Kan Khua Tlang Na Liam Ni Cu ( Part-1)

Zanlei ninem te nih semnak lungrawn khua dawh cu a hun liamtak riangmang ko cang. Auh i tlaih duh len zongah zingnu lairel le remruat ngai hi auh i tlaih awh a ttha fawn lo. Zanlei ninu a hun liam hnu hawidang chungkhar hna cu zanriah an dum tti cio cang hna. Kannih chung bel ka nulepa tiva ah an kal i an tlung bal rih lo. Tang 9 ka kai kum i kharpi ( T'hal caan) lio caan te a si.

Ka nulepa cu an tlung deng cang hnga maw aw tiah hngahhlang ngai in ka nau le nih kan innthlang bo in " fikfik" an tumh len hna. A langpar nawn khin ka pa nih "fikfik" ka nua le cu a van tumh ve hna i cuticun innthlang bo le a langin an tlunpah cun ka nulepa ka nau le cu an i vioh len.

Cu ni cu kanmah khrihfabu a si mi khuadang khua ( A khua min ka chim lai lo) nih kan khua ah gospel in an rak kan tlawn ni, niruk ni khua an phak ni bak a si. Kan inn ah ai dawh taktak mi nungak no tete pahnih bak an hun chiah hna i zanlei sang ah khan an phan cang i kan inn chungah cun kan tthu ko. Pakhat kha cu kan chungkhat sahlawh deuh a si i pakhat nu Thaku timi hi ai dawh taktak mi a si.

A mit-au, mi chawnhbiak le a muisam ka zoh tikah ka uar ci/ka duh ci rumro a rak si ziar ai. Nungak Thaku le Kiki nihcun na nulepa cu an phang deng cang hnga maw ? ti a si lengmang ve. An phak zan niruk zan kha pumh zan a si i hlacawn chung hna an rak duh ve. Rawlttam pah buin pumh le rawlei ta loin pumh cu an siarem ve rua lo. Keimah lawng nih rak eipi chung hna ning ti tikah meh kan ngei fawn lo i ka ngamh ve lo.

Zan khua a hung mui ngai cang hnu ahkhin ka nulepa tiva kal mi cu khua an hung phan. Thaku nih " ka nu ka pa tu maw na tlun tiah" leklak an thil a cawih colh hna. A cutluk nu fel cu ka ti. Ka nulepa zong nihcun "aw! nan phan cang ti, kan inn ah nan rak tlung i kan ilawm tuk ne ai" tiah Thaku le Kiki cu an kut an vun tlaih colh ve hna.

Kiki nih leklak Ngabawm cu a chuah le kheng chung ah Nga cu a bungh hna. Cangai bawm zong Thaku nih a vun chuah le Bartan chungah a vun bunh ve hna. Cangai kha lian tuk kaw bawm chungah ai tap i a bung kho ti lo. Pakhat pakhat nih cu Cangai cu kan chuah/kan bungh lengmang i sau ngai te kan rau cang. A dongh marawt ah ka pa nih a bungh/chuah khawh ceo a si.

Ngasa le Cangai cu tolk khutmat in Bartan cun kan hun chuan hna. Cu tlawmpal ahcun aw nitlak lei in Faruahthawh/ ttotho/ thlitu le ruahpi a vuak bak in ai vua colh ko. Zanlei te khan khuadawm a nak tuk cang i khuari a tur lengmang cang. Thlitu nihcun kan inn cu a hninh thluahmah ko, ruah le rial kan inn chung khat in an hung tla, thlitu nih kan inn vpang bauh a timh hoi. Kan inn di thlitu nih hawh a timh cang. Appril thla facang tuk khawhka te faruahthawh / ttotho timi thli le ruah cu si kaw a fak ngaingai ko.

Kan khual nungak pahnih Kiki le Thaku mit-au le umtuning ka zoh ah an lungrethei ngai ti a fiang. Kiki kha cu kan chungkhat/ sahlawh si ko i poi tuk lo, Thaku mithmai bak ka khap lo ngai. Far fangkhat te kan ngeih mi kai pom i tappi kam ah kan tthu ko. Thaku cu khoika set ah ka tthu ti awk thei lem lo khin ttuanglai tbt deng ah khin a tthu ve. A caan ah ka pa he kan inn zeitintal um maw? midang inn hna a him maw? tiah tungvang pang kan hriat pah i awngkaa kan bih pah tawn.

Thli le ruah/ rial a hung daih deuh in cabuai ah rawl cu kan hun tuah i kan ei hna. Thaku cu tlawmte lawng a ei, voikhat ai suah mi te khi kai za a ti i ai bang diam ko. Kan ei khim bak kheng zong fimtawl ta loin Kiki le Thaku he cun kan itim kan itim i Biakinn lei ahcun pumh ah kan kal. Khuami cheukhat inn cu thlitu nih a rak rawk mi inn a rak um len. Camphio cungcih a hawk piak mi hna inn hnihthum cu a um.

Biakinn cu kan phan i mi an rak khat pah cang, kan tlai ngai ko nain a tlai tuk le a tlai cem cu kan si lo. An khua in minung 50 hrawng nu he pa he, hngakchia he mino he, u pa le pastor he tiin an rat caah khuapi tein kan pumh pi hna i pumh cu a nuam ngai.

Pumh kan van ttin dih hnu in kan inn leiah Kiki le Thaku ticun kan ttin ve. Khual poah kha hmunkhat ah kan church chairman men inn a riak ding an si caah an thil herh mi tete le zan ih-phah puanvorh tete kha kan iput pah in an riahnak ding inn lei ahcun kan kal hna. Lam a cet pah caah duhsak tein kan kal i Thaku cu biaruah hram ka hun thok pah cang. Mah inn tlung nungak rumro helh cu ai dawh hnga maw? Tuni, tuzan bak cu pei kan iton ko cu atu rumro in kan duh kan dawttuk ti colh cu ai dawh hnga maw..? ti ka ruat colh ve. A sinain tlang dang veve kan si pinah saupi a caam ding an si lo caah hin rianrang deuh in thil ti hau ko timi ruahnak nih a van ka tei caan a tam.

T'hal caan ruahpi a van sur khawh hnu van zoh ah a thiang hirhiar. Khuadawm a pelte zong a um sual ti lo, cung Arfi hna tthepdildel tete in an ceu i zan Thlapa te zong piang ngai a hung ceu ve.

Zanlai khuasik ah ai dawh mi Thaku rimhmui hnim in a pawng teah ka kal ve lengmang. A caan a sau deuhdeuh zanhmui rim bang ai rimtak a chuak chin lengmang mi Thaku cu zoh le ngiat ka cim kho hrim lo.

Note: Pehtthan ding.

Andrew Tum Tling