Duh A Tling Lo Dawtmi ( Part-4)

Rili kam panchian (pangpang dum) chungah Suite cu lungleng ngai in a um i hlan i Pathawng he an rak tthut-tti tawnnak sianginn kam park chung te kha ngai in a mah te lawng lileng in a thu ko.

Tlawmpal ah chuncaw ei caan a hung phan i chuncaw a ei khawh in Bumbai khuapi lei panh in Suite cu ai thawh than cang.Suimilam Pathum chung hrawng mawttaw lam pi ah an tlik hnu in Suite cu Bumbai khuapi an sianginn cu a van phan.Innka cawng security nih innkaa cu a van hun piak i a hawi le india,naga,minupur miphun he hna a van in chawn.

A mitsir tein Pawthawng tah khoika dah um hnga?ziah a rak chuak lang bak lo ee,ka hmu bak lo ee tiah a lungthli tein a hlam lengmang nain Pathawng cu a rak chuah hlei ti lo.Minute tlawn pal hnuah isum kho loin Suite nih a hawi nu kha Pathawng tah tuni sianginn kai lo maw?Ziah ka hmu lo ee,khoika dah um tiah a van hal.A hawi nu nih cun"Pathawng cu Myanmar leiah ka tlung cang lai tiah pei ai thawnh diam cang kha.Tlung duh hlah sianginn kai lio i tlun cu tiah kan thloh tuk ko nain zeidah lungrawknak ngei sehlaw a dawh,a tlunnak nili a si cang ee''tiah a van chimh.

Cu thawng a theihka Suite a celh hrim lo,tthutdan cung in a lu ai khun i a mitcung ah mithli hna an hung i dil colh.A hawi le nih hmuh lai phan ah a biang cung an vun tolh hlan deuh te khin a hnawh tthan lengmnag.

Pathawng hitluk nangmah ngai in le hlam i ka hramnak le ka mitthli hna hi khoika dah ka thlet ti lai,ka taurnak le ka hramnak vialte hi Patawng na ka hnawh piat te lai tiin dahkaw na umnak sianginn te cu ka rak panh hi,atu khoiah na um?U Thawng,miphun dang hna hmaiah mithli tlak ter le ngaihchiat ter kha na ka ka sian bal ttung lo,atu keimah te lawng mi inn tang le lo tang ngaihchia mitthli he ka ttahnak aw hi rak thei ve lo cu mu ka ttahnak mitthli hna hi na ka hnawh piak ko hnga ee tiin Suite cu Manipur a hawinu sinah cu zan cu riah in a mah te lawng ih-khun cung ah a ttap lengmang.

A thaizing zingka tein tangka tlawmpal te he Suite cu kawlram lei tlung dingin ai thawh ve cang.Bumbai khuapi in Kawati khuapi leiah a kal mi Tlanglong teckert cu a lak i a kal ve cang.zan hnih le nihnih tlanglong in a kal hnuah Kawati khuapi cu a phan.Kawati khuapi in Suite a tangka a dih cang.Tangka a ngei ti lo,a lungre a thei tuk i a sivang tuk cang.Kawati in Mizoram khuapi Aizawl khua leiah a kal mi Mizo mawttaw mawng pawl kha a chimh hna.A ningzak tuk ko nain Mizo pawl nih an theihthiam piak caah ai lawm tuk.

Nikhat le zan khat mawttaw in an kal hnu ah Suite cu Aizawl khuapi an hung phan.Aizawl bazar Zarkot ah an ttum i hawidang cu taxi in an inn lei cio an panh hna.Suite bel khoika a panh kho ti lo,tangka a ngei ti lo cu ta,chungkhat sahlawh theihhngalh mi ngiangai zong a ngei fawn lo,cutincun zarkot bazar ah mah te lawng a tthu ko.Zan a hung tlai,khua hung sik,ziah mahnu hi hika hin amah lawng a thut peng ko hnga tiah a ti mi le a zoh mi an tam pah cang.

