Doral Lian Bang Kan Karah T'henzai An Rel Hnu Cun

( The true love story)

Suisui hi Thantlang peng khuate a si nain Kalay ah hngakchia kum 10 a si in a pu le sinah a um mi a si. A pu le sinin Kalay myo ah tanghra tiang sianginn a kai.

Lianlian hi Tidim peng a si nain Kalay ah a um i sianginn a kai mi a si ve. Suisui le Lianlian cu hmunkhat teah sianginn kaitti an si i ai kom ngai mi an si.Hawikom sinak in an ikom ko nain nungak tlangval thinlung an van ngeih hnu cu n an karah duhdawtnak an hung ngei veve cang.

Lianlian nih Suisui hlei in thimmi dang a ngei lo i Suisui zong nih Lianlian hleiin thimmi dang a ngei ve lo.An pahnih tein misir an iven caan a sau ngai cang.Sianginn khan chungah siseh, lenglei khuachungah siseh Lianlian nih Suisui a lennak le a zitmuainak caan a hung sau ruangmang.

Cuticun an iduhdawtnak cu furpi tilain bang a hung lian chin lengmang i a caan ah thlichia bantukin a hung hrang tawn caah khat lei chungkhar veve nih an hngalh cang hna. Suisui a pu le nih Lianlian cu miphun dang Tidim a si caah le anmah chung he ai remlo mi an si caah Suisui caah an duh naisai lo.Khenkham hram an thok cang.

Lianlian a nulepa a chung le zong nih Suisui cu an duh naisai ve lo.Khenkham hram an thok ve cang.

Suisui a pu le hi Kalay myo ahcun a rum ngai mi an si i anmah cang ahcun ai uah ngai ve mi an si. Lianlian te chung zong hi Kalay myo ahcun a rum ngai ve mi an si ve tikah an iuah ngai ve. Mirum veve mi chungkhar an si tikah an irem lo,an iuah veve.An i ngiar ngaingai mi chungkhar an si.

Lianlian nih Suisui te inn ah leng loin a um kho bak lo.Suisui zong Lianlian loin a um kho bak ve ti lo. Sihmanhsehlaw an karlak ah fak piin an khenkham cang. Lianlian nih Suisui a va len caan Suisui te chung nih rak kan leng hlah tiah an tthawl caan hi a tam ngai cang.

Lianlian a chung le zong nih Suisui kan fapa hi rak kom ti hlah,kan fapa caah kan in duh lo an ti caan zong a tam tuk ve cang. Nikhat hnu nikhat in an khenkhamnak hna a zual chin lengmang.An karah itonnak caan a har chin lengmang. An karah duhdawtnak a fak chin lengmang tiah an pahnih in an um khawh veve lo caan hi a tam ko cang.

Itong kho lo dingin a lamkip in khenkhamnak an tuah hna. Boarding school ah a um lio mi Suisui kha a chung le nih a sawng ah um ti lo ding in inn ah an lawiter. A sawng i um ahcun Lianlian he an itong lengmang an ti caah cuti an lawiternak cu a si. Suisui cu inn chungah Lianlian zuun ngai in ihkhun cungah a hram lengmang i Lianlian zong Suisui um tilo hnu cun ca zong a ruat kho ti lo. A cawn mi ca nakin a dawtmi Suisui lawng te a ruat i a mitthlam ah a cuang zungzal.

Zan khat cu Lianlian Suisui ngai in a um kho ti lo.Suisui dah tilo thildang zeihmanh a ruat kho ti lo. Zanlai ah a tho i boarding school ai kulh mi kha a bauh i lengah a chuak. Zantlai zanttim ah Suisui leng dingin a va kal. Suisui a chung le nih an ka theih sual lai ti a phang i a thli tein vampang in a kai i Suisui ihnak khan chung ah a thli tein a va lut. Cuticun zaithlai hnuah an aw hmanh chuah ngam loin duhdawtnak bia an phaitti tawn.

Suisui te inn hi dot hnih a si i dot hnih cung bak in Suisui ihnak khan chungah vampang in a kai i thlalangawng in a vung luh tawn hi a si.

Zandang bang zan khat cu Lianlian Suisui leng dingin zanttim ah a kal tthan cang.Vampang cun hehchek law tiah a kai i Suisui ihnak khan cu a van phan i a lut. Suisui cu a rak ihngilh tuk cang. Suisui tiah Lianlian nih a auh lengmang nain a thei ti lo. Lianlian nih Suisui kut le taksa cu a van tongh. Suisui a chung lei in a mang a rak chiat liote a si ngelcel ai. Ruahlopi in Suisui cu a aw a hung thang sual.An pa hnih in an aw a hung thang sual tikah Suisui a pu le nih an theih hna i ihnak khan in an van chuahhnawh colh hna. Lianlian a rak si ko tiah Suisui a chung le kha an thin a hang tuk,a lin tuk hringhran. Zeibantuk minung ko ah dah na kan rel i hiti innchung ah na kan luhhnawh police sinah report na duh maw ti a si ko cang.

