Dr. Vumson nih
Mualphohnak hoih in CNF cawlcanghnak kong, Mirangca in a tialmi cu, Mirangca a
rel kholomi http://thechinstar.com/ reltu
nih rel ve hrim kan duh ko tiah nawl-halnak a um caah, public ah
pholang cangmi, website zong ah taar cangmi a si ko caah, careltu nih theihnak nawl/ relnak nawl (right) an
ngei ko tiah laica tein leh a si. Dr. Vumson nih hin, zeitindah a tial rengreng
tiah hngalh a duhmi, Mirangca a rel kholomi paoh nih rel khawh a si.
Ca nan rel tikah,
ruahchih awk cu, CNF kut in an nunnak a liam timi tiang ahcun, a dikmi an si
kho men ko, asinain, thah an sinak a ruang (reason) ahcun, Dr. Vumson tialmi
hi, ingtu (victim) dirhmun (anmah Zomi lei hoih) in a tialmi a si caah, CNF lei
dirhmun in an chim/tial hlan ahcun, ahodah a dik timi careltu nih thleidan
khawh a si rih lo timi hi ruat chih te u!
Miphun dang a simi, Kawl
nih an kan uk, an kan hrem. An kan thah. An kan sersat tikah, cucu celh loin a
kan uktu Kawl Miphun ralkap doh ding in ramtang ah aa pummi hna, CNA hna hi,
Kawl Miphun ralkap nih hmuhnak paoh ah thah ding dirhmun ah an um. Cu tikah,
Kawl Miphun ralkap lei tang in, Kanmah Chin Miphun lila rawihphirh in, CNA
ralkap thihlohnak khua a khangtu zong an um kho ko. Cubantuk ral le sar karlak
ah aa tenhmi nun maw a biapi deuh, CNA ralkap lohral dih dah tibantuk dirhmun
hi, cozah dotu hna nih an ton duh ngaimi a si theu bantuk in, Miphun a humhimtu
thih or loralnak cha cun, ral le sar karlah a tenhmi hna tu nih, Miphun himnak
caah an nunnak pe ko hna seh tiah liamsiaherh in nunnak dihtermi zong um khawh
a si. Cuabantuk tete zong cu, phuan caan a phan tikah, an um ahcun, CNA lei nih
an langhter/phuan caan a um te lai zumh a si. Cubantuk tete zong a um kho timi
ruat buin rel cio hram u!
Thatlo
Lei In A Min A Thangmi CNF Cawlcanghnak
Khawmsuattu: Pu Vumson
Bo Zing Cung officer pakhat DC
ZomiInnkuan tong dingin cohlan a sinak cu DC ZomiInnkuan sinah, CNF chairman
Ralbawi Thomas Thango nih Laihilh Dim Sian Ciin kongkau cu thla thum chungah
thanh nan si lai, timi biakamnak an rak pekmi ruangah a si. Sihmanhsehlaw cu
thla thum cu January thla ah khan a dih cang nain ZomiInnkuan nih CNF sin in
Dim Sian Ciin kongkau zeihmanh an thei ti lo.
Bo Zin Cung nih kawlram ah democracy
uknak a chuahkhawhnak hnga le UN bawmhmi party pathum hna ramkhel biaruahnak i
CNF hmailei an dirhmun he pehlai in hma laknak ah CNF nih zeitindah NDF le NCUB
chungtel a luhter hna timi kong fianternak a tuah. DC ZomiInnkuan hi ramkhel
kong ah aa thlak bak lomi an si. Zeicatiah DC ZomiInnkuan cu ramkhel rian he aa
pehtlaimi siloin thlacam tinak ngeih duh ah dirhmi riantuannak buu a si.
Bo Zing Cung nih an riantuanak kong fianternak a ngeih lioah thil pakhat khat
tuah a si tikah, palhnak zeimaw cu a um zungzal phung a si, tiah a ti.
Hibantukin bia a chimmi nih hin ZomiInnkuan chungtel pawl fak piin an thin a
hunter hna. Zeicatiah ZomiInnkuan hrawngah CNF nih minung an thahmi hna kong he
pehtlai in Bo Zing Cung nih kan thluak tawl a kan timh tiah an ti. An nih an
duhning ahcun an rak tuahmi thiltha lo ruangah zangfahnak langhternak,
zawnruahnak langhternak, le theihthiamnak halnak hna CNF nih an tuah hna seh ti
hi a si. ZomiInnkuan nihhin CNF nih an thahmi minung pawl hi CNF cunglei
committee nawlpeknak in thahmi an si ti kha an hngalh hna.