Suite cu a rawl a ttam i a tihal tuk i a thazaang zong a dih pah cang. Zan suimilam 3;00 hrawng ah khin nu pakhat nih a hmuh tikah a khuaruah a har tuk.A hei fuh i "ziah,hikahin na tthut peng ko,a hodah na hngak?a tlai tuk cang lo maw"?tiah a hal.Suite nihcun ka u tangka ka ngei ti lo i kalnak zong ka ngei lo,cucah cun kahin ka tthut pengnak si ko ee"tiah thinlung kuai in a chim tikah mahcu nu nihcun a zoh ah a lung a suk ngaingai.

Cu nu nihcun" Boihte na ngaihchia hlah mu,na lungrawk hlah mu,kanmah sinah na um lai tiah a ban tein a van hruai a mawtaw chung ah cun a van khumh i an inn ah a kal pi.

Suite cu [ Boihte tiin mizo nih an auh]cu a sining le a konglam kha an van hal tikah mahhna chungkhar nihcun mitthli he an ttah pi.Chungkhar i an nu cem nih "Boihte na va tuar hringhran dah!Pathian a ttha tuk i dam tein na rak chuak kho,a ttha tuk ee,tiah a ngawng in a kuh i ai lawmhnak mitthli le a ngaichiatnak mitthli cawh in Boihte cu a pi he an ttap.[Suite nih chungkhar nucem kha "ka pi'' tiah a auh_mizo lei an phung si].

Mahhna chungkhar nihcun suite cu zarhkhat tluk an zoh i hnipuan tthatha an cawk piak i a damlonak vialte zong siizung ah an piah i an thlok.vatimen thatha le sii tthatha an pek i a taksa a der mi hna an hung milmuang i ai dawh tuk cang.Zarhkhat hnu hrawng ah khin Laitlang ah tlun ai tim ko nain "hihna chung nih an ka zohkhenhnak hi tlawmpal tal cu ka cham ve hna lai,ka umpi o rih hna lai i an rianttuan ka bawm hna lai"tiah thinlung ruahnak a ngeih caah khualei tlun kong kha a ceih lem lo.

Tlawmpal a hung um hnuah khin an fapa Puia nih suite cu a duh tuk ko ai.Nichiar umthiamlo tiawk tlukin a helh lengmang,Puia a nu le a pa zong nih Suite cu mifim cathiam le pumrua ttha a si tikah an fapa nupi caah an duh tuk ve.Kan fapa nupi caah Pathian nih a kan pek mi a si ti tlukin an iruah ve cang.Sihmanhsehlaw Suite nihcun zungzal pasal ding caah Pathawng lawnglawng ai thim mi a si i biakamhnak a pek cang mi a si.

Nikhat cu Puia a nu le a pa nih Suite cu hitihin an ti "Boihte nang cu kan fanu caah Pathian nih a kan pek mi na si,Puia he hin tthitumnak kan in tuah piak hna lai mu"tiah an soilem. Suite a lungrethei tuk cang,zeitindah a si hnga tiah a lu ai khun i khua a ruat lengmang nain Puia a nu le a pa cu bia kaa khat hmanh a let ngam hna lo.Suite lamkam ah Puia nu nih zaangfak ngai in a rak char lio kha van ruah tikah cun Suite kha tluk ngaihchia le lungrethei in a um lioah a bawm i a chanchuah tu nih zungzal nupi ding caah van hal i "ka duh lo'' ti hi cu suite caah a har ve hringhran ko lai ee.Suite zeitluk fak in dah khua a ruah hnga.Zanchiar ihphak nem mi cungah a it ko nain thingluang cung ih bantuk a si,ai hngilh kho lo a khel ai let lengmang,a bauah lam hluan a ruah ah ttahnak lawng tein a khat.

Cutincun Suite Puia cu te chung nih nupi ding ca i an ti tikah Suite nih a el hrimhrim ngam hna lo.Hitlukin an ka dawtnak hi a si ko nain ka duh lomi he iumh cu,Pathawng sinah ka thinlung le zeizong vialte ka pek dih cang fawn,zeitin khuaruahawk ka thei lo ee tiah amah le amah lawng ai ceih lengmang.Sihmanhsehlaw Suite cu mifim thiam le mittha mi dawtnak a thei mi a si caah an innchungkhar sinah mithmai panh le lawm tein um khawh ai zuam peng.Cutikah Puia te chungkhar nih Suite nih an kan duhpah ko ti kha an zumh tikah Suite le Puia cu tthitumhnak puai tuah dingin an timhtuah piak hna.

