Ka Mitthli

Kuala Lumpur zanlei ninem nawn teah khin ka hawipa Pahre he semping ( KWC) shopping mial ah thil duhherh caw ding in kan kal. Dot thumnak kehlei kam ahkhin kan duhherh zin Bawngbi le shirt angki umnak ahcun kan lut. Mithmai panh tein " Nan duh mi rak zoh uh" rak kan caw ve uh" tiah awka nem tein a van holh mi nungak no te hmurka cu ka hna chungah duhsak tein a hung lut. Mithmai panh/nih bu tein a van kan met mi a mithmai nih ka thinlung pipian thui bang nuam ngai in a ka thui colh. 

Rianrang tukin fiang tein ka van zoh colh ve. A ke in a lu tiang ka ngiat dih. Ai dawh lawlaw, a zeihmanh soisel awk a um lo. Hitluk lainu dawhkhawh cu tiah ka khuaruah lei a ka harter. A zihmui rim lawng si loin ai dawhnak rimrua nih Pahre cu teng ko in a kah nain kei cu tanleih bang a hnuh in a ka hnuh. Aircon kik nih din tein a van chem mi sungku rimthaw cu duhsak tein ka hnarkua chung ah a hung lut.

An dawr chung ahcun thilcaw zokzok lem loin sau ngai kai helhum ter. Cu hnuah thil ka cawk pah in a konglam tlawmpal te ka hal. " Ka min cu Sungku tiin ka au ko a ka ti i a facebook le a ph no.a ka chinm". Cuticun thil cu kan cawk khawh in inn leiah kan ttin.

Ka hawipa Pahre nih " Mah nu kha cu ai dawh bak si, a mak lawlaw Tiluk nungak ah pei ka rel cu" a ti phak. Pahre, ka helh lai mu kha nu kha, a ph no.le a facebook min zong a ka pek ko si, ka helh lai ka hngah hlan loin ka ti. Pahre, aaaaa daiko! Na ngah kho lai lo, nangmah le nangmah lungfah nai pek si, an duh bal lai lo cuh tiin taxi chung ah lawi pah in kan iceih len.

Ka lawi pah le inn ka phak hnu zongah Sungku rumro ka mitthlam ah a cuang colh ko. A awka nem te kha ka hnathlam ah darkhing thawng bang a hung ring zungzal.

Ka ruah mi cu " Darling a ngei cang hnga maw"? tihi a si. Cute cu fak tukin ka ruat. Zan suimilam cu a hung tlai zuahmah i Sungku phone number cu duhsak tein ka van kua i ka call.

Hello, Sungku na it pah cang maw? " Aw, it pah ko cang hi" Zaangfah tein chonh kan duh le ngah hnga maw? " Aw..ngah ee, ka chawn ko". Zeidang thawngpang le rianttuan kong hna ka van iruah hnu in theih ka duh bik mi cu ka hal. Sungku, biahal ding pakhat kan ngei, a dik ning tein na ka chimh lai tiah ka ti.. Aw si ee, zeidah ka hal ko a ka ti i " Sungku boy friend ( Tlangval dawtmi) na ngei cang maw? tiah ka hal. " Ka ngei rih lo" a ka ti i ka zum set lo. " Biatak te si ko, ka ngei rih taktak lo" tiah a ka ti tthan tikah tlawmpal te cu zan khuamui ihphah cungah ka hung mirh pah.

Cuticun facebook in siseh handphone in siseh kan i chawn lengmang i keimah zong KWC innpi leiah ka dawtmi Sungku ton ah ka kal caan a tlawm ti lo. Nikhat hnu nikhat- Thlakhat hnu thlakhat in kan ipehtleihnak a ttha i a fek chin lengmang. Ka duhnak le dawtnak zong a fak chin lengmang cang. Nikhat rian a off ni teah ka va leng i restuarent kan tthu tti.

Sungku, na sinah biachim ding ka ngei i caan na ka pe kho hnga maw? tiah ka nawl. Si ee, U Tling chim ko ngah ko a ka ti i thintur pah bu cun duhdawtnak bia phuan hram ka van thok. "Sungku, hi vawlei cung ahhin pardawh phuntling an par i cu par vialte hna lakah ka duhbik mi cu atu ka hmaika teah a tthu mi nangmah hi na si. 

Semping dawr chung i kan hmuh voikhatnak le kan ton voikhatnak te khan ka thinlung le nunnak dihlak nih zungzal caah an thim cang. Nang he nunchung lengtti ding le idaw zungzal ding in ka thinlung nunnak dihlak he na atu nan sinah ka ra. Sungku, kan duh tuk mi na si,kan dawttuk mi na si. Kan duhdawtnak ka thinlung le sining hna hi cohlang in nang zong nih ka cungah duhdawtnak na ngei kho ve hnga maw?" tiah thinphang pah le thinphudip ngai in ka van phuan.

