DUH DAWTNAK MITTHLI ( Part-1)

Zanlei ninu a liam lai te Melbourne khuapi ah vunnak vunrang, vunsen ti thleidan um loin park chung ah nuam in an leng hna. Highway zalam pi ah rianttuan mi tete motor in vingving in an tling thluahmah hna. Zanlei ninem ah a dai tuk mi le a nuam tuk mi khuapi chung ah khuazaruat in Thlalangawng kam ah Ahniang cu khua a ruat len ko. Ziah, hitluk a dai mi le a nuam mi khuapi ah Ahniang hi park hna ah a kal ve lo i lente hna a celh ve hnga lo..? Siloah a duh ngai mi Strawberry juice dinnak dawr zongah a tthut hnga lo..? Amah te lawng umhar lileng cun zeiruangahdah cuka te cun a tthut hnga i khua cu a ruah len ko hnga tiah a ho haltu le chawntu hmanh a ngei lomi Ahniang cu zanlei nitlak lai teah khin a dawt mi Lianlian ngai le ruat in thlalangaw kam te ah thu in a mitthli a tla lengmang.

Australia a phakka tein a rak chawn lengmang tu le a rak kom lengmang tu Lianlian nih caanraulo teah lamdang a mertak ko rua. Lianlian thinlung le nunak ah Ahniang dah ti lo zeithil hmanh ai tlum lo in a rak um ve i a dawtmi Ahniang he hmunkhat teah lentti cu a sunglawi in a nuam tuk a rak ti ve hringhran ko. Sihmanhsehlaw minung hi zeithil nihdah kan thinlung a danter i a pialter tiah cun a ruang a phunphun a um ko lai. Lianlian thinlung a pialter tu, Lianlian nih Ahniang sinah zungzal in a bia a rak chiah mi a la tthan tu hi amah Lianlian lila hi a si. 

Kan Khua Tlang Na Liam Ni Cu( Part-2)

 Zan khua thiang tang ah kan khuachuah zalam hrawn in kan kal lengmang. Pumhchuak kaa hrawng te a si caah michoklet an tam pah rih. Caanraulo teah Thaku te an riahnak ding kan bu church chairman te inn cu kan phan. Innchung ahcun kan bu nungak tlangval tlawmpal an rak um ve. Thaku te khua cu an tling, Thaku a iang kho tu le Thaku tluk in muidawh iang ngei an um lo.

Tlawmpal ah kan mino chairman Paling nih pakhat tete in theihternak a van kan tuah i khual lei zong nih theihternak cu an van ituah ve. Caansau hmanh ka tthu rih hme maw? Thaku lawng dahkaw ka mit nih a ngiat ko rih ka tilio ah kan mino chairman pa nih "lawi a za cang, nan raknak lam le sul a chukcho pin a lamhla tuk i nan ceicer tuk lai, tuzan cu kan lawi rih lai i thaizan tu ah saupi in kan in t'hutpi te hna lai" tiah zankhat tthennak bia a van phai len ko cang.

Kan Khua Tlang Na Liam Ni Cu ( Part-1)

Zanlei ninem te nih semnak lungrawn khua dawh cu a hun liamtak riangmang ko cang. Auh i tlaih duh len zongah zingnu lairel le remruat ngai hi auh i tlaih awh a ttha fawn lo. Zanlei ninu a hun liam hnu hawidang chungkhar hna cu zanriah an dum tti cio cang hna. Kannih chung bel ka nulepa tiva ah an kal i an tlung bal rih lo. Tang 9 ka kai kum i kharpi ( T'hal caan) lio caan te a si.

Ka nulepa cu an tlung deng cang hnga maw aw tiah hngahhlang ngai in ka nau le nih kan innthlang bo in " fikfik" an tumh len hna. A langpar nawn khin ka pa nih "fikfik" ka nua le cu a van tumh ve hna i cuticun innthlang bo le a langin an tlunpah cun ka nulepa ka nau le cu an i vioh len.

