Ka Nunnak Hi Nangmah Ca'h

David le Stella hi an khua tein ai duh mi le ai daw mi an si. Nungak tlangval an sikaa tein ai duh mi an si.Duhdawt hmasa bik veve mi an si. Phundang in kan chim ahcun "First love"Nge-chit-Oo bak an si.David zong nih Stella hi a duh hmasa bik mi a si i Stella zong nih David hi a duh hmasa bik mi a si ve.

David te chungkhar hi misifak santlailo te an si i Stella te chungkhar hi mirum mitthawg an si. Stella cu khuapi ah sianginn a kai tawn i David tu cu sianginn kai kho ti loin nichiar tein lo a thlo tawn.A caan ahcun Mizoram leiah Vok le Caw tibantuk hna a zuar i cutitecun ai cawm mi chungkhar an si.

Sifak tuar kho ti loin David cu Malaysia ah a kal.Zeital a tthahnem deuh hnga maw? Ramthumnak hna ka phak ve sual ah tiah Malaysia ah a kal cu a si.

David Malaysia ah a kal hnu Stella cu lungleng le ngaihchia in a um zungzal. A caan ah David nih phone in a chawnh tawn zumhawktlak tein an karlak dawtnak a fek zungzal. David kumkhat Malaysia a umnak a tling cang.Stella David loin a um kho hrimhrim ti lo. David zong Chiness nungak no le Malaysia lai nungak muidawh hna lakah tlongleng ko hmanhseh a duhdawt tuk mi Stella hlei in thim mi a dang lo i ngiat mi dang a ngei hlei ve lo.David Stella loin a lungleng a thlakaam a celh ve ti lo caah Stella cu Malysia ah ra ve dingin a sawm.

Stella zong kal dingin ai tim.A nulepa a chimh hna,a tta le a chimh hna tikah an senh naisai ti lo. Univarsity kai lio nungak no te Malaysia kalter ding a tta le le a nulepa nih an duh hrim lo. Stella an farhning te Malaysia kal ding cu thih tluk ah an ruah.A tta le pathum USA an um cang ko.An rum tuk cang,Malaysia kal a herhnak a um lo.Sihmanhsehlaw Malaysia kal na ka thloh ahcun ti zong ka ding lai lo rawl zong ka ei lai lo tiah a chung le a tta le cu a ti hna.

USA ah a ummi a tta le nih Malay thongtlak a har ning le Malay a hartuk ning vialte an chimh dih. Nute nang cu kan farhning te na si,rak itim hlah mu,na duh mi poah kan in cawkpiak lai i lailei ah na duh ning tein rak nung ko tiah an lem i an thloh le zongah a duh naisai hlei lo.

Stella cu tiding lo le rawlei lo ngai taktak cu a takpum nih a celh ve lo i a caan ahcun a ding-ei ko nain ka pawkhim tihmanh a thei lo_a thawh le a nam hmanh a thei lo. An ruuninn ah buh thawthaw le sa thawthaw a ei ko nain a thawt/nam a thei kho lo. Duh chungin phaisa hman ding a ngei ko,Sui tthi ai oih ko,sui zungbunh ai bunh ko,a fenh-aih hnipuan tthattha an tleu ko nain a dawtmi David tello le umlonak hmun cu a caah pakpalawng menmen a si.Ai nuam kho hlei lo.

A chung le nih thloh tuk ko hna hmanhseh Stella cu a dawtmi David caah thih a ngamh mi a si_nun a ngamh mi a si. Zeitindah Malay ka kal khawh timi kha a thli tein ai zuam i a tuaktan peng. Voikhat cu Kalay i univarsity a kai lioah a suitthi le a zungbunh kha a zuar i a chung le theihlo bak in Malay kal cu ai thawh.A chung le nih sianginn kai ko rua an rak tiah khan Malay a phan cang.

A chung le Malay ka phan cang ee tiah thawng a thanh hna cu an khuaruahhar ko.A chung le an thinlin tuk,USA ah a um mi a tta le a thinlin tuk hringhran ko nain zeiti tuah awk hlei an thei lo. Nulepa inntang nuam tein a um kho ko nain sifak santlailo mi David a dawttuk ruangah Malaysia harnak ram cu a rak phan ve.

