Ni Bang Kan Semnak Ai Khat Lo (part-2)

Khua lei ka chung le he saupi kan i el lengmang. Ka chung le nih biaknak dang a si ruangah a duh in an duh hrimhrim lo. A donghnak ahcun nanmah nupi si lai cuh,keimah nupi pei si ko lai cu,ka thu ka nawl si ko nanmah nih nan cawm lai loh,keimah nih ka cawm ding mi si ko ka ti ve hna.

Malaysia dirhmun le sining ahhin anmah miphun pawl he ikomh hi ralrin ngai hau tiah ka thinlung tein ka ruat tawn. Kei zong kai ralring peng,lungfim tein a sinah bia ka chim zungzal. Biaknak kong hrimhrim hi ka chim bal lo.Amah zong nih a chim bal lo.

Kan iduhdawtnak cu kumkhat a reng ti lo,kan sining le thinlung vialte kan ithei dih cang.Kan karlak ah zeithil hmanh a tlam tling kho lo ding a um lo. Zeitik caan poah ah ka ngaih le van ra ka tiah cun amah nih mawttaw a ngei lo nain a ttapa mawttaw in a van ra tawn. Amah he kan iduhdawtnak ruangah a chungkhar nih hnahnawhnak an pe bal lo.Nain, keitu cu ka chung le he kan imawhchiat tawn kha mu.

Nana nihcun kan iduhdawtnak hi a tta le pa,a u le sinah tlamtling tein a rak chimh dih cang. A u le tu hna nihhin keimah ton dingin an rak zulh tawn. Cuticun an thinlung a ttha i "duhdawtnak"cu midang nih an theih zongah a poi lo an ti. Keitu nihcun mi sinah kan iduh lo,kan i uar lo tiah kai pheh tawn_kan idang ngai.

Kan karlak ah thil a si kho bak lo ding pakhat a um_Cucu biaknak pakhat ihrawm hi a ngah lomi a si.

An chungkhar tein keimah hi Islam ah lut dingin an ka lem lengmang. A hawi le nih siseh,a tta pa nih siseh Nana tthit na duh ahcun Islam ah na luh a hau tiah voitam an kan chimh cang. Pakhat pa ai capo ngai mi Tamtam kan timi le bang nihhin cun anmah Islam pawl thlacam lai ah khin " Hi..Pating,mari mari samaiyang" tiah a niih bu khin a ka sawm tawn.Keimah biaknak thlennak dingah an chungkhar tein an izuam ti kha fiang tein ka hmuh tikah ka thinlung hi a rak fak i Pathian sinah mitthli he thlaza ka rak cam tawn.

" Bawipa anmah biaknak chungah ka luhnak hnga lo na thlarau thianghlim in ka umpi peng ko.Anmah tu hi nangmah an in hngalh khawhnak hnga an thinlung thleng ko hna tiin mitthli he ka ih lai tinte thla ka cam tawn".

Cuntincun ni thla an liam,kum an liam i ruahnak le thinlung zong a hung sang chin lengmang kan ti ko lai cu_ dawtnak sawhsawh lawng sitiloin tthitumhnak tuah cang ding in kan duh veve cang.

A nih Kalang ah um i kei hi ka rianttuannak Nilai ah ka um. A langpar cun phone cu kan ichawn "Pating zeitikah tthitumhnak kan tuah lai" tiah a ka ha tawn.Ka thei ve lo,nangmah manh tik poah ah si te ko seh ka hei ti tawn ..Nangmah manh tik poah ngah ko a ka ti ve..A nih nihcun rianran deuh kha a duh mi a si. Kan chuah ni thla hi ai khat tuk. October 21 niah a chuak veve mi kan si i tukum October 21 ah tthitumhnak cu kan tuah lai mu tiah ka leh.

Thla thum te lawng ai duh ai dang. A nai tuk cang caah biatak tein khuaruah cu a hau ti ka van ifiang ngai. Nana zeitindah tthitumhnak cu kan tuah lai tiah ka hal tikah ka theilo ti vial lawng a ka leh. A ka hal ve tikah ka theilo ti vial lawng ka leh khawh mi a si ve ko. Zeitindah tthitumhnak kan tuah lai tihmanh ai fiang rih lomi duhdawtnak nih fak tukin pei kan nunnak chungah hmunhma a rak khuar cang cu.

