Duh A Tling Lo Dawtmi [Part-3]

Ruahpi siamsiam tein a sur,thinghnak cung in vawlei ah ruahti dor an tla pa ziahmah.Culak ah Suite cu lungretheih tuar in thingkung hram teah a dirnak caan a sau pah cang.Tiva sum lei hrawn in Suite cu chuk lei ah a kal.

Zanlei khua a hung tlai,tiva kuang ni a hung hliap pa ziahmah,Suite tiva kuang hrawn ah lileng le ngaihchia in amah te lawng a per choi lengmang ko.Tlawmpal ah zan khuamui nih tiva kuang le tuupi hmawng cu a van khuh cang.Ramsa phuntling an vahveihnak le an rawlkawlnak hmun cio in riahbuk leiah an tlung pah cang hna.Va te phungtling zong an riahbuk panh pah in zaihla dawh sak pah he rianruun cu van hlam ve cang hna.

Pathawng dawtmi Suite bel riahruun a ngei ti lo.khoika dah ka ih hnga tiah hmunhma rem deuhnak le tthat deuhnak kawl in Suite a vai.Zan khua a mui cang i kalnak a hmu ti lo,a donghnak ah thingkung lianpi tangah hnahchawl a phak i cuka cun a riak.Zute le Vate hmanh nih chungkhar tling in riahruun chungah lum tein an hngilh dih lioah fanu dawt Suite cu hnemtu ngei loin pilking le tuupi hmawng tangah amah te lawng mitthli he khuasik lak a bag te a lu ai tlinh i zamttim khuamawt ah a ih pah in a ttap lengmang.

Zingnu kutser cerhlian ninu ceudawh te chuak in zinglei khua a hung lang tthan.Suite caah ttahnak phur niceu menmen a si.A caah lawmhnak niceu a tlang kho lo.

Zinglei khua a hung ceu ziahmah cun Ramsa hna rawlkawl in fingkip le tlangkip ah an i thawh cang.Vate phunkip zong thingpar cungah umthiam loin an awn an au.

Suite zong tihal rawlttam tuar in zinglei cu a hung tho ve.A rawlttam tuk caah a thazaang a chuak kho tuk lo,Nusal tiin khoika tel ah eiding phun um hnga maw tiin a mit a vei len ko.A chak teah khin Theipi hmin ttha tuk mi a hei hmuh.Cu thei cu a hei fuh i a hramah a tlaimi cu zu nih an rak ei dih cang.A kung san deuhnak ah khin a hmin ttha mi tampi an tlai rih.A san leiah cun a kai i vanchiat ah a ke a pelh i thingkung cung cun a tlai sual ko ai.

Ai,ka nu! tiin a va ai vial ah khin vawlei a phan cang.Sau nawn te a hung hram hnuah nusal tiin theikung cungah a kai nolh tthan.Theipi hmin cu cim te le fawi tein a ei pinah a bag chung ah khat tein ai phurh chih.

Cu ni zong tiva sum/chuk lei hrawn in chun nitlak a kal tthan.A caan ah lungkua le thingkung tang tibantuk ah a riak i thingthei le thinghnak ei in a paw ai cawm.Zute le Vate hmanh rawl loin a chia lo tu kan Pathian nih Suite zong rawl loin a chia lo.A caah ai tlak in ti le rawl a pek tthiamtthiam ko.

Suite cu amah te lawng ramtang ah thlakhat chung a vai cang.Nikhat cu zanlei nitlak lai teah khin tili ah long/puum pakhat a hei hmuh.Ai! hika hi minung nih an palnak hmun a si cang ti a hmuh tikah a thinlung a nuam deuh ngai cang.Nain cikkhat tete ahcun minung hmuh lai zong a ttih pah cang.Minung hmu loin thlakhat renglo ramtang ah a vai cang cu ta.Cun,mah ram mi si lo pinah India ram misual an he kai tong sual ti zong a phang tuk fawn.

Suite cu mahcu thing in seih mi long/puum hme te cu ai cik in zan khuadei tiva sum leiah cun a zuang lengmang.Zinglei khuadei lai teah khhin tiva lianpi pakhat ah a chuah.Cuka tiva lianpi pakhat cu tlawmpal a heu zuan ah khin ralchan ah khua hmete pakhat a hei hmuh.Cuka khuate ahcun ka lut hnga maw tiah ai ruat lengmang.