Cu ni cu kanmah khrihfabu a si mi khuadang khua ( A khua min ka chim lai lo) nih kan khua ah gospel in an rak kan tlawn ni, niruk ni khua an phak ni bak a si. Kan inn ah ai dawh taktak mi nungak no tete pahnih bak an hun chiah hna i zanlei sang ah khan an phan cang i kan inn chungah cun kan tthu ko. Pakhat kha cu kan chungkhat sahlawh deuh a si i pakhat nu Thaku timi hi ai dawh taktak mi a si.

Ka Mitthli

Kuala Lumpur zanlei ninem nawn teah khin ka hawipa Pahre he semping ( KWC) shopping mial ah thil duhherh caw ding in kan kal. Dot thumnak kehlei kam ahkhin kan duhherh zin Bawngbi le shirt angki umnak ahcun kan lut. Mithmai panh tein " Nan duh mi rak zoh uh" rak kan caw ve uh" tiah awka nem tein a van holh mi nungak no te hmurka cu ka hna chungah duhsak tein a hung lut. Mithmai panh/nih bu tein a van kan met mi a mithmai nih ka thinlung pipian thui bang nuam ngai in a ka thui colh. 

Rianrang tukin fiang tein ka van zoh colh ve. A ke in a lu tiang ka ngiat dih. Ai dawh lawlaw, a zeihmanh soisel awk a um lo. Hitluk lainu dawhkhawh cu tiah ka khuaruah lei a ka harter. A zihmui rim lawng si loin ai dawhnak rimrua nih Pahre cu teng ko in a kah nain kei cu tanleih bang a hnuh in a ka hnuh. Aircon kik nih din tein a van chem mi sungku rimthaw cu duhsak tein ka hnarkua chung ah a hung lut.

An dawr chung ahcun thilcaw zokzok lem loin sau ngai kai helhum ter. Cu hnuah thil ka cawk pah in a konglam tlawmpal te ka hal. " Ka min cu Sungku tiin ka au ko a ka ti i a facebook le a ph no.a ka chinm". Cuticun thil cu kan cawk khawh in inn leiah kan ttin.

A Donghnak Bik Ka Dawt Sinah Ka Cakuat

Dawt, na dam lio a si maw? Na dam ttheo lai tiah ka ruat. Kei zong Pathian dawtnak thawng in ka dam lio a si. Dawt, atu na sinah ka rak in kuat mi ca hna hi catlang le biafang a dihlak in na rak ka relpiak nak lai upatnak he zaangfah kan nawl.

Dawt, kei cu zungzal na thinhnemtu si dingah le zungzal lengtti ding cun na caah ka rak tling hrim rua lo. Ka thinlung dihlak le sinak dihlak hi nang na caah cun santlailo an rak si ko rua. 

Hlan i dawtnak bia kan chimh lioah cun kan dawttuk ve ko ka tta na rak ti ttung,zeikar hlan ah na dawtnak nih tibang a ka reu tak cang ee. Na dawtnak tihal in zankhuamawt ah thinlung sivang in zeican tiang hme ka hram rih lai.

"Ka dawt mangtha tuk mu,kan hngilhtak chung lai"tiin na cakuat ka hmuh zawn ahkhan,nai hngilh hnuah kei cu hngilh kho loin caan saupi kan ruat zungzal dahkaw. "Na mangttha" tuah loin zantinte zeitik tiang dah ih merem loin ka um rih lai....

Duh A Tling Lo Dawtmi (Part-5)

Suite cu khuaruahhar le lungrethei in innchung le innleng lawng a hlat lengmang ko. U Thawng hi zeikodah can hnga atu tiang ziah a rak phak bal hnga lo tiin a hngak lengmang. Zansuilam 12:00am a tling cang,Suite cu lungrethei in ai hngilh kho lo. Suite ph a rak ring in " Hello! Suite Pathawng ka si, atu hi Oparasi nih an kan tlaih i lokup ah ka um ko, a thli tein phone ka van in chawnh ka dawt Suite thlacam daithlang hlah, khah police an ra cang hih byebye" ti vial a si ko.