David he Malay ah an i tong i an lengtti zungzal.Stella cu CRC card he lawng a si tikah a duhnak hmun poah a kal ngam lo.Nulepa sinah nuam tein um i catang sang pi tiang a kai kho ding mi Stella cu Malaysia ramah thlanti le zaangba in rianhrang a ttuan ve cang. CRC card te he lawng nichiar Malay ah thinphang in leng ko hmanhseh David a um ve caah a caah lawmhnak in a khat tthiam.

David zong an chungkhar pawcawmnak caah nichiar rianhrang ttuan i ai hne ve.A dawt mi Stella a um ve tikah kum voi cu nupi ka tthi lai ti lawng a ceih ve ko cang.

David ruahlopi in a kalfak i a celh ti lo.Khuami nih rianrang in UKM siizung ah an tlik pi colh. Doctor nih a zoh i a kal pahnih ning in a rawk tuk cang caah thlen a hau ti a si ko.

Cu thawng Stella nih a theih tikah a thinlung kekkuai dih ai zal. A lungfak tuk a celh hrim lo. A thaizingkip ah Stella cu a boss nu sinah offday a hal i UKM siizung pi ahcun a va kal ve. A dawtmi David cu ih-khun cungah uai chialmal tein a rak ril ko. U David na dam deuh maw tiah a kut lum tein a cal te ah a van muai,U David na thinphang hlah mu,na dam zau ko lai thla kan camtti lai mu tiah thazaang tampi a pek.David thil a hnawm mi poah kha a suk piak i siizung ah a va pek tawn.

David cu a kal pahnih ningin a rawk cang caah a nung ding a si lo.Stella nih fiang tein a theih ve tikah a nunnak kuai dih ai zal.David angki le bawngbi a suk pah in Stella cu bathroom chung ah mitthli he a ttap tawn. David kal pahnih a rawk mi pakhat thlen ahcun David nunnak a ngei ding a si.Sibawi pa nih kal cawk ding kawl uh law a kal pakhat hi kan tlen piak lai i a nung ko lai.Cuhlan amah ning bantuk te a si ko lai tiah a ti hna.

An khuami le siibawi te nihcun kal cawk ding cu an kawl len nain an hmu kho ti lo. Stella a lungrethei tuk cang. Doctor pa sinah a va kal i "zaangfahnak tein Doctor pa David caah keimah ni ka kal hi pakhat ka hlut lai ngah lai maw?" tiah a va chimh. Ngah ee,a ttha tuk tiah Doctor pa zong ai lawm tuk ve. David nih mahkha a thei lo.

A caan cu a hungphan i an pahnih tein opration an tuah.Stella kal kha pakhat an lak i David kal pakhat ah an bunh. An pahnih in kal pakhat veve lawng in an nung cang. Dam tein siizung cun an hung chuak i siizung i an um chung phaisa a dih mi vialte zong an rak in khon mi phaisa in an pahnih tein an cham veve. An hung dam cang i tiksa reprai zong an hung ngei veve cang..David cu padeuh kan ti cu rian ah a lut kho cang.Stella bel rian ah a lut kho rih lo.

Stella CRC card lawngin Malay ah a chaihmai tuk cang. Mi sium si,tangka ngeih lo si a sivang ko..US i a tta le nih an duh lomi thil tamtuk a tuah caah phaisa an kua duh lo.Mi sinah toidor tein a um ko i a tiksa zong a van ichih/khah deuh in opration tuahnak he pehtlaiin UNHCR zungah bawmhnak hal ding le UN card hal dingin ai tim.

A hawinu he UN zung ahcun an kal. Vanchiat ee tiah zingpakhuan in Oprasi nih lam an rak block i taxi vialte an chek dih..Stella cu CRC card lawng a si caah an tleih.A hawinu Supi tu cu UN card a ngeih caah an thlah. Stella nih a damlo mi ka si,UN ah bomhhal dingin ka kal lai ka ti tiah a nawl lengmang ko hna,Doctor pa cattial piak mi vialte zong a piah dih ko hna nain Immigration pawl nih an duh naisai ti lo..Immigration hospital a um ve ko ti a si..

Upadi nih midam le damlo tiin thleidannak a um lo.Phungning tein cazah nih a pom mi card a si lo ahcun siizung um lio zongah tleih a si ko.

