a dirpi mi poapoah mitha an si zongah, mipi a dawmi an si zongah, lusuk in support ko loah Ralkap Party thimmi nih zei an holh ngam lai lo. Coungress Party in CM Lal Than Hawla Hluttaw a dir ciamman cun a Party MLA vialte, Minister vialte zei an holh ngam tung lo. Uite eik chuak an lo i, daisup in an thu. Cucaah Ralkap bawi chimmi poapoah kha lusuk piakding MLA le MP thim kan herh lo. Rak thim citcet hlah. Bu chung na um cun bu Phunghram ningin  riantuan a hau. Meeting biachahnak le Chairman theihpinak lo in rian na tuan/ bia na chim sawhsawh kho lo. Na chim cun buu chungin chauh na hau men hnga. Dantat na hau men hnga. Ralkap Party zong Buu pakhat an si caah cu chung thu dir vialte Buu duh ningin an zulh dih a hau mi a si.  Cucaah thimnak ah Vote va thla ko, nain Ralkap Party vote va pe hrimhrim hlah,  Ralkap na vote nak chacun Boycott rak tuah law a tha deuh lai. Upatnak he, Salai Van Lian Thang

Kawlram thongtla pawl an chuahthan hna

January ,2012 Cacawn ningani ah Kawlram zumhnak ruang I thongtla pawl minung 651 cu an chuah hna tiah mizzima thawngla nih an tial.

Cu chungah cun 88 Sianghngakchia hruaitu Ko Naing zong aa tel ve. Cun Shian mipi Democracy party hruaitu U Khun Htun Oo zong Tawng- Ngu thonginn in an chuah mi ah ai tel ve.

Cun Kalay thonginn in an chuah mi hna pawl cu, U Sai Lun, Ko Myo Aung Naing, U Tin Yin, U Kyaw Aung, U Kyaw Kyaw, Ko Soe Yazaphyu, Ko Phyu, Ko Min Min Thun, Ko Nai Lin, Ko The Aung le Ko Ne Lin Aung hna an si. Zing Suimilam 11:00am in Kalay Vanlawng in an umnak hmun lei ah an tlun pi hna.

 Cun a hleice in Thoh-Hlan-Zii a rak tlaimi hna le Kawlram uktu bawi General a rak tuan mi U Khin Ngunt zong an chuah ve. Khin Ngunt cu kum 73 a si I a tar ngai cang. Thonginn in a chuah bakah a chimmi cu a tu uktu pawl le Daw Aung San Suh Kyi I an riantuan ning a tha ko tiah mipi sinah a chim. Cun kei tu cu ramkhel rian tuannak ahcun kai tel ti lai lo a ti. A cheukhat nih cun an chuah mi hna hi ramkhel rian ruangah thongtla mi an si dih taktak hnga maw a timi zong an um ve. Asinain zei a si paoh, thongtla hi vialte an chuah mi hna cungah lunglomh tuk awk a si ko. Mizzima 13,1,2012

Kahnak A karh Ruangah Kachin minung 4000 tluk Loije in China lei ah An Zam

Kachin News Group nih Loije Myo I a ummi Kachin mipi pawl cu Kawl ralkap le Kachin ralkap an I kah ning a fah ruangah China ram leiah an zam tiah an chim. I kahnak cu zaanlei suimilam 3:00pm tluk hrawngin aa awt I Kawl ralkap 200 renglo cu Loije khua ah an lut tiah mit in a hmu tu nih an ti. Kawl ralkap nih thah ding an phan caah an zam mi a si tiah an ti.

Hriam A Tlai Lomi Nu Pahnih  Cu Cozah Ralkap Nih An Thah Hna

Hriamnam zeihmanh a tlai lomi Kachin nu pahnih cu Kawl Ralkap nih, Kachin State Phakanh khua kam ah an kah hna. Mit in a hmutu hna chim ningah, Lawngawi Ying Wang kum (17) , Gawlu Sang kum (20) hna cu Nam Ya khua I market kai an kal lio ah an hna tiah an chim. Kachin News

Minung 100 Nih An Lungkhur An Zamtak

Phakanh khua pawng hrawng I lungkhur ah rian a tuan mi, minung 100 nih an riantuannak lungkhur in an zam tiah tiah Kachin News nih a tial. A ruang cu an riantuannak hrawng hi Kachin le Kawl Cozah an I kah a fah chin lengmang caah a si. Kachin News

Laimi Nih Kan Neihchun Wrestler Tial Thang Kong Tlawmpal

 Val Tial Thang cu Cyracuse City I a ummi  a si. Amah hi Cyracuse City School hna I Wrestling team ah chungtel pakhat a si ve.

A mah hi Hakha khua I Pu Tawk Cem Le Pi Mang Si hna I an fapa a si. June 2007 ah khan Malaysia in USA .Syracuse khua ah an phan. Cu tic un  New York I English holh a cawn lio ah , Tial Thang  nihhin Wrestling lentecelhnak nak hi  a hmuh. Cu lio ah cun H.W.Smith Sianginn ah tang 7 a cawn lio a si I, cu ka hmun in a rak I awtnak a si.

 A rak luh ka ahhin Junior Junior Varsity team pawl hi a rak phomh dih hna tiah Syracuse City I an Wrestler lutlai pa nih a chim. Cu le cangka in tang 9 ah an kai ter.

A tu ahcun a mah hi pound 152 a si I teinak zong tampi a hmu mi a si. Section III Championship ah teinak a hmuh ahcun State tournament ah ai vua ding a si. A mi thuat dan hi an uar ngaingai. Kan Lai paih le a dang phunphun cawh dawh a si I, a mah he aithua mi pawl nih a ralrin zia an thiam lo an ti. An hruaitu pa nih lung bantukin a hak mi ti tiangin a ti. A tu an I thuatnak zongah teinak a hmuh khawh nakhnga thlacamnak in rak bawm cio hna u sih.