RO ṬHA CHIATU KAN PA

Rev. Van Biak Nawl

Cangthim: Hebrew.13:7; Pathian bia a rak inchimtuhna nan hruaitu hmasa hna kha philh hna hlah u. Zeitindah an nuncan kha a si i zeitin dah an thihning a si kha ruat `han u law an zumhnak kha cawng hna u.

Biahmaiṭhi

Laimi nih kan pupa hna kan ti tikah Biaknak lei hruaitu hna kha ka chim duhmi a si.  Pathianbia a kan chimtu a kan hruaitu hmasa kan pupa hna hi philh awk an ṭha lo. Kan pupa hna  nunning ahhin Rev. Dr. David Van Bik, nunning hi  vun zoh ṭi usih ka duh. An tuahṭuanmi le cawn awktlak an nunning/sining pahnih hi zoh tuah hna usih.

1. Zeitindah A Nuncan

1926 July 28 ah Tlangpi khua ah a chuak. A pa Saya Chawn Tur le Pi Rent Ṭial an si. Sianginn kainak hi tang (4) tiang Tlangpi ah a kai. Tang 6-7 hi Falam khua ah a kai. 1949 ah hin Cherrapunjee, Assam state, Indai ah Serampore Matric (Tanghra) a rak awng. 1956 April 23 ah Pi Moble Zo Kai he an i `hi-um. M.I.T. ah B.Th. a rak awng. Hihi Center Baptist Theological Seminery, Kansas U.S.A. nih degree an pekmi a si. Cun Berkeley Baptist Divinity School atu ah cun (American Baptist Seminary of the west) Califonia  ah M.A. degree 1959 ah a rak lak. A rak kir i, 1959-1963, Zomi Theological College (ZTC) ah Principal a `uan. 1963-1976 tiang Lai Baibal a let. 1978 ah United Bible Society nih an chuahpiak. 1990-1996 tiang Chin Christian College (CCC) Principal a `uan. Cauk uk 30 a `ial. May 21, 1994 ah American Baptist Seminary of the west nih Honorary Doctarate, Doctor of Divinity (D.D.) an pek. August 19, 2000; 9:05 On Saturday ah Frederick, Maryland U.S.A. ah hi vawlei a nunnak in a kan liamtak. A dawtmi a thaisung Pi Moble Zo Kai, a fale Steven, Eric, Rollin, Kenneth, Alice le tu 11 a roh hna. H.B.C.  zapi/zaraan thlanmual ah an vui. Hihi a tawinak in  a nunning ka hun langhtermi a si.

2. Zeitindah A Thihning

Mi pakhatkhat  a thih tikah a zawtnak zeidah a si? Zeitin  dah a thihning a si? ti hi hal a si tawn. (tc., Zawtnak pakhatkhat ruangah maw? Zudin ruangah maw? AIDS ruangah maw? Drug (sii) ruangah maw? Suicide  maw? Accident maw? Ralkut in maw? tbk.) Zeicahtiah a thihning hi zawtnak ṭhalo, asiloah pulthih maw? Sarthih dah? ti kha (a ruang) theih duh a si tawn. Zeicahtiah cun minung kan tuanbia hi kan thih ni ah a lang.

Kanpa  David Van Bik hi “Thih tiang zumhtlak salṭha” (Bia. 2:10) bantuk in Pathian zum bu  tein a rak thi. A thihning hi  huhaam le rumra a ngei tuk hringhran. A chuah ni nakin a thih ni ahhin sunparnak a hmu deuh ti usih law kan palh lem lai lo. Zeicahtiah a nun lioah zei bantuk minung dah a si ti le zeidah thliṭha a tuah ti kha a thih ni ah bia a chimtu a si. Kan pa  hi zei tluk in dah a ruak a lum ti cu zapi theih a si. Mi cu an thi cio asinain amah tluk in Laimi nih an sunhsakmi ka hmu bal lo. Atu in hnulei ah an um rih lo. Atu in hmailei zongah an um ka zumh ti lo. Ramdang riliral in Lairam  ah ruak tlunpimi  hi an um bal lo, amah pakhat lawng hi a si. “Dr. Van Bik, bantuk in kan Laimi ruak a sungmi an um bal lo”. tiah Dr. Robert Thawng Hlei nih a ṭial. Dr. Sang Awr zong nih, “A ruak nih vawlei a `ol i, kan Laimi dihlak in upat pek le thlah a si, a ruak nih a minung sinak fiang tein a kan chimh,” tiah a ṭial ve.

