Hung Kir T'han Ko Ka Dawt (Part-2)

Tasik Tlanglong station ahcun ka pawng teah a hung dir.A sam thlak le a tungtai ka zoh ah ai dawh lawlaw,soisel awk um lo bak khi a si.A kik ngai mi aircon toiah a zihmui hrim cu Serthlum rim thaw te bang ka hnar chung ah duhsak tein a hung lut i ka chungthin tiang a hung phan.

Mittthep lo tein ka zoh lengmang i amah zawng nih a van ka zoh pah lengmang ve.Kan mit ai ton caan ah khin umtuzia thiam loin ka thinlung cu a ttang nem cung ai tuai lengmang.

Ka chawnbia hnga maw tiah ka ruat,amah zong nih ka chawn hnga maw tiah iruat ve len sehlaw ka lawh ter ve.Cutincun rilli cung hnakchawl vuan bang kan thinlung le mit lawng nih duhdawtnak a thui lengmang ko.

Ticket cu kan lak dih in ka kalnak ding platform 2 lei ah step hlei cungah duhsah tein ka zuang.Ka liam hlan lo hnulei kai her lengmang.Cu nu cu ticket a van lak dih in platform 1 lei ah a kal ko ai.Kan lam ai dang cang,a nih khat lei ah kei khat lei kam tiin kan itthen.

Lungtho lo ngain ka hngah mi Tlanglong a hung phan colh.Kai tuar ti loh i Tlanglong chung ka luh lai ah ka kut cung lei ah ka phar i "bye bye" ka hei tuah i "bye bye" a van ka tuah ve ko.Ziah,kan thinlung cu itheithiam rih hmanh hlah sehlaw kan kut cu ai theithiam tuk ko hi ta tiah kai ceih colh.

Lungzur le siaherh bu tein ka liamtak riangmang ko.A caan nih minung a kan hngak lo caan sinah minu ka duhnak le ka dawtnak a hung liam ve.Zan khuadei amah lawngte ka ruat tthan i ka thinlung ah a caam zungzal.

Ka nunnak ka thinlung ah tiva bang a luang cang mi "Minu te" zuuntuar in rianttuan zong zaangtlung kho loin a thaizing zong amah lawng te ka ruat i kan iton tawnnak "Tasik Tlanglong station"ahcun ka va kal tthan.

Chunnitlak zanlei mui tiang amah muihmai kawl in ka hngak lengmang nain a ra ti lo.A muithlam ai her hrim ti lo ee.Lungleng ngaihchia ngai in inn leiah ka kir tthan.

Voikhat cu thlakhat a luan hnuah ruahlopi in kan itong tthan.A hawi le nu pathum he an si.Hailen copitiam restuarent ah an rak tthu ko.Kei zong ka hawi le pathum he cun nungak pawl an tthutnak cabuai kam teah kan tthu ve.Ka mitsir tein ka zoh lengmang,amah zong nih a mitsir tein a ka zoh lengmang ve.A hlan ahcun kan mit ai ton zawn ah ka mit cu ka rat tthial tawn nain atu ahcun ka zohchih cang.Amah zong a ka zohchih ve cang i izohchihnak veve nih thinlung hna a ngamter caah kan nihchuak pak tawn.Amah zong a va ka zoh caan teah cun a nii kho ve cang.

Tlawmpal ah a hawi le nu pahnih cu lai holh (Thantlang peng) holh bak in an van holh.Ka khuaruah a har nawn.Laimi an lo tuk ka ti ttheu lo maw ziah mah kanmah laimi sinah hin ka duh mi nungak Tuluk nu te hi a um khawhzia ee tiah thinlung imanhlo ngai in ka buai.Kei ka hawi le pahnih he laiholh in bia kan iruah len.Ka duh mi nungak nute cu holh lo dai tein a um caah ka khuaruahharnak cu si.

A din mi Orang juice hrai tanttim hmanh a din hlan ah Laiholh te bakin ka pawng te bakah a ra i " Laimi na si maw"? tiah a van hal ko.Aw c ee,tiah launawn in ka van leh i kan kut kan van tlai hna i thawngpang dangdang kan van ihal hna. Theihternak tlawmpal zong kan van pehchih.

Ziah,Chinku tuluk nungak bak ah tah kan rel peng ko cu,laimi na si kan theilo cu ta,sory si mu tiah mithmai khap lo ngai in ka van ti.

"Heeee si lai loh,nai uah pah i si ko cuh.Kei zong laimi na si fiang tein kan theih lo caah rak ka ngaithiam mu"tiin Chinku awnem te nih ka nunnak fak tukin hmunhma a khuar.

A phone number le a umnak a ka chimh colh i cuticun inn lei ah mah le inn lam cio ah kan ttin hna.

