Kan Khua Tlang Na Liam Ni Cu( Part-2)

 Zan khua thiang tang ah kan khuachuah zalam hrawn in kan kal lengmang. Pumhchuak kaa hrawng te a si caah michoklet an tam pah rih. Caanraulo teah Thaku te an riahnak ding kan bu church chairman te inn cu kan phan. Innchung ahcun kan bu nungak tlangval tlawmpal an rak um ve. Thaku te khua cu an tling, Thaku a iang kho tu le Thaku tluk in muidawh iang ngei an um lo.

Tlawmpal ah kan mino chairman Paling nih pakhat tete in theihternak a van kan tuah i khual lei zong nih theihternak cu an van ituah ve. Caansau hmanh ka tthu rih hme maw? Thaku lawng dahkaw ka mit nih a ngiat ko rih ka tilio ah kan mino chairman pa nih "lawi a za cang, nan raknak lam le sul a chukcho pin a lamhla tuk i nan ceicer tuk lai, tuzan cu kan lawi rih lai i thaizan tu ah saupi in kan in t'hutpi te hna lai" tiah zankhat tthennak bia a van phai len ko cang.

Keinih cun lawi cu ka duh bak rih lo, anmah khual lei nihcun " a tuan tuk rih hme hi, tthu ko rih uh" an ti ko nain an thaba tuk ti cu a fian ve ko caah thadam tein ih-zau kha an herh ve cang. Kan hawi le innleng ah an chuak phutmat, kei ka tthu ko rih, mitt'hep lo tein Thaku cu ka zoh ko rih, ka hawi le an chuak thlu deng cang caah kei zong ka phei zuunrau cawi in Thaku mitsir ven pah he tthutdan tlang tleih pah in ka hung tho chialmal ve. Thaku nih " Na lawi ve la mw? tthu ko rih hme nang cu" a ka ti nain a velhlei hna si sual ah tiah " ka lawi pah ko lai, nan ihnak hna sinpi lai maw?A kik pah i puan vorh le ihphah hna nan ideih lai maw? tiah caansau nawn te bia kaa chimter len. Innkil lei khin Kiki nih " Utling, na lawi lai maw? tiah thang nawn khin a van ka hauh ve. Cuti luklak bia kan iruah lioah innleng tiang ka phan manh cang. Thaku nih innleng tiang a ka thlah i " khah si le, mangttha tuk mu...Thaizing zingka teah ka van in lak tthan te hna lai mu, byeee" tiin cuzan cu khuamui nih daidup in a khuh cang mi caan ah ka Bawngbi zal kut hnih in kai purh i cung Arfi le thlapa zoh pah in vancau bu khin kan inn lei cu ka fuh.

Zan a hung tlai hnu semnak kan lungrawn khua te ah thilzil kik nem tete an hung hrang chialmal. Lamchak lei in Khuabai nupa hna hlasak thawng le Khuatarit lunglen thlasak thawng hna nih semnak lungrawn khuate ah lunglen a zualter chin. Zaanguai chialmal in ihkhun lei cu ka van panh i ka ih hmun in Thaku cu ka ruat colh. Ziah, mahhi Thaku hi ka duh ka dawt ko cang hi teh, zeitindah si hnga..? Zeitindah ka tuah lai tiin keimah le keimah lawng kai el lengmang. Sautuk hngilh loin ka pawng teah a um ko mi le kan inn tlung, thaizing ah ka ton tthan ko ding mi Thaku cu thinlung biatak tuk hringhran in ka ruat. Aw... Thaizing zingka teah ka ton tthan te ko lai tiin cu zan ka ruatnak le ka thinlung cu ka dinhter i kai hngilh.