Sungku cu tlawmpal a cal ai domh, holh loin sau nawn a um hnu ah ka mithmai a van ka zoh pah. " U tling, tu ahcun zeihmanh kan let kho rih lo ee, ka theithiam ko rih mu, ni dang ah lek khawh kan zuam lai, kai ruat ta ve rih lai mu. Pathian sinah thlacam law kei zong thla ka cam ve lai i Pathian nih a tthabik in khuakhan te ko lai" tiah a ka ti. Lungnuam pah nuam lo pah veve buin kan inn leiah kan ttin veve.

A hmaizarh Sungku rian off ni te cu a hung phan tthan i rian ka off ve. Kan tthut tawnnak restuarent ahcun kan tthu tthan cang. Cerhti bang a reu kho lomi Sungku ka duhdawtnak cu duhsak tein ka van phuan tthan. Saduhthah le chunmang bang Sungku nih " U tling, kan duhdawt tuk ve ko ee" nunchung zungzal caah kan thim ve, kan lengtti/ kan umtti lai mu" tiin a van chimpah in a bia hmanh a dih hlan ah a kut in ka van tleih in fak nawn in a kut cu a van hmeh chih len. Kan karah thinphannak zeihmanh um ti loin nuam le lawm tein kan tthutti cang. Kan inn ah hohmanh ka chung le an um lo, inn ah ttin usih a ka ti i an inn ah kan ttin. Ka duhdawttuk mi Sungku hmursen te cun duhsak tein ka van kiss, Thingkung ngaidul tang i Sia rawlret a kai lengmang mi bang Sungku hmursen te cu rawlret khai in ka van khai. Cim ni le vuai ni ka ngei lo, tho hih! a fak tuk a van ti caan i "a zawh!" a ti caan ahcun cikkhat te cu ka stop ta tawn. Hotel ah kal ding si ko nain hmailei tthitumhnak tuah ding mi tiang ka van ruah i ka tuak tikah hitlukin ka dawtmi Sungku ihpi ding tiangtiang cun ka siang lo. A nungak lio i a thiang ti lomi si dingin ka siang lo. A thianghlim mi nungak si ding in le upat awk tlak mi tthitumhnak si dingin kai zuam i thazaang zawng tampi ka pek. Amah sin zongah ttha te le hman tein ka chim.

Cutincun ni le thla hna an hung liam i kan iduhdawtnak caan zong a hung sau ruangmang ve cang. Dawtnak a fek tuk ko i tiah iton lengmang zong kha a herh tuk ah kan ruat lem ti lo. A lang tuin kan in chawn lengmang.

Ruahlopi in Sungku kha a rian in a chuak i riandang ah a kal. A hlat tuknak Pinang leiah rawldawr ah ttuan ding a kal diam ko ai. Ka thloh lengmang ko nain a hawi le he an si caah thloh khawh a si ti lo. KL ah riandang kawl ko, silole ttuan loin um sawhsawh ko ka ti zongah a duh naisai ti lo i a hawi le nu pathum he an kal diam.

Ka thloh lengmang ko nain ka bia kaakhat te hmanh a ngaih duh lomi ka ruah ah ka ngaih a chia, ka mitthli a tlak lawng si loin ka thinhung tuk hringhran. 

Zarhkhat chung ph ka chawn duh lo. Ph a ka call zongah ka tlaih piak duh lo. Mifim tuk a si ve caah " U tling nihhin a ka dawt tuk ruangah pei hmundang kaadang kal a ka siang lo i a thinhungnak le lungfahnak a langhter mi si ko hi" ti kha a theihthiam tuk caah " U tling ka ngaithiam ko, ka rak kir zau ko lai tiah a ka ti tawn.

Zarhkhat hnu hrawng ahcun kei zong nih nichiar zanchiar tiawk in ka chawnh i a langtlang in duhdawtnak bia cu kan phaitti zungzal.

Ni le thla hna an liam, minung kan hmuh mi le kan theih mi zong ai dang lengmang bang, kan thinlung le ruahning zong hi ai thleng lengmang ve tawn ko rua. Voidang bantukin ka dawtmi Sungku nih a ka chawn ti lo, a hmurka a tlawm chin lengmang cang. A bia zong a hak i a ro chin lengmang.

