Lairam Hi Kan Chuah Tak Lai Maw?

To.

            Pu Semuel Chung Kuh,

A kong: Meting sawmnak

           

Acunglei kong he pehtlaiin Lairam i a ummi saram upa vialte nih kum zakhat ah voikhat tuah tawn a simi centennial meeting  cu atanglei hmun le caan ah tuah a si lai caah upatmi nangmah hrimhrim pel loin na chuah khawhnak lai kan in sawm.

A ni………: 36, Fangah thla,  2011

A hmun : Vuihninh Tlang.

Ceih ding:Lai saram nih Lairam kan chuah tak lai maw? Hmaizahnak he,

James pawte

Chungtuantu

Lai Saram Bu (L.S.B)

Chinland

           

Kum 2001, fangah thla, ni 36 ah Lairam um saram upa vialte hna cu centennial meeting tuah dingin  Hakha peng, Vuihninh Tlang ah an hung phan cio hna. Inntek a simi khuanu khuapa hna nih lungtho le hmaipanh tein van hlapi he khua kutka in an rak don hna. An mandat sak ning hun zoh ah  an i timhlamhnak a sau ko cang ti cu a fiang. A liamcia kum 100 lio he tahchunh ahcun tlangsang pipi cungah chokhlei, dingdi le senri par an tlawm hringhran ko cang. Sihmanhsehlaw a khuati a that pah rih ko ca ah aa dawh khun ko, maw Lairam an ti. Hi meeting ah peng kip in a kai kho mi upa an zapi 260 an si.

           

Cheukhat upa hna nih cun hi meeting nih hin kan caah hlawhtlinnak an kan chuahpi taktak hnga maw ti ah lunghrinhnak an ngei.Cheukhat nihcun Lairam le Lai saram sining hun i purhdah tikah a chia lei panh dawh kan si ko tiah lungdong ngai in an um. Sihmanhsehlaw upa zeimawzat nih cun hi meeting hi hmual a ngei lai. Tunmernak a kan pek hrimhrim lai tiah ruahchan nak nganpi an ngei.Zeipaoh a si ah thaizing cun an meeting cu thawk a si cang lai.

37. Fangah thla 9:00 a.m          

Lairam saram upa vialte hna cu Lai saram lak ah pa bik a simi Pu Vakok philh lonak inn nganpi ah an hung thu cio hna. An meeting haotu hi Rev. Dr.  Robert  Chimbu  a si. Ramkip fonh saram aiawh in Dr.Job Sakuh an sin aa tel khawhmi nih an meeting a hlunghlai ter khun. Chairman nih   lawmhnak bia a chim dih hnu ah theih hngalhnak  an tuah.Dr.John Khacer nih hramthawk nak thla a cam. An meeting ah pumsa in a tel khoti lomi  tleicia pi le pu, nu le pa hna hmanizah upatnak he zapi dir in ZBC No.168 kha an sa. Cun John Kinglang (a hngawng ah uico hruainak thirhri in aa tem) nih  kitha a tum i Martha Pitlung (A tai deng tiang a tlekmi Lai skirt aa hruk, a tawtte a lang pah) nih Chankar lakah timi hla a sak.

         

Chairman:Kan fa le nih nan aw nan aan in nan kan au piak caah kan i lawm. Khah! kan meeting cu kan thawk cang lai. A liamcia mi kum 100 lio mi ka meeting rikhawt hun rel ding a si ko nain caan kar lak ah relrem lonak a um caah ngiahthiam kan hal hna. Kan chairman hlun a fello ka ti duhnak cu a si ruam lo hih! Zeipaoh  a si ah, nihin kan dirhmun  hi a liam cia kan rikhawt a si ko lai ti ruah buin a ra laimi kum 100 chung kan nunnak caah lung thin tak tein kan ruahnak kan cuah cionak lai kan sawm hna. Meting chungah a ngu sualmi kan um um ahcun Muko Mekazin ah nan min chuah a si lai.(Hmaitlar ah a thumi upa pahnih cungut hram an hun i thawk)

Pu Kithuan:(Kalaram ah LLB degree a lak hnu ah Hakha Peng ah sihni a `tuan liomi a si. Meeting phunphai ah hmasa bik ah bia a chim lo ahcun zaan ah aa hngilh kho lo)