Thaizing cu zingka tein ka tho i chungnitlak ai dawh tuk mi pangpar dum chungah Thaku he nuam tein kan lengtti. Ka duhdawtnak thinlung bia hna cu ka hmurka nih ka dawt Thaku sinah pehzul tein a van phuan thluahmah. Ka duhdawtnak tidil cungah nuam tein lio a duh mi le ka duhdawtnak tizuthlum duhdim tein dawp a duh zungzal mi Thaku nih " Utling, kan dawttuk ve ko ee, nang he kan iton hi ka caah lawmhnak nganbik a si" a ti pah khin kan kut hnih tein kan i tlai i kan hmailei veve hoih in kan cal le kan cal cu kan tonh tti. Cuticun ai dawh tuk mi le a nuam tuk mi park chungah Varit nupa bang dawtnak congthai in le kan lentti caan a hung sau ruangmang cang. Thaku nih Rose pangpar rang mi te khi a van ka pek i " Ka dawt Utling, hnim hmanh! a rim a tlum tuk nangmah le keimah dawtnak bak a si ko tiah mirh nawn te khin a van ka pek mi Rose par te cu ka van hnimh. Thlithiang le ruahti khuacaan ttha hna nih an cawm mi Rose par rimhmui cu ka dawtnak Thaku he mirh nawn veve in kan hnim tti. Culio ahcun sunghno ka nu nih " Patling, tho cang! tho cang! tiah ka puan cu a van hawh len ko. Elaw! thawk ka tloh ko lo maw tu hi tiah rianrang takin ka van tho i coka ( Innte) lei ka van chuak cu Thaku le Kiki cu tuaicur in rawl an rak chum/chuang cuahmah ko. Thaku nih " Utling na mangttha tuk rua ee" tiah a van ka capo pah khin " keinih, tuzing cu thawh ka tloh bak si, nanmah tein nan rak lawi i ttha tuk, ka ruatthiam ko ne uh tiah bianem cu ka van chim ve.

Chungkhar tling tein cabuai cungah Pathian pek mi tirawl ding-ei tti dingin kan ikulh cang. Ka nu nih " Tuzing cu Thaku nih thlacam seh" tiah a van ti cu " holh lo tein a um colh, a pawng teah ka tthut caah a thli tein ka cabuai tangin ka ke ah a van ka sih colh, ka Utling nih ka chawng seh" tiah a van ti i keimah nih thla ka cam dih hnuah rawl cu kan ding-ei tti hna.

Eikhim in sunday ni zingpumh ah kan kal. Gospel in ( Pulpit change) ah a rak ra mi Thaku te khua Khrihfabu nih hla t'hat'ha an kan sak piak i pumh a nuam hringhran.

Pumh dih in Khual le laikhat nungak tlangval pawl cu tlangah kan kai hna. Kan khuaram ah a nuamh biknak Cingril tlang timi ah hawikomhnak le nuamhnak tuahtti dingin kan kai hna. Cu tlang cu kan lu lei kan khua in meng khat tluk hrawng ai hlat. Cu tlang ahcun Chokhlei, Vaurong, senri le thingkep par phuntling an parnak, kehthei, dingzun le ram thingthei phuntling an tlainak hmun a si. Tlangpar cung ahcun thizil vingving in a hrang i Va phunkip dai loin an au-khuannak le zaihla an saknak hmun a si.

Khual le lai tiphun in a ttuaittaui tein caanttha cu kawl cio a hung si cang. Thaku pawng rumro ahcun kai helhum i ka tthuto. Tangkua ka kai karpi lio te a si i ka rak hngakchia deih rih. Nungak helh zong hi ka rak ngamh tuk rih lo. Fak tuk le biatak tuk in nungak uar le duhnak thinlung ka rak ngeih lio hrawng te kha ka si. Keimah nakin upa deuh mi pawl kan khua tlangval an tam tuk i annih cu an ralttha tuk. Zeibia poah an chim ngam i kan nih valno deuh pawl cu an biaki tein an van kan ziao ahcun tanglei lawng bih a si ko. Patling, mah inn tlung nungak hna cu mahnih cun ttuai phung si tal lo cuh tiah an van ka capo luklak le valcang ( Val upa deuh) pawl nih Thaku hmunhma cu an van ka chuh diam ko.