3. Zeitindah Bia A Chim

Chan le caan he aa tlak in nihin tiang a hmaanmi bia roling  a rak chim tawnmi lak ah, kaa cinkenmi hna cu:-

a.  Laimi cu thih hnu ah pangpar awih kan hmang: A sullam cu kan nun lioah dawt ṭung loin kan thih hnu ah aa daw tuk pungsan in va ṭah asiloah a nun lioah thangchiat rem lo huat `ung i, a thih hnu vial ahcun thang`hatnak, lawmhnak, le upatnak bia va chim phun khi a si.

b. Pastor hi Driver he  aa lo: Mi pakhat cu Pastor ṭuan a duh ahcun Baibal a cawn hmasa (Baibal sianginn a kai hmasa) a herh hrimhrim. Ṭhate in a cawn i a-awn hnu ah degree a hmuh. Cu hnu lawngah pastor cu a ṭuan khawh. Cu ticun mipi kha Baibal duh ningin lamding lamhmaan ah a kalpi a hruai khawh hna lai. Cu bantuk in, mi pakhat nih Driver si a duh ah cun motor kong kha a cawn a hau ve, a thiam i, a theih a hngalh dih hnu ah awnnak license a hmuh. Cu hnu lawngah  Driver kha a ṭuan khawh ve. Cu ticun maw`aw kha ṭhate in a mawngh khawh caah mipi kha lamtluang tein lamding lamhmaan ah a kal pi khawh hna. A mawngh lawng thiam a za lo, a chim lawng thiam a za lo. Baibal, Pathian kong (Theology) hi cawn hrimhrim a hauh bantuk in, Machine, Maw`aw (Machinist) hi a cawn hrimhrim a hau ve.

Cucaah  cun cawnnak tlamtling a ngei lomi pastor nih mipi a hruai tikah buainak (piah-ta-naa) a chuak khawh bantuk in thiamnak taktak a ngei lomi driver nih maw`aw a mongh  tikah accident (khawndennak) a chuak kho. Mipi buainak le khawndennak a chuahtertu si lonak dingah cawnnak le thiamnak hi a herh tuk. Nihin ni ah micheukhat nih cawnnak a herh lo phun in an chim. A si lo Laimi nih a lamkip in cawnnak kan bau tuk rih. Cawnnak hi a biapi tuk. Political (Ramkhel) leiah cawnnak sang a ngei lo minih cun ram `hate in an hruai/an uk kho lo. Religion (Biaknak) lei zongah cawnnak sang a ngei lo minih cun mipi daite in an hruai/an kalpi kho ve hna lo.

c. Laimi cu rum kan celh lo: Laimi cu kan rum kan ngeih deuh cun; kan hnar a puar, kan i uah kan i porhlaw. Kan bia hi a ngan i mi zei ah kan rel hna lo. Micheukhat caah cun an rumnak kha  zudin sa einak le nuamcennak hna ah kan hman i, kan chancheu hlan ah kan thi, tlangval le nungak dawh hna zong mifim cathiam a site lai dingmi hna nih rawhralnak le thihlonak an tong. Mino tete hna nih chanṭim hlan ah an thih an loh caah telefa zong an ngei manh ti lo i, an ci a tlau. Cu lengah inn le lo, ngeih le chiah zong  a ṭet i, hram a pelh. Kan rum deuhdeuh Pathian kan philh deuhdeuh kan lotlau deuhdeuh tiah a rak ti.

d. Van le vawlei an i hnam: Hi bia hi kum 100 tlinnak Centennary puaipi Zarhpi zingpumh ah a chimmi thawngṭha a si. Hi ni a sermon hi H.B.A. nih cassette tape phel in an rak chuahpiak.

“Japan ram ihphah ṭhabik cung i ka ih le Lairam  saphaw ro cung i ka ih hi, kaa  hngilhning cu aa khat ko”. Japan ram a tlawn i a kir hnu a chimmi bia a si. Hi lioah hin Japan a hawipa nih suimilam a ṭha ngaimi laksawng a `henh”. A man zeizat dah a si? tiah ka hal. A ka lehmi cu, “David Van Bik a man kongah na lungrethei hlah! A caan hmaante in an chimh khawh ko lai,” tiah a ka leh ti zong a rak chim.

Mirangholh innpi chung luhnak tawhfung ṭhabik pakhat cu Dictionary hi a si. English - Chin Dictionary i biahmaiṭhi a ṭialmi a si.

4. Zeitindah An Upat

M.I.T. nih Kawlram chung ah, Bawipa rian ah zumh awktlakte in Pathian salṭha a si tiah an thim hna i, kum 25 in a cunglei, kum 35 in a cunglei, kum 45 in a cunglei upat  pekmi ah, voi 3 tiang in ai tel.

M.B.C. nih an pekmi a sangbik upatnak Fellow of Distinguished Christian Service (F.D.C.S.) hi Kawlram pumpi Baptist kum (175) tlinnak Civuipi ah an pek. Hi laksawng hi mi sawhsawh nih hmuh khawhmi a si lo. Laimi lakah amah lawng nih a hmuh.

H.B.A. nih a ramchung a rian`uantu lakah kan pabik na si, suttung bantuk in kan i ngatchanmi na si an ti i, a rian`uannak kum (50) a tlinnak Jubilee zong an tuahpiak i, upatnak roca an pek.

C.A.C.C. nih Laica, Laiholh, le Lai nunphung ah kan pacem na si, Baibal na kan lehpiak, Dictionary na kan ṭialpiak, Cauk 30 na kan ṭialpiak, Laimi lakah cauk tambik a ṭialtu pakhatnak le B.Th. hmu hmasabik na si tinak upatnak roca an pek. A dangdang Association, Area le Local Churches hna nih an pekmi upatnak roca hi a tamtuk  rih kan ṭial cawk lai lo. (Van Bik Museum ah hin an chiah dih hna zohkhawh le hmuhkhawh peng an si.)

