Duh A Tling Lo Dawtmi (Part-5)

Suite cu khuaruahhar le lungrethei in innchung le innleng lawng a hlat lengmang ko. U Thawng hi zeikodah can hnga atu tiang ziah a rak phak bal hnga lo tiin a hngak lengmang. Zansuilam 12:00am a tling cang,Suite cu lungrethei in ai hngilh kho lo. Suite ph a rak ring in " Hello! Suite Pathawng ka si, atu hi Oparasi nih an kan tlaih i lokup ah ka um ko, a thli tein phone ka van in chawnh ka dawt Suite thlacam daithlang hlah, khah police an ra cang hih byebye" ti vial a si ko.

Suite cu mah cu thawngpang a theih cun ihkhun cungah ih lengmang in a ttap thluahmah. U Thawng zeiton hme kan ton hoi.. Nang le kei hi duhdim tein lentti caan a um kho lo ee..Kan kar ahhin ngaihchiatnak le lungretheihnak lawng maw an si tiin Suite cu zantlai zamttim hnuah a mitthli rialti bang a luang thluahmah.

Pathawng cu Lenggeng camp ah a dawtmi Suite ngai in ni le thla a rel cang. UNHCR nih rak lak/chuah ding kha an hngak. Rawl peikuar khat te he ihphah le puanvorh a um lonak innchung khuasik lakah lungrethei in ai kual zungzal. Lenggeng camp hi tlangbo cungah an sak mi a si caah khuacaan a kik ngaingai. Cuka khuasik lakah cun Police pawl hrocernak he nifatin thonginn chungah a caan hmannak a sau ruangmang.

UNHCR pawl nih le refugee thongtla mi rak zoh dingah an khulnuar tuk hringhran. UN office in Lenggeng thonginn cu ai hlat tuk lai lo nain UNHCR zong nih anmah duh poah in thong chungah refugee vehvatnak nawl hi an ngei rua lo. Thong uktu Immigration nawlpeknak lo cun UN zong nih thongtla ton khawh a si lo.

Pathawng cu ruahlopi in thong chungah a zaw. Ai thokka ahcun lufak le ceicer sawhsawh te a si ko nain thong chung ahcun zawtfah zong Police pawl sinah chim ngam a si lo. Pathawng cu nikhat hnu nikhat in a zual chin lengmang. Rawl zong ttha tein a ei kho ti lo. Nulepa le a dawtmi Suite ngai in a caan ahcun a mitthli a luang tawn. Nikhat cu a celh ti loin Police sinah sii a hal hna nain police pawl nih an pe duh lo. Laimi cheukhat zong nih police sinah ttha tein an chimpiak sii an hal piak lengmang ve. Paracetamual ril khat an pek i cu te cu a din. Dam hlei a panh tilo caah Clinic kal dingin Immigration sinah zaangfah a nawl lengmang hna nain zeiah an rel piak lo.

Cutincun damloin sau ngai a um cang caah a taksa le thitha hna an der thluahmah. Zankhat cu zanlai ah Pathawng a lungfim ti lo, a hawi le nih Pathawng Pathawng tiah an auh lengmang nain a hawi kho ti hna lo. Thinphan in thonginn kutka cu thongtla pawl nih fakpi in an cumh,an den i Immigration pawl cu an auh hna. Caan sau hnuah khin Immigration pawl cu duhsah in an ra i an zoh tikah Pathawng cu siizung ah an kalpi. Siizung a phak tlawmpal in Pathawng cu a nunnak nih a celh tilo caah hi vawlei harnak in ai din cang. A nunnak thawng a dong i a cet riahmah ko. Doctor pa nih a thi cang tiah a ti. Seramban hospital ah Pathawng cu a nunnak a liam. Doctor pawl nih ttha tein an fimtawl i mithi chiahnak room chungah ttha tein an chiah.

A thaizing zingka teah Immigration pawl nih UNHCR office cu phone an rak chawnh hna. UN pawl nih CRC zungah thawngthanhnak an van tuah colh ve. Cu thawng nih Malaysia laimi vialte ngaihchia le mitthli tla in a tuah hna. Pathawng a thi ee timi thawng cu Suite zong nih a van theih ve tiah a rianttuannak in inn ah a ttin colh. Kai zumh kho lo, a si kho lo tiah Pathawng khuami le a chung le pawl cu a hal hna tikah " a si tak ko ee, Pathawng cu zahanzan suimilam 1:30am hrawng ah khan mual a kan liam tak cang ee" tiah an van chim tikah Suite cu tuar kholoin ttuang ah ai lawng in semmawng naunuar bang ttap in a ai thluahmah.

Pathawng a chungkhat le sahlawh khuami hna zong an rianttuan hmun in an rak ttin cio,rianttuan an zuam hrim lo. Pathawng a umnak inn cu tonpitu ngaihchiatpitu an khat cang. Mithli le hnapduk he Kuala Lumpur khuapi ah ttahnak mitthli a luang.