Kan ihmuh ti lonak thla 4 a si cang. Kan umnak ai hlat tuk cang caah rianttuan veve ahcun iton caan a um kho ti lo. Voikhat cu Sungku a hawinu Aahnem nih ca tlangkhat te a van ka kuat. " Na dawtmi Sungku kha darling dang a ngei cang ee, kawlpa he an i duhtuk cang, van chawn ti hlah" ti si ko. Hibia ka theih ni cu ka thinlung le nunak a kuai/man cikcek. Ihkhun cungah ka zau i khua ka ruah pah in ka mitthli an hung tla ziahmah. Ka dawtmi Sungku ph cu ka call len nain a tlai duh ti lo. Ca ka kuat zongah a ka let duh hrimhrim ti lo. Aahnem sin tu akhan a singning le konglam ka hal lengmang. Aahnem zong nihkhan van hlat duh ti hlah law, kanmah zong nih kawlpa hna cu duh hlah kan ti lengmang ko nain a si kho lo ee, ilungsak ko tiah a ka ti tawn.

Ka rianttuannak boss pa sinah nihnih off day ka hal i ka hawi Pahre he Pinang ah Sungku ton ding cun kan kal. Kan va phak tikah cun Sungku le kawlpa cu an rak um ti lo. Zankhat kan riak i kan riah chung vialte Hotel ah an caan an rak hmang. An ra lai ti kha a rak theih caah kan muihmuh kha a duh lo caah a si. Zeitiawkttha kir ko ne usih kan ti i ka mitthli le ttah buin KL khuapi leiah kan rak kir tthan. Cuhnu cun kei zong Sungku cu ka chawn ve ti lo.

Ni le thla caan a liam mi chungah ka dawtmi Sungku ngai le lungfakin nitin zantin te ka hram lengmang tawn. A hlan ahcun a rak ka dawt tuk ve ko nain atu cu mu zeihmanh ah a ka rel ti lo hi ta. Hmundang ahkhan rak kal hlah sehlaw hitihin lungdang a ngei hnga lo ee ti ka ruah zawn ah Malaysia laimi kan dirhmun ka ruahchih caan ah ka lungfahnak mitthli a luang lengmang.

Thla tampi a liam hnu Sungku zuuntuar le lungfahnak mithli a zor dih cang ko rua, a um ti rua lo ka ti lioah voikhat Aahnem nih thingphan ngai in ph a van ka chawnh " Sungku kha nau ngei cang lai ee, atu Ampang siizung ah a um ko ti si". A thaizing cu rian ka off i Ampang siizung ahcun ka va kal ve. Sungku cu fanu te a rak ngei cang. A fanu te cu room dang ah an chiah i ka hmu kho lo. Sungku cu ihkhun cungah a samthur ngai in a rak ril ko.

Sungku, fanu te maw na ngeih cang, kan lawmhpi tuk ee. Dam zau izuam mu tiah Sungku kut lum te cu ka van tleih i ka thinlung mitthli rialti bang a tla thluahmah. Hlan lio i rawldawr kan rak tthut lio i a kut lum te ka rak tlaih kaa ahkhun cun lunglawmhnak mithmai he a nuam tuk kan rak ti nain atu ahcun mitthli an tla cang. Amah zong nih ka mithmai a ka khap ti lo, a ka zoh ngam set ti lo. Lengah tlawmpal ka chuah i Aahnem he cun bia kan iruah. An pa cu hmuh ka duh ngai ee ti khuachung ah a vak a ti i an pa cu ka hmu thai lo. Tangka rm-500 ka chiah ta hna i ka ttin ve.

Sungku le a fanu te cu siizung ah sau ngai am um hnuah inn ah an rak ttin. An pa nih zarhkhar hrawng a umpi hna i a zamtak colh hna. An pa umnak an thei ti lo. Anmah nufa te lawng min sinah cun an um. Sungku hi Malaysia ah a unau chuahpi an um lo caah an khuami sinah an um. Tefa he mi sin um cu a fawi lo, zing a tam zan a tam, zawtfak damlo caan zong a tam caah innchung khar he mitthmai ikhah lo caan a tam hringhran. Innkhan te hmanh ah um kho loin innpi ah an nufa te cun an riak tawn. A caan i rian ka off caan ah ka va leng tawn hna i a fanu te ka van cawi tawn. A nu muisam in a chuah caah duh a nung tuk hringhran.

Nikhat cu an nufa tein innkhan ah kan um ve cang la an ti. Nute zong kum khat a tling ve cang i misinah ka chiah lai i ttha ko lai, innpi um cu kan celh bak ti lo an ti caah innkhan thlakhat ah rm-400 man pek dingin an um ve. Sungku cu nichiar rian a ttuan ve cang. A fanu te mi sinah a kaltak tawn.