Suite nih a zanmang hmanh ah a ruah bal lo mi le a hmuh ballo mi Puia he cun ruahlopi in tthitumhnak puai cu a tuah taktak ko.An nupi a hung si hnu cun anmah kut ah an chiah cang i an duh ning poah in tuah hram an thok tthan cang.

[A hlan i mittha taktak kan timi hna le a kan daw bik tu kan timi hna zong hi a caan ahcun a kan huatu bik le a kan nihsawhtu bik ah an rak cang tawn].

Puia te chung nih Suite a konglam le pasal a neih zong lai lei pakhat hmanh thawngthanhnak an tuah hna lo.An theihter hna lo.Ph chawnhnak le mi tlungkal kan thei hna lo an ti sawhsawh men ko.Suite nih le Innchung hnokhnai bul le dum thlawh lawng a tuah mi a si i khualak ah midang bang ai chok ve mi a si lo tikah khualei thawngthanh le mi tlungkal cah ding zong a thei ve hna lo.

Voikhat cu Suite cu mehhang caw dingin bazar ah a kal lioah kanmah lai lei mi a hmuh hna."Cikkhat tein dir rih uh,bia kan cah ta hna lai" tiah a kawh hna i a chung le cu bia a cah hna". Pakhat pa nih"na biacah mi a sau pah i ca in ttial law kua ko hna ngat,a ttha bik lai tiah ruahnak a van cheuh.A siahcun thaizing kan i tongtthan kho ti lai maw tiah a van hal hna i,"aw mawtor gate ah khan rak chia law kan phur ko lai" tiah an ti.

Cu zan cu Suite zantim le kuamang ah a tho i ka palsal Puia nih a ka hmuh sual ti phan tuk bu tein phaizawttan hme te ai van i hitihhin mitthli a nu le a pa le a dawtmi Pawng cakuat sinah cakuat cu a tial.

Dear ka Nu le ka,

Nan dam lio a si maw?Ka pi le ka pu kan chungkhat sahlawh vialte dang hna zong an dam dih hna maw?Kei zong nan thlacampiaknak thawng le Pathian dawtnak thawng in dam tein ka um lio a si.Ka nu ka pa,kan ngai tuk cang hna ee"a tivial ah khin a hmaika catlap cungah a mitthli durdur in an tla thluahmah".Ka nu ka pa,ka lamthluan le thihnak horkuang chung in ka rak chuak ca cu ta''nan lungrethei ti hlah uh mu,nan fanu nu ka thi loh ee,ka nung ko,a tu hi Aizawl ah ka um i pasal ka ngei cang ee.

Ka nu le ka pa,nan duh loning in ka um sual mi le ka palh sual mi rak ka ngaithiam hram uh law nan fanu caah dong loin thla rak kacam piak ko rih uh.Kei zong nih thla kan campiak zungzal ko hna.

Ka nu ka pa,kan ngai tuk cang hna ee ti hlei cun chim ding hi zong ka thei ti lo,nan fanu dawt ka mitthli tla loh i ka ttah lo ee,zeithil poah ahhin nusal ka ti zungzal ko.tiin a dunning tluk hmanh in ttial kho loin a clak cu a kil le a kil in a mitthli nih ciar dih lak a tlak hnawh cang.A ttah tuk nak ah a thin le a ttang a su bak in ai su.Ka nu ka pa,kan ngai tuk cang hna ee,hmailei ah Pathiannih tonnak caan kan pe hram ko seh.Kan iton tthan hlan tiang dam tein mangtha tuk uh mu.

Nan fanu
Suite [ Boihte]
Aizawl.

Hi cakuat a ttial dih in Puia cu ai sual hnga maw tiah a mitsir tein a zoh lengmang.Catlak dang a van i lak i a dawtbik mi Pathawng sinah hitihin ca cu a ttial tthan.

Dear U Thawng,
Vawlei cung i ka dawtbik mi ka U Thawng,dam in na um lio a si maw?Kei zong Pathian dawtnak le na thlacampiaknak thawng tein ka dam lio te a si.Ka dawt tuk mi U Thawng kan ngai tuk cang ee,hi cakuat le catlak te hin keimah canah na kut kan tleih.