Min Hnin kha CNF nih ralkap nih thah an
timhmi a si lo nain an rak thah sual tiah chim a si. (CNF ralkap nih an thah an
timhmi a silomi mortorcycle mawngtu an nam sualmi a rak si). Hi kong ahhin Bo
Zing Cung nih Min Hnin nupi Dr. Maureen zong thate in nawlnak a rak ngeih cang.
A pasal thihnak kong he pehtlai in Dr. Maureen he tonnak an ngeih lioah Bo Zing
Cung nih Adolf Hitler a uarnak le aa zohchunmi a sinak kong a chim. Adolf
Hitler cu vawleicung ralpi pahnih lioah Judah mi million ruk a thattu pa a si.
A si ahcun Bo Zing Cung cu Hitler he an zulhmi lam aa khat tinak maw a si kun
hnga? Chin ram chung minung zeimawzet thah-nawnnak ding a timtuahtu
(campaigntu) a si hnga maw?
Cucaah Dim Sian Ciin lak-ruknak kong zongah hin ruahchih lo
awk tha an si lo. Bo Zing Cung nih cun minung sawm nga lengkai kan lak-ruk cang
hna tiah a hei ti men ko. Hihi thil thlaphang taktak a si. Minung pakhat nunnak
kong hmanh ah kan lungre a theih lio caan ah CNF pawl nih cun a dang sawnli le
pakua an lak-ruk chap hna. Hibantuk in lak-ruk a tongtu nupa le chungkhat vialte
nih zeitluk lungfak in dik hi kong hi an hei ruah cio hnga. Cu lak-ruknak
vialte cu CNF cunglei nawlngeitu committee hna nawlpeknak in tuahmi lawngte an
si dih.
Pu
No Than Kap thah an rak timh zong kha CNF cunglei nawlngeitu committee
nawlpeknak in tuahmi a rak si ti kan hngalh. Cubantuk tthiam tthiam in Stephen
le kum 15 asimi nu, Biak Tial zong kha kawl ralkap hlathlaitu hna sinah kan
kong thawng nan thanh hna ti ruangah an thah hna zong kha, cunglei CNF
nawlngeitu committee nawlpeknak in a si tthiam tthiam ko.
Hibantukin mi an thahning chungthil kan
zoh tikah Lalhmangaiha le Zam Tung Thang thah an rak sinak zong hi cunglei CNF
nawlngeitu committee nawlpeknak in a si, ti cu a fiang. CNF vice chairman le
CNA lutlai sang bik asi bantukin hi lak-ruknak le thahnak vialte a timtuahtu le
a tuahchuaktu sinak mawh vialte cu Bo Zing Cung nih a phorh dih.
Bo
Zing Cung nih thil cang sual cu an um phung a si, tiah fiangte in a chim.
Saizang khua ah khua mi pahnih an voikhat hmuhnak bakah CNF ralkap pawl nih
ceilak in an hliam hna. Cu bantukin an tuah cu mahlemah i vennak caah a va si
ko lai. Sihmanhsehlaw CNF nih ralkap tam deuh i hruai duak zau tthan in kha
khua an tuk-nam than hna tikah mah pum vennak men si ti loin nan khua ah ral
kan thawk, timi thawng va thanh a si cang.
DC ZomiInnkuan chungtel pawl nih Bo
Zing Cung sinah Tedim peng i phaisa kholh lo dingin an nawl timi zong hi a
dikmi le a hmanmi a si ko. Sihmanhsehlaw an halmi taktak cu: meithal par hmuah
chih phaisa hal ti lo ding le pek a duh lomi/a pe kho lomi thah lo ding tu khi
a si deuh.
Pumpak in CNF nawlhal ka duhmi hna:
Mi
thah ngol cang u
Mi
lak-ruk ngol cang u
Mi
tuk-velh ngol cang u
Mi
thil-chuh ngol cang u
Mi
thil hrawh ngol cang u
Nan
ralkap pawl duty an um lio ah zuu ri ti hna hlah seh.
Nan ralkap nan cawm khawh hna lo ahcun
ralkap thar lak hi ngol cang u. Ralkap zong nan herh lo. NCUB, NDF le
Tripartite Dialogue chungtel tu si ulaw, ralkap ngei lo tein Chin Ram hi nan
aiawh awk a si ko. CNF nih nuhrin covo an buarmi kong ka hngalh hlan ahcun CNF
hi ka rak dirhkamh ngaingai ve ko. Keimah nih ka chimmi le ka tuahmi hi cu
biapi a si lo sihmanhsehlaw CNF nih an mah pum vennak dah asi lo ahcun mi an
thah ti lo hi a biapi.