Sihmanhsehlaw thlakhat hrawng a ttuan hnu ah khin a fanu te cu a damlo lengmang i Sungku cu rian a ttuan kho ti lo. Innman pek ding, siizung kalman, ei ding caah awlokchong vansang in an um caan a tam tuk cang. A sining kha fiang tein ka theih i ka hmuh tikah ka va len caan hna ah tangka tlawmpal te ka chiah ta tawn hna.

Nikhat cu a fanu te kha a damlo a zual tuk i Ampang siizungah an kalpi. Holh lehpiak ding in keimah nih an nufa te cun ka zulh hna. Sungku cu a fanu te ai i pom siizung chungah a mitthi a tla. Zankhua a hung tlai tuk cang i ihkhun cungah a fanu te i pom in ka dawt ka fanu te aw tiin ih thluahmah in a ttap thluahmah.

An nufa te cun ka zoh ko hna, a fanu te cu a hrom a ring i a fanu te cu a panh kho bak ti lo. Sungku ttap ti hlah, a dam zau ko lai cuh, na lungrethei hlah, Pathian nih zeipoah hi a khan dih ko lai ee tiah thazaang ka pek lengmang i ka hnemh tawn. A fanu te cu a zual deuh hlah maw tiah a lu ka van tongh i a lin tuk cu a si lo. Nurse pawl nih atu le tu an kan veh lengmang. Zamttim le khuamang ah Sungku ngamthiam loin a fanu te ai pom i a ttahnak caan a sau tuk.

Nau a van ttah zawn ah khin a mitthli ai hnawh i naute cu a thlim a awih tawn.

Vawlei cung i ka duhdawt bik mi Sungku hi ba-uah singning a van phak mi ka ruah i ka hmuh tikah ka thinlung le nunnak nihin a tuar kho hrimhrim ve lo. A nungak lio ah khan a parttawh hmanh ka rak sian lomi atu hitiang ba-uah singning dirhmun a can mi hi ka zoh tikah ka mitthli donh cawk loin a luang ve tawn. U tling nihhin hitluk in maw a rak ka dawt ti hi atu ahcun a fiang tuk ko nain Pinang i a um lioah khan cun a rak ifiang kho hrim rua lo. Siizung um caan a sau i lungretheih zong a zual chin lengmang. Chun ahcun kei rian ka ttuan i zan zongah zanchiar cun ka va kal kho tawn lo. Va kal zongah va riah khawh si hlei lo i holhleh herh ti dah lo ahcun mahduh bang um awk a ttha lo.

Pathian dawtnak le kan thlacamakthawng in fanu te cu dam deuh lei a panh ngai cang caah siizung cun an chuak. Riantuan khawh ttung lo hiti Malaysia um peng cu a sithiam lo caah an khuami nih kawlram - Laitlang leiah tlung ding in an timhtuah piak hna.

Tlun an ithawh ni ni caan cu a hungphan i kei zong Imbi tiang cu ka va thlah ve hna. Thil zong zeimawzat ka cawkpiak hna i tangka zong tlawmpal te ka rawnh ve hna. A fanu te cu ka van i " Nute va tlung cang ko ne uh, Malaysia cu a har tuk le khua lei ahcun na pilepu nih an in dawt tuk lai i nai nuam ko lai" tiah holh a thiam dengmi cu bia ka ruah len. A nu nih " U tling, na ka dawtnak hi caan tampi cu ka rak philh sual ka ngaithiam. Atu hin cun zeitikhmanh ah kan nunchung kannih nufa nihcun kan philh ti lai lo ee, Pathian tu nih thluahchuak in pe sehlaw in cham ko seh, na cungah kan ilawm tuk hringhran ti a van chim vial ah khin Sungku a mitthli biangno cung ah rianrang tukin an hung tolh thliahmah. Ka hmaika ah Sungku nih keimah he pehtlai in a mitthli voikhat a thlaknak ni/caan a si.

An nufa te cun Taxi chungah an luh lai ah innpa hawikom thlahtu hna nih " dam tein" tiin an za an chanh cio cang hna. Taxi chungah an nufa te cun an lut i Sungku " Zei ti thloh awk nih nan ttha fawn ti ttung lo, dam tein vung kal ko ne uh law" tiin sianlo ka mitthli a hung thla thluahmah ve. Ka thinlung a kuai a man dih cang, Sungku zong nih " hihipei dawtnak taktak cu a si hi" ti ai fiang tuk cang caah " U tling, na ngaihchia hlah mu, dam tein rak um zungzal, Pathian nih a rem ti ahcun tonnak caan ttha tu kan serpiak tthan te ko seh "tiin ka mitthli cu Sungku nih a van ka hnawh piak.

Mitthli he sianlo mi byebye kan i tuah hnu ah taxi nih lo diam in a kalpi diam ko hna. 

                                    ##########

Photo: Tialku ( USA).