Ka dawtmi Thaku pawng teah ka tthuto kho ti lo. Midang nih Chokhlei par le Senri par an van ttawh mi tete hna Thaku nih a hnulei sam ah ai tonh chih cang. Midang val upa deuh kha " ka ubiak,ka ucung, ka ulian" ti deuh in a van auh ve cang. Hawikom thar le ngamhtlak thar tete a van ngei pah cang. T'hatnak in ihawikomh cu a ttha tuk ko nain keibel ka thinlung chunglei te cun ka thinlung a rak fak ziar. Kai nuam kho ti lo. Ka cungah zeihmanh sualnak a tuah lomi Thaku cung a thli tein kan thinlung a fak cang. A nuam tuk lai, philhkhawh lomi ni/caan a si lai tiah kai ruah mi ni/caan cu ka chung lei in kai nuamh lo ni le caan a si. Zanlei ni liam zokzok seh, midang he an ihawikomhnak hi dih zohzoh seh tiah khua lawng ka ruat cang.

Zanlei ninu cu a hung nem chialmal i leng le valno rual hna cu Vanra run bang semnak lungrawn khua zung panh in kan tlung tthan cang.

Zanriat dumtti khawh in kan biakinn ruun dawh cu kan panh tthan hna. Ka church chairman pa nih " Thaizing cu kan khual pawl hi an caam lai, Caw le Vok kan that lai i a hohmanh bau lo tein thaizing zanlei ah rawlhrawmnak kan ngei lai, khuami le khrihfabu dihlak sawm nan si" tiah thawng a van thanh cu " Amen" timi kan tam ko.

Zan pumh chuak in khual nungak pawl lenkai ahcun voidang phun bang kan ithawh cio. Pathian ni chunhnu tlangkai lio i hawikom pawl kha Thaku pawng ahcun an khat cang. Kei cu innkil vampang hngoh khin khuaruat ngai in ka tthu ko. " Thaku nih" Utling, rak tthu ve hih, ziah nangmah lawng na tthut ko, nungak hna biaruah ve hna ca tiah"siaherh ngai in a van ka hlam. Ka lungchung tein Thaku nangmah he tthuttti le umtti lawng ka duh ee, atu ka thinlung le nunnak hi na hngalthiam lai lo mu tiin ka zai len. Cutiluklak cun kan caan cu a hung liam manh hoi ko.

Duh lo le huam lo zong ah lawi cu a hau hoi cang. Lungnuam lo takin ihkhun cungah ih caan a phan. Nihnih khat te lawng a liam rih mi ni/caan te kha hngilh loin zan khuadei ka mitthlam ah an cuang. Ka zoh deuhdeuh ai dawt chin lengmang ka dawt Thaku cu zinglei ah kan inn a rak phan tthan. Ni dang bang ka umtu ning a hman ti lo. Thaku ka hmuh le ka pawng te i a um ahcun kai nuam tuk ko nain thaizing ah Thaku kan khua tlang a liam lai ding mi ka ruah ah atu hin ka ngaih a chia cia cang. Ka tuar cia cang.

Kiki nih a ka zoh lengmang tikah Patling nihhin Thaku hi a uar i a duh ti kha a rak hngalh i a zumh ziar ko rua. Thaku bel nih an inntlung ( An khual ) ka si caah Utling hi hitihin a ka komh i a ka dawt, a ka tleihchannak a si tiin a rak iruah ve. Voikhat cu Kiki nih Patling Thaku hi na uar pah rua e..? heeeee.. Tiah a nih bu khin a ka ti. Zeidang bia ka chim lo " Thaku hi ai dawh bak si, a fim zong fim, mittha zong si lai, kan inntlung si hlah sehlaw ka helh bak hnga" tiah Kiki he cun Thaku theih lo kar ah Thaku kong cu kan ceih len.