A tanglei hi DCZomiInnkuan zong CNF he
pehtlai in teltumnak a ngeihtertu CNF pawl nih an thahmi le thilsual an
tuahmi cazin a si.
Ralkap
pensen ZelZa Lang le Saizang khua mi pa thum an thah hna.
Saizang khua hi Tidim khuapi in meng sarih a hlatmi a si i uknak lei zung a
umnak hmun zong a si fawn. Saizang hi khua ngan ngaingai a si. Hika khua
pawngte hin Manipur tivapi hi a tho. Hi khua hi a tu Tedim, Lamka le Saikal
peng hrawngah a ummi hna khua hmaisabik a simi Ciimnuai velchum ah a ummi a si.
Saizang khuami Pu Kam Hen hi Burma ram
le India ram karlak sumdawng tuahmi a rak si. Hi pa hi Saizang khua mi le
kiangkap khua mi vialte caah mitthahnem ngaingai a rak si. Cu lio ahcun Chin
ram chungah miphun le ram caah mithahnem tampi an rak um rih lo caah le Kawlram
le India ramri kiang Saizang khua ah a ummi a si caah Kam Hen cu CNF nih an hun
theih hngalh colh. CNF nichuah chaklei ralkap bu headquarter cu Mizoram chung i
a um bantukin Kam Hen hi CNF he hngalh theihnak a rak ngei mi a si. Zeitluk in
dah Kam Hen hi a rum ti hngalh an duh caah CNF nih hlathlaitu mi pakhat Saizang
khua ah an rak thlah. Cu CNF ralkap pa cu khua chung ahcun bongmong cawk a
duhmi bantuk khin aa umter. Ni zeimawzet Saizang khua chung, Kam Hen inn i a um
hnu zongah cu pa nihcun CNF ralkap a sinak kha khua mi a ho sin hmanh ah phuang
loin Kawl longyi aa hruk i tlahuar in a mu ko. Cu pa cu Ciimnuai hloh in aa
hloh sek nain a awchuah a dik lo caah mipi nih Hakha mi a si an hngalh thiam
thiam ko.
Zuu hna an ding ti. Kam Hen cu, cu CNF
ralkap pa cu hoikom tha ngai ah an hung cang zau. A rauh hlan ah CNF ralkap pa
nihcun Kam Hen nih a inn chung, Kuang chungah phaisa a chiahnak kha a hngalh
colh. Kam Hen cu India phaisa in tingli le Kawl ram phaisa in tingkhat tluk
hrawng a rak ngei. Cun, cu Hakha aw chuah a kengmi pa cu, ni tlawmpal a rauh hnu
ah a kal diam.
Cu pa a kal dih hnu nithumnak ah
meithal aa put i hmai khuh le puan temh he a ummi minung pathum Kam Hen inn ah
an chuak. An dihlak aiawh in bia a chimtu pa nihcun Kam Hen cu na thing kuang
ong, tiah meithal peng hmuah chih in a tler/hro. Cucaah Kam Hen nih an bia al a
ngamh lo caah a inn chungah a luhpi hna i an phaisa chiahnak thing kuang cu a
awnpiak hna. Cun, an nih nih India phaisa in tingli (Rs. 40,0000) le kawl ram
phaisa in tingkhat (Kyats. 10,0000) cu an lak i lo diam in an kal. Meithal
aa putmi pakhat pa cu Kam Hen nih a aw chuah ngeihnak in hlan deuh i bongmong
cawk ding in a sinah a rak phan i a hoi ah a rak cangmi pa kha a si, ti kha
fiangte in a hngalh. Cun, an nih nih a phaisa fir dingin a ra mi kha CNF an si
ti kha a hun hngalh. Cucu cawn ninga zan October, 1996. (A ni cu aa palh kho
men)
Zarhpi ni ah hoikom le chungkhat vialte
an ra i Kam Hen cu a phaisa sunghmi kong ahcun an thutpi i an hnemh. Zuu le
rawl hna an rak put. Biathli an i ruah pah in zuu cu an ding hna i an ri hna.
