Online Mitthli ( Part-1)

By; Andrew Tum Tling

Voikhat cu zanlei sang nawn ah a si.Ka facebook massager ah cakuat a rak lut.Zei huaha ah ka rel lem lo,mi he chatting hi ka zuam phun a si lem lo caah a si. "Hi" timi te lawng khi a si i ka let lo hrimhrim.Ka theihbal mi hmanh khi hei sisehlaw ka let hlei lai lo.

" Upa lenhloi na ttial mi a ttha tuk,a rel a nuam tuk,rak kan zuam piak peng ko mu,kan ilawm tuk"ti in a va nolh tthan.Kha ti van ti tikah a hodah si hnga tiah a facebook account tha tein ka van zoh. Fidihniang Fidi ti a si."Aw kei zong kai lawm tuk ve" tiah ka hei leh ve ko.( A ka fak le chimthiam ruangah ka chat mi si lo.Hibantkin in a ka kua mi massage amah hlan ah an tampi ko.An vehle a si tiah ka ruah.Minung pakhat kan sinak cio lawng in cakuat ka leh mi a si rih).

Kan bia cu a hung kal vima i ka min,ka khua le ka sining tlawmpal tiang in a van ka hal tikah ttha tein ka hei chimh ko.Keinih tampi bia ka hal lem loh,amah a ka hal mi vial leh lawng kei kaa zaa ko.Citupiin mi hal i ka huam tuk phun zong a si lo caah mu....

Cu zan cu zeitindek si a cakuat cu atu le tu in ka rel lengmang.A fb wall ah ka kal i a pic post mi cu pakhat hnu pakhat in ka zoh i like zong ka pek dih.Nungak pic a si ah pa pic a si like pek hi ka huam phun a si bak lo i ka pe tuk bal hna lo nain cu zan Fidihniang Fidi timi fb wall ah caan sau ngai ka leng.

A thaizing cakuat ra ti hnga maw tiah ka hngak pah len nain cakuat a ra ti lo.Midang sinin cakuat hi tampi ka dong zungzal ko nain "Fidihniang" cakuat tlukin ka lunglut mi an um lo.A thaizing ah cakuat pakhat te a Fidi sin in a ra than."Hello, Upa na dam ttha maw"? ti a si.Midang nih ca kan ka kuat ahhin " hna na hnok,ka chat lengmang hlah"tiah a hmang mi ka si bal nain Fidi cakuat ka hmuh ahcun ka rak ilawm tuk. Fidi cakuat cu ka si khawh tawk ka hei leh i caan sau hmanh kan i chat hlan ah rianttuan ka thok i kan i chat kho ti lo.

Chun nitlak amah bak ka ruat.Rian ka ttuan pah ahhin amah profile pic cu ka hmaika bak ahhin ka mitthli ah a cuang ko.Ziah,zeitindah si,a pic ahhin midawh tuk zong a si ttung lo amah rumro hi ka mitthlam ah ka suai hnga tiah keimah le keimah cu mihrut bang bia kai el lengmang.Ka fb freind nungak hi 3000 tal cu an um lai nain a hohmanh hitihin ka ruah bal i ka suai bal ttung hna lo.Hi thil hi a sawhsawh a si te lai lo,dindorh phun a si lai lo hih tiah ka ruah cang.

Zarhkhat chung kai uah ve,mi va chat luklak le mi sining va hal luklak hi ka zuam lo tiphun in ka um ko nain a ngah ti lo.Fidihniang Fidi facebook wall ah ai dawh mi kanttawkyi park chung bang thadam ngai le nuam ngai in ka len caan a tlawm ti lo.

Khoika um mi dah si hnga?khoizei khua dah si hnga?Kum zeizat dah si hnga?ti hi theih ka duh hringhran.Kai sum kho ti loh, Kei zong nih a kong lam le a sining tlawmpal puanvar deuh cu ka hei hal ve cang tikah ttha tein a ka chimh ve.

