Zuun T'hing A Caam Lai Lungrawn Ah (Dal-2nk)

Zanlei ni hung nem chialmal cun Sungsung he kan lungrawn khua lei ah kan tlung.Ka thinlung le nunnak ah Sungsung dah tilo thildang zeihmanh ai tlum ti lo.Chun nitlak ti awk in an inn le a lo rumro ah khua ka sa i ka khih-ngerh tawn.

Voi tamtuk hi Sungsung sinah "duhdawtnak"bia ka phuan cang nain Sungsung nih bia ttha in a ka leh mi kaa khat te hmanh a um bal lo.

Ih-khun cung i zantlai hnu ah khua ka ruah tawn ahcun ka lung i a dong tawn ko.Sinain zinglei niceu a hung chuah i ni a hung linh phualmal cun Sungsung te inn ttheo ah ka kal.Sungsung hi ka ruat bak ti lai lo i ka leng bak ti lai lo tiah keimah le keimah biakamnak ka tuah zong a tam tuk cang.A sinain,duhnak taktak hi cu takpum in control khawh a rak si rua lo.

Nikhat voikhat a mui ka hmuh lo cun thih kai tim,ka duhdawt tu a zual chinchin.Chun ah siseh,zan ah siseh Sungsung leng dingin ka kal i Sungsung a rak um lo ahcun ka nunnak nih ti le rawl a hlam mi nak fak deuh in Sungsung cu ka nunnak nih a rak hlam.

Zalam len i kan iton caam hmanh ka thin "duk"tiah a lau tawn i an innleng i a kedenh le nitlang ah a pho mi a angki te ka hmuh hmanh kan thinlung a rak lau tawn. Sungsung cu a fimtuk mi a si ve caah a ka duh lo ko zong ah ka duhdawtnak kha fiang tein a hngal tikah a ka dawt tuk ve.A ka tleihchan tuk ve,a hawikom ttha bik bantukin a ka ruah.

Nikhat cu mino nih tlangrian [လုပ္အား] kan ttuan hna.A hopoah nih Sungsung zulhkhalh cu duh cio a si i a pawngkam te um le zitmuai cu an duh cio.Kei bel Sungsung a ka duh lo ti kai hngalh tuk caah mitampi hmai i Sungsung pawng um le chonh-biak tuk cu ka ngamh ti lo_ka ningzak cang.Pasui le Sungsung an i komh ning le an ichawnh biak ning ka hmuh i ka ruah tikah ka lungtling hrimhrim ti lo. Zanlei kan tlun pah thluangthluan anmah pahnih te lawng hawihnu ah an i thlai fawn i ka lunghring tuk cang_ka thinlung a umthiam ti lo.

Cu zan cu Sungsung leng dingin kai thawh tthan.An inn ka tthut tlawmpal bia tlawmpal kan i ruah manh cang_Upa pahnih an rak lut ko."Kha!Sungsung kan in leng hna,na nu le na pa tah" ti a si ko.Sung nih ka nu le ka pa maw nan herh hna tiah a nu le a pa cu ihnak khan in a hei auh hna.Sungsung nu nih"Zeirilmam ko dah cu zan ahcun nan kan len,lunghring in"a van ti.

Keimah ka um peng caah biahram an ot ngam ti lo,va ttin cang ti le an ka ngamh fawn lo,Sungsung te chung nih le zeiherh ah an kan len ti hmanh an i fiang fawn rih lo. Mileng pahnih an lukheuh caan a sau,an ka zoh lengmang kai theih ko,kei tham nungak pei ka len ko cu tiin ka tthu tur ve.

An mileng pakhat deuh,calngau pa nih "khah,Sungsung le Patling nan biaruah thaw ko,kan nih tappi kam ah kan tthu lai i,nan nih innpi [mileng khan] ah va tthu uh a kan ti i mileng khan ahcun kan i tthial.

Mi leng pahnih nih bia an van thok mi cu "Sungsung hi USA ah a um mi Pahnok caah kan duh,kan in hal hna,zeikhom sisehlaw khua kan ruah piak ko uh" ti si ko. Cubia cu Sungsung he fiang tuk in kan hna nih a theih veve.Cikhat te kan lau tuk veve.Ka hmaika ka bih i zeikhua ka tuaktan kho ti lo.Ka hmaikaa ah Sungsung a tthu ti lawng ka ruah khawh mi le ka hmuh khawh mi a si.

                        
"Ei!! Patling a ti i Sungsung a lau tuk ve,zeitinhme ka um lai?a ti i tthut-to zia hmanh a thiam ve ti lo.