Cu zarhpi ni tthiam tthiam ahcun ralbawi Solomon nih a hruaimi CNF ralkap
pawl Saizang khua ahcun an chuak i khua bawi Pu ZelZa Lang sinah an ra i phaisa
an hal colh. Pu ZelZa nih atu liote ahcun tingkhat (Kyat. 10,0000) tlukte lawng
ka sinah a um cucaah khua chungah ka kholh hmaisa lai I cu hnu ahcun kan pek te
hna lai, tiah a ti hna.
Khua bawi ZelZa Lang nih CNF ralkap
pawl lakphakti a dinh hna cuahmah hna lio ah khin mizeimaw nih Kam Hen cu, na
phaisa latu CNF pawl khua bawipa sinah an um, tiah an va chimh. Cu bia an theih
cangka tein Kam Hen le a hoi le cu zawkzawk in Pu ZelZak inn lei ahcun an tli
colh.
Kam Hen nih CNF ralkap lah ahcun hlan
lio ah a inn ah a rak tlung cangmi pa kha a hmuh i cu cangka te cun, Kam Hen le
a hoi le nih cun an zuan hnawh hna i CNF ralkap pathum cu an tlaih hna.
Cubantukin zuuri hna nih CNF ralkap pathum an tlaih hna kha a hmuh tikah an
bawipa Solomon nih a puan tang in meithal in a kah hna. Cu lio caan cu khua a
kih caah puan an i vorh hna. An bawipa Solomon kahmi meithal kuan nih khua mi
pakhat a paw ah aa khen. Cun, an khua bawipa ZelZa Lang zong a ke ah a khen
chih. Cun Pu ZelZa Lang kawl ralkap a tuan lioah ralkap uniform he aa thlakmi
vampang cungah aa tarmi hmanthlak zong meithal in a kah a mit ah a khen. Cu
bantukin khua mi pawl an kah hna hnu ah CNF pawl cu lo diam in an kal.
ZelZa Lang chungkhar nih khua chung
sisayamah pakhat an auh hi an hma cu an zohkhenhter hna. CNF pawl an rak kir
than lai tiah an ruah caah khua chung pitusit pawl an auh hna i khua an venter
hna. Cu hna pawl nih cun meithal lai meithal puahtthek le pengphir an i put i
khua cu an ven.
Sisayamahnu cu hliam a simi pahnih a
zohkhenh dih hna in a kal. Cun, cu zaantim hnulei ah khin CNF ralkap pawl cu
tam deuh chinchin in, ralkap pahleinga hrawng an ra tthan. Khua vengtu pakhat
nih cun meithal in CNF ralkap pawl cu a kah hna nain a meithal a puak lo.
Cucaah CNF ralkap nih cu pa cu an kah i an thah. Meithal puah thawng cu an
theih tikah khua chung mi vialte cu khat le khat an i au hna i nan meithal he
chuak dih u, CNF ralkap kut in kan khua kan ven a hau tiah, an i ti hna. Khuami
vialte cu an dihlakte in an lai meithal puahtthek le pengphir he cun an chuak i
an khua bawipa inn lei ah an kal. Asinain cucu a rak tlaituk cang ai. CNF pawl
nih automatic meithal hmang duak zau in an luhnak ding inn chunglei kah pah
cuahmah in an lut. An luhnak ding inn khan vialte cu meithal in an kah
dihcikcek. Hliam a tuarmi pahnih ZelZa Lang le a dang pakhat an thah hna. Cu
lengah inn khan kip ah pa dang an um ti hnga maw, tiah an kawl hna i kum 14
tluk asimi khua bawipa fapa an hmuh i thah an timh. Sihmanhsehlaw khua bawipa
fanu pahnih hna nih kan pa zong nan thah cang caah kan tate hi cu that ti hlah
u, phaisa kan ngeihmi dihlak kan in pek hna lai a herh ahcun midang sin zongah
kan in cawipiak hna lai, tiah an nawl tuk hna caah thah loin CNF ralkap nih an
kal tak hna.
A thaizing zingka ah khuami pawl nih
inn cungdot ah aa thupmi pa pakhat CNF pawl nih an thahchihmi an hmuh nolh
than. Kam Hen tu cu kha zan CNF an rat than hlan ah an inn ah a kir diam cang
caah an that manh lo. CNF nih Tungzang khua bawipa Pu Zam Tung Thang zong
an thah fawn. Tungzang hi chungkhar inn 300 hrawng umnak khua a si.
October 15, 2000 ni ah CNF ralkap pathum Tungzang khua ah an rak chuak i an
khua bawipa Pu Zam Tung Thang an rak kawl.