Cutincun kai manh caan le ai manh caan ai ton poah ahcun kan i chat lengmang i voice (Aw) zong in kan i kua lengmang.Tlaihchan nak timi cu thinlung chungah khuaiseng bang ai benh cang i thlathum hrawng hnu ahcun Fidihniang Fidi cakuat loin chunni ka tla kho ti lo i zan khua ka dei kho ti lo.Nu le pa hi hmunkhat um tuk ahcun i uar a fawi i iuar hnu ahcun iduh a fawi te an rak timi a hman ko lai.Nain kei le Fidihniang hna cu kan mui zong kan i hmuh bal tung lo i hmunkhat zongah kan umtti bal fawn ttung lo.I uarnak lam a um lo tiah a hung fiang ngai.Sihmanhsehlaw uarnak timi hi khoika indah a rat i khoika ahdah a um ti van chim cio uh law kan chim ning ai dang cio lai dah.

Midang tampi hi Online chung in an i duhdaw,an iuar i a taktak iton tikah lungtling tein chungkhar sermi an tampi.Nain,a taktak ton tikah mualpho mi zong an tampi tthiamtthiam ve.Cu lawng siloh,a nuamhnak men in icapo sawhsawh in a taktak ton caan chuah tikah a huam thai lomi zong tam deuh cu an si ve tthan.

Nain,Fidihniang Fidi he kan i chatnak le bia kan iruahnak ah midang tuanbia le sining zulh le tahchunh in ka um bal lo i ka ruat bal fawn lo.Kai ruah mi cu Fidi hi ka dawt i ka duh a si ahcun kan i tong lai timi cu 100%in kai ruahchih mi a si.

Ni a hung liam i thla a hung liam tikah ka thinlung le nunnak cu Fidi sinah nikhat hnu nikhat in tlampal tete in a kal lengmang i tamtuk a kal cang.I sum kho lo le iuahnak le ningzahnak zong nih a tlaih i a kham khawh ti lomi duhdawtnak kan thinlung nunnak ah tthal caan ramkang bang in a kang cang.Phalh le hmih khawh a si ti lo.

Nikhat cu kai tuar kho ti loh i "kan dawt tuk"tiah ka ti.Kan duh tuk tiah chim ka duh ko nain ka ningzahnak tlampal te a um rih."Kan dawt tuk"ti ah ca ka van kuat i "kan dawt tuk ve"tiah a van ka leh ko.Oh!tiah cikkhat te ka lau.Na ka daw taktak maw tiah voithum tiang bak ka hal i voithum tiang ning tein "kan dawt"a ka ti mi ka ruah ah tlangval ka si ve caah zeibantukin dah a ka dawt hnga tiah ka ruat cang.A lungtak in a ka daw hnga maw ti zong ka ruat chih. Cuni thok cun kan cakuat hmasa ah le a dongnak ah "Dawt"timi biafang nih hmunhma a hung ngei cang.

Anih hi Australia ah a um mi si i kei hi Malaysia ah a um mi kan si tikah kan kar ah fingtlang le rili thuk pipi an tamtuk caah vanlong in kal lo ahcun zeitikhmanh ah ai tong kho ding kan si lo.Minung sinak in hi ai hla tuk mi ramkhat le ramkhat kar ah zumhlonak tete hi a um kho mi a si.Sihmanhsehlaw kei i kai ruahnak ahcun idawt i iduh taktak ko ahcun hmailei kum saupi hnu zong ah kan itong te ko lai timi zumhnak le ruahnak in ka um zungzal. Amah tu kha keimah nih ka zum ziar lo.Cucaah thil tuak ding le a thinlung tete ka hal ve "Dawt, kei hi UN nih USA kal ding in ka au sual hna sehlaw zeitin si lai?Nang le Australia um mi na si fawn"tiah ka hal.

"UN nih USA kal dingin an in auh ahcun ttha tuk ko si,US ah kal ko"tiah a ka leh ko.Kai ruah ning a ka let bak ti lo.Ziah,kei nih zungzal nupi ca ding tiangin ka duhdawt tung.Anih nih hin tah hawikom sawhsawh ding ca lawng ah maw bia a ka ruah i a ka dawt hnga tiah ka ruat colh ve bak.Hal nolh ko rih ning law chim nolh ko rih ning tiah" Dawt, US ah ka kal ahcun nang le kei tonnak ding hi a lam a um ti lo,a har tuk cang"tiah ka nolh tthan.

