Online Mitthli (Part-3)

By; Andrew Tum Tling

Ka dawtmi Fidihniang Fidi nih ka ban pahnih in a ka hruai i kan inn lei ahcun kan ttin. Inn kan phak in mawttaw accident kan tonnak kai hliam mi kha a dam rih lo caah ih-khun cungah an ka ihter colh. Fidi le a hawipa cu suimilam pakhat chung hrawng an tthu i an in lam east melbourne a hla deuh caah an tlung colh ve.

Ih-khun cungah ka dawtmi Fidi zuuncuai in ka um i cu zan cu zan khuadei kai hngilh kho lo.Ka mitthlam ah amah lawng te a cuang i ka hnathlam ah amah aw-aan lawng a thang. Fb in ca kuat tawn i a caan te lawng a ka let tawn. Kei damlo kan ti cu a caan ah Parku nih a ka zulh i siizung ahcun ka vai piah ttheu tawn. Australia phakka damlo cu ka ca'h a rak har tuk. Ka u le nih an ka zohkhenh ning a ttha i an ka dawttuk ko nain Fidi he kan umnak ai hlat tuk caah le damlo in khuaruah lawng te a si caah ka thinlung tiang in a zaw dih.

Thlakhat hrawng a hung tlin khin cun kei zong dam deuh lei ka panh ve cang. Voikhat cu Parku nih biachimh ding kan ngei a ka ti i zeikodah si hnga tiah kai ngaih tuk. "Patling, na duhdawt ngai mi Fidi kha darling dang a ngei an ti cu" si maw? tiah a ka hal. Ka lau tuk hringhran,Ai! si hnga maw..? Honih dah cucu an chimh le tiah ka van hal i a hawi le nih an ka chimh ko,cu pinah nai i ka va kal zongah khan a darling an timi pa he cun coffee san an rak tthu cuahmah ko tiah a van chim chih rih.

Zan ka ih lai te a si i ih-khun cung ah voikhat ka khel ka van leh i fah ngai in khua ka ruat. Khua ka ruat ka ti nain ka ruahnak le mitthlam ah Fidi lawng te a si. Ih-khun cung cun kai let lengmang,a si tak hnga maw aw...? a caan ahcun ka zum pah lo nain a caan ahcun ka zumh pah tthan.

Ka dawtmi Fidi cu Fb in ka hei chat. Dawt,na dam maw? Boihte, nai hngilh cang maw? tiah ka chat len nain a ka let ti lo.Malaysia ka um lio tein a rak ka chawnh duh huahalo mi kha mahhi ruang ahhin pei a si kho lai hi tiin ka van ruah tikah cun lungfahnak mitthli hna biangno cungah duhsah tein an luang iahmah.

Thlakhat hnu hrawng ahcun kei zong ka hung dam deuh cang i Biakinn lam zong ka panh kho tthan cang. Ka thinlung ai hliphlua khawhnak hnga Parku nih nuamhnak le hmunkip ah a ka lenpi tawn. Cattial le carel ka huam tuk mi zong duh ning tein ka thinlung taksa nih caan a pek khawh cang. Nikhat cu ka hawi le he bawlung chuih dingin kam itim. Ka far le ka u le ka nii nih an ka thloh tuk nain ka duh lo. Patling chuih rih duh hlah,na hnak nai khawn mi le na lu nai khawn mi hna kha a zual tthan sual lai an ka ti lengmang nain ka dam ko cang hme cu a poi ti lai lo tiah Bawlung cu ka chuih ve. Kan chuih canceo lioah ruahlopi in pakhat pa nih a ka kalh i fak tukin ka tlu sual. Ka tho ti lo,ka hnak a fak tuk ka hram cang. An ka zawnh i leng ah an ka chuahpi. Ka celh ti hlei lo i a rannak in siizung ah an ka tlik pi tthan.

Siizung ahcun zanthum le nithum ka um hnuah ka chuak tthan i si-ai he kan inn ahcun kai thlop pah. Lungdong lo tein ka dawtmi Fidi cu ka chawnh lengmang ko nain a ka let bal tilo. A caan ah phone in ka call tawn sau zong kan ichawn manh tawn lo.Kai manh deuh lo le mangttha chung rih ti lengmang a si cang. A darling pa he cun an rak idawt ning a fek tuk ko cang rua.

Voikhat cu zanlei nawn ah a si. Kan inn ah tthitumh sawmnak ca a rak phan.Ka chung le cu an iceih pah. Puai kal le kallo ding hna an iceih pah bantuk khin an um. Zanriah kan van eikhim in Parku nih tthitumh sawmnak ca cu a ka pek ve. Keimah pumpak te kha an rak ka sawm ve. Tthitumh sawmnak ca cu hote ko dah an si hnga..? Australia phakka ah sawmtu zong ka ngei hnga maw..?A ka thei mi zong an um ttung lo tiphun khin luklak ka van ituai ta.

A chung ca cu duhsah tein ka van rel i photo an benh chih mi zong fiang tein ka van zoh tikah ka duhdawt tuk mi Fidihniang a rak si ko. Cikkhat te cu ka thaw ai su! ka ttang a tur dih. Ai! hiticun si lai lo tiah lungcan pek in ka van ihrim tthan. Ka pawng ah Parku computer a dek i a tthu ko,ka nii le a dang pawl cu an it dih cang nain an ihngilh rih lo.