Pu Zam Tung Thang hi kum 45 hrawng
minung a si ramkhel lei kong hi fak piin a buaipi mi a rak si. A mah hi
Zomi National Congress president zong a rak ttuan bal. Cun, a mah hi kawl ralkap
he naihte in rian a tuanmi le ralkap hlathlaitu MI (Em Ai) pawl he zong naihte
in rian a tuan timi a si. CNF pawl nih phaisa an kholhmi le tlawnmi kongkau kha
MI sinah cun report tuah a rak si. Cu report tuahtu cu Pu Zam Tung Thang a si
tiah zumh a rak si.
CNF pawl nih Pu Zam Tung Thang hmuh an
duhnak kong an chim. Cu lio ahcun Pu Zam Tung Thang cu a dum cawngh ah khua
lengah a um caah hmuh awkin khua chungah a rak um lo. Cucaah CNF pawl nih
Tungzang khuami Pu Lamh Thang cu Pu Zam Tung Thang dum ah na kan hruai lai tiah
an au hi Pu Lamh Thang nihcun CNF ralkap pawl cu dum ahcun a kalpi hna.
Pu Zam Tung Thang dum an phanh bakah
CNF ralkap pawl nih Pu Lamh Thang cu Buanli khua ah va kal law an khua bawipa
kha khuami phaisa le arti khawl hna sehlaw rak pu hna seh, tiah va chimh, tiah
an ti. Buanli khua hi cu dum cun hlaa tuk lo ah a ummi a si.
Buanli khua in Kamh Thang a hung kir
lei ahcun Pu Zam Tung Thang le CNF ralkap pawl cu dum ahcun an rak um ti lo. Cu
an inn i a phanh cu zan tlai hnupi ah a si cang. Lamh Thang cungkhat pawl
nihcun CNF ralap pawl nih an thah cang rua tiah lung phang in Lamh Thang cu an
rak hngah zeicatiah cu bantuk he aa lo mi tuanbia an theih cia mi a rak um
cang.
Nili
a luan hnu ah Pu Zam Tung Thang ruak cu thing lakah hmuh a si. Meithal kahnak
in a thih caah CNF ralkap nih an thah, tiah zumh a si. A ruak cungah “Hi pa hi
cozah he pehtlai in rian a tuanmi a si. Hi pa bantukin cozah he pehtlaihnak a
ngei mi paoh cu hi pa tonmi bantuk hi nan tong lai” timi ca an chiah tak. Cu ca
cung ahcun CNF seal cumh
a si.
Kawl cozah nih Pu Zam Tung Thang
thihnak kong cu an theih tikah zeitindah thah a si timi cithlatnak an rak tuah
colh. Cu cithlaihnak ahcun Pu Lamh Thang nikhat lamkal asimi Tedim khuapi ah
atu le atu an auh. Pu Zam Tung Thang dum i CNF ralkap kal pitu a si ruangah CNF
lei ttang na si, tiah cozah ralkap pawl nih an ti. Hi report tial a si tiang
ahhin cun Pu Lamh Thang cu tlaih a si rih lo, sihmanhsehlaw cithlatnak a dai
bal rih lo. Cun Pu Lamh Thang zong nih a rauh hlan ah an ka tlaih lai i thongah
an ka thlak ko lai, tiah lungrethei ngai in a um ko.
Pu
Zam Khan Pau Thahnak
Socialist
Program Party tawlrelzia an thiamlo ruangah Kawlram
chawlehthalnak lei ah fak piin a rak tla. Cubantukin an tlakchiat lio caan
ahcun State and Law Restoration Council le State Peace and Development Council
le ralbawi Ne Win kut tang ummi ralkap pawl rianttuannak vialte nih a hung zulh
ciamman i Chin miphun zong nih fak taktak in tu hlan an tawn bal lomi sipuaizi
lei tlakchiatnak an tong ve. Cu bantuk dirhmun ah Chin miphun kan dir lio caan
ahcun Zo miphun pawl nih an ngeihmi paoh paoh Mizoram lei ah kalpi le va
zuarthlainak rumro in pawcawnnak an kawl ve. Arti, ar, vok, caw le a dangdang
lo chung chuak ei ding vialte zong an lak hna i Mizoram leiah zuar awk ah an
kalpi tawn hna. Cubantuk in an hmuhchuakmi phaisa te cun Chin ram ah an herhmi
thilri, si ti bantuk tete an cawkzalh tawn hna.
