Online Mitthli (Part-2)

By; Andrew Tum Tling

Ka dawtmi Fidihniang Fidi ngai in le ruat in chantling cungah hngilh loin zan khua ka dei. Nitin ttuan zuam lo le din-ei chungpil loin ka hramnak caan a sau cang.Nikhat hnu nikhat Fidi sinin cakuat a tlawm chin lengmang.Ka kuat mi ca leh hmanh hi a caah thilhar ngai a si cang ko rua.Sihmanhsehlaw mifim le mittha a si ve caah lunglawm tein cakuat a ka leh caan zong a tam ngai ve ko.

Cuticun zeitikahdah UN nih an ka auh tthan te lai i ka dawtmi Fidihniang sinah ka phak te lai timi ruahchannak he ka nun lamthluan cu nifa tein ka zul zungzal ko. Thla thum hnu hrawng ah khin UNHCR nihcun a van ka auh tthan i ka va kal tthan.Officer nu nih interview cu a ka tuah tthan.Na file hi Australia Embassy zungah up awk a ttha lo.Zeicatiah cun,na case hi Australia cozah nih a cohlan mi si lo caah Australia ram kal awk na ttha hrimhrim lo.Cucaah cun na duh zong duh lo zongah USA ah na kal a hau ko tiah a ka ti tthan. Minute 2 chung hrawng holh lo bak in khua ka ruat.Ka cal kai domh, a caan ah van ka cau,a caan ah ka lu ka khun,ka dawtmi Boihte he tthennak caan a phan taktak ko cang hi ta ka ti.

Officer nu nih a ka zoh tikah a zaang ka fak ngai ve ko nain zeiti hlei in bomh awk ka ttha ti lo.Officer US kal cu ka duh hrimhrim lo,Australia si ko seh tiah ka nawl peng ko rih.Officer nu a thinhung cang ti ka theih ko.Sihmanhsehlaw,Fidi umlonak vawlei cu ka caah ramcar bantuk menmen a si.

Officer nu nih zeitin hmanh in fial awk le ttanpi awk ka tthat ti lo caah amah zong a lungdong ve cang.A ka ti mi cu "Zeitikhmanh ah UN zung ah van ra ti hlah,na UN card renew lawng ah na rak ra cang lai,a dih ko inn ah a va ttin"a ka ti mei ko.

UN inkaa cu ka van hun i leng ah ka chuak.Ka thinlung a kuai a man,UN nih an ka reject cang ti ka theih.UN inn hmai ah caansau nawn te ka tthu i khua ka ruat.Kai theih manh hlan ah ka mitthli biangno cungah a hung tolh iahmah.Ee!mi an um an ka hmuh lai ka ti i mi um lonak chak lei ka hoi i ka miithli cu kai hnawh zoh.

UN inn hmai in Taxi nih "Mana pergi"khoikadah na kal lai? tiah an ka hal nain kaa khat zong ka chawn hna lo.Laimi cheukhat zong an rak um pah ve. Taxi zong i cit zuam loin ka ke bak in Pudu leiah ka kal.Duhsak tein thingkung tang zalam sir in ka kal thluahmah.Khua zaza ka ruat,zei ko hme ka ruah i,hi Malaysia damiah le mifir tamnak hmun ah ka um ko,ka caah caan ttha le Pathian thluachuah a si ko dah kaw tiin khua fakpi in ka rauat cang.Ka mitthli le lungfahnak hna nih ka takpum ning in a ka tuam dih.

Aw! Ka dawttuk mi Fidihniang ton le hmuh ka duh tuk ruangah maw hitluk ngaihchiatnak le lungfahnak hi ka tuar.Zeitik chan hmanh ah ramthumnak ka phan kho ti lai lo mu.Atu ka ngaihchiatnak le mitthli hna hi Fidihning nih a ka theih piak ve ttung lai lo ee tiin khuazaruat le lileng in keimah te lawng lamsir lei khin ka kal lengmang.

Pudu ka phan i Pudu in Cheras leiah Bus in ka tlung i zanlei ninem nawn teah khin kan inn ka phan.Kan inn chung ka luh bak in ka bag ttuangah ka tengh colh.Ka lungfak tuk ka celh hrimhrim lo.Hawikom khuami le chungkhat hna nih "zeitin na zung kal cu tlamtling maw"? tiah a kan hal.Ka chawn huam hna lo,ka mithmai an zoh tikah a tlamtling lo ti an ifiang ko.