Sungsung phanghlah tiah a kut in ka van tleih i ka van rehchih.Duh hlah law si ko cu ta tiah thazaang cu ka pek len.Kei zong mileng hna pahnih mithmai ka khap bak ti lo.Sungsung ka ttin lai ka ti nain Sungsung "ttin hlah"ttin hlah"um ko"um ko"ti bak in a thazaang dihlak chuah in a ka thloh i ka tleih.A thli tein kanmah pahnih te lawng cu "ttin le ttin lo"ahcun kan buai lengmang.Ka inn a si lo caah ka duh ahcun ttinnak nawl ka ngeih bang Sungsung nih a ka tlai kho ti loh i ka chuak.

Sungsung te inn le kan inn kar lam ka kal voidang he ai lo ti lo.Ka thinlung fah lawng si ti lo,khua ka ruah ah ka ngong i lamlai pi ah arkoin ka dir tawn,ka thin zong a hung i a lin,zan khuamui ah ka hmuh mi thil hi ka caah ral bantukin ka hmuh dih hna.Cuthil ka cung i a tlung mi nih ka taksa le ka pumsa hi a mah duh ning in a kalpi.

Lampi ah thingtan ka put i zuri bang in hrocer rumro ka rian,kan inn ka phan i innka cu voidang ah dintein ka hun tawn mi kha ka ke in ka van lamh colh.A rak it cang mi ka nu nih innka hrenh a hun hlan ah voithum bak innpa theihawktlak loin "kuturter" in ka lamh manh ko.

Ka nu nih "ziah pate, cuti na um..?Zu maw na rit,zu zong na din bal ttung lo,a ho he dah nan i sik..? tiah awka nem tein a van ka hal.Ka rim a ka hnimh i zurim pakhat hmanh ka nam fawn lo,khuaruahhar tukin ka nu le ka pa an um cang tikah ka lung ai nuam loh i capo ah ka thlah..Haaaaa ka nu kan tihram ko hna cuh,nan ka ttih pah hnga maw ka ti le zuri nawl ka van cawng ta tiah ka hlen ziar hna.Ka pa nih "eih,eih,eih, si la loh_nupi tthit na hau pah le si ko hih"tiah a van ka ti chih.

Aaaaa si hlah,nupi tthit hauh ahhin tikhan maw an um le..?Ka pa hi ka nu tthit na rak hauh hna ahhin tikhan na rak um le si bak lai haaa tiah ka pa cu ka van capo le ih-khun cung in ka farnu he thideng in kan nii..

Culak ahcun zankhua a hungtlai ruangmang.Ka chung le an i hngilh ding cang,hngilh kho loin mitthli khua a hung ruat cang. Hi tlukin Sungsung ka duh i ka dawt ko mi Sungsung nih a ka duh ve lomi ka ruah ah le Sungsung valdang sinah liam tak ko lai ding ka ruah ah kan thinlung nih tuar kho hrimhrim loin biangno cungah hnawh cawk loin ka mitthli a luang thlahmah.Duhdawt mi ruang ah ka mitthli voikhat tlaknak bak si i tuarzia ka thiam hrim lo.Duhdawt mi ruang ah ka mitthli hi voikhat hmanh a luang lai ti hi ka rak ruah bal mi si lo i a ruah awk hrim ka rak hngalh bal mi a si lo.Duhdawtnak he nuam tein um lawng kha ka rak tuaktan mi a si tawn.Mitthli he ihmerem thiam loin zankhua dei ka ttap.

Cu ni thok in Sungsung te inn ah ka kal ngam ti lo.Khuate kan ti cu a thaizing kip ahcun Sungsung le Pahnok an ium lai timi cu hngakchia in upa tiang nih theih dih a hung si cang.Sungsung cu a chung le nih Pahnok va dingin fial le hnekchih peng a si tikah minunnem te Sungsung nih Pi le pu Nu le pa fial mi tamtuk in el ai timh ve lo caah Sungsung le Pahnok puai ni cu khiah a hung si cang.

Zarh hnih hnuah Sungsung le Pahnok puai ni cu a hung phan taktak cang.Khuami hna an ilawm dih,mirum nupi tthit kan ti cu a cice hrinhran ko.Hakha lei in Hlasak thiam zong tampi an cah hna i khua chingchan zong khual a rak tlung mi an tam ngai.

Mitampi an i nuamhnak ni a si nain kei ka caah cuni cu ka ngaihchiat le ka lungkuai bik ni ah a cang.Zingkaa sia that le chumchuang tu meikhu van ah a hung kai phutmat. Aw..Sungsung cu pasal ngei taktak ko cang hi ta tiah a ho chimtu um loin ka mit bak nih a hmuh mi thil boruak cu ka nunnak le thinlung nih a tuar kho hrimhrim ti lo.