U Thawng kei cu vawlei cungah a harbik mi le ttih a nung bik mi khurchung in ka rak chuak cang ee,U Thawng ka sining hi na rak thei lai lo mu,tiin a van ttial vial ah khin (pen) cu a ha in aseh i catlak le cabuai cungah Suite cu ik lengmang a ttap tthan hoi.U Thawng kei ka caah cun vawlei hi mitthli tlak nak le ttahnak lawng te a si ko ee,tiin a van pehtthan vial ah khin a angki ban in a hnar le a kaa ai huh i isum kho loin bak in a ttah tluahmah.A tahnak ah a ik tuk i a hnulei kengruh le thahri tianginn an thir dih.

U Thawng,na dawtmi Suite nih nangmah theihlo in ka tuah sual mi sualnak le palhnak vialte hi rak ka ngaithiam hram ko mu.

Kan dawttuk ko nain "zungzal in zuangzal tiang kan lengtti lai" tiah kan biakam mi vialte kha keinih cun ka let dih sual cang ee.U Thawng nang le kei cu zingnu samhrisih kan si rua lo.atu fiang tein kan chimh " Kei cu pasal ka ngei cang ee"ti a van chim vial ah khin a hmai cu catlap le cabuai cung ah a beh i nguingui in a ttap thluahmah.

U Thawng,kan ngai tuk ee,kan iton tthan hlan tiang mangtha mu.Byebye

Suite [ Boihte]
Aizawl.

Suite cu Pathawng sinah a duh ning tluk hmanh in cakuat ttal kho loin a ttah tuk i a cakuatt tial cu a mak,a kut tha a thir dih cang i a ttang le a keng dihlak a suk in a i su.A cakuat ttial mi te cu a chung le hmuh lonak ding ah a fim ta i amh cu ngam kho loin nguingui a ttap thluahmah ko.A ttahnak aw le a mitthli a takpum le pumsa nih a control kho ti lo.Ai sum kho ti hrimhrim lo i a duhning tein tha piin a ttah thlauahmah. Cabuai cung a hmai a beh,a angki ai seh i "Maw ka nu ka pa,ka tta thawng aw'' tiin a ttah thawng nih a pasal Puia a van tthangh.

Puia cu a a mit a van i hnuai i a van zoh cu Suite cu cabuai hngoh in a rak i kual len ko.Puia nih ziah na ttah,zeidah na ttah tiah a van chawnh vial ah hringtu nu le pa cu an ihnak khan chung in an rak chuak ve.Ziah nak tah tiah an van hal tikah " Lai lei ka nu le ka pa ka tta thawng ka ngai tuk hna ee" tiah a ttah buin a chimh hna.A nu le apa nih " a ho em mei,cutiang ringot ah ttah te cu a zahthlak ee" an ti sawhsawh men ko.Zeihmanh ah an rel piak lo.

It,it, tiah ihkhun cung ah an van tilchih i ihkhun cungah cun a kai.Suite a ngam kho hlei lo,a ttah a zual chinchin.A palsal Puia nih hnahnok na si,va chuak law innleng ah va ttap,hngilh ka duh,kan vuak sual lai tiah a hro a hro i innleng ah a chuah ter.Site cu innleng ah a mitthli he diriam tein ttap ding a chuak.An inn thlang mawttaw lam kam te i mipoit a ceu pah mi tang teah a tthu i thinlung kekkuai in a mah te lawng zanttim le khuamang ah a ttap peng ko ee.A nu le a pa a ngai tuk hna,A tta thawng a ngai tuk.Zan a ih ah a mang ah a hmuh lengmang ve hna cu ta.

Zan a hung tlai,Lam ah ai chok mi motor an um ti lo,khua hungsik tuk cang,Aizawl khuapi king kirkiar tein a um.Van hei zoh ah cung arfi hna nuam tein an leng,Zantlai ah amah te lawng a vak lengmang mi zan thlapa te bang Suite [ Boihte] cu a mah tein a ttap lengmang ko. ( ka peh tthan te lai) By: Andrew Tum Tling