Upat hmaizah awk a tlakmi nan hmaika ah kumpi kumkul chung ziknawh sorry chun-mang ka manh mi ka vun chim lai. Kan Lairam thlitu hran ka zoh ah saram umnak thathi kan ngei ti lo. Tuhmawng le ram kung vialte saam le thiam an si dih cang. Hlan lioah angki leng he kan tlungkal kho nain nihin ni ahcun aircon lo cun chimpit kan si ko cang hih. Thil man nih van a tawng tung. Kan ram hi kan chuahtak lo hmanh ah ramdang  pem cu kan hau ko cang.

Pi Thing Bungkhong:( B.Ed degree a lak hnu ah siangsangruun ah ca chimtu asi. An pa Malaysia ah a um). A si hrim ko. Cencerh rumro  in kan channak thlapi thla kul a si cang. A poi bikmi cu market zongah cawk awk a um lo hi a si. Duh Zaam (a fapa upa bik) a pi le a pu cu an lung a dong  ngai ko cang.

         

Pu Sazuk:(MBBS a dih hnu ah Vuichip Tlang  ngaktah cawmnak ah ngandamnak lei lutlai a si)

A cunglei i kan nu le kan pa nih an cal bo le bo loin an hun chimmi hi ruah caan a cu ko cang. Kan siinn ahhin mizaw an karh chin lengmang.Kuan fang le mei hmapu ko hi an tam. A damlomi zohkhenhtu caah tintan kan pekmi hna nih an kan pem tak lengmang hlei ah kan sii-ai a simi thingram hram le par vialte an tlawm hringhran ko cang. Cun an va le ramdang  i a um mi nupi cheukhat hna nih pa dang sin in an ngeihmi fale ko hi an tam i atu hi Jubilee tuah khim te kan si cang. AIDS zong nih kan miphun a hlanh pah cuahmah cang. Sii-ai tha cawk khawhnak ding le sii lei fimnak cawn ah ramdang kal kan hau ko rih lai.

                                      

                                           XXXXXXXXXXXXX

Cuticun chuncaw ei caan a hun phan. Zanlei 1:00p.m ah an meeting thok ding an si ko nain Chairman le upa cheukhat an phak khawh rih lo caah 1:30 p.m ah an meeting cu an hun domh than.

Chairman: Kan meting thawk caan kan theih lo caah si lo in herh pang dangdang kan ngeih caah kan hun tlainak a si. A ruah zia kan thiam ko u law tiah kan ngunkeng min in kan nawl duh hna. Khah! Chunhlan meeting ah a ngu rih lomi nguh caan si lo in piangpai deuh le fimkaan ngai in kan meeting cu kan domh hna lai. Ruahnak thatha he bia a chim cangmi pawl cungah lawmhnak chim awk ngaingai ka hngallo.

Pu Saihrem: (Saram kong ah Ph.D tiang a hmumi a si.)

Atu hi ti chung tlong saram lu kan tlawm hringhran cang. Kan thinghram le lungto nih kan vawlei a fehter khawh ti lo caah ti nawi lak rumro  ah khua kan sa. Cucaah  lungfim caan kan ngei ti lo. Kan mit a that ti lo caah hnachet tiang nih mithman benh kan hau ko cang. Pu Zubui ‘Lai Vision’ mithman dawr ah zapi kan kal kho fawn tung lo. Cun fa ngei ding in vacek ah a kal mi kan nu le hna tlun in an hlam ti lo caah kilkawitu ngei lo ngak tah kan tam ko cang. Lairam ah nau ithen ngam a si ti lo caah pum lawng loin a um mi kan nu le kan nungak vialte cu Kawlram lei ah hmunhma an khuar chin lengmang cang. A poi bikmi cu Kawlram ah aa then mi kan fale nih Lairam hun kir an zenh hringhran mi hi a si. A caan caan  ka ruahmi cu Lairam ah hiti i benh ko hi caan sau caah thathnemnak a ngei hnga maw ti hi a si.

Pu Sathar: ( Lai bawnbok lo a tuahmi in Malay ah kum nga a um hnu ah khual dang pem Lai saram caah Lai nunphung le laam a chimtu a si).