5. Zeitindah Minih An Hmuh/ruah

David Van Bik an hmuhning /an ruahning cio a ṭialmi hna tampi lak chungin a cheukhat anmah ṭialningte in ka rak ṭial ve. Cu hna cu:-

Mirang Holh

·         Do not forget that you Lai people have a precious gem. The gem is Dr. Van Bik.     {Dr. Johnson}

·         The kingdom of God on earth has lost a patriarch of the Baptist work in the Chin hill of Burma, a Biblical and linguistic scholar, and a mentor of younger Chin leadership. I have lost of a friend of 43 years. {Ken Blazier} (Hi pa hi U.S.A. sianginn a kai lio i a hawikom `habik pakhat a si).

·         Some of you may laugh at me, but I would like to call him the Shakespeare of the Chins.  {Rev. James Sangawi}

·         David, In my book, is one of the really Great ones! {Paul Clasper}    

God had greatly blessed the chin people by sending to them someone of the quality of David Van Bik.  {Rev. Lloyd G. James}

·         David Van Bik was not only a theological educator for the Chins, He was also a man who wanted to improve the living standard of the Chins. {Dr. Cung Lian Hup}

·         One of  the Church Fathers for the Laimi (Chins) and the Churches in Myanmar.   {Rev. Lal Pek Lian}

Laiholh

·         David Van Bik cu, chanthar Laimi tuukhal ṭha a si. {Dr. C. Duh Kam}

·         A pum in kan thihtak hmanhsehlaw, a rianṭuannak cu a nung zungzal lai. {Dr. Sang Awr}

·         Dr.Van Bik, nangcu; Baptist kan zumhnak Sangphawlawng aa hrennak thir cangai bantuk a tlaitu na si. {Rev. A. Za Khar}

·         Na `uanmi roling rian, Vawleicung mi ropui hna thlanmual an liamning na hluan. {M. Dar Zing}

·         Laimi pasalṭha, Laimi nih an lawmh. Laimi caah na rian na lim, Laimi nih Ro ah an chiah. {Steven Ni Kio}

·         Laimi lawng si loin Lairam hrimhrim a dawtu pa upat hmaizah awktlakbik mi. {Dr. Hnuh Thang}

·         Simple living, high thinking hi nangmah nih na nunnak in na langhter. {Dr. Lal Uk}

A mah Philhlonak ah tuahmi pawl lakah minlang deuh hna cu:-

1). David Van Bik Foundation (D.V.B.F.),

2). Van Bik Museum (H.B.A. zung Hakha),

3). Van Bik Memory Baptist Church (Kalay),

4). Van Bik Library (Thantlang), le

5). Van Bik Mini Hydro Project (H.B.C.)

Hi lengah hin amah min bunh in rian`uannak tete tampi a um ko. Hi hna hi zapi nih kan theih deuhmi in ka vun langhtermi an si.

Biafunnak

Vawleicung fimthiamnak innpi chungah luhkhawhnak tawhfung Dictionary le kan thlarau zungzal nunnak lamhruaitu Vancung luhnak tawhfung Lai Baibal Thiang a kan ṭialpiaktu a si. Cu lengah cauk tambik a kan ṭialpiaktu a si. Kan ram kan miphun caah roṭha tampi a kan chiahpiaktu a si. A nunning, a thihning, a zumhning kan zoh tikah Hawihlei, cungcuang, a zik, le teitu na si tiah Rev. Lai Ram Hu nih Hla a phuah. A hmaan tuk ka ti. 

Hruaitu ṭha hi, philh an har; Mifim bia hi, ro a ling.

Fakpi i pulpitcung in aunak nakin, thilṭha tuah hi a aw a thang deuh.

Lamram kong tampi theih nakin, Lamram caah tuan a ṭha deuh.

Nihin Lai mino hna nih kanpa Dr. David Van Bik a nun ah  cawn ding tampi kan ngei. Zeitin dah a nuncan kha a si i, zeitindah a thihning kha a si ti kha ruat ṭhan usih law a zumhnak kha cawng in, kan ram le kan miphun caah a lamkip in roṭha tampi a chia khotu kan si khawh nakhnga i zuam cio usih.

Hruaitu fim hna cu van i arfi ceu bantuk in an ceu lai  i, Lamding ah mizapi a hruaitu hna cu zungzal in zungzal tiang arfi bantuk an si lai. (Daniel.12:3)

Ref:

1). To God Be The Glory (In memory and Honor of David Van Bik).

2). David Van Bik Golden Jubilee Magazine.

3). Rev. Dr. Van Bik, Deirel Cazual; Posted On July 17, 2011.

4). HaKha Tipil Khrihfabu Tuanbia (copyright@HBC February 2008.

5). Lai Bible Thiang.

6). Amah Chimmi (Sermon, Lecture, Seminal, Bible conference tbk.,) chungin..

7). English - Chin Dictionnary Biahmaiṭhi.