Ka dawtmi Fidi vangeih ni sawmnak ca cu voikhat pin ka rel ngam ti lo. Cu sawmnak ca te cu ka ttang cungah kai pom i vampang lei hoih in ka ttap. Ka thinlung a kuai a man dih cikcek. Aw! hitlukin ka duhdawt ve mi nih thaizing cun pasal a ka ngeihtak cang lai mu. Fidi loin ka nunnak caan hman ding mi hi ka ruah bal ttung lo. Ziahhme ka dawt Fidi tiin isum kho loin ka ik thluahmah. Parku nih a van ka zoh i ziah na ttah tiah ka khel a va ka leh. Ka mitthli ka van hnawh i ka ttah bu cun cho lei ka van hoi, cu zong ah ka ngam kho hlei lo.Parku nih "ttap hlah'ttap hlah" tiah a ka hnemh nain a ka hnem kho ti lo.

Ka ngaihchiat le lungfahnak a zual chin lengmang. Ziah hme, hlan ahcun kan dawttuk ve ko a rak ka ti ttung,Malaysia ka um lio i a ka chawnh duh ti lo kha hi ruangah pei a rak si ko lai hi. Australia ka phak hnu zongah a kan chawnh duh hlei lo i Parku nih darling dang ngei cang a rak ka timi kha a taktak si cang ko hi ta. Amah hmuh le ton ka duh i amah he zungzal lentti ding ka duh ruangah dahkaw Malaysia UN zung i khatluk lungreithei le fahnak ka tuar. Ka mitthli tamtuk a rak tlah kha. Anih nihhin tah tlawmpal tetal a ka hngalh piak in a ka ruahpiak ve hnga lo maw..? ti ka ruah ah ka thinlung nih a tuar kho hrimhrim lo. Parku lawng nih ka ttahnak aw le mitthli a deihter kho ti lo i ka ni le ka far le dang an hung chuah. Ziah, pate na ttah tiah ka nii nih awka nem tein a van hal i kaa khathmanh ka chawn lo. Parku nih Fidi ruang i ka ngaihchiatnak hna cu a chimh hna tikah, Aw.... Sitak ee, nain pate na ngaihchia hlah mu,Australia ah nungak cu an tam tuk si, midang kan kawl tthan ko lai cu ta tiah ka nii nihcun a ka hnemh len. Patling ttap ti hlah,na dam lo hih,na zual hoi sual lai i poi tuk lai ee tiah ka far le dang pawl nihcun an van ka hnemh ve.

Zan a hung tlai ngai cang i ka ttahnak aw le mitthli a hung hul/daih deuh cun ka chung le zong an ihnak khan cio ah an kan kal ve. Puan lum tein kai vorh i ka ih hmun in ka mitthli a dong lo. Ka ihphak le chantling hna nih ka thinlung hnemtu si loin a ka ttahpitu le tuarpitu ah an cang. Rem tein kai tlinh mi chantling cu ka mitthli nih a ciarter dih cang. Ka ph ka van lak i fb ka van on.Ka dawtmi Fidi wall ah duhsah tein ka kal i a pic post mi le ca post mi pawl mitthli he ka zoh tthan hna.Fidi hmanthlak cungah semmawng naunuar bang ka ttap lengmang ko.

A thaizing cu zingnu kutchuah niceu dawh te cu Melbourne khuapi ah a hung lang tthan cang. Zingka tein kai kholhttawl i ka chung le kha tuni cu puai ka zawh ve lai tiah ka hauh hna. Ka nii nih "Si ee, va kal ve ko,a vaneihnak sa tetal cu va ei ve ca,co hmanh na co khawh lo, zahan zan na ttah le na hram kha cu aaaa,nai lungsaknak ah va kal ko" a ka ti i a ka capo pah chih.

Kan itim i Parku he cun mawttaw in kan choi. Kan umnak lam a hlat pah caah kan tlai deuh i minung a rak chuak mi Biakinn an khat ngai cang. Innchung ah kan lut i hnulei cem tlar ah kan tthu. Pulpit cu ka hei zoh i pangpar dawh phunkip le Electric meiceu colour phun tling in an ceu.Um...An puai cu sunglawi bak lai hih tiah ka thinlung tein kai ceih pah.

Lehthahtu Rev. nih caan a van tleih i hram an van thok cang. Ka dawtmi Fidihniang cu a pasal ding Pahmun sinah pek hram an van thok. Ka thutnak hmun in mitthlep lo tein ka zoh ko lioah ka mitthli fim te a hung tolh iahmah. Biakamnak serhram an van thok i ka dawtmi Fidihniang aw te cu ka hna chungah duhsah tein a hung lut. Cubia nih ka thinlung le nunnak a khuai i a man ter dih tthan. A kuai i a man dih cikcek cang mi ka thinlung, rial bang a hung ral ka mitmu in biagno cung ah ti an hung luang thluahmah. Minung an tamtuk i pawngkam mi nih an ka zohchih len ko nain mitthli ka hnawt cawk lo.

Caan cu a hung dih i kei zong ka mitthli a hung hul deuh lei a si cang tikah monu le mopa kuttleih dingah ka kal. Ka dawtmi Fidihniang kut dawh te cu ka van tleih. Rawl danghnak hmun leiah kan kal colh. Rawl zong tam ka ei kho lo. Ei khin in kan inn lei lam a hlat caah kan tlung colh. Cucu ka dawtmi Fidihniang kut ka tleih ni donghnak a si.

                                               ..........................

                                               A Dih Cang!!!