Zanlei ninu a liam lai te
Melbourne khuapi ah vunnak vunrang, vunsen ti thleidan um loin park chung ah
nuam in an leng hna. Highway zalam pi ah rianttuan mi tete motor in vingving in
an tling thluahmah hna. Zanlei ninem ah a dai tuk mi le a nuam tuk mi khuapi
chung ah khuazaruat in Thlalangawng kam ah Ahniang cu khua a ruat len ko. Ziah,
hitluk a dai mi le a nuam mi khuapi ah Ahniang hi park hna ah a kal ve lo i
lente hna a celh ve hnga lo..? Siloah a duh ngai mi Strawberry juice dinnak
dawr zongah a tthut hnga lo..? Amah te lawng umhar lileng cun zeiruangahdah
cuka te cun a tthut hnga i khua cu a ruah len ko hnga tiah a ho haltu le
chawntu hmanh a ngei lomi Ahniang cu zanlei nitlak lai teah khin a dawt mi
Lianlian ngai le ruat in thlalangaw kam te ah thu in a mitthli a tla lengmang.
Australia a phakka tein a rak
chawn lengmang tu le a rak kom lengmang tu Lianlian nih caanraulo teah lamdang
a mertak ko rua. Lianlian thinlung le nunak ah Ahniang dah ti lo zeithil hmanh
ai tlum lo in a rak um ve i a dawtmi Ahniang he hmunkhat teah lentti cu a
sunglawi in a nuam tuk a rak ti ve hringhran ko. Sihmanhsehlaw minung hi
zeithil nihdah kan thinlung a danter i a pialter tiah cun a ruang a phunphun a
um ko lai. Lianlian thinlung a pialter tu, Lianlian nih Ahniang sinah zungzal
in a bia a rak chiah mi a la tthan tu hi amah Lianlian lila hi a si.
Lungtak tein Ahniang sinah a rak chim mi bia le hla vialte kha Lianlian nih
hnulei ah a kirpi tthan dih hna.
Lungtak tein a rak cohlang i ai
nunpitu Ahniang caah cun vawlei ah ttahnak hram ai thok cang. Ti nih a reutak
cang mi nga bang nganfah tuar in le nilin lak chawlno kiah bang a nun a uai
cang mi Ahniang cu vawlei ah ruahchawnawk ngei ti loin mitthli he a ttap
lengmang.
Zanlei ninu cu a hung liam i
Melbourne khuapi cu zan khuamui nih a van khuh thluahmah cang. Hawi le kom tete
hna Biakinn ah hlacawn ding in an kal thluahmah hna. A mitthli he a hmai a van
phiat i Ahniang cu Biakinn ah hlacawng ding in kal ai tim ve. Voidang tawn
bantukin Lianlian nih Ahniang cu mawttaw in a van lak i an pahnih te cun
Mawttaw cungah Biakinn lampanh in an kaltti. Hla cu an cawng hna i an cawn dih
in Lianlian nih an inn tiang van thlah dingin Mawttaw chung ah an lut tthan
cang. Ahniang holhlo dai tein a tthu ko. Lianlian zong holh lo dai tein a tthu
ve. An kal lengmang ko i lamcenceo tluk hrawng an kal ah khin Ahniang nih
" U lian, tulio kan thinlung le nunnak cu muihnak le ttahnak lawng tein a
khat. Na ka bawm kho hnga maw?" tiah awka nem tein a van hal. Lianlian nih
" Ahniang aw, voitam kan chimh cang, nang le kei cu ai co kho ding kan si
lo caah ka far bantuk zoh in kan zoh lai mu kan ti cang kha, cubantuk cu fak
tukin ruat ti hlah. Kei zong kha hlan kan chimh mi bia vialte kha kai palh
cikcek ee" tiah lungdong ngai in a van chim.
Aircon thlikik nih a ttang cungah
kik nawn tein a hun chem mi Ahniang cu, cu bia a theih tthan lengmang tikah a
nunnak thinlung hna a chung lei in a hun tur. Ahniang nih zeibia a peh ngam ti
lo. Aw kei cu ka tling kho hrim rua lo mu ti kha a thinlung thli tein ai
hnemhnak bia a si. Ahniang te inn cu an van phan i " Ulian kai lawm tuk
mu, mangttha tuk byeebyee" tiin Lianlian cu an inn leiah a kal.