Zanlei ni a hung nem chialmal cun khual le lai hmunkhat teah rawldumtti caan cu a hung phan. Rawlchap tu, tihang suaktu, rawltuahtu tiin cheukhat nungak tlangval pawl cu kan ituai lulh cang. Cheukhat nungak tlangval rawl ai tuh mi an hung um len cang. Thaku nihkhan Utling ei rih hlah, ka hngak ko rih hmunkhat ah kan eitti lai tiah a rak ka chimh mi kha kai cinken peng. Nunau le uapa deuh pawl rawlei an van ilim pah ziahmah. Nungak tlangval pawl hmunkhat ah ei caan a hung phan. Thaku nih sa le buh a kut khat in ka kaa ah a van ka barh colh ko. Aiaiaiai, ka ei kho lai lo.. tiah noh ka soh..Na ei lo bak ahcun tiah a kutdong in a ka sawhchih caah ka kaa khat cu ka ei thluahmah. Cu maw ka duh la tiah Thaku cu a kaa tlum lo tiang in buh le sa cu ka barh ve, a kaa chung ah a ben bak in ka benchih. Ai sualtuk ve caah a hmai cu buhfang lawng te ai benh. Haaaa nih le kheh buin a hmai buhfang cu pa-uah in ka hun thianh piat. Cuti kan inuamh tuk lio caan ah zanlei ni kan khua tlang liam ai zal cang. Belkeng hna cu kan hun fimtawl hna i a dih in Thaku le Kiki he kan inn ah kan lawi hna.

Zanlei nitlak lai, nika a sen vuakvap hrawng teah khin Thaku he innleng tthutdan sau cungah kan tthu. Thaku nih " Utling, nan kan dawtnak le nan kan zohkhenhnak cungah kan ilawm tuk ee. Hmailei tuah Pathian nih thluahchuah tampi in in pe ko hna. Rak kan philh hrimhrim hlah. Kan khua hna hi na rak phak i nan rak rak sual ahcun khoikadah Thaku tein a si tiin van hlah law kan inn ah rak tlung te uh. Cun, Thantlang ah tanghra kan kai tti lai i kan itong tthan te lai cu" tiin Thaku thlizil kik te bang a hung hrang chialmal. Aw si ee... Siseh mu Thaku.. Thaizing cun nan khua ah nan tkung cang lai i umhar le lileng tukin pei kan um lai hi tiah cubantuk bia cu caan sau nawn te kan iruah. Khua a hung tlai in zan pumh ah kan kal ttha hna.

Cu zan cu mino pawl hawikomhnak ngeih kan duh caah pum caan tawi te lawng kan hmang. Pumh a hun dih in Mino pawl hawikomhnak lei kan chucrh chairman inn ah kan kal hna. Nuam taktak in nihchuak phunkip kan sai i sianlonak love song phunkip kan phomh cang. Social leader hruaitu pa nih ruahlopi in hlaksak a hun ka thiah ko ai! Zapi hmai ka hung dir, sau nawn hlasak ding kai ruat, hla fung hnih sak ding ka ngei nain fungkhat lawng ka sak. " Thaizing cun ka dawt kan ttian cang lai, Then siang lo tiin ttap hmanh ning law, siseh caan tlaih awk a ttha tung lo, kan iton tthan hlan, ka dawt mangttha... timi hla te ka van sak. Cutincun tleih awk a ttha lomi caan cu an hung thluahmah cang.

Kan itopinak caan cu kan dihter i tthahen ngai mi tete tthut caan a hung phan. Kei zong tthahnem ngai in caan sau nawn ka la ve ka ti nain midang an tamtuk caah Thaku pawng teah ka tthu kho hlei lo. A muihmuh le a aw-aan theih te hmanh hi kei ka caah cun a rak tlum tuk mi a si ko. Zan a tlai tuk cang,ttim Ar a khuannak zong a sau ngai cang, zinglei khua a dei dengmang cang caah kan inn ah ka lawi. Dawtmi Thaku ka ruahnak hngilh zong kai hngilh manh hauha loin zinglei khua nih a ka dei phuat.

Zingnu ser niceu dawh te nih semnak lungrawn khua te cu voidang bang a hun poh tthan cang. Ka dawt Thaku he kan itthen ni a si. Zinglei rawl cu chungtling tein kan dumtti hna. Thaku le Kiki lampi ei dingah chuncaw thaw tein kan fun piak hna. Zingkaa ah tthal ruah siamsiam tein a sur pah. Ka nulepa ka chung le hna he dam tein Thaku le Kiki cu tthennak kuttleih caan a hung phan cang.