Suite cu mah cu thawngpang a theih cun ihkhun cungah ih lengmang in a ttap thluahmah. U Thawng zeiton hme kan ton hoi.. Nang le kei hi duhdim tein lentti caan a um kho lo ee..Kan kar ahhin ngaihchiatnak le lungretheihnak lawng maw an si tiin Suite cu zantlai zamttim hnuah a mitthli rialti bang a luang thluahmah.

Pathawng cu Lenggeng camp ah a dawtmi Suite ngai in ni le thla a rel cang. UNHCR nih rak lak/chuah ding kha an hngak. Rawl peikuar khat te he ihphah le puanvorh a um lonak innchung khuasik lakah lungrethei in ai kual zungzal. Lenggeng camp hi tlangbo cungah an sak mi a si caah khuacaan a kik ngaingai. Cuka khuasik lakah cun Police pawl hrocernak he nifatin thonginn chungah a caan hmannak a sau ruangmang.

Duh A Tling Lo Dawtmi ( Part-4)

Rili kam panchian (pangpang dum) chungah Suite cu lungleng ngai in a um i hlan i Pathawng he an rak tthut-tti tawnnak sianginn kam park chung te kha ngai in a mah te lawng lileng in a thu ko.

Tlawmpal ah chuncaw ei caan a hung phan i chuncaw a ei khawh in Bumbai khuapi lei panh in Suite cu ai thawh than cang.Suimilam Pathum chung hrawng mawttaw lam pi ah an tlik hnu in Suite cu Bumbai khuapi an sianginn cu a van phan.Innka cawng security nih innkaa cu a van hun piak i a hawi le india,naga,minupur miphun he hna a van in chawn.

Duh A Tling Lo Dawtmi [Part-3]

Ruahpi siamsiam tein a sur,thinghnak cung in vawlei ah ruahti dor an tla pa ziahmah.Culak ah Suite cu lungretheih tuar in thingkung hram teah a dirnak caan a sau pah cang.Tiva sum lei hrawn in Suite cu chuk lei ah a kal.

Zanlei khua a hung tlai,tiva kuang ni a hung hliap pa ziahmah,Suite tiva kuang hrawn ah lileng le ngaihchia in amah te lawng a per choi lengmang ko.Tlawmpal ah zan khuamui nih tiva kuang le tuupi hmawng cu a van khuh cang.Ramsa phuntling an vahveihnak le an rawlkawlnak hmun cio in riahbuk leiah an tlung pah cang hna.Va te phungtling zong an riahbuk panh pah in zaihla dawh sak pah he rianruun cu van hlam ve cang hna.

Duh A Tling Lo Dawtmi [Part-2]

Suite cu sianginn luhnak caah tangka Rm-20000 a pek khawg lo ruangah zanlei ninem te sinah lungkuai ngaihchia in a mitthli he a ttap lengmang.A thinlung a fak tuk,a ngaihchia tuk hringhran.

A dawtmi tta caan Pathawng zong curuang ah a lungre a thei tuk hringhran.Pathawng nih a u le US um mi phone a chonh hna zong ah "a ziah,nai ahcun pei tangka cu kan in kuat cang,tangka hman na tthawng tuk,iralring hiti na si ahcun kan i zohkhenh kho lai lo ,kan in kua kho lai lo,hmaithla thla nolh ah kan in kuat te lai"an ti i a u le nih ceiko in an van mawhchiat ai.

Duh A Tling Lo Dawtmi [ Part-1]

Zanlei ni a hung nem chialmal cun Suite cu voidang bang an sianginn kainak sianginn erea chung park (pangpar dum) chungah cazoh ding in a kal tthan cang.

Lungthin nuam tein a ca a zoh dih in tlawmpal fak ngai in khua a ruah lioah tlangval pakhat Pathawng a pawng teah a rak ra."Suite,zaangfahnak tein na pawng teah ka tthu kho hnga maw"? tiah Pathawng nih a van hal."Aw ee, ra hen U Thawng rak tthu ve hih" tiah Suite awka nem tein a van chonh ve.