1995, March thla chungah Lophei khua
tlangval pawl nih Mizoram lei kalpi dingin caw run an hruai hna i Tio nel tan in
ke kalnak lam Zote-Farthlang lei in an kal. Cu lam cun Mizoram phanhnak ah nili
chung an rau. CNF ralkap pawl cu India ram, Mizoram State ah chiah an si bantuk
in chawlet-chawhrawl pawl phaisa khawl dingin Zote le Farthlang karlak ah a
ummi CNF ralkap pawl he an i tong.
Cun CNF ralkap pawl nih Zam Khan Pau le
a nau pa caw nan hruaihmi man tax nan pek lai tiah an hal hna. Phaisa an pek
hna hlan lo Mizoram leiah an kalter hna lo caah caw man tax cu an pek hna.
Mizoram ahcun fawite in an caw cu an va zuar hna I, loh- theih-lo in chungkhar
caah an herhmi thilri pawl Mizoram ah an i cawk i an kir than.
Kum 24 tluk a simi Zam Khan Pau hi a
upa nih Mizoram lei caw dawi bawmh dingin a hlan. Zam Khan Pau hi kum hnih tluk
a simi fate le nau a pawi lio mi nupi a ngei mi a si. An cu a nau ngeih nithla
a tling deng cang caah a ran khawh chungin inn tlun a duh. Nitlak hnu ah khin
zamrang in Zam Kham Pau le a hoi le cu Trio ral lei va peh an i tim.
Sihmanhsehlaw, CNF ralkap pawl nih lam an kham hna i kalter an duh hna lo. Zote
khua pawng ahhin Kawl cozah nih ralkap camp an chiahmi pakhat a um. CNF ralkap
pawl nihcun “kawl ralkap pawl nih hi kaa ah kan um hi an theih lo kan duh.
Cucaah, kan kong an theih sualnak hnga lo mizeihmanh Trio ral chuahter kan onh
hna lo,” tiah an chimh hna.
Sihmanhsehlaw, Zam Khan pau nih CNF
ralkap pawl cu “ka nupi a rauh hlan ah nau ngeih ding a si caah zaangfahte in
ka lenhter ko sawh u,” tiah a nawl hna. Cun, CNF ralkap pawl nih zantim ah
kal-tleng na duh ahcun Kys.100 in rak kan pe, tiah an hal. Sihmanhsehlaw Zam
Khan Pau nih Kys. 100 cu ka ngei lo tiah Kys. 50 aa chuah i a hun hmuhter
hna bak ah, CNF ralkap pa nihcun a meithal tanglam in a suk a suk chih i
Zam Khan Pau cu vawlei ah a tlu. Cun, cu ralkap pa nih cun a meithal peng in
Zam Khan Pau cu a paw ah a sawh chih. Cucaah, a meithal peng zummi nih Zam Khan
Pau zuundil a pemh tiang a sawhchih. A hma cu a fak tuk hringhren ko nain inn
phanh tuan a duh tuk caah aa hnee i kal aa zuam chih. Asinain, Haimual khua
tiang lawng a kal kho. An hliamnak hma a fak tuk caah a celh ti lo i zan ah a
thi.
CNF ralkap nih Pu Kham Khaw Pau Thil an
suhnak kong (a min hi CNF pawl nehzulh sual lai phan ruangah thlen deuh a si)
Pu
Kham Khaw Pau hi Mizoram ramri le Kaleymo karlak truck/jeep a mawngmi a si. Hi
pa nih Mizoram le Chin ram karlak ah a tongmi zong hi thil dang a si hlei lo.
Hibantukin Mizoram le Chinram karlak check points tampi a um caah mawtaw mawng
paoh nih phaisa hi hmun li ah an pek a hau. Chawlet-chawhrawl le mawtaw mawng
vialte nih an thil zuarmi man zatuak zeimawzet khi cozah ngunkhuai khawltu le
palik sinah an pek a hau. Cu leng ahcun, kawl ralkap pawl sinah an kal duhnak
tiang tleng lak in an kal khawhnak hnga venhim man (an mah auhning in) an thil
man zatuak zeimawzet hi a tlangpi in khua lehnak haukaa ah pek than a si tawn.
Mawtaw mawng pakhat a si bantukin Kam Khaw zong nih cozah ralkap sinah siseh,
cozah ngunkhual khawltu sinah siseh, a pek ve a hau.