Ahniang cu inn chung a lut i
ihnak khan lei a panh colh. Chantling le ihphak cung ah a thinlung a ba
hringhran. Lianlian hi zeiruang bik ahdah cuhlan bantukin a ka duhdawt ti lo i
cuhlan bantukin a ka chawnhkhenh ti hnga lo..? Zeiruang ti ka hal zongah a ka
chim duh fawn lo. A hawi le nih Darling dang a ngei an ti mi hi a taktak a si
ko lai tiin khua a ruat. A caan ah hibantuk lungrep ngeilo le biakam let hmang
mi pa hi zeiko ahhme ka duh i ka dawt len ko, ka thleihchan len ko hnga..? Ruat
ti hlah ning, za ko seh tiin kua a ruah thut caan zong a tampi ve.
Duhnak hi kham khawh a si lo an
rak ti bang, hmur le kaa menmen in duhnak hi kham khawh a rak si lo. Thinlung
le nunnak chung ah chunglei in a rak ithok cang mi i caan tampi a rak kal cang
mi duhdawhnak hi Ahniang caah cun tleih i ttemchih a har hringhran ko. Zungzal
in cerhti bang a luangmi duhdawhnak hi kham zong ah a pahchih tthiam ko lai.
Zeitluk Bel lian mi donh zongah a khat lai i a liam tthiamtthiam ko lai.
Ahniang nih Lianlian a duhdawtnak hi zeitihmanh in kham le tleih a ngah lo.
Ihtintling cungah semnawng nuanuar
te bang Lianlian kong ruant in lungfak le ngaihchia in Ahniang cu mitthli he a
hram lengmang. A ihphak le chantling hna nih a thinlung an hnem kho ti lo_ a
mitthli dawntu ceo an si. Zan a tlai tuk cang nain Lianlian he an rak i kuat mi
measage vialte hna kha a hun rel tthan hna. Kan duhtuk, kan dawttuk timi bia
kha a hlan ah lawmhnak petu a rak si nain atu ahcun ttahnak mitthli phurtu ah
an cang dih cang mu tiin Ahniang cu a ngam kho hrim lo.
Aw ka duhnak le ka dawtnak hi ai
hngalh tuk ko nain a dihlak tein hin cun ai hngalh kho bal lai lo. Hmur le kaa
nih a chim phuan khawh lomi pinah khin Lianlian kan dawttuk dahkaw, nang he
itthennak cun ka nunnak le ka pum hi itthen sehlaw cucu ka duh deuh. Nang he
zungzal tthen ding cun ka ruat kho hrim lo mu.. Ulian, ka mitthli le ka ttahnak
hna hi rak zoh hmanh, na zaang ka fak tuk lo maw tiin Ahniang cu zamttim
khuamang ah ik thluahmah in a ttap lengmang ko. Zan a tlai tuk cang, a ttang
hna an tur i a thahri hna an fak dih cang. Hnemtu le bawmtu ngei loin Ahniang
cu mitthli he zankhua a dei.
Lianlian cu Ahniang a pialtak hnu
a darling thar nu he vawlei ah nuam in an caan an hmang. Hi leicung hi mi nih
" duh a tling lo" an ti, kan duh mi a tling ko hi ta, nang le kei
karah duhnak a tling i nang he zeizong te a tling i lawmhnak in a khat tiin
dawtnak chawnghlang an rel tti caan a hung sau ruangmang ve.
Ni le thlam liam in khuacaan i
her hmanhseh Ahniang nih Lianlian a duhdawtnak zeitikhmanh ah a liam in ai her
bal lo. Tiva kam ah a kheu mi thingkung nih a caan hman tein a thei a tlai i a
hnah zong a uai bal lomi bantukin Ahniang nih Lianlian a duhdawtnak hi a hnah a
uai bal lo.
Nikhat cu Park chungah Ahniang cu
thinlung thadam tein thingkung thladem tang i tthutnak an tuah mi cung teah a
rak tthu ko. Duhsak tein khua a ruat i a phone a tuai pah. Mawtaw parking nak
lei khi a hei zoh i Lianlian Mawttaw a lo ko ee a ti lioah Lianlian nih Mawttaw
cu a hun side colh. Ahniang cikkhat te ai nuam ngai. Um.. Ulian ka hmuhlonak le
a aw-an ka theihlonak sau tuk cang, ka pawng teah a rak tthu theu lai tiin ai
ruahchan lio cuahmah ah nungak pakhat he Mawttaw chungin an hung chuak ko ai!
Mitthep loin, mifak ngai in cikkhat te cu Ahniang nih a zoh hna. Nain, a mit
tanglei ah duhsak tein a tthuh tthan.