Stella cu a kut thir in an van khimh i police motor ah a duh lo na buin an khumh chih. Lenggeng camp ah an kalpi ngiahmah. A dawtmi David he hmanh dam hirhiar tein an tlong rih manh lo,zaangfahnak le zawnruahnak a pelte hmanh a ngei kho lomi police pawl nih Stella cu mitsen in an van zohchih..Thingtan iput in an tli lai le an zam lai ti bang Rela nungak lengttul tonglo pawl nih an hnu an hmai in a ven hna..Nan min ho? tihmanh ah an hro in an hro..Kal uh, dir uh,nan lu khun uh an ti i an lungning loin vancau le lukhun sual hmanh ah chuih le lamh a si ko.

Thir cikcin thluan in minung pahra a kemh in an khih hna.Nan lukhun pah in kal uh tiah rela pawl nih an ti hna i an kal lioah Stella cu Rela habeu nu nih na lukhun a dihlo tiko sehlaw a biang ah voihnih bak a van thongh ko ai..Bengh khi cu disehlaw ai zia..Nupi fa i a thongh bakin van thongh ko cu a mak ngai ko. A hnulei thabet ah thlu ko a van chuih rih hoi ai.

Stella mitthli rianrang tukin vawlei ah a hung tla.Rela nu nih "ttap hlah,hi lai hi na hngal lo maw,zeiruangah Malaysia ah na rat?" tiah a van hro chih rih.

Aw...Vawlei cung dawtnak sang bik a ngeitu,suitthi oih cawk lo le sui zungbunh hruk cawk loin a ngei ko nain midang sifahnak hrawmpi a duh lawng siloin midang nunnak khamhnak ding caah a thinlung le nunak hmanh a pe siang tu Stella cu a harbik mi muihnak thonginn chung ah a phan cang..

Thirhling kulh mi inn chungah zanlei sang nawn ah khin an luhpi hna..Buh tthing peikuar khat te khi plastic in an fun i ngasa rawh kutdong tia te he inn chungah cun a lut.. Stalle nih buh tthing fun te cu a van samh i a mitthli he thaw tein a ei..Zanhan rawl a ei ti lo caah a rawl a ttam tuk cang.Kaa khat hnih ai tuh ah khin a rawl cu a dih colh.

Lenggeng camh ah zankhua dei kik lakah puan zunkhat zong a um lo.Cutin tein inkil kam teah khin Stella cu ai kual i a it tawn. Lenggeng camp ah ni 20 a um hnuah a bia an ceih i Kayang thongpi ah thla 4 tla ding in an kuat.. Kayang thongpi cu an van phan i police nih hrocer hram an thok tthan cang hna.. Thongchung thilthuam tete cu a van ihruk.Um.. Atu cu thongtla ka si taktak cang.Tuhnu thla 4 cu kahin ka um hrimhrim lai ti a hung i fiang.

Inkhan a bite pe 10 patle hrawng ah khin minung 7 an chiah hna...Puan zunhnih lawng minung 7 caah an pek hna.Innchung pit tthup in a um mi khan ah lungdong ngai in stella cu a um..Zanlei khua a hung muih chialmal cun a dawtmi David he an rak lenttinak Sunway hrawng le tiva an kal ttinak tiva kuang hrawn vialte a mitthlam ah an hung cuang..David muihmai le ankaa hna a hnathlam ah din loin an hung thang. Stella a celh hrim lo,zei sualnak hmanh a ngei lomi damlo ruang i UN bawmhhal dinginn a kal ko mi ngai te hitluk hmunhar ka rak phak hi ti a ruah ah a lu ai khun i nguingui in a ttap thluahmah. Furpi tilan bang a mitthli hna dong loin an tla i ttuang ah an i dil. Indonesia nute nih a zoh tikah a zaangfah tuk i a hnemh ve tawn."Ka hawi ttap ti hlah mu,thla 4 chung an timi an zuh lai thla 3 hrawng te lawng pei thong ah kan tlak ko lai cu,ttap ti hlah" tiah a hnemh i lungcan a pek i a hnemh ve tawn.

David nih Stella thong chungah va veh dingah kayang thongpi ahcun a van a kal. Stella body no.cu an van au i a va kal cu a dawtmi David nih a van ton.Kuttleih in hmun khat ah iton khawh a si lo.Thlalang chungah iton a si caah an karlak thlalang nih a dan hna.An mui fiang tein an ihmu kho i telephone lawng in ichawnh khawh a si.Lehhmah pakhat a chah lomi tlanglang nih fak tuk in a dan hna..

