Duh A Tling Lo Dawtmi [Part-2]

Suite cu sianginn luhnak caah tangka Rm-20000 a pek khawg lo ruangah zanlei ninem te sinah lungkuai ngaihchia in a mitthli he a ttap lengmang.A thinlung a fak tuk,a ngaihchia tuk hringhran.

A dawtmi tta caan Pathawng zong curuang ah a lungre a thei tuk hringhran.Pathawng nih a u le US um mi phone a chonh hna zong ah "a ziah,nai ahcun pei tangka cu kan in kuat cang,tangka hman na tthawng tuk,iralring hiti na si ahcun kan i zohkhenh kho lai lo ,kan in kua kho lai lo,hmaithla thla nolh ah kan in kuat te lai"an ti i a u le nih ceiko in an van mawhchiat ai.

Pathawng lungrethei le awlokchong in ih- khun cungah ai tengtale cang.A dawtmi Suite sifak le santlaihlo ruang i sianginn van chuah i mitthli tamtuk luan lai a ruah ah a celh ve hrim lo.A kut cung tangka Rs-3000 te lawng a um fawn.Thaizing ah thil a cang hnga ding mi ah zeitin van phisin awk a ttha ti lo.

Suite nih ramdang ah chungkhat sahlawh unau ngeih mi a ngei lo,laitlang i a nu le a pa nih lothlawh buin Vokte Arte an zuat i tangka an hmuh chom mi te le mi docuai bu tein sianginn an kan kai ter mi a si.

Zan khua a hung mui i Suite cu rawlei tidin zong a zuam ti lo.Ih-khun cungah lungkuai in ai tengta le.Pathian nih ka caah a ttha bik in khua a khan ko lai tiin mitthli he zankhua dei thla a cam.

Zinglei niceu dawh te nih Bumbai khuapi cu a van poh cang,high-way zalam pi cung mawtaw tthatha vingving in an tli,anmah an rian cio tuan dingin mi vialte timhtuah nak an ngei cang.

Lainu Suite miphun dang le ramdang ah fimnak cawng in a mitthli tamtuk a luang cang.Sianginn lei ah hawidawt hna a ttuaittuai in an panh cio cang.Suite bel sianginn panh a zuam ti lo.Zingdang i ai ngaih tuk tawn mi sianginn khan cu a caah ttihnung bik khan ah a cang.

Zeisihmanh ah, ningzak bu te le iphuhrung bu tein a bag le cauk te cu a van ilak i sianginn lei ah duhsah tein a panh ve tthiamtthiam ko.Sianginn luhnak fee na pek lo caah sianginn nih cohlan na si ti lo,kan sianghngakchia na si ti lo,sianginn dang ah na caah hmun a um ahcun vai tthial ko ti a si ko cang.

Suite nih ai ruah cia a si ko i a bag le cauk te he sianginn cun a chuak.Inn ah a ttin i a dawtmi Pathawng cu phone a hei chonh.

"U thawng sianginn cun ka chuak taktak cang ee,Na lungrethei tuk hlah mu,zeithil poah hi Pathian nih a theih dih ko,Pathian khuakhan le lairel a si ee,U thawng zanlei na rak ttin tik cu inn ah rak ka leng te mu"tiah awka nem tein a hei chonh.

Zanlei sianginn van ttin hnu cun Pathawng zong Suite nih room a hlan mi inn ahcun a va leng.Zeitindah Suite na um ning si lai,na tlung lai maw? zeitin kan tuaktan nibg si lai tiah saupi an iceih hnu ah Suite cu kawlram lei ah tlung lo ding in Venus Hotel ah rianttuan dingin ai tim.

Hotel ah kum khat hrawng rianttuan ta i cuhnu ah tangka ai khon mi tein sianginn kai tthan ding kha ai timh mi a hung si tthan.

A thaizan suimilam 10:00pm ah Suite cu Venus Hotel ah interview tuah dingin Pathawng he an kal.Suite a muisam ai dawh,a fim a leklak fawn i rianttuan ding in a tling colh.A thaizing 11:00am ah venus hotel ah riantuan thok ding le a riak colh ding a si cang.

Cuni cu Pathawng zong sianginn kai loin Suite cu a buai pi ve.Pathawng nih Suite a zoh ah a lungfah a celh ve hrim lo.Hitlukin Suite ca a thiam i ca ai zuam mi sifah le harsat ruang in sianginn van ban taktak ko le laimi a hohmanh an um lonak vai( kala) sinah a dawttuk mi Suite rianttuan ding a siang hrimhrim lo.Zeidang thim ah le tuah awk a um hlei lo. Kawlram lei tlun ding zong in tangka a um fawn lo.

Pathawng nih Suite thil le ri te cu a van cawi i Suite cu a bag te he mithmai panh lo tuk bu tein Venus hotel leiah taxi in kal ai thok cang.

Pathawng nih "Dawt, Suite zeithil poah cakuat le ph chonh daithlang hlah mu,kei zong nih ph ka van in chonh lengmang lai.Nangmah loin sianginn chungah hin saupi ka um kho hnga maw?Ka zuam ve ti lo ee Suite na sinah ka ra ve ko lai"tiin Pathawng cu zalam cungah a mitthli a hung tolh.