Ka hung dir ve lai, Pu Hrem he bel kan vun i kalh hnga dek maw? Asi ah kan ram hi umnak a tha ti hringhran lo maw? Remh awk a tha ti lomi Rev. Peter Saphu Khrihfabu  maw kan lawh ko kun cang a tu hi! Pawcawmnak ruah ah ram ngei lo bang kan vah kan veih hmanh hi zei ti awk tha. Tulio  vawlei nih a dirpimi Ecology hi tah kan ram nih kan dirpi ve hnga lo maw? Fimkhur in kan tan rual ahcun sermi thil dang he zong kan i rem ko hnga. Ramdang a kalmi hi kan thazaang an si cuahmah ko hih. A um mi um ve ko usih.

Pi Khuaivah: (Linguistic lei a thiamsang ngaimi a si. Lai saram nunphung le zatlang `hanchonak bu ah thazaang a chuah mi si loin thazaang a la ngaimi a si. Hmai thla cun ramdang ah va a ngei cang lai)Um, Pu Thaar chimmi hi dangkhat cun a hman lo a ti kho lomi kan um lo tiah ka ruah. Pu Thar biamei lamh ah hung ruat hlah u law. Kan ram hi hiti hrimhrim in um uh kan ti ahcun chan nih a liam takmi cauk chung  grammar cheukhat nunphung ah kan chuak ko hnga ta. Sihmanhsehlaw lamdang a um ve komi, kan caah san a tlai ko mi cu lungdong ngaiin tapchak ah chunzan hlan aa kual ko mi chizawh bang….Pu Chizawh: (A hmai a sen ngai. Pension a la cangmi a si) Pumpak in kan i phozar hi zohrem a si lai lo dah kaw!

Pu Fikfa: (Vuichip ngaktah nih an cawmmi asi)A si. Pu Chi chim mi an hman. Kan pu (Vuiphip Doctor) he nan bia iang i khat hlah ngat u. Min fangkheh in kan i ti kan i tau sual ahcun pingpang kan su…

(Pu Kawngsang a hungdir colh. Passport loin ramdang a kal i vanchiat ah an run kuat hnu ah a pa mithmai zoh in Vuichip ah rawl um tlaitu a si)

Pu Kawng: Fikfa le Kawsang hi chuahkehnak kan hun zawt riangmang ah cun arsa ei ti kan si. Hrinsor kan zoh ah pengkhat tlang khat kan si hih!  Ka tanh hlei ti nak cu a si lo. Hiti in kan mah le kanmanh kan i suk kan i khawn  ruangah kan kut chung a um cangmi zong kan tlolhmi a tam i al pei cang tiah. Kawlsang Theology 5:15 fiang ngai in kan hmuh khawhmi cu ‘zeitin tiah pakhat le pakhat lung i hmuh lo a si tikah dawtnak hram catphut’ ti pei…

Pu Utlak: (A hmai a sen ngai. A tu le a tu Khrihfabu aa thialmi a si) Kei hi a keng a phar ai tiah nan ka thlanglamh men hnga. Ka duh lonak ah cun phuhlam tiang ka ngamh ve pei tiah.

Pu Thankawng sakap: (Ca lei le vah lei edita a si. Nungak a ngeih le ngeih lo aa fiang lo).

Pu tlak, biachim ahhin chimtung le chimphei a um. Chimcia, chim hnulei le chimchung le chim telaimi zong um dawh a si. Um! Atu hi Lai saram sianghleirun a kaimi kan lo ko cang hih. Chairman, kan ngaithiam ko, zei kan chim, zei kan tuah ti kan i hngal lo hih! (Zapi an hung ni)

Pu Thlai Berh: (Mi `hatlonak phozaar hi a pahrang pakhat a si ve. A dawh lo ngai caah a fanu pakhat nih cun ka pu a ti)Atu hi ti kan chim ah tlang a chimmi nan um.  Lamphawk in kan kal tiah ma nan i ruah! A ce..A ce.. Pu Chairman zong kha zeidah na tuah. Hiti ngai hin cun kan meeting dih in siapi a liam dingmi kan tam ial lai hih.