Stella nih telephone cu a van tleih i "hello, ka U" a tivial ah khin a mitthli cu ruahpi bang a hung tla thluahmah..Zeibia hmanh a chim kho lo, feh tein David he cun an i zoh ko nain khat lei khat lei in an mitthli lawng a luang thluahmah ve.

David nih " Dawt,na ngaihchia hlah mu,na sal ti ko law,na rak chuak zau ko lai ee,UN zong ah ka rak i chimpiak ve lengmang lai cu" tiah thangzaang tampi a pek.Dawt,ka ngaithiam,keimah ruangah hitlukin nganfah na tuarnak le na ka dawtnak hi ka ruah tikah ka nunnak nih a celh lo ee.Ka ngaithiam ko mu dawt tiah a ngaihchiatnak cu mitthli he a van phuan ve.

Ka dawttuk mi Ka U aw,na ngaihchia hlah nang zong,ka chuak dengmang ko.Nangmah ruangah hitiang ka tuarnak si ttung lo,keimah duhthimnak le sining tein Malay ka phak mi hi a si ko ee..Dawt na caah zeitluk hmanh in tuar ko ning a poi lo kai lawm tthiam ko.Kei cu dawt nangmah ta pei ka si cu,na caah ka tuar lo ah ho caah dah ka tuar kun hnga.Dawt,fak tukin khuaruat hlah mu,zeizong te hi Pathian remruat a si ko ee tiah an biahmanh a dih hlan le mitthli hmanh a hul hlan ah a caan a dih cang..Police nih a za cang,a caan a um ti lo tiin Stella phone cu an chuh..An mitthli he thlalang chung in Byebye dawt tivial lawng kha a si ko.

Stella cu thongchung ah a damlo i zawt a zual ngaingai.Thonginn ahcun zeitluk damlo zongah siizung kalpi a har tuk.Siidin awk zong a um lo, ka damlo tiah police pawl a chimh lengmang ko hna nain zeirelpiak a um lo.Thih zong ah ramdang mi thongtla thih cu uite arte thihtluk hmanh ah an rel lo. Stella a thitha a der tuk cang,a taksa zong a der dih cang.

Sihmanhsehlaw Pathian sinah thla a cam zungzal i Pathian ai bochan peng.Khua ka ruahtuk nak ah ka thinlung ai rawk sual tiah nusal tiin lungcan ai pe peng.

David nih thlakhat voikhat lengmang thong inn ah a va ton tawn.( thlakhat voikhat lawng ton a ngah).An iton chiar mitthli he riahrun an hlam ttheu.

Stella chuahni caan le ni a hung tling.Ai nuam tuk,lunglawmhnakin a khat.Misual tiah cozah kutin a luat cang. Immgration bus nih a va lak hna i Lenggeng camp ah a chiah tthan hna.Camp a um bak in an khuami sinah kawlram lei thlunnak ding a tta le (US i a um) mi nih tangka an van kuat.Camp chung hawi cu kawlram ah an tlung.Sihmanhseh Stella a tlung duh hlei lo.A dawtmi David he ton tthannak dingah UN a hngak.Immigration nih kawlram mi tlun a duh mi free in kawlram ah tlun khawh si an ti.Midang a tlungmi an tampi_ Stella a tlung duh hlei lo.UN an rau tuk ko nain Lungsau tein a hngak peng ko.

UNHCR cu thongtla mi ton dingin Camp ah an rak phan.Stella zong interveiw a phi ve.Thla hnih hnuah thong chung cun a rak chuak.UN zunginn a dawtmi David cu ka U ka chuak tiah midang ph ai hlan i a van chonh.David nih a rianttuan lio mi cu a kaltak i UN zung leiah taxi in a tli.UN zung hmai ah a hngak lengmang. Zanlei nithlak lai teah khin Stella cu UN catlap he a hungchuak ve cang.An van ihmuh bak in an ikup i mitthli he an ttap thluahmah.Lunglawmhnak mitthli a luang.Ngaihnak biaza an chim cawk lo,an karah tthenak a um tilo.A fek mi duhdawtnak he an lengtti cang.

Stella nih a nunak cu David ca'h le David nih a nunnak cu Stella ca'h.An nun an ihrawm i an zeizong te an ihrawm.

( Boihte nih ai thim mi tlangtar). By; Tum Tling