Mizoram le Chin ram karlak ah a ummi
khua pakhat Rihkhuadar timi ah cozah ralkap pawl nih an um. Cun, Tio tiva
nichuahlei kam zongah cozah ralkap camp pakhat a um fawn. Tiva khat te lei ral
cu Mizoram a si cang. Rihkhuadar khua hi ramri he meng thum hrawng lawng aa
hlatmi a si. Tio tiva in nitlaklei kap Mizoram chungah CNF ralkap camp pakhat a
um ve.
2001
March chungah khan Kham Khaw cu Kawlram le India ramri a kal i cu lio ahcun CNF
ralkap pawl cu an rak um. Rihkhuadar le Tio tiva karlak ahhin BA camp pakhat a
um i Tio tiva ah a dang pakhat. Rihkhuadar le Tio karlak ahhin CNF ralkap pawl
an cawlcangh ngaingai. CNF le BA pawl hi theihthiamnak an ngei i CNF nih hi kaa
ahhin phaisa khawlhnak nawl an pek ve hna. Zeicatiah CNF um lo ahcun hi kaa
hrawng ahhin BA pawl um a herhnak a um lo. Cu bantuk cun CNF pawl nih BA
pawl hi mitlung kal phaisa khawltu ah an herh hna. Cozah ralkap pawl zong nih
CNF pawl cu ramri ah an umnak kong chimhfiahnak caah an herh ve hna. ( Note: Hika ah “BA” a ti lengmangmi hi, zeibantuk BA dah ti
ka fiang lo. Burma Army ti duhnak or Phu dang dek!)
Cucaah
CNF ralkap pawl nih dong Rihkhuadar in dong zakhat zakhat tluk lawng a
hlamihmun ah Kham Khaw Pau rak tlaih hi an caah a cang kho mi a si ko. CNF
ralkap nih Pu Pau cu na ngeihmi phaisa vialte rak kan pe dih, tiah an hal.
Phaisa a hal cuahmah pah cun CNF ralkap pa nih cun heh tiah a kuttum in a hmai
ah a thongh chih. CNF ralkap maw, BA pawl nih maw, phaisa an ka hal sual ah
tiah a zal chungah Kys. 10,000 aa chiah cia mi a um i cucu CNF cu a pek hna.
Sihmanhsehlaw, CNF ralkap nih cun Pu Pau nih phaisa Kys. 10,000 lawng a ngeih
lai ti hi cu an zum lo. Cucaah, CNF ralkap pa nih cun phaisa tam deuh in rak ka
pe tiah a hal pah in a hmai ah a thongh chih. Cu CNF ralkap pa nih Pu Pau cu a
paw ah meithal in a sawh chih i a kap ding bantuk in a um caah Pu Pau nih ka
phaisa kenretmi hi thih hnawh awk tlak a si lo tiah a bag chungin Kys. 10,000
aa chuah chap i a pek. Saupi tlerhro hnu lawngah phaisa a pekmi a hmuh tikah
CNF ralkap pa cu a thin a hung tuk hringhren i fak chinchin in a hmai ah a
bengh, a thongh i a kalter. A thongh, benghnak cu a fahtuk caah Pu Pau cu
nithum chung raw lei kho lo in a um i rua peng in fanghang ding in a um.
Thuam
Go Pau Thahnak
Thuam Go hi Mizoram le Kalymo karlak
sundawng tuahmi a rak si. Tuithang khua ah dwar hme te a ngei. Chungkhar lubik
a si bantuk in khua huah tak in Kalemyo lei ah thil a vun cawk i Mizoram lei ah
tuletu a kal pi tawn. Mizoram in thil zeimaw a cawk i an dor ah zuar dingin a
chiah tawn.
A mah he khual a tlawng ttimi pawl hna
he, 2001 March chungah khan Gun tiva kam ah an riak hna. An mah le i lumhnak ah
mei hna n kau i rawl hna an chuang. Cu bantukin meiphu kulh in an thut lio
ahcun tiva khatlei ral in mizeimaw nih meithal in an rak kah hna. Cucaah, Thuam
Go le hoi le cu “Kan kap hlah u. Khua mi sawhsawh kan si, tiah fak piin an au”.
Sihmanhsehlaw cu vial ahcun Thuam Go cu an khen i a thi. Cu Thuam Go thattu cu
CNF ralkap an si ti kha a rau hlan ah an hngalh colh.
CNF ralkap pawl zong nih Thuam Go an
kahmi hi cozah ralkap ah kan ruah hna caah a si, kan palh tiah, an co hlan ve.