Hung Kir T'han Ko Ka Dawt (Part-2)

Tasik Tlanglong station ahcun ka pawng teah a hung dir.A sam thlak le a tungtai ka zoh ah ai dawh lawlaw,soisel awk um lo bak khi a si.A kik ngai mi aircon toiah a zihmui hrim cu Serthlum rim thaw te bang ka hnar chung ah duhsak tein a hung lut i ka chungthin tiang a hung phan.

Mittthep lo tein ka zoh lengmang i amah zawng nih a van ka zoh pah lengmang ve.Kan mit ai ton caan ah khin umtuzia thiam loin ka thinlung cu a ttang nem cung ai tuai lengmang.

Ka chawnbia hnga maw tiah ka ruat,amah zong nih ka chawn hnga maw tiah iruat ve len sehlaw ka lawh ter ve.Cutincun rilli cung hnakchawl vuan bang kan thinlung le mit lawng nih duhdawtnak a thui lengmang ko.

Ticket cu kan lak dih in ka kalnak ding platform 2 lei ah step hlei cungah duhsah tein ka zuang.Ka liam hlan lo hnulei kai her lengmang.Cu nu cu ticket a van lak dih in platform 1 lei ah a kal ko ai.Kan lam ai dang cang,a nih khat lei ah kei khat lei kam tiin kan itthen.

Lungtho lo ngain ka hngah mi Tlanglong a hung phan colh.Kai tuar ti loh i Tlanglong chung ka luh lai ah ka kut cung lei ah ka phar i "bye bye" ka hei tuah i "bye bye" a van ka tuah ve ko.Ziah,kan thinlung cu itheithiam rih hmanh hlah sehlaw kan kut cu ai theithiam tuk ko hi ta tiah kai ceih colh.

Hung Kir T'han Ko Ka Dawt (Part-1)

Ka rianttuannak hmun in KL khuapi cu zanlei tlai hnuah hnawhhnam nawn in kan van panh.KL ka kai lonak thla khat a tling i ka rianttuannak khuate ah nifatin rian ah ka caan ka hman.

Keimah tawk in fresh ngai le smart ngai in kai ttamh i taxi Rm-12 in ka hawipa he kan van haiher top.Taxi in tlawmpal kan kal hnuah Train ( Tlanglong) station (Dinhhnun)cu kan phan i kan itinhnak hmun lei phak ding in train ticket cu kan phiat.

Sumilam 1:00 renglo hrawng Tlanglong in kan kawl hnuah Tasik Selatan Tlanglong dinhhmun pi cu kan van phan.Siaherh in plastic thilri kai put mi cu a tam ngai.

Ni Bang Kan Semnak Ai Khat Lo (part-2)

Khua lei ka chung le he saupi kan i el lengmang. Ka chung le nih biaknak dang a si ruangah a duh in an duh hrimhrim lo. A donghnak ahcun nanmah nupi si lai cuh,keimah nupi pei si ko lai cu,ka thu ka nawl si ko nanmah nih nan cawm lai loh,keimah nih ka cawm ding mi si ko ka ti ve hna.

Malaysia dirhmun le sining ahhin anmah miphun pawl he ikomh hi ralrin ngai hau tiah ka thinlung tein ka ruat tawn. Kei zong kai ralring peng,lungfim tein a sinah bia ka chim zungzal. Biaknak kong hrimhrim hi ka chim bal lo.Amah zong nih a chim bal lo.

Ni Bang Kan Semnak Ai Khat Lo (part-1)

Malaysia ka phanhka ni 20 hrawng ka um ah kan rianttuannak facetory chungah oparasy nih an kan luhhnawh i thong thla 11 chung ka thla. Thong chungah Malay holh kai chap lo,kawl holh le mirang holh tu kai chap deuh.Thong ka chuah hnuin kan facetory (sehzung) ahcun kan lut tthan hna.