Zeisihmanh ah lut ko ning a ti i Pathian sinah thlacamnak a ngei ta cuka khuate ahcun zinglei suimilam 6:00am hrawng ah a lut.Cuka khua cu inn 50 hrawng an si i nga tlaih in a paw a cawm mi khua an si.Nga an tlaih mi hna hi sumawng pawl nih an hung cawk tawn hna.Mawtaw lam zong a pem lonak khua le khuapi naihnak khua zong a si lo caah cuka khuami cu an hrut tuk rih.

Suite nih khuami cu mirang holh in a van chonh hna tikah an hohmanh he an i chawn kho lo.Kan mah lei muisam keng mi minung hi an hmu bal hna loh i Suite cu an khuapi tein an chuak i an zoh dih.Khuami nih an tleih i inn chungah an hren.An ei mi Aatta le ngasa an pek i a ei ve tawn.

Zarkhat an hren hnu ah khin cuka khua i khuapi ah Sianginn sang a rak kai mi pa pakhat a rak tlung.Cu pa nihcun a va ton i an i chawn ko.Suite nih a sining le a tuanbia kha ttha tein mithli he a chimh tikah cupa nihcun a zaangfak tuk hringhran.

Cupa nihcun "na thingphang hlah,na lungre zong thei hlah,keimah nih kan bomh ko lai.Nan sianginn kainak zong hi ka theih tuk mi si,kei zong Bumbai khuapi ah sianginn kai ve mi ka si ko" tiah a ti i bia a kamh tikah Suite cu a thinlung a nuam ngai cang.

Cupa nihcun an khua mi vialte kha Suite sining a chimh dih tik hna ah an khuami dihlak nih Suite cu an zaangfak ngaingai.

An thil hruk-aih mi le eidin phunkip tiangin an rak pek.Cuka khua ahcun Suite cu zarh hnih a caam hnu ah Bumbai khuapi lei panh dingin Suite cu cuka khua i a bawmtu Rahul timi pa he an i thawh tthan cang.

Suite kal lai zing cu an khuami an cuai tuk hringhran.An khuami vialte nih a kut an tlai tangka zong an pek cio.Suite zong cuka khua cu a rak ttih tuk nain atu ahcun a bawmtu khua an rak si.Suite zong nih a ruahlo ning tukin an dawtnak a hmuh tikah ai lawmhnak mitthli he cuka khua a liam tak riangmang hna.

Nithum le zanthum speed board hmang in tiva pi cungah an kal hnuah Bumbai khuapi rilli lei a kal mi tilong pi in Suite cu amah lawng a kal ding a si cang.A hawipa Rahul nih cuka tiang cu a thlah i a kir taak cang.

Pathawng cu lungrethei in Suite a thawngpang cu a rak hlat lengmang ve.Vinus hotel ah a va kal i a hlat zong ah Suite konglam thawngpang hohmanh nih an theihlei lo.An khua ah a tlung tiin an rak ruah ve.Pathawng lungrethei in tidin rawlei chungpillo in Suite kong ruat le ngai in a ttahnak mitthli a tam tuk cang.Laitlang lei zong thawng an hei thanh i Suite te chungkhar zong khua mi nih mitthli le ttah buin an rak topi ve hna.

Bumbai khuapi pawl rilli pi panh in Suite cu tilong nganpi nih a tlik pi thluahmah cang.Tilong chungah minung an tam pi.Nikhat le zan khuadei an kal hnuah Bumbai khupi rilli kam cu an phan.

Zinglei niceu dawhte a hung chuak i rilli kam pangpar dum (park) hna an i dawh hringhran.Zapi nih hman mi telephone in Suite nih Pathawng phone cu a call len nain a ngah ti lo."Hi number cu a thi cang"tiah computer nih atu le atu a chimh lengmang.

Suite rawldawr ah rawl a ei dih khawh in Bumbai khuapi leiah suimilam 12:00 ah mawttaw inn ai thawh tthan ding a si.Suimilam 3 chung an kal ahcun Bumbai khuapi taktak a lut cang lai.

Zinglei rawlei hlan teah Suite cu rilikam pangpar dum chungah ai chok.Hlan i an sianginn ah Pathawng he Park i an rak len lio kha Suite mitthla le thinlung chungah puan bang a hung thar tthan.Dinhmun remhlei an donh mi cungah tthu in Suite lileng khuaruat ngai a tthu. Ka pehthan lai.. By; Andrew Tum Tling