Annih chung hi anmah biaknak Islam ahhin ai zuam ngai mi le ai biatak ngai mi an si ve.Abikin ka darling le bang hi cu ai zuam tuk lawlaw mi khi a si.

Kei zong ka sikhawhtawk te cun Jesuh khrih cu ka thinlung dihlak in ka zumh i ka cohlan mi le ka ttanh i amah lei karhlan chinchin kha kai zuam mi a si zungzal ve.

Tthitumhnak ding kan timi ah thlakhat lawng ai duh cang.Voikhat cu zan suimilam 3:00am hrawng ah si.Sms rin thawng nih a ka tthangh.Ka mit ka van hnuai ka van zoh i ka van rel. " Pating,tthit na ka duh taktak ahhin cun Islam biaknak ah na luh i na lung nai thlen a hau.Zeiruang ah hme kan biaknak hi ai dan tuk hnga...Hikong ka ruah fate mitthli he ka ttap tawn.Atu zong ka ttap tuk.Pating,na ka dawt taktak i tthit na ka duh taktak ko ahcun Islam ah luh hi nan tuah awk na rian a si ee" ti a si ko.

Ka mit ka van hnuai ka rel tthan,amah lila kha a si tthiam ko. Ca ka let hnga maw aw....tiah kai ruat nain ka let lo,a hmulo bantukin kai umter. Zantlai hnu ah ka lungfim dih,a mitthli le ttah buin a van ttial mi ca cu biatak tein khua ka ruah piak ve. Ziah, kum hnih deng kan iduh cang i ka dawtmi Nana nih hibia hi a chim bal ttung lo,a nai tuk cang caan ah a chim awk a rian cu a si ve ko.A ka dawttuk caah keimah he ico a duh tuk caah hi bia hi ai sum khawh tilo ruangah a chim mi si ti kha fiang tein ka hmuh.

Ka thinlung umthiamlo in zan khuadei cubia nihcun a ka tuai.Ka khel kai let,kai tengtale nain zeihmanh a chuak hlei lo.Kan kar ah biaknak ai dan tuk mi ka ruah ve tikah ka thinlung a fak tuk ve,ka celh ve hrim lo caah ka mitthli kurkur in an thla thluahmah. [Exodus 20:3 keimah hleiin Pathian dang zeihmanh nan bia lai lo]. timi baibal ca caang kha ka rel i Pathian sinah thlacamnak ka ngeih i lungdai tein ka it tthan.

Cutincun dawtnak nih kan nun lamthluan a hruai mi chungah rianrang ngai in a ni caan cu a nai thluahmah. Kei zong khualei ka chung le kha nupi ka tthi kho men tiah thawng ka thanh ve cang hna,malay nu si caah zeiah an kan relpiak lo.

Phone chung in tthitumhnak kong kan ceih poah ah biaknak kongah kan i el pah len cang. Biaknak kong kan ceih paoh ah ihmuhthiamlonak hram ai thok pah ziahmah. Biaknak kongah buailo dingin kan ti nain kan thinlung in cun buainak fak bik a chuak. Kei zong zeitindah Islam (Malay) pawl hi tthitumhnak an tuah ning si tbt an phunglam kha ka van hlat ve. Cun,kan khrihfa phung le laimi tthitumhnak kong he pehtlai in kan sining te kha ttha tein ka chimh ve.

Phone chung lawng in a tlamtlin khawh lai lo caah keimah a riak in ka van ra lai i kan iceihtti tiah a ti i a thaizan ah cun a riakin a van ra. Kanmah pahnih nih nithla kan khiah mi zarkhat lawng ai duh cang. A riak cun a ra i a tta pa zong cu kan sinah a um ve ko caah lungthiang tein caan a kan pek ve.

Zan cu kan phan i cabuai kam tthutdan cungah biaruahhram kan van thok.Kan hawi le an i hngilh dih cang. Phaisa zeizatdah dih lai? zeitindah na nulepa sinah le na chung le sinah kan kal ning si lai? timi bantuk khan kan laiphung bantukin ka van hal. Kaa khat zong a holh lo,chim hme..? tiah ka van hnek chih ilungsi lo huaha in a hei ka chimh ve ko.

"Pating, tuah kan timi na tuah lo ahcun zeitincundah tthitumh cu a si khawh kun hnga aw...A si kho lo ding mi thil kan itim sual ko rua...Pating, na ka dawt i ka zawn na ka ruah ahcun Islam ah na luh a herh ko ee. A si nain kan hne lo,hramhram cun kan ti lo mu,nangmah nawl si ko tiah a van ti vial ah khin a mitthli biangno cungah duhsah tein a hung tolh iahmah.