Lianlian nih ka ngaithiam hram ah ka pi ka pu tiah a nawl len hna. A donghnak ah Lianlian pa an chawh i a pa nih a hung lak i Lianlian cu ai ttin pi.

Cuticun zeitluk khenkham zongah an karak tthennak a um kho hlei lo. An iduhdawtnak tu a zualter chin lengmang. A hnu ahcun Lianlian zong sianginn kai ai phuak ve cang i a pa le nih rian an ttuan ter.

Nikhat hnu nikhat in doral lian bang an karah tthentu hrang ko hna hmanhseh Suisui le Lianlian karah hohmanh tthentu um kho loin Lianlian le Suisui cu an zam. An chung le nih tthen dingin an kawl lengmang hna nain an hmu kho hna lo. A hnu ahcun Lianlian te inn ah an pahnih tein an ttin i an um. Lianlian a chung le nih a chawnh zong an chawn zuam hna lo. Suisui kha an rem hrimhrim lo.

Lianlian cu a pa nih hmundang khuadang ah a riak in rian a ttuanter i inn lei rak tlun caan zong a pe duh lo. Suisui cu an duhlo tuk,an remlo tuk buin tein Lianlian te inn ah toidor tein ai benh peng ko. Suisui zong inn i um sawhsawh cu ttha lo tiah dawr a ngak ve. Thla khat ks-50000 tein mi dawr ngah ai hlawh ve. Suisui nih lakkhah a lak hlan ah Lianlian pa nih a rak lakpiak dih lengmang tawn.

Suisui cu phaisa hman awk zong a ngei tawn lo. Rianttuan i zanlei a rak ttin tawn ahhin a chung le nih rawl an rak ei tak tawn i rawl le meh hang vialte an rak ei dih tawn. Suisui nih rawlttam in thlanghrawl bel a va zoh tikah zeihmanh ei ding a um tawn lo i buhri le rawlttam tuar in zan a it caan a tam tuk cang.

Suisui,zan khuatlai ihmeremthiam loin khua zaza a ruah caan a sau ruangmang. Ihkhun cungah a dawtmi Lianlian zuun ngai le thinlung fak in zamttim le khuamang ah a mitthli a luang zungzal. Lianlian cu thla hnih ah voikhat te lawng hna khua ah a rak tlung tawn i a chung le nih Suisui an tuahto ning a theih tikah a thinlung a fak tuk ve zungzal. Suisui cu sa thawthaw le buh thawthaw an ei caan zongah an sinah an eiter bal lo. Amah dang tein tappi kam teah khin tikulut le mama (cencerh) te he lawng hna rawl an eiter tawn.

Cutincun Suisui cu Lianlian chung le nih an tuahto ning a fak tuk tikah Suisui zong a tuar kho ve ti lo.Hitihincun a si kho bal ti lai lo tiin a lung a dong tuk ve cang.Nikhat cu Lianlian a rianttuannak hmun in a hung tlung i Lianlian nih Suitthi a cawk piak. Suitthi a cawk piak mi cu Lianlian umlokar ah a chung le nih chuh an timh i Suisui nih a duh naisai ve lo. Hi cu nanmah cawk mi si ttung lo,Lianlian nih a dawtnak in a ka cawk piak mi si kan pe kho hna lo a ti ve hna.

Cutisiah cun a rannak in kan inmak,va ttin,chuak kan innchung ah minute pakhat zong um ti hlah tiah Suisui cu an tthawl.

Suisui a thinlung a kuai a man dih cikcek. Nan fapa nihhin a ka duh ve ruangah dahkaw nan sinum ka huam lo nain kai hnek mi a si ko.Ka huam khe loh,ka chuak tuk lai tiah a ttap bu bak in a pu le cu rak ka la uh tiah phone a chawnh hna i a pu le nih saikel in an rak lak i inn ah an ttin pi.

A pu le nih hika Kalay myo i na um ahcun si kho ti lai lo, Laitlang leiah na tlung lai an ti i laitlang ah tlung dinginn Suisui cu ai tim. Suisui nih bus ticket a lak dih cang i Kalay in Hakha leiah a tlung ding mi bus in thawh ai tim cang.

Mawttaw cungah an thil an senh pah zuahmah, Suisui zong a thil lian deuh mi bus chung ah a senh len ve cang. Suisui laitlang ah tlun ai tim timi kha Lianlian kawi pa nih Lianlian cu zan ah khan a hei chimh i Lianlian cu zanhlan bak in a hung choi ve. Lianlian zinglei ah Kalay myo an inn a phak bakin a thil hmanh thleng ta loin Bus stand leiah ahcun a thli colh tthan.