Ka nu nih istyle law puai hna ah va chuak ve hme tiah a ka fial nain puai kal zong zuam loin a hlan i Sungsung he kan rak kainak "Cingril tlang"kan khua lu tlang ah keimah te lawng "zuun tthing"hlam ding in ka va kai. Palep le khuaifah hna nih ai dawh mi le a thlum mi Vauraung par tlan in an caan an hmang.A hlan bang tlang cung thlizil dai loin an hrang ko rih,Chokhlei par dawh hna an uai rih lo,thingkep par le senri par hna zong anmah ning tein an rak par rih ko. Va te phuntling lunglawm in zaihla an sa i khat lei tlang in khat lei ah an zuang lengmang hna.

Cu tlang in lungrawn khua cu ka hei cuan i sa meikhu van ah a kai thluahmah.Hngakchia hna authawng le loudspeaker biachim thawng cu thlitu nih tlangcung ah a van kaipi i ka hna ah a thang lengmang.Kan rak to ttinak Chokhlei kung tang teah ah keimah te lawng ka si cang.Kan khiah mi chawlhno le Chokhlei par hna vawlei an rak ciam dih cang.Mithli he fingtlang thluan hrawn in zanlei ninem te liam ai zal cang i Semnak kan lungrawn lei panh in duhsah tein ka ke cu chuk leiah a zuang i muihualham teah khin kan inn cu ka phan.

Zeizong vialte puai cu an rak ilim dih cang.Sungsung hawile Tin Tin Le Parku nih chun nitlak an rak ka kawl len.Sungsung zong nih cuni cu a rak ka hlam tuk hringhran ve.Zan ah mizuarkai ding caan a hung phan_Sungsung kha Pahnok te inn ah chungkhat hawikom rual hna nih va thlah a hau i kei zong Sungsung thlah ding cun ka kal ve.

Sungsung nih a ka hmuh bakin "tuni khoika dah na kal"tiah ka kut in a ka tlaih i a ka mawhchiat len nain kaa khat hmanh ka holh lo.Sungsung cu a puantom le a thil chiahnak thingkung te he semnak an ruuninn te cu a chuahtak riangmang ko cang.

Kei nih a puantom khat lei liang cungah kai khinh pah in Sungsung cu khat lei kut veve in Tin Tin he kan hruai i Pahnok te inn lei panh cun kan kal i mipi nih kan hnulei in an kan zulh thluahmah.

Sungsung semnak an ruuninn va chuahtak ding a ruah ah le hawi le kom vialte van kaltak ding a ruah ah zalam cung ah zan thlapa vang tang ah lungkuai in a ttap thluahmah.Hawikom rual he lentti cim hlan ah a duh lo tuk bu tein sunghno a nu le a pa nih thlankhun tuan tuk ah an dim ter tuan ai ee.

Zalam cung kan kal lioah Kawicung le a hawi le pawl nih zaihla an van sak mi cu " Kha hlan an rak chim thaihlung mang bang_kai nawl lio ah ka dawt liam ai_zeiti ruah nawlh awk um ti loin_Thlang khundim in merem ai cang"...[Sungsung cu nguinguiiiii in ik lengmang in a ttap lengmang ko.Kei zong ka thinlung nih a tuar kho hrim lo i ka mitthli hna hnawh cawk loin an luang thluahmah ve]. "Maw par bang na uai niah dawt hniang_na ruah piak lo na ttang lungfah lai_fiakfaifa bang tlangkip ah rung hmanh ning law_ka lung a riam kho hnga lo semmawng bang.

"Sungsung na nu nih an fial hrat cun liam ko ne law Pahnok sinah"ti vial hmanh khi peh kho ti loin ka mitthli cu vawlei ah van ruahpi bang dor khat hnu dor khat in an tla lengmang.Cuticun mitthli le hnapduk he ka caan cu a hung liam i zan khua kan dei.

Sungsung loin nikhat te hmah kaa nawl kho lo.A thaizing bak in India ram (News Delhi) ah sianginn kai ding in kai thawh colh.Kum 4 hnuah kan semnak lungrawn khuate cu ka van phan i Sungsung he kan tthut tti tawnnak an runninn le chumtual hna Sungsung liam hnuah ka van hmuh tthan.

Kan lentti tawnnak zalam le dinhmun fingtlang pheihrawn ttha vialte kei lawng nih mitthli he lungleng in ka van ttol tthan hna.

Kan "Zuun T'hing A Caam Lai Lungrawn Ah"..

By; Tum Tling