Zanlei ni a hung nem chialmal,innchung ah ka zau ko.Ka ihhmun in ka tuar kho ti lo.Inntual ah ka ttum i ka hawi pa Pahre a rak um ve.Ka kawi,tuni cu ka celh bak lo,ka tuar kho bak lo,zuu ding usih ca tiah ka sawm.Heeee a ka ti salam ko,na rituk sual lai le Malaysia na puah dih sual lai, i thlachiat tiah capo ah a ka seih sawhsawh.Silo eh,Pahre aw ding ko usih tiah biatak tein ka van sawm tikah "Ziah, Kawitling zuu cu na din bal ttung lo ee,zeidah cang"tiah Pahre a lau ve cang.

Kawlsan (Zuudawr) ah kan kai i Pahre sinah ka sining vialte cu ka chim dih. "Nungak pakhat ruang i USA kal hna ilet le duh lomi cu Malaysia ahhin nangmah lawng bak kan theih mi na si.Na pasal lo ve tak awh,Pa na si lo maw? Nu pakhat lawng maw vawlei cung ahhin a um? Online chung DL chinchap,haaaa ka zeirel lo" a ti le a ka nihsawh chinchin cang.

Pahre,ruat ve hmanh! kei cu Fidi hi ka duhnak nakin ka dawtnak a ngan deuh si! Vawlei cung chawva le suingun vialte nakin Fidi cu ka duh deuh cu ta.Fidi umlo nak vawlei ahhin kum zeizatdah amah zuuntlem in ka hram cang, kum zeizatdah ka ngaih cang,atu nithum hmanh chimlo atu suimilam caan chung hmanh ka dawt Fidi loin len hi ka zuam ti lo dahkaw tiah ngaihchia in ka kawipa cu ka van holh hnawh ve.

Pahre nih " US ah amah nak dawh le style an tampi ko lai ee,US cu a nuamh zong a nuam deuh an ti cu teh,kei cu US kal bak pei ka duh cu".Aw c ko la nain Pahre zeitluk tuupi le hmawngttha le hmunnuam hmanh khi va siseh, pangpar phuntling an parnak le dong loin cerhti thlum a luannak ram hmanh khi va sisehlaw ka dawtmi Fidihniang a umlo nak ram le hmun cu ka caah these ramcar bantuk khi a si tthiamtthiam ko.

Phaisa ka kawl lo,nuamhnak ka kawl lo,fimnak thiamnak zong ka kawl lo,ka kawl mi cu Fidihning ( Boihte) lawnglawng ka kawl mi si.Pahre,na theithiam cang maw? na fiang maw? tiah a hmaikabih in mitthli he ka van chimhnawh len ko.

Ka kawi,Pahre cu a khuaruahhar in a lau ve cang.Ziah, Kawitling hi hitihin nidang a um bal ttung lo, a sawhsawh a si ti lo,minung thinlung hi contro zia thiam a hau cang timi fiang tein a hngalh ve cang.

Kawitling, "na ngaihchia hlah.Na dawtmi zong ttha tein chonh khawh kan i zuam lai.Cun, UN zung zong ah ca kan ttial lai i nangmah hrim zong na kal tthan lai_keimah bak nih kan zulh ve lai.Fidi he dam tein nan itong kho te ko lai ee, na lungsau ko,zeipoah ahhin lungsau a ttha bik ee. Amah Fidi hna nih anmah Australia lei in van try awk hna a ttha hnga maw aw......tiah khuaruah ngai buin a van ka hnem len ve ko rawh.

Aw...Anmah lei zong in a ttha ve ko lai nain kha bantuk cu ka ti lem lo.Ka unau dang zong an tampi ve ko si,an tikhawh mi si ve ko.A ttha bik mi cu amah hi "Malaysia ah rak tlung sehlaw cuticun tthitumnak tuah hnuah a ttha bik,a rang bik mi si.Nain,atu cu a chawnh zong a ka chawn tuk ti lo le cubantuk cu chim zong ka chim ngam ve ti lo" tiah mitthli a hung hul deuh leiah lungfim nawn in bia kan iruah.