Khuazaza a ruat, a thinlung kuai
dih le man dih ai zal. Lianlian le A DL cu khatleisir pangpar thladem tang ah
an tthu ve. Ahniang nih din dingah ai ken mi Strawberry hang hraitan hmanh a
ding rih lo. Culio ahcun Lianlian darling Nusui nih Aahniang cu a vai kal hnoh
i Ahniang timi cu nangmah na si maw? tiah a hun hal. Aw, Ahniang timi cu ka si
lo nain Ahniang cu ka si ko, zeidah herh um maw? tiah hmaipanh tein Ahniang nih
a leh. "A um ko, Lianlian hi voikhat zong hnahnawhnak rak pe ti hlah, na
thinlung le ruahnak kha dai tein rak umter cang. Kai phu loh tihi rak theih ca.
Atu hi last warning si colh seh, na fiang maw? icinken" tiah a kutdong
bakin a hun sawhchih ko.
Ahniang a thin a lin tuk
hringhrann. Hi tiangtiang dingin a ruat bal lo. Ka maw, cuticun ti ding ka si
lo ee..Lianlian nihhin " Kan duh kan dawt" a ka ti hmasa ruang ah pei
ka duh ve i ka dawtmi si ko.
Nangmah hi hika ramah na um ve le um ve lo hmah
kan theihbal mi na si loh. I chiahchiah, keimahnak fak in na tuar te lai,
minung hi zeitindah thil hi an ti khawh cio ti hi na theih hrimhrim te lai,
tiin Ahniang hacangrial in ka thinlung mitthli a tla. Hibantuk thil hi dah ngai
cuhlan ah ka ton bal lo, ka ton te lai ti zong hi kai ruah bal ttung lo tiin
Ahniang cu ngaihchia lungfak in Park chungah cun a ttap thluahmah.
Lianlian a va kal i an pahnih in
an isik/hronak cu a va mawhchiat len hna. Ahniang nih Ulian, za cang seh mu,
voikhat zong in chawn ti hlah ning, hnahnawhnak in pe bak ti hlah ning. Kan
thinlung le nunnak hi nunak hi nangmah lei kal ti lo dingin ka ttemtawn ve cang
lai tiin bia a cah khawh ve cang. Lianlian nih Nusui cu a ban in a dawh i a
kalpi.
A thinlung a hninghno tuk mi le a
nem tuk mi Ahniang hi a ho nihdah cuti ko cun a hrocer len ko ee.. Lianlian
zuuntuar le ngai in nitin zantin mitthli tlak le ttah lawng a rian ko mi
Ahniang nih zeital palhnak a ngei maw? Palhnak a ngeih ttung lo. Duhdawt tuk
ruangah micung ah fahnak le tuarnak a pek bal ttung hna lo. Amah nih Lianlian a
duhdawt tuk ruangah fahtuk le ngaihchia tuk in a tuar leh leh hi.
Cuticun Ahniang cu Park chungah
caansau thlonlen le um zong huam inn leiah tlun ai tim. Mitthli le ttahbu,
thinhung bu le lungfah bu he a Mawttaw cu a hun start i tlawmpal a kal ah a mit
a mui. Ai tuar kho ti lo i a hmaika i Mawttaw pakhat kha fah taktak in a
tteih/suk hramhram.
Duhnak hi a fahtuk cang hnu ahcun
a mit a mui i lamhla a zoh kho ti lo. Duhdawtnak hi a lungfahter le ngaihchiat
ter hmanh hi tuar a har i tuar khawh a si tawn lo. Lungfahter le ngeihchiatter
lawng hmanh silloin duhdawtnak a thinhunter ahcun zeithil poah cang ko seh tihi
a fawi tuk cang mi a si.
Ai!!!!!!Ai!!!! tiah pawngkam mi
le mithmutu nih a van zuanhnawh. Ahniang Mawttaw cu lamsir ah a sir in ai let.
Tlawmpal ah police an phan colh. Ahniang cu an hun lak tikah cun a takpum tein
thi nih a tuam dih. A lungfim ti lo, zeihmanh a thei ti lo. Lianlian le Nusui
zong an pawng teah a si caah an rak tli ve. Lianlian nih "Ahniang
Ahniang" tiin a auh len nain Ahniang a hawi ti lo, a chawn ti lo. Ahniang
cu a rannak in Ambulance ( Mizaw phurhnak Mawttaw) in Hospital ( Siizung) leiah
an kalpi colh. Peh tthan te
lai. by; Andrew Tum Tling
No comments:
Post a Comment