Suite a hnem khotu hohmanh an um ti lo, ngaihchia in chunitlak a tuar i a caan ah cikkhat te a mitthli a hul nain rau lo teah a mitthli a luang tthan lengmang. Zanlei khua a hung mui i KL khuapi cu ngaihchiatnak mitthli nih a khuh dih. Tidin rawlei zuam loin Suite a ttap lengmang. Zantlai hnuah khin Suite cu innleng paranda ah khua a cuan. Zalam pi cungah Mottaw hna rianrang tein an tli, electic meiceu nih KL khuapi ah colour phuntling chuak in tthep deldul in an ceu hna. Ai dawh mi khuapi i zandai tangah mitthli hul loin Suite cu thinlung kuai/man cikcek in a ttap lengmang. Suite mitthli hna dawntu ngei loin duhsak in vawlei ah dor khat hnu dor khat an tla lengmang. U Thawng dam tein kan itong tthan lai kan rak ti tung, na dawtmi na far Suite nih lunglawm tein kan hngah ko ttung, innka hram ah hmaipanh tein ka rak in don ko ttung, U Thawng ziah na annka thlum tein na rak ka phan kho lai lo maw.. U Thawng ka nunnak nihhin a tuar kho hrim lo ee.. Nang bang ka nunnak hi thih awk ttha sehlaw thih hi ka duh ve ko ee tiin Suite cu umthiam loin a ttahnak mitthli a zor kho ti lo.

A hawinu Hnemtawi nih "Suite ttap ti hlah, a tlai tuk cang hih, inn chungah rak lut cang law zeitiawkttha lo ee, vawlei cung cu i lungsak ko cang tiin a hnemh lengmang zong ah Suite cu a kut le ke thir dih tiang in a tuar tuk cang. Hnemtawi nih a mitthli he innchung ah a luhpi i a ihter. A ihphak le Chantling hna Suite caah mitthli dawntu an si. A mitthlam le thinlung ah Pathawng ruat in Suite a ttahnak mitthli nih Chantlingkhuh le ihphah hna ciar dih in a tlak.

Pathawng ruak cu Doctor te nih ttha tein an check i an tuah dih hnuah CRC le UN rianttuantu hna nih Siizungah an va lak in thlanmual lei vui dingin an kalpi. Pathawng a dawtu le chungkhat khuami hna zong thlanmual leiah an kal ve. Suite zong Pathawng ruak thlak ding in thlanmual lei cu a panh ve. Zanlei suimilam 4:00pm hrawng ah thlanmual cu an phan i Pathawng ruak zong thlanmual a rak phan colh ve.

Thlanmual cu cikkhat teah ttahnak thawng nih tichum zam bang a khuh dih colh. Suite thinlung kuai in ka dawtmi ka tta U Thawng atu te lawng hi maw kan hmuh khawh ne..U Thawng rak i hlau, rak ka zoh ta ko, kum caan saupi tong loin hmuh kan duh tuk cang na ka ti kha....Ka zoh ne hme U Thawng aw tiin Suite cu Pathawng ruak cung ah ilawng lengmang a ttap thluahmah. U Thawng a si kho lo, tho ta ko voikhat te cu ka duh bak lo tiin a ai buin Pathawng ruak cu a van kuh i a hngawng in tun a van timh ahkhin a pawng ummi hna nih Suite cu a ban in an van tlaih.. Suite mitthli hna a dawtmi Pathawng ruak cungah dong hngal loin a tla thuahmah.

Pathawng nih Suite ton ding in a rak rak pah i Kotoraya ah Suite phurh ding ah tiin Angki le Bawngbi ai dawh tuk mi a cawkpiak mi te cu Pathawng thil sinah a rak um. Pathawng thil cu bag chungin an van chuah i Pathawng ruakkuang chungah an van senh hna. Suite caah tiin a cawk ta mi thil cu Suite nih a ttang cung teah a van pom. U Thawng na thil cawkpiak mi te cu nangmah nih pe ti loin maw Immigration pawl hna nih a ka pek cang ee..Cu ka thinfak hringhran cu U Thawng zeitinhme ka tuar khawh lai.. Kaa khat te tal cun ka chawn ta ko law tiin a ttah lengmang lioah ruakkuang cu an van chinh i vawlei chung ah thlak hram an thok cang. Pastor pa nih ruakvuinak caan a hman dih in Pathawng cu sianlo tuk buin vawlei chungah an van thlak riangmang ko.