Abia leh mi ka tuak tikah ka lung a dong ngaingai.Tukum i UN card a ngah ko mi UN nih an hei ka auh tik,US ka va phak tik i kum 5 hnu khi cu ruahchan awk le hngah awk a um bak ti lo.Keimah mi thinlungsau bak ka si ka ti nain khi tik le caan khi cu kan thinlung nih a phan kho hrimhrim ti lo.Ka dawt mi (Boihte) nihhin zungzal ca dingah a ka duh lo ruangah si ko lai tihi ka ruat cang.Sihmanhsehlaw cuhlan kan bia le kan hla ttepkhuai bang ka van khirh tthan tikah a sinah ka caah hmun a um ko tiah ka ruah fawn.

"Ton khawh si ko ee"tiah a ka leh tthan ve."Kan iton hmanh ah US ka phak hnu kum 5 hnu lawng ah ton khawh si ee"tiah ka chinh tthan ve tiah "Kum 5 hnu i ton zong tha ko si"tiah a ka leh hoi.

Fidi nihhin a ka dawt taktak ahcun thil atuah ding mi a um ko.A tuah khawh ding mi thil zong a si fawn ko i a tuah ning lam zong a um fawn ko caah amah le keimah nunchung ai dawh mi chuarkhar sikhawhnak hnga cu thil cu tuah a tim lo maw?A thinlung ah tah cu thil cu a um hnga lo maw? tihi keimah le keimah fak piin biahalnak kai tuah. Hi zawn teah cun Fidi (Boihte) cungah ka ngaihchia ngai.

Keimah nih ka tuah khawh mi thil khi sisehlaw cu atu bak in ka thok hnga i kum voi chungah cun ka sin a phan ko hnga ti lawng ka ruah mi a si. Malaysia in Ralzam dirhmun in Australia um mi caah zeidah ka tuah khawh?Ipheh lo tein zeihmanh ka tuah piak khawh mi a um lo.Ka thinlung dihlak in dawt le a caah thlazacam piak lawng a si ko.

Dinlo tein ai her lengmang suimilam le caan chung ah kum khat tluk kan rau cang.Nifatin cat loin dawtnak cabuai cung ah thinlung rawl kan eitti caan zong a hung sau ruangmang.Kan karah dawtnak a kik bal lo.Dawtnak thli a dai bal lo.A lum i dawtnak thli dinloin a hrang zungzal.Mui lang zong in kan i chawnh lengmang tikah mui le sam tiang in duhdawtnak taksa hiarnak tiang a chuak kho.

*********

Kum 3 hnuah……..

------------------
Cutincun Dawtmi ngai le hlam in ttuan zai ka rel loiah UN nih phone an van ka chawnh.UN zungah van ra,RST phi ding in kan in auh ti a si ko.Kai lawm tuk.Lawmhnak in ka thinlung a khat.Malay bawtor um hrim ka zuam ti loh,thong ka tlak lio i cingdan voihnih bak lungfim lo lak in a ka tu tu pawl kha ramdang ah an rat i ka ton sual hna si ahcun an ha ka phawi dih hna lai.Til le zang hmanh hual loin a kan chuih /beng tu Immigration pawl kha an fa le tal cu ramdang ah ka ton sual hna ahcun ka hmaika ah an vio lai cu tiah Malay um a harnak le a ka simhnak cu kai ceih ngai.

Cuzan ah khua ka ruah tthan mi cu ka dawttuk mi Fidi ( Boihte) kha Australia ah a um mi si ttung.Tulio ram interview cu US lawng te a si fawn.US ram ka ciah si ahcun zeitindah si lai tiah lungrethei ngai in khuaruah hram kai thok tthan. Ka dawtmi umnak Australia ah kal kho ning law ti ka duh tuk.

UNHCR zungah holhlet mi ka u bantuk ah ka ruah mi ka Upa zantlai hnuah ka call.Zeitin tulio ram interview hi US deuh maw an si ko?Aust hi teh zeidahlawh,kei zong an ka auh ve le US cu ka duh lo.Australia ka duh fawn i tiah ka hei hal.