Van ka cau in saulak te khua ka ruat,ka thawpi ai su,ka thaw hmanh ka chuak kho huaha loin ka um. Ka lungretheih tuk ah ka thluak nih zeihmanh tuak kho loin ka um bek. Ka dawtmi Nana cu ka hmaika ah a mitthli ai hnawt len ko. Tlawmpal ah cabuai cungah ka lu ka thluk i ka hram len. Nana nih a lungrethei tuk,a thluak buai tuk ti kha a ka hmuh i a hngal caah Pating na mit ichinh law dai tein mitnute pa nga chung um ta,cun na mit iau kan ti te lai a ka ti. Minute pa nga chung cu ka mit a ka huh,zeihmanh ruat hlah a ka ti i a za cang a ti i ka mit cu kai au. Cun, a phone i nihchuak video kha tlawmpal a ka zohter ta.

Thinlung fak tukin khuaruahnak tlawmpal a hung zau deuh ngai. ( Nannih zong nan lungretheihtuk lio i nan thluak nih a tuar khawh lai lo nan phan ahcun cuticun va tuah ve te uh).

Kan bia cu peh lo awk a ttha lo.Amah nih a van peh tthan.Pating Islam luh cu nang le kei kan i co khawhnak ding caah a rem na ti maw? tiah a van ka hal tthan. Ka chim duh hleilo.Chim ko na ruahning tein kan hnek cu a si hrimhrim lo tiah a ka ti peng. A si kho lo,a ngah lo ka lut kho lo tiah ka let ve. Cutisi ahcun zeitindah kan ico khawh kun lai tiah ngaihchia ngai cun a van ka hal chih ve. Nangmah tu khrihfa ah na lut lai i khrihfa phung in kan ico ko lai tiah ka leh tiah "a ngah lo,a si kho lo"tiah a ka leh ve hoi. Kan biaknak hi zalong tein kan biak ding a si veve ko lo maw....? ziah cutincun tiah kan aw a hung sau deuh cang.

A thli tein kutka hrenh kan hon i lengah kan chuak..Inntual ah kan tthu...Kan bia cu kan peh tthan i aphi a chuak kho hlei lo. Pating hi lai hi ka rak ruahcia mi te a si ko ee, a si kho lo ding mi thil kan rak tuah i kan rak itim ko hi ta a ti i a mitthli cu zantlai hnuah hnawkcawk loin an hung tla. Pating,zeiruang ah hme kan biaknak hi a rak idan tuk hnga...Nangmah le keimah tlukin duhdawtnak vanchia hi an um hnga maw...tiah ik lengmang in a ttap thluahmah.

Kei zong zeibia ka chim kho tilo,ka dawt Nana kut lum te cu zan khuatlai ah ka van tleih i ka mitthli hnawh cawk loin an tla thluahmah ve. Aw..Nana zeiti ruah awk le khuakhan awk ka thei ve ti lo,kan itthen ko lai ta...Jesuh khrih cu ka hlaw kho bak lo i nang zong nih na pathian cu na hlaw kho bak ve fawn lo caah tuzan hi a donghnak si ko sehlaw tiah ka chim cang.

Ka dawt a thinlung a kuai/man dih,a nunnak nih a celh hrim lo. Semhmawng hngakchia sem te bang ka hmaika ah "Pating,pating,kan dawtnak nih an tthen kho lo"tiin a ttahnak mitthli hna ruahpi sur in an sur tthan.

Zeitindah si lai..? A donghnak bikah hitihin siseh..

1. Nangmah biaknak te na bia lai i keimah biaknak te ka bia ve lai.Cun, nanmah Islam phungin tthitumhnak kan tuah lai.
2.Mah le biaknak tete kan bia veve ko lai i kan lut veve lai lo.Kanmah khrihfa phungin tthitumhnak kan tuah lai.

Hi pahnih lawng hi thimding a um cang.Ithim zongah a ngahlo ding mi tthiamthiam khi a si ko. Islam phungin tthitumhnak tuah dingah Khrihfa mi an cohlang lo.Khrihfa phung in tthitumhnak tuah tikah Islam minung an cohlan fawn lai lo. [ Nain, pastor te chimh khawh kai zuam lai i Pathian sinah thlacamnak te he ti kha ka ruahning a si.Ahnu ahcun ai thleng hrimhrim lai kha ka ruah mi a si].