An pahnih tein an bag cu ka bei i an center leiah cun nithawng chinh pah in kan kal. Anmah le an khual cio kha an van thlah cio hna. Khual pawl an hung tling pah cang, ruahpi sur a tuk chin lengmang. Kan tlung ngam hnga maw tiin zapi an i ceih len. Kan pastor pa nih thlacamnak a ngeih dih in ruahpi sur lakah thlun cu an ithawh.

Ka dawtmi Thaku bag te cu ka van bei i nithawng pakhat izawng in an khua lei lam cu kan panh. Ruahpi sur a tuk tuk caah ka liang khat lei cu a ciar dih ngawt. Thaku nih a caan ah ka liang in a ka kuh, a caan ah ka ban in a la tlaih. Kei zong nih a caan ah a liang cung ka kuh i a caan ah a tai in ka kuh ve. Cutucun an khua lei lam panh in kan kal i kan khua lonh lungphun tiang kan phan. Mi thlaktu pawl kan kir cang hnga maw tiah kan iceih len nain, lanhla deuh tiang si ko seh tiah kan lam caan cu kan peh tthan. Kan kal lengmang pah in Thaku he cun bia phunkip kan iruah pah. Duhdawtnak bia chim caan a si ti lo mi caan ah duhdawtnak bia phuang loin ka um kho ti lo. Ka duhnak le ka dawtnak hi Thaku nih ai theih lo ding mi ka ruat kho ti lo. Lam caan sautuk kan kal cang. Utling va kir ko cang, na kirnak ding lam a hla tuk cang hi ta, khua pakhat i kan i ramri kan phan cang, va kir cang mu tiin ka dawt Thaku awnem te nih kir a ka fial tuk cang. Zapi an kir uahmah cang hna.

Keicu kir duh loin ka dawttuk Thaku kut kai tlaih i ramri tiva kam ah ka dir ko. Thaku a hawi le zong varal an pet ve cang. Kiki nih tiva ral in a ka hngah ko. Ka dawt tuk mi Thaku kir ding hi ka celh hrim ti lo ee, nang he atu hnu suimilam caan tlawmpal chung khi hei um rih sehlaw kan duhdawtnak bia vialte hi kan chimh dih ko hnga mu tiah lungzur ngai ka hun chim. Thaku nih " Utling, ziah kha cancan na sinah ka um le cubia cu kaa khat tal na ka chimh lo..? 

Maw...maw..maw..? tiah Thaku khuaruahhar tukin vawlei ah a lukhun. A kha in ka van tleih i Thaku ka zoh tuah! atu ah pei ka chim ko hi, dawtnak hi a tlai ti um ttung lo, Thaku kan dawttuk ee, kan duh tuk ee tiah isum kho loin thing le ramtang ah duhdawtnak bia cu ka chim thluahmah. Utling aw, poi taktak si.. Hi lai hi rak hngal ning law khua faktukin ka ruat hnga lo mu.. Atu cu fak tukin khua na ka ruatter ve cang. Utling hi a si ttheu lai tiin ka lungthli tein ka rak ruah lengmang.

Utling, va kir cang mu. Thantlang sianginn kai ah kan itong tthan lai. Kan hawi le nih an kan kaltak tuk cang lai. Dam tein mu Utling tiin a kut zattial nem te in ka kut cu a van tleih i Thaku mitthli fim te biangno cung ah a hung luang iahmah. Mitthli he tiva tan pah in tiva ral leiah duhsak tein byebyeebyee tiin kan kutza kan i piah i hnulei kan i chit riangmang ko.

Ka dawt Thaku lamthluan ka ruah ah chuk le cho lawng te a si. Lam bi te ah ruahpi sur lamnal pah he Cangvat lakah a har ko lai ee. Kan khua in khuapakhat nih a kan dan i tlang dang an si caah an khua le kan khua kar hi zinglei 8:00am in zanlei 7:00pm hrawng ah an van phan te lai.

Hnulei her in kan semnak lungrawn khua cu lungleng ngaihchia in panh tthan cang. Kan khuachuah hauhnar in ka dawt liamnak fing le tlang cu ka cuan tthan. By; Andrew Tum Tling