Hung Kir T'han Ko Ka Dawt (Part-1)

Ka rianttuannak hmun in KL khuapi cu zanlei tlai hnuah hnawhhnam nawn in kan van panh.KL ka kai lonak thla khat a tling i ka rianttuannak khuate ah nifatin rian ah ka caan ka hman.

Keimah tawk in fresh ngai le smart ngai in kai ttamh i taxi Rm-12 in ka hawipa he kan van haiher top.Taxi in tlawmpal kan kal hnuah Train ( Tlanglong) station (Dinhhnun)cu kan phan i kan itinhnak hmun lei phak ding in train ticket cu kan phiat.

Sumilam 1:00 renglo hrawng Tlanglong in kan kawl hnuah Tasik Selatan Tlanglong dinhhmun pi cu kan van phan.Siaherh in plastic thilri kai put mi cu a tam ngai.

Tasik station cu zan suimilam 8:30 hrawng kan phan.Voidang he ai lo loh,minung kan tamtuk ning hi ke chiahnak hmanh a um lo tiawk tluk khi a si.A hnuk bak in minung kan i hnuk i a pah bak in minung ipah cio a si ko.

A thaizing kha muslim pawl ni sunglawi (Holy day) ni a si caah cuni cu an rianttuan hmun cio in an khua le inn cio an rak panh i an rak tlun pah cio kha a si caan/ni a si caah cutkukin minung tlungkal kan tam cu a si.

Kan tlunnak ding cungdot lei ah kan van kai cu minung kan tam chinchin,a tlung lei le a kal lei kan icawh dih cang.Raltthat in mi pah i itenh lo ahcun zan khuadei hmanh ah leng lei ah a chuak kho ding kan si ti lo.

Aho cio poah mi karlak ah itenh cio a si ko i kei zong cu mi karlak ah heh tiah kai tenh ve,ka thilri put mi nih le a rit,aircon kik ngai in an chiah ko nain ka pum tein ka thlan nih a ka ciah dih.

Cuticun minung lakah cun itenh cu si ko kaw ruahlopi in pakhat nu he kan i pah/tteih sual ko ai! Engin ngei veve mi van ipah cu a din te lo,pakhat nu nih a kut in ai put plastic le caku bawm vialte a boh dih i a thilri vialte tangah a choi dih.

Keinih ka kut in kai put mi plastic zong ai boh dih ve i juice le fruit pawl kai put mi tangah an ril dih ve.Kan pahnih in mual kan pho cikcek. Ka lau tuk hringhran,Elaw!sory sory tiah ka van zuanhnawh colh.Ka palh tuk ka ngaithian ko mu tiah mirangg holh ka thiam tawk in zaangfah ka van nawl len ko nain a mit sensen in a ka zohchih.Elaw! Tuluk nungak no te ka ti sual,ka caah a poi tuk lai ka ti i ka thin cu drum tur bantukin a tur cang.

A thinhung tuk ticu a fiang ko,a thil tang i a tla mi pawl cu char ka van timh hna nain minung kan tamtuk caah char awk zong an ttha ti lo.Pahnih thum ka van char i ka van pek."Sory bak si,ka ngaithiam ko,minung kan tamtuk caah si ko ee" tiah zaangfah cu ka van nawl chih len.

Tang ah a tla cang mi thei Apple thei cu pum thum te ka van char piak mi cu ka van pek tikah "kai lawm tuk hringhran" tiah awka nem tein a van ka leh."Keimah tu ka palh deuh,ka ngaithiam ko mu,keimah nih kan pah hmasa sual caah si" tiah awka nen te le mirh nawn tein a van ka chawnh mi bia nih ka thintur le thinphan mi vialte ti bang a van nemter i tikik te bang dai tein minute pakhat chungah a umter colh.

A mithmai a panh tuk hringhran,tang ah a thla cang mi Apple thei pum thum te ka van pek lioah khan laksawk la mi mithmai bantukin a panh kho i a mirh khawh mi nih ka thinlung ah vatimen a van rawnh bantuk khi a si.Minute pakhat chung teah thinphang le thintur in ka um mi vialte cu minute pakhat chung lila ah arpi nih a fale a thla tangah lum tein a chiah hna bang ka thinlung cu nuam tein a chiah khawh colh.

A mithmai panh le ai dawhnak iang zoh ka cim hrim lo,cutluk nu dawh cu,second pakhat chungah a ke in a lu tiang ka bih dih manh.Cutin cun can tlampal kan ituai hnuah Tlanglong station dinhhmun cun lengah ka chuak tak.Cheras lei kal ding Bus stand ah cun ah ka tthu i tlampal ah mah cu nungngak no te cu a rak phan colh ve.

Ka hawi pa nih "Zoh hmanh khih! mahtluk dawh khawh cu" tiah a van ka chimh len.Mit tthep lo tein ka zoh lengmang lioah kan umnak Cheras lei kal ding Bus ( No.405) cu a hung phan colh i Bus chungah ka lut colh ve.

Bus cu sau nawn te a dir i motor thlalang chung in mah cu nu te cu ka zoh lengmang.

Lungtling te le diriam tein ka zohcim manh hlan ah Bus nihcun a kan kalpi riangmang ko.Lampi thluangthluan amah lawngte ka ruat i ka mitthlam ah a cuang.

Cu zan cu hngilh kho loin amah lawngte ka ruat hoi.Mah nu te kha khoika khin dah a va kal hnga i khoika dah a va um ve hnga ti lawng ka ruat.Voidang ah itong nolh kho usih law a ttha tuk hnga i tuzan ka mang zong ah amah lawng te hmu ning law ka duh tiin cu zan cu amah ruat in chantling cungah kai ceih lengmang.

Nithum hnuah Tasik Tlanglong station cu ka phan tthan i a tthutnak hmun te ka van hmuh tthan.Atu ahhin ruahlopi khin rak ra tthan sehlaw ti lawng seihku ka zin i amah rumro ka mitthlam ah a cuang hoi.Tlanglong station chung cu ka van lut tthan i minung kan tlawm tuk cang.Kan ipah/tteihnak hmun hna ka van zoh tthan,a mithmai panh le mirh hna kha ka mitthlam a hung cuang i a awka nem te kha ka hnathlam muko thum thawng bang a hung thang lengmang.

Cuti amah kong ruat in ka um ko lioah ruah taktak bang a hung lang tthan taktak.Lamhla nawn khin ka hei hmuh i keimah lei duhsak tein a ke a van kar hlan thluahmah i a van ka neih deuh thluahmah ko.Mit tthep lo tein ka zoh ko,cikkhat kan mit ai tong i ka mit khat lei ah ka tthial tthan colh.

Ka pawng a phak hlan in a sinah hmur le kaa nih a chim ngam lomi "Duhdawtnak"cu ka thinlung le nunnak ah thlaici bang a hung keu. Zeitindah kan ipah khawh ning a si hnga...Ralring tein ka kal ko ttung,amah zong ralring tein a kal ve ko lai va si kaw..

Ai pah ding le ai tong ding hrimhrim in maw Pathian nih a kan ti le si hnga ti hna hi ka ruat. Ka pawng te cu a hung phan i Tlanglong ticket laknak ahcun kan dir veve. ( Ka peh tthan te lai). By; Andrew Tum Tling