Ka dawtmi Fidihniang nikhat hnu nikhat in kan ipehtleihnak a zor chin lengmang.Nichiar ca ka kuat ko nain ka cakuat a ka leh mi a tlawm chin lengmang cang.Amah zong rianttuan,kei zong rian ka ttuan ve caah online in itonnak caan ttha a um kho ti lo.Amah lei in "Dawt,kan ngai tuk ee"timi cakuat lebang cu ka hmuh ti lonak a sau tuk cang.Fidi thinlung le nunak ah keicu tang ah ka tla chin lengmang par bang uarter a ka zalh cang. Sihmanhsehlaw keinih ka duhnak le ka dawtnak cu caan a rau deuhdeuh a tak chin lengmang i a thlum chin lengmang.

Cutincun keinih lungtthul lo tein Fidi sinah ka nunak lamthluan cu ka zulhter peng ko i ai din bal lo.

Thla (4) hrawng a rauh hnuah ruahlopi in UNHCR lei nih an van ka auh tthan.Zeidah si hnga? UN card hna chuh an ka timh i si hnga maw? tiah lung nuamlo ngai in ka va kal. Officer nu nih cabuai le tthutdan cung in a rak ka hngah ko.Bia tlawmpal a va ka hal i "Australia ah na kal kho cang lai" atu na file vialte hi Australia Ambasy zungah kan pek lai i caan rau lo teah an in auh tthan ko lai"ti a si ko.Kai lawm tuk ahhin ka mitthli a hai.Ka dawtmi ka ton cang lai ka ti.

Cuzan cu Fidi sinah ca ka kuat len nain a ka let ti lo.Amah zong a rian busy tuk ve i si la ti hna ka ruat.Nain,a online caan tampi fawn ko i ca ka let duh huaha lomi hi ka cungah ichirnak le lungdang a ngei cang i si ko lai tiah ka ruat cang.A sinain a caan tete ahcun "ka dam ko.nt?" tbt cakuat te cu a ra pah lengmang ko nain biadang a peh tthan ti lo_cubantuk cun a um.

Australia ka kal ni le thla cu a hung tling ve cang.Hawidawt hna nih an ka thlah UN zung tiang an ka thlah.Ka dawtmi Fidi nih a rak icit mi te MH (153) bak kai cit ve.Kuala Lumpur International Airpost in kan i thawh i suimilam zeimawzat kan zuan hnuah Australia Airpost cungah remhuar a ka tthumh ko. IMO pawl nih tlawmpal an ka zohkhenh i ka u le innah an ka chiah.Ka u le innah cun nuam tein ka um ko nain Fidi sinah ca ka kuat mi Fidi nih a ka let duh ti lo.

Voikhat cu Thantlang peng ttawngcaw (Sport day) Eeast-Melbourne ah an tuah.Cu hnum ahcun ka farnu Parku (Ka ni fa) he kan kal ve.Zanleini a liam dengmang ahkhin Minu pakhat certuar kam teah amah te lawng a tthut ko khi ka hei hmuh.Ka zoh ah Fidihniang he an i lo ngai ee tiah a thli tein kai ceih lengmang. Lamnai deuh ka van zoh,Fidi pic kai chiah mi he ka van zohchih,amah bak a si lai tiah ka ruah.Ka chawn hnga maw tiah kai ruat nain palh sual lai ka phang.

Zanlei ninu cu liam aizal cang.Melbourne khuapi dawh zanlei ninu nih byebye tiin kutzanem a van pek rawh.Thantlang peng hrinfa vialte certual ah nuam in an leng hna.Mirum sifak,mirang minak thleidannak um loin nuam tein an leng cio hna. Zanlei puai a dih in mi vialte mawttaw cung ah kai in an inn cio ah ttin caan a phan cang.Ka dawtmi Fidi mui le sam te zong cu mawttaw parking nak hmun lei a kal lio tiang in ka cuan peng ko rih. Tlawmpal ah ka far Parku nih "Kan ttin cang lai,kan nih nitlak lei um mi kan si,kan lam caan a sau"ati i hawi nungak cuan loiah a ka auh len cang.

Lungsiaherh ngai in Parku he mawttaw hram ah kan i hel lioah Minu cu mawttaw cungah luh ai timh bak khi a si.Mipa pakhat he an si.Cu a langh lio teah cun "Parku Parku, khi nu khi na theih mi si maw?"tiah ka hal.Rak lut,rak lut tiah Parku nih Mawttaw start hram a thok cang. Mawttaw chung i ka luh bak ah Parku nih kha nu kha maw,ka theih mi si ee,Fidihniang hme si ko cu tiah a ka ti ko. A he!! tuan tein na ka chimh lo,ayooo! tiah Fidi parking lei cu ka van hoi ahcun duhsah tein mipa pakhat nih a mawngh mi mawttaw chung ah Fidi cu a kal riahmah ko.