A chim mi cu"Tulio ahcun US deuh lawng te si ko.Nang zong US si te ko lai cuh.Na vanttha tuk aaa,Malay ah sau hmanh na um rih lo,UN card naite pei na ngah ko, an in auh manh,kan lawmhpi tuk.Cun US an in ti sual tikah Ok ti ko mu.US cu ka duh loh Aust lawng ka duh ti hrimhrim hlah tiah ralrin a ka pek ta.

Ka saduhthah cu Aust ah a si ko nain ka takpum cu US ah ka kal ter.US a si ko lai tiah ka zumh ve caah a si.Zungzal lengtting ding in kai thim cang mi Boihte (Fidi) he kan i hlat chinchin lai.Ka ruat kho lo,Boihte he zungzal itthen ding ka ruat bal lo.Kan thinlung a kuai a man.Zantlai hnuah ka dawt fb page ah ka leng.Apic post mi tete pakhat hnu pakhat in ka zoh hna i sianlo mitthli biangno cungah duhsah tein an tolh iahmah. Aw! Dawt na pic te lawng hi maw kei ka cantawk an si ko ne lai.Na pic hmuh vial lawng hi maw na rak ka kamh mi cu an si ne.US ka phak hnu ahcun nang le kei tonnak lam cu a har cang lai kan ti kha thinlung kuai le man cikcek in zantlai/zanttim ah ih merem thiam loin ka ttap ee.

UN nih an ka auhnak kong cu ka dawt cu ka chimh tikah ai lawm tuk ve.US ah an in ti zongah ttha tuk ko ee a ka ti hoi.Australia rat i nangmah he zungzal untti hme ka duh cu tiah ka ngaihchiat par ah ka ti chih cang.Cutikah Fidi tlawngpal te a lung a hung pem.Aw a si maw zeipoah Pathian nih a ttha lei in khua a khan ko lai ee thla kan camtti lai cu a ka ti i tlawmpal cu ka ngaihchiatnak a hung nem deuh mi a lo.Kei zong Australia ka si khawhnak hnga le ka dawtmi Fidi he zungzal umtti mi kan si khawhnak hnga Pathian sinah fak piin thla ka cam tawn.

UN nih an ka auh ni le caan cu a hung tling.UN officer nu nih hmaipanh tein thutdan cung in a rak ka don.Interview cu a van ka tuah i USA na sahlawh chungkhat sn um maw?tiah a ka hal colh ko.Ummm...US ka si cang ti ka fiang i "Um hlah"ka ti colh.Officer nu a lau!! Ziah,nan khuami,theihhngal tak an um lo maw?tiah a ka hal chih rih."Um bak lo ee"tiah ka leh tthan ko.Holhlet pa nih a ka met tuk cang.Holhlet tiang in a thinhung cang."Mihrut"a ka ti ko lai.

Officer nu nih US Ambasy zungah na file kan in kuat piak lai USA ah na kal lai"a ka ti ko.Ka duh lohi ka el."Officer zaangfah tein US cu ka duh lo ee,Australia ah ka tthial piak ko,cuka cun ka chungkhat sahlawh zong tampi an um ee"tiah ka hal.Officer nu a lu ai kheuh,a mitfak in a ka zohchih.US si ko seh muh,tiah nem te le niih bu tein a kan ti tthan.Ka duh tthiamtthiam lo.A donghnak ah Officer nu nih bia al zuam ti loh i "si le va ttin rih law phone kan van ichawnh tthan te lai"a ka ti i inn ah ka ttin.

Fidi (Boihte) cu ca ka kuat a ka let ti lo.Zantlai pi tiang ca ka kuat nain a line a off cang i mitkuh thawng tein ai hngilh tuk cang lai mu.Zeiruangah dah si hnga,nihin kherkher a cakuat pakhat zong ka hmuh lo.Nihin ka ton mi thil ah Fidi ka duhdawtnak ah ralttha tein bia ka chim ngam.Mi tampi nih Online dawtnak a hmun lo sn ti,a taktak si lo an ti,nuam sual le umhar sawhsawh pei si ko cu an ti nain,ziah kei nih Fidi ka duhdawtnak hi a taktak a si ko ttung.Nuamsual le umhar men a si ttung lo.Cuzan cu hngilh kho loin fak tuk in khua ka ruat ee. Part II nak rel than te...