Cuzan cu chantling cungah ai dawh mi pangpar dum cul in khua zaza ka ruat.A caan ah ka ni,a caan ah ka ngaihchia.Keimah le keimah thinlung hmanh a phi chuak kho rih lomi nunak lunghmui ngai ka caan cu zeimawzat a hung liam.

Ni le thla nih a kalpi mi caan chung ah Chinku he phone kan ichawnhnak caan a hung sau ruangmang cang.Pasal duhdawtnak biaruah caan cu cang lo maw....

Zanlei ninem nawn teah khin Chinku he pangpar dum pakhat chungah kan lengtti.Pangpar phuntling nih an i dawhnak iang an langhter,muici phuntling in an en i an par nain ka dawt mi Chinku nakin ai dawh deuh mi pangpang pakhat hmanh an um lo.

Duhdawtnak biasung phai in ai dawhmi dum chungah cim le vuai ngei loin kan caan cu a hung liam i zankhua mui nih KL khuapi cu a khuh cuahmah cang.Cutincun thinlung khat dawtnak dum chung ah kan caan cu a dih riangmang.

Thla hnih hrawng kan um hnuah Chinku cu ramdang USA kal ding a hung si cang.Medical check-up ai lim dih cang i kal ni le caan cu a hung phan taktak cang.

Malaysia ah ralzam dirhmun in ttihnung ral phuntlung a tam ko,covo zeihmanh kan ngei lo i a har hringhran ko nain Chinku KL tlang van liam lai ka ruah ah ka ruatkho hrim lo.

Aw!..USA ah hnangam tein Chinku a taksa le a pumsa cu a um ko lai nain a thinlung le a ruahnak cu KL tlang a liam kho ve hrim lo.

Thaizing 6:00am ah UNHCR zung phanh ding a si cang.Zan khuadei khuaza ruat in suimilam cu atu le atu ka zoh lengmang. Ka dawt Chinku kal caan cu a hungtling taktak cang.

Taxi pathum kan hlan i Chinku cu kan thlah hna.UNHCR zung hmai ah Chinku anun si a vang.U tling veimu tiin a chim vial ah khin zinglei thinghnah cung i a luang mi dapti dor bang .Chinku biagno cungah duhsah tein mitthli a hung tolh thluahmah.U tling,ka rak kal chung lai i nang le kei kan caah hmun ka rak remh chung lai mu.USA ah kan itong tthan lai.Caan a roh deuh si le keimah tu Malaysia ah visit in ka ra tthan te lai mu.U tling,seihchiah,seihchiah mu tiin ka kut nemte itlaih in Chinku cu nusal cuh in a ttap lengmang.

Aw....Kei zong ka tuar kho ve hrim lo.Lungtling tein kan lemcim hlan ah dah ngai kan itthen tuan ne mu.Chinku ngam cang law ttap ti hlah mu,thaizing ahcun kan caah khua a dei te ko lai ee,tiin ka hnem ka ti nain keimah tu ka mitthli dordor in vawlei ah an tla.Zinglei khuasik lakah Chinku kut lum te itlaih in a kik mi mitthli minute caan chungah tamtuk a luang cang.

Thlizil kik nemte sinah dawtnak tthentu mizeidah an si..? lungpi bang a hak mi thinlung a khuai i cerhti bang reu kho loin mitthli a luan tertu hi a hohmanh an um ttung lo.Vawlei cung duhthimnak le sining ruangah dah ngai nang le kei kan ttian chung ko ne lai.Dawt,rak ka philh hrimhrim hlah mu,tiin dawtnak biakam fek he byee byee ti caan a hung phan cang.

A thilri sutkhet he UN innka chungah mitthli he ttap buin a lut riangmang ko.

Dawt,dawt, "byebye bbyebye "tiah ka za ka zo i ka au len nain ka aw a chuak kho ti lo. Ka mitthli lawng a au cang.

Cikkhat teah ka dawtbik mi Chinku ka hmu kho ti lo.A ka liamtak cang. Chinku KL tlang a liam hnu ah kei lawng lileng le zuunngai in ka caan cu nifatin an liam.Kan rak lenttinak zalam pheihrawn ttha le kan tthut ttinak runinn dawh sang vialte kei lawng ka ttol tthan hna.

Chinku ngaih a zual i philh ni a um kho lo.Ni le thla liam in kum caan liam ko hmanhseh a thar in a zual i a fak chin lengmang. Chinku, Hung Kir T'han Ko Ka Dawt.

                                                    [The end]

Note:Photo hi kanmah lai nungak muidawh a si.[ google photo tar lengmang nakin kanmah laimi photo te hi itar ko seh]. Lungthiang tein hmanhthlak tarnak nawl a ka petu muidawh Diana Par [ Tha Hlei Par ] cungah lunglomhnak tampi ka ngei i ka lenhloi ttial mi a rel tawn mi nan dihlak cungah kaa lawm tuk.