Pi Tuangtuan: (B.Th a dih cang. Zumhnak in fimnak kawl aa timmi a si i ramdang chuahkhawhnak ah cun Hell ram zong va tlawntak zong a ngamhnak kong a sermon theu tawn).Pu Berh chimmi cu thil hman ngaingai a si. Agenda ah hun in kal pi hna ning law…kan ram hi kan fimthiamnak a niam ko rih. Kan vawlei sining kan theih hmasat lo ah cun thlai kan vui kho hnga mei. Seh thilri lei cawnnak kan ngeih lo ahcun kan ram ah sehthawng a leng lai lo ti nak a si ko. Nihin ah seh lo ngai in aho tal an ding an ei ti ruam lo hih. A niam a sang a um hlei lomi fimnak hi kan herh dih ko hna. Kan ram ah hin fimthiam cawnnak sianghleiruun a um lo mi bel hi a poi ko. Ram dang ah sianginn a derh kho ding kan si lo caah ramchung ah kan derh a hau lai. Cun liberation theology kong hi a caan um seh law ni hnih thum cawnpiak ah nan tha men lai dah ka ti!

Pu Vawrvok: (Lairal lio ah lusam hngal loin a zam mi pu Sihal tu chin a si)A si ngai ko. Kan saram umtuning hi kan zoh ah khua dang pem kan unau hna le Lailei um unau tonnak kan ngeih tikah i thleidan deuhnak (social gap) a ummi hi a poimi lakah poi hmasa a si. Miphun dang zohchonak le tanglamhmi ( mental colonization) kan si kan timi zong duhsah tein kan thlau pah cang. Zeipaoh siseh law kei cu ramdang chuah cu ka duh hrimhrim lai lo hih. Sahluk Dictionary ah kan hmuhmi cu Lairam (min) Lai saram umnak dawh (min fianh) rualrem, tanrual ti pei a si kha!Zan lei 5:00 p.m a si cang. Chimtu an um ti lo.Chairman pa nih a mit hnuai pah in

Chairman: A chimtu nan tampi rih ko lai nain sau deuh kan chim sual ah cun kan nge kan i den sual hna lai caah  hi vial hin  kan bia fun tuah hna u si law! Nan chimmi hi vun sur taktak ahcun ruahnak pahnih a um. Hnatlak pitu a um veve. Hmanung deuh a simi ‘Lairam cu kan chuah tak lai lo” timi me pek hmasa a si  lai. Kan zapi 260 kan si. ( mee cu an hun phawt). Cu lio ah cun upa cheukhat hna cu an thin mei linh in a lin. Biachimtu an hun tuak tik hna ah Lairam chuah tak a duhmi an tam deuh fawntung. An thin a phang. An thlanhripi nih a peih hna. Thlaza lawng an cam ko cang. Maw Bawipa, kan ram hi kan caah na chiahmi ram a si. Maw Pathian kan kal tak hin sawh hlah tiin…(mee cu an hun rel dih tikah mee 127 a hung chuak).Kan lo ko cang. Maw Lai vawlei kan in dawt ko tung. Na caah santlaihnak kan ngei hringhran ti lo maw? Riahhmun ngei loin chiatserhmi bang maw kan vaih ko kun cang lai. Maw kan nunphung dawhdawh hna, maw kan phun min cawisangtu kan laam le kan hla hna, maw kan farkung, chokhlei, senri dawhdawhna kan ram lo cun na ngam ngai hngamaw. Kan zanmang  hmanh ah kan manh nam tung lo. Thlalangawng in a langmi hring dildel fing le tlang an hun zoh tikah an celh hrim hrim ti lo. An hmai ah an mitthli aa hrual. Khua an hmu kho ti lo.

A sinain….Asinain……

Me cu an hun rel dih tikah Lairam cu chuah tak si ko seh a timi nih mee 125 an hmuh. Mee pek lo in a um mi upa 7 an si. Cuticun Lairam cu Lai saram nih chuatak si hlahseh timi nih an tei hna. A donghnak ah A Hmeram Laitlang hla an sak dih hnu ah an meeting cu zaan 7:30 ah a dih.

Cu ti cun Lairam cu Lai saram nih an chuak tak lo.