Sihmanhsehlaw zeihmanh thim zongah a si kho lo ding mi kha ithim a duh lo.Laiphung bang lakruak in thil van tuah ding zong ah miphun dang a si caah le ramdang a si caah kha tiang cu ka ngamh ve lo.Amah zong nih a duh ding si fawn lo.

Zan a hung tlai tuk cang.Kan umnak hi khuate lei ah a si tikah mi thawngpang vialte a dai dih.Mawttaw thawngpang hmanh ai thei lo.Cung arfi hna khi ka hei cuan i nuam tein an lengtti. An in dannak a um lo. Cung thlapa zong amah te lawng a kal lengmang ko i vanlai a phan deng cang. Thlizil kik nemte a hung hrang chialmal. Ka dawtmi Nana mitthli hul caan a ngeilo,duhsak tete in caan sinah ka mitthli cu an tolh ziahmah ko rih. Biaruah dingdang a um tilo,zeitluk chim len zongah thlitu nih kan kar lakah a choih dih cang. Kan idawtnak hri fek tein tem ko hmanh usih ruun khat ah a lengtti kho ding kan si tilo.Ruun khat lentti lo ding dawtnak cu atu bang hmailei caan ah mithli tlaktertu an si tthan ko lai. Cucaah,kan idawtnak hri ttem cang mi vialte phoih dih a hau cang.

Dawt, hihnu cun nang le kei cu kan ipehtlai ti lai lo mu,kan ichawn ti lai lo,hika zong ah van ra ti hlah mu tiah ka ti. Aw..A phone cu ka van lak in ka phone number le ka photo vialte delete dih cang tiah ka ti. Ka photo pakhat a van delete ah khin a mitthli a thar in a hung tolh thluahmah tthan. A dang tampi a delete nain pakhat amah he ttha tukin kan ithlak mi a delete duh ti lo.Hi cu ka phiat kho lo,a si kho ti lo tiah a ti i a mitthli hna phone cungah an tla thluahmah. Kei zong nih delete ko tiah mitthli he ka hnek chih peng ve. A delete duh ti lo.

Kei zong nih ka phone chung i pic um mi vialte ka hnawh dih colh hna. A ph no. zong ka delete colh. Ka dawt mi Nana nih a phone ah ka phone number a delete kho ti lo. Delete ai thimh ah a thinlung le nunnak nih a celh ti lo i a phone cu a ttah buin vawlei ah a hlonh. A hmai thlalang vialte a sop dih. ka ban in a ka tleih i fak piin a ttap thluahmah. Pating, zeiruang ah kan biaknak hi ai dan tuk hnga...? tiah a ttap lengmang.. Kei zong zeibia ka chim khawh mi le ka hnemh khawh mi ka um ve lo.Pasal ka ti ko nain a hmaika i mitthli tlak lawng kha ka si ve ko cang...Hmur le kaa nih biatampi chimh kholo hmanh sehlaw mitthli nih nunchung philh khawhlo dingin bia tamtuk a chim cang.

Kan pahnih tein inntual ahcun kan tthu i zankhua a tlai tuk cang..Nana ngam cang a tlai tuk cang hih..Suimilam 4:00am a tling cang hi ta.Khua a dei dengmag cang..Inn chungah lut usih mu tiah a ban in ka van hruai i inn chung ah cun duhsak tein a ihnak khan ah ka kalter.

Aw..Chuahsemnak ai khat lo,miphun ai khat lo,nunphung ai khat lo,ram ai khat lo,biaknak ai khat lo ruangah "Duhdawtnak" cu ikhat ko hmanhsehlaw nutling patling sinak veve in cun a rak ngah/sikho bak lo hi ta.

Ni bang kan semnak ai khat lo...Ka dawt.

Zungzal in zungzal tiang mangttha..Thih hnu zong ah kan thlarau hmanh ai tong kho ti lai lo ee.Kan phaknak ding hmun ai khat lo mu...Ka dawt..Tikha kan bia a donghnak a si.

Note: A dik/hman tak mi si..Tuanbia/lenhloi tial tawn mi kan si caah keimah kong zong van thai pah ve ko ning ka ti ko hih. By; Tum Tling