Kawl ralkap pawl nih lunghrinhmi mibu paoh an kah tawn hna caah kan mah nih kap
hmaisa hna usih tiah kan kah sual hna, tiah CNF ralkap nih an chim. Thuam Go hi
fa pathum a ngei. An pa thihnak nih cun an lung a father tuk hringhren. A hnu
ahcun Thuam Go fale cu an dihlak ngaktah sianginn ah an chiah hna.
YMA
President Pu C. Lalhmanngaiha Thahnak
July 12, 1996 zaantlai ah Mizoram le Chin ram ramri ah a
ummi Khuagleng khua ah ralthuam he a ummi CNF ralkap pathum an lut. ZoNeing
(Vol XI No 48, 49, 52,58,) nih a chimning ahcun ramri ummi khua pawl hi CNF
ralkap pawl nih harsatnak le buaibainak tamtuk an pek rua hna. Cu zaan zong
ahcun CNF ralkap pawl nih fak piin innka an king i, hnachet khuari an umter.
CNF ralkap pawl nih cun “CNF ralkap kan si hi, innka rak kan awng u” tiah an
auh len hna. Cubantuk in an tuah tiah khuami nih CNF ralkap cu an tih tuk
hringhren hna. Cucaah YMCA president Pu Lalhmangaiha cu mipi tanpi dingin a inn
chung in a rak chuak i “zeidah a cang, tiah a hal hna.Cu vial ahcun CNF ralkap
nihcun meithal in an kah i khua lai ah chikhat ah a thi colh. Cu dihcun CNF
ralkap pawl cu khua dang lei ah an kal i an va kalnak khua ahcun inn ngeitu
pakhat lakphakti rak kan pe, tiah an hal i lakphakti an din dih in an kal diam.
Mizoram
palik pawl nih CNF ralkap pawl cu July 19th, 1996 ni ah Pu Lalhmangaiha thattu
CNF ralkap cu an dawi hna. Vaphai khua ah CNF ralkap le Mizoram palik pawl cu
an i tong i fak piin an i ka pi CNF ralkap Ca Chun thah a rak si. July 25, 1996 nih minung thongli nih
Aizawl khuapi chungah Pu Hmangaiha thahnak kongah duhlonak/lungtlinlonak
langhter in an au. Cun Aizawl Tenis Stadium ah Young Mizo Association president
le general secretary le Mizoram Home Minister Pu J. Alsangzuala nih Khuagleng
khua YMA president Pu Hmangaiha thahnak kongah fak piin sualphawtnak an ngeih.
Pu Lalhmangaiha Thahnak Ruangah
Biathluknak Tuahmi Pasarih
1.
Tihphang in a ummi Khuangleng khuami hna chanh dingah hmai ah a chuakmi
Pu Lalhmangaiha cungah upatnak le hmaizahnak peknak.
2.
Zeitikhmanh ah ral a ngei bal lomi Pu Lalhmangaiha thahnak fak piin
sualphawtnak langhternak.
3.
Mizoram cozah nih Pi Vallaveni (Pu lalhmangaiha nupi) le a fale hna caah
lukhawng phaisa pek i Pi Vallaveni cu aa tlakmi cozah rian pek piak ding
halnak.
4.
CNF ralkap ruangah dai tein zaan ah it kho loin a ummi Kawl ram le Mizoram
ramri khua Vaphai, Khuangleng, le Hnahlante khua hna ah palik umnak post chiah
ding halnak.
5.
Mizoram ramri Bangladesh le Burma karlak ah ramri palik chiah dingin halnak.
6.
Mizoram chungah a ummi ram dangmi vialte a rannak in chuahter dih ding halnak.
7.
YMA nih bawmhnak a hal tikah a rang kho bik in palik nih bawmhnak an peknak
hnga halnak.
August 1, 1996 ah Mizoram cozah nih Mizoram chung ummi
ralzam vialte le kawl miphun a simi vialte Hnathial khua in a dawi dih hna. Cu
bantuk cun Mizoram cozah nih Burma ram miphun a simi paoh daw ihram cu Mizoram
hmun khat kaa khat ah a thok.
August
3, 1996 ah Mizoram Police Private Constable chungtel a simi Pu Vanlalpeka Lance
Naik, battalion pathumnak ah a ummi zong CNF ralkap nih an kah i a thi. Khuangleng
khua thilcangmi in caan rau lo te chungah CNF ralkap nih Ruantlang khua pastor
an kah fak ngai in an hliam than.
Vum son
Thechinstar chung ta lakchin mi a si.