Suite nih "U thawng,na ngaihchia hlah mu,kum khat te lawng pei si ko lai cu.Thlakhat voikhat rian off khawh kai zuam lai i ka rak in leng tawn lai.Nang tal ca i zuam ko,nang cu na u le zong US ah an tampi i sianginn kainak ah tangka chambaunak na ngeih ttung lo.Nang tal cu kai ko mu U thawng" tiah Suite nih nu cancuh in a mitthli he hacangrial lengmang Pathawng sinah thazaang tthawnnak bia a van chim ve.

Nusal pei ka si,zeitin vawlei ahhin harnak tong bal lo an um ttung lo,keinak sifak le cathiam lo an tam tuk rih maw,Pathian nih zeithil ka ton poah ah a ka umpi ko a ka hruai zungzal ko tiah Suite cu lungtthawng ngai Venus hotel lei panh Pathawng he an i tthen cang.An caah a hnubik bia cu "Dawt byebyeee" ti lawng kha a si ko cang.

Suite caah ttih awk thil a tam ko.India ram hi miphun dang a nautat ngai mi le tleihhrem,a thlite thah le nawn a tam tuk nak hmun a si. A bik in Bumbai khuapi le Delhi khuapi hrawng le bang ahhin cun north-east lei minung hna hi a nehsawh deuh hna i an rem ziar hna loh.North-east lei nungak an hmuh hna ahcun India pa pawl hi cu an thi a kai colh i tleihhrem le sualpi an duh colh tawn hna.Curuang ahcun Mumbai khuapi ah nichuah lei India minung hi thawngpang theih lomi an tam tuk cang.Cucaah nu ca lebang ahcun iralrin taktak a hau.

Suite le Pathawng a caan ahcun phone in an i chawn tawn i suite nih thlakhat voikhat in a va tlawng tawn.Pathawng sianginn kainak tangka ai relrem lo deuh caan hna ah Suite nih a thlahlawh tangka a hman ter chung tawn.Cutincun a lang le par in idawt tein an um zungzal.

Suite cu muidawh tiksa ngo kan ti cu India minak pawl nihhin an ngiat lengmang.Suite a rianttuannak thla 5 a hung si ve cang.An hotel ahcun an bochan ngai mi ah a hung phan ve cang i mizapi hmuhnak ah a rumngai mi hna a lo cang.

Nikhat cu India minak pawl nih khan Suite an ngiat lengmang tikah an mitthi,Cun a rum ngai mi ah an ruah.Cucaah Suite tlaih dingin khua an khang.

India minak misual pahnih nih security innka cawng vialte zik an nawh tangka an pek dih hna.Suite ihnak room umtuning ttha tein an lehla dih hnu ah zankhat cu suimilam 2:30am hrawng ah Suite room chungah misual pawl nih an luhhnawh ko ai.

Innka tawh an cik i Suite cu "duk" ai hlau colh,a cal ah pistol hmuahchih a hung si i "Au hlah,na au i na holh ahcun na thi colh lai.hika inn chung hotel cu kan kut a phan dih cang,kan bia a ngai lomi minung 10 ihkhun cungah an thi cang.Ra law kan zul,na bank card na kan pek lai i cun bia kan in hal lai i kan in thlah tthan lai" tiah meithal he an soilem.

Ka duh loh tiawk a ttha ti lo,a kaa ttep in an huh,a kut hnulei ah an leh an ttem i mawttaw in hmundang ah an i kalpi diam ko.

Suite cu a thin a phang tuk,mitthli he a ttap lengmang,holh a duh zong ah a holh kho lo i au kho ti lo.Cutincun zanttim le khuamang ramtang ah an kalpi.

Zinglei khua a hung dei lai teah khin ramlak tupi hmawng pakhat chungah an lut.Suite cu nusal thih le thih nun le nun tiin ai sual lengmang.Vanchiat ah an mawtaw cu chengpalang ah ai let ko ai.Vantthat ah India pa minung pahnih cu an thi colh_i cei hna seh.

Suite cu lungfim lo ngai in suimilam cheu hrawng a um hnu ah a van i hlau.Nusal tiah a tha a van rengh i a hung tho.A kaa an huh mi ttep cu thingfung ah a hnur a hnur i a hung poih.A kut hnulei ah an ttem mi mawttaw thir ah a hnur chih i a cet dih.

Mawttaw chung ah a herh mi thilri tlawmpal bag chungah ai rawn i hmun dang ah zam ai tim.India pa pahnih cu a van zoh hna an thihnak caan a rak sau pah cang.

Cilio cu india lei furpi ruahti tam lio caan te a si.Zinglei khua a hung deikaa hrawng te khi a si i,maw vuatvap tupi hmawng chungah Suite cu khoika lei ka panh ti zong hngal loin a vai lengmang.Tupi chungah va phun an tling,saram phun an tling,cakei ttihnung seh hmang zong an um ko lai.
Va phung tling le saram phuntling zing lei khua hung dei cun an riahbuk in an chuak i rawl kawl ah an vai cio hna.

Suite zong tihal dangcar tuar in tupi chung ah caan sau lak a vai ve cang.Suimilam 2 tluk hrawng a kal hnu ah tiva te pakhat a hmuh i cuka lei cu a hei fuh.

Cu tiva ti cu diriam tein a din i tiva kam teah khuazaruat a ttap lengmang.Ruahpi siamsiam tein a tla pah,atu ka umnak hi khoi dah si thei thei loin thinlung kekkuai mitthli he thingkung pi tang i tiva kam teah khuazaruat in a ttap lengmang ko. (Ka peh tthan te lai) By; Andrew Tum Tling