Mawttaw mawngtu (driver) pa nih mawttaw pi cu a start cang.Mi vialte an thil an senh dih cang i mi zeimawzat rem tein an tthu cang hna. Suisui cu a dawtmi Lianlian zuun ngai in uai nawn tein mawttaw kam ah a dir rih ko.

Cu lioah cun Lianlian a hung phan. Lianlian nih Suisui cu a van zuanhnawh i "Dawt, na kal kho lo,na ka tluntak kho lo" tiah a mitthli he a van kuh chih. Suisui nih "U lian,ka tlun a herh cang,a si kho ti lo ka tlung ko lai" tiah mitthli he a van el chih len ven.

Suisui, ziah na ka daw lo maw? keimah lawng cun zeitindah ka um khawh lai..Dawt, ka tluntak hlah mu tiah Lianlian mitthli hna duhsah tein vawlei ah an thla thluahmah. Suisui ilet awk a ttha ti lo. U lian,kan dawt tuk ko ee..Nangmah kan dawttuk ruangah pei kha cancan ka tuar kha..U lian atu cu zeitiawkttha ti lo ee, dam tein um khawh tu rak izuam law Pathian nih a rem tiah cun ka van ra tthan te lai mu..U Lian ka kal cang lai..Tiin Suisui isum kho loin ik thluahmah in a ttap lengmang.

Mawttaw nih"pit,pit,pit" tiah voi tam a auh cang hna. Mi vialte nih khuaruahhar in an zoh dih hna. Minung an lut dih cang i Suisui lawng an hngak mi a si cang,duhsak tein mawttaw cu a hung awn i a mawngtu pa nih duhsah tein a kalter cang. Suisui le Lianlian an ikup,an ittah nak ai tthen kho ti lo..Mawttaw a kal cang khih tiah zapi nih an van auh hnawh cang. Suisui isum thiam loin a zaw ka nu ka celh lo hringhran tiin a bag ai bei mi cu vawlei ah a hlonh i maw U Lian tiin thang piin a ttap thluahmah. Suisui vawlei ah ai bual i maw ka nu tiin a ttap thluahmah.

Suisui a pu nih a zoh kho ti lo, a pu nih a van sik,a hro chih len i an duh lo na bu tein an itleih mi ban cu a thlahter hna.

Aw...Minung ai dub le ai daw i sialo buin ai ttah cuahmah ko mi a ho nih khin dah a tthen hna ee..Zeinih khindah a tthen hna. kan sian lo ka dawt ti cuahmah ko natein a ban in a duh lo le a tuar kho lo bu tein Suisui cu a hnuh i mawttaw chungah a ben chih. Mawttaw thlalang chung khin Suisui nih mitthli he U lian byebye a van ti i Hakha leiah a dawtmi Lianlian cu a liamtak riangmang ko ee.

Lampi thluangthluan Suisui cu a ttahnak mitthli a hul kho lo. Tidin le rawl ei zong zuam loin Suisui cu Hakha khuapi a phan. Suisui laitlang a liam hnu Lianlian zong amah lawng a celh ve ti lo.Nikhat te hmanh Suisui loin um ding a ruah ah Lianlian ttah le hram lawng a rian ve.

Lianlian nih a hnu deuh mawttaw in Suisui cu a van dawi i Suisui ruahlo piin Hakha bus stand ah Lianlian cu a hmuh tthan ko. Hakha a phak cang caah tiawk a ttha ti lo i Suisui le Lianlian cu an pahnih tein Suisui u le inn ah an itthum. Hakha ah nihnih an cam hnuah semnak lungrawn khua leiah an tlung tthan.

Suisui chuahsemnak lungrawn khua ah thlakhat hrawng an um tti. Lianlian te chung nih Suisui an hrem ning le an tuahto ning kha Suisui a chung le pawl an lung a fak tuk an celh lo. Fapa le nupi a si ko mi annih vial cabuai cungah buh le sa he rawl ei ko nain nang vial a dang tein tappi kam teah ngapih rawh te he lawng rawl an in eiter hrimhrim hi kan celh bak lo an ti i sunghno a nu zong a mitthli a luang.

Suisui le Lianlian ico ding,hmunkhat ah umtti peng kha a rem an ti hrim ti lo caah A nu le pa nih Lianlian cu Kalay leiah an tlunter ve. Suisui a pu ( A nu tta) nih Lianlian kha Kalay myo ah thakbare kan zuar lai tiah ai kalpi i Kalay an phak cun Suisui pu nih a thli tein a van kirtak tthan.

Cuticun Suisui le Lianlian cu an karah doral lian nih tthenzai an rel hnu cun zuuntuar veve in an hram zungzal ko. Suisui cu thla tlawmpal hnu ah Malaysia ah a kal i Lianlian cu India leiah sianginn kai ah a kal ve.

An karah pehtleihnak a um ti lo. By Tumtling