Parku Parku, dawi zok mah nu kha tiah ka fial.Ziah hme? Kan umnak ai khat lo hme cu,tiah a ka mawhchiat len.Dawi ko,dawi kan tiah cun dawi ko,na dawi lo ahcun inn kan phak in kan vuak lai tiah mah far nana cu ka van hro i ka bia cu el ve loin Fidi mawttaw cu kan dawi colh ve.lailei bantuk in mawttaw kal ter le chawhkanh awk a ttha ti lo.A sining zulh tein Mawttaw mawngh a hau fawn.Lam a lawn deuh caan ah Full speed bak in kan tli.A caan ah trafic poit nih a kan kham lengmang hoi. Parku nih ai tuar ti loh i Fidihniang cellphone cu a call.Mawttaw mongh lioah ph chawnh a ngah fawn hoi loh.Nain,a call chih.Voitam a call hnuah Fidihniang nih a tlaih."Nanmah kan in dawi hna hih,parking remcaang um ahcun rak dir uh"tiah a ti. Aw ee,tiah an kan leh ve ko.

Lam a lawn deuh lio caan ah Parku nih mawttaw cian tuk in a mawngh caah ruahlopi in zamlam zir ah kan accident/kan tlu.Elaw! kan ti i kei kha ka lung a rak fim ti lo.Police an rak phan colh.Parku cu vantthat ah a zeihmanh ai khawng loh.Kei kha lungfim loin siizung ah an rak ka tlik pi i siizung ka phan.Parku nih Fidihniang kha phone a chawnh tikah mawttaw in siizung ah an rak phan colh ve.

Sibawi te nih siittha ttha kha a van ka chunh,an van ka thleih i suimilam 3 hnu hrawng ahkhin ka lung a hung fim ngai cang.Ka mit zong ttha tein ka van au khawh cang.

Ka pawng te cu ka van zoh i Fidihniang cu a rak tthu ko.Parku le Fidi hawipa kha lengah an rak chuak chung.Fidi nih "U tling na dam ttha maw? na lungfim maw tuhi"tiah awka nemtein a van ka hal.Ummm..A fim ko,ka dam ko lai tiah ka let ve.Zaangfah tein Fidihning na si maw tiah ka van hal.Aw.. Si ee,U Tling ziah na ka thei lo ma? Ka si ko ka si ko.

Fidihning aw ka van theih i a mui fiang tein ka hmuh i ka ton khawh cang tikah kai lawm tuk.Zeiruang ah hme hmundang/kaadang zong a tampi ko nain siizung chung theng teah hin kan iton hnga ti ka ruat.Kai lawmh tuk ko nain liamcia caan ka ruah ah ka ngaihchiatnak mitthli le lungfahnak hna cu biangno cung ah rialti bang a hung luang tthan ee.Ka dawt Fidi kut nem te cu ka van tleih i ka mitthli biang cung in chantling cungah an tla thluahmah.Ka mitthli khat lei kut in hnawh kai tim nain sii an tlaih caah kai hnawt kho lo.

Fidi zong a thinlung kuai caan a phan.Liamcia caan thil sining vialte Parku nih a rak chinh dih.U Tling ka palh tuk,ka ngaithiam ko mu"ti a chim buin a mitthli hna rang tuk in a hung tla ve.Aw ka dawt Fidihniang keinih cun kan ngaihthiam zungzal ko,na palhnak zong a um lo.Nang le kei kan iton i kan i hmuh khawh mi hi nangmah le keimah khuakhannak si loin Pathian khuakhan le remruat a si.Ttap ti hlah usih,Dam tein ka um lai,lawm in kan lengtti cang lai mu kan vawlei ahhin ka dawt.Saduhthah le chunmang hna cu a tak in an tling cang ee ka dawt.....Tiin kan mitthli cu a hung hul ngai cang.Tlawmpal deuh ka um ah khin ka hung dam ngai ko caah "Inn ah ttin usih law ttha hnga maw"tiah siibawi te cu kan chimh hna i inn ah kan ttin.

Fidi nih a kut hnih tein a van ka thawh i a kut in a ka hruai,a ka tlaih i mawttaw in inn lei kan inn leiah kan ttin hna.

                                                             ############