Pathawng thlan cung teah tthu in suite cu lungkuai in a ttap lengmang. U Thawng aw..Ziahhme na ka kaltak tuan tuk ee..Na far ka lungfahnak le ngaihchiatnak hna hi na ka ruahpiak lo maw? Zeitindah na ka liamtak hnu keimah lawng cun ka um khawh lai.. Dam tein kan itong lai i nuam tein kan lengtti cang lai kan rak ti ko kha ta..U Thawng atu khoiah hme na um..? Thongchung na rak um lio i na nun lioah khan na rak ka ruat in na rak ka ngai tuk ve ko lai mu.. U Thawng, ka ngaihchiatnak le ka ttahnak mitthli hna hi na rauthlau tal in na rak hnawh piak ve law kei lawng umhar lileng in ka um caan ah rauthlau in rak ka leng tawn law dawtnak bia kan phai tti lai mu tiin Suite cu ngam kho loin a ttap lengmang ko rih. U Thawng kei zong leicung ka nun a dih te tikah khin ka rak ra te lai i van inn kutka tuin rak ka dong te law nuam tein kan lengtti te lai mu.. Zingnu remruat le lairel ngai hi tuarthiam a har ko ee..

Zanlei ni a liam dengcang, Suite cu Pathawng thlan cung teah tthu in innlei ah a ttin duh ti lo. Zapi Mottaw in an ttin dih cang i midang minung pathum lawng nih an hngah cang. Suite, ra cang a za cang ee a tlai tuk cang kan ttin cang lai, zanlei ni zong a liam cang i zan khuamui nih ai tim cang, kan ttin cang lai tiin an auh len le an sawm leng zongah Suite cu inn leiah attin duh ti lo. Rak ka ttintak chung ko uh, keimah tein ka rak ttin te ko lai tiah a hna.

Hnemtawi le a hawi le nihcun a duh naloin a kut in an dawh i Suite cu a ttah buin Mottaw chungah an khumh i inn leiah an ttin pi. Pathawng rialbang a ral hnu Suite cu lileng le ngaihchia in Kuala Lumpur khuapi ah nitin ttuan zuam loin mitthli he ttah lawng a rian.

Lenggeng camp ( Thong) chung i ummi Pathawng a hawi le Laimi pawl zong nih Pathawng nih mual a kan liamtak ti an theih ni cu mitthli he thong chungah lungfak in an rak ttap ve. Immigration pawl cungah an lungfak tuk. Chin refugee hna thonginn chung i kan um tikah zawtfah a har ning le Malay cozah nih Uite Arte tluk hmanh ah an kan rel lo ning ruah ah Pathawng a hawle Kawibik te pawl an lungfah an tuar kho lo.

Kawibik nih a lungfah ai tuar ti lo i Immigration pa cu a mawhchiat. Zeiruangahdah Pathawng a thih tiah a hal. Ka thei ve lo, siibawi te nih an chim ning ahcun " raifanh thkuakkai" a si an ti tiah Immigration pa nih a leh. Ziah, na theih lo..? Na hmaika ah a um mi minung, nanmah kuttang hrenhkhumh mi chungah a ummi minung kong cu ziah na theih lo..? Nanmah nihhin sii zong nan pe duh lo, a hramthok tein a damlo tiah voitam kan in chimh hna. Sii maw nan ngeih lo..? Ziah ttha tein nan kan zohkhenh duh tung lo ahcun nan kan tlaih..?Nanmah ruangah kan hawipa hi a thi mi si na hngal maw..? Innka hi hrenh hlah uh,kan kumh hlah uh law a thi lai lo tiah Immigration pa cu Kawibik nih a kutdong in a sawh chih.

Immigration pa nih " Ka nau thonginn a si hi na thei maw..?Ziah Malay ah thongtlak na duh lo ahcun Malay ah nan rat..?" Ziah nan rat ahcun phungning tein nan rat lo.? tiah a van ti ve. Kawibik nih " Refugee kan si hi na hngal maw..? UN tangah phungning tein a ummi kan si hi...Malaysia ram hi buai sehlaw,thahnawnnak um sehlaw ramchung mi hi ramdang sh an zam ve ko ttung lai tiah Kawibik le Immigration pa cu sau ngai bia an i el len ve.

Pathawng nih a cawkpiak tami Bawngbi le Angki te cu Pathawng can ah tiin Suite nih ai hruk-aih tawn. Ni le thla liam in caan liam ko hmanhseh Suite nih Pathawng a ngaihnak le a dawtnak hna cu liam ni an ngei lo_ Thinlung chungah an cam zungzal.

Rua bang kiak in
Thing bang pur cang hmanhlaw
Kei na far thinglung chungah
Na um zungzal lai ee
Lei caan a dongh tiang in.

Nang ngai in ka ttah zawn ahkhin
Rauthla tal in hung lang ve law
Kei ka kiang ah.

Dawtnak bianem phailen cim lo
Zanmang an hluan ai cang
Ka riangvai mi ka nun
Chunmang an dong
Zanmang tal ah tta Thawng
Kei ka ca'h nangmah.
                                  ###########

Wrote by; Tum Tling