Nikhat cu thlanti he zaangbang takin ttuanzai kan rel lioah Malay miphun nu pahnih le pa pali an rak lut ve.Kan ttuan cuahmah lioah cun nu pahnih cu ttuannak hmun cu an rak zoh.Tlangval pawl nihcun an i dawh pah hnga maw tiah kan mitsir te cun kan ngiat len hna. Um,an i dawh ngai ko hi mu! an puan lukhuh belte a um le heitiphun khin kan i ceih sup.

Ka Dairy: November 5, 2012

Zingnu kutchuak zinglei ninu ceudawh te nih Kuala Lumpur cu nidang bang a van poh tthan cang. Micheu zalam cungah nuam in an lengtti hna. Micheu an dawtmi he nuam tein duhbia an phai tti hna. Anmah le siarem ning cio in an um an kal,an ttuan,an tlong an lengtti hna.

Sihmanhsehlaw kei ka caah cun cu ni cu muihnak nih a kuh ni a si. Kayang thongin chungah thinphang thintur in ka rak um i ka tuar lio caan a si.

Zingka tein ka thong body number cu a van auh i zapi hmai ah ka chuah. Ka kut ah cincik in an ka kih hnuah chak leiah an kan kai pi.Laimi minung 11 kan si. Kan dihlak te cun artlang tein kan kal i kan hnu kan hmai in police nih thingtan iput in an kan ven.

Ka Nunnak Hi Nangmah Ca'h

David le Stella hi an khua tein ai duh mi le ai daw mi an si. Nungak tlangval an sikaa tein ai duh mi an si.Duhdawt hmasa bik veve mi an si. Phundang in kan chim ahcun "First love"Nge-chit-Oo bak an si.David zong nih Stella hi a duh hmasa bik mi a si i Stella zong nih David hi a duh hmasa bik mi a si ve.

David te chungkhar hi misifak santlailo te an si i Stella te chungkhar hi mirum mitthawg an si. Stella cu khuapi ah sianginn a kai tawn i David tu cu sianginn kai kho ti loin nichiar tein lo a thlo tawn.A caan ahcun Mizoram leiah Vok le Caw tibantuk hna a zuar i cutitecun ai cawm mi chungkhar an si.

Mitthli Sinah Dawtnak Tizu

( The true story)

Kan ram har le uknak cozah tthatlo ruangah Nubiak cu 2011 ah khan Malaysia a rak phan. Nubiak hi mifel te le Pathian a ttihzah tuk mi a si i a muisam zong ai dawh ngai.

Atu chan cu nan theih cio bang innchung tappi tlangah nungak tlaval ikawl chan cu si ti hlah kaw Nubiak le Justin hi facebook in an ihmu hmasa.Facebook in hawikom sinak in an ichat,an in chawn lengmang ko i a hnuah muihmuh in an itong.An mui an ihmuh i an iton tikah an i duh colh veve.

Doral Lian Bang Kan Karah T'henzai An Rel Hnu Cun

( The true love story)

Suisui hi Thantlang peng khuate a si nain Kalay ah hngakchia kum 10 a si in a pu le sinah a um mi a si. A pu le sinin Kalay myo ah tanghra tiang sianginn a kai.

Lianlian hi Tidim peng a si nain Kalay ah a um i sianginn a kai mi a si ve. Suisui le Lianlian cu hmunkhat teah sianginn kaitti an si i ai kom ngai mi an si.Hawikom sinak in an ikom ko nain nungak tlangval thinlung an van ngeih hnu cu n an karah duhdawtnak an hung ngei veve cang.

Zuun T'hing A Caam Lai Lungrawn Ah (Dal-2nk)

Zanlei ni hung nem chialmal cun Sungsung he kan lungrawn khua lei ah kan tlung.Ka thinlung le nunnak ah Sungsung dah tilo thildang zeihmanh ai tlum ti lo.Chun nitlak ti awk in an inn le a lo rumro ah khua ka sa i ka khih-ngerh tawn.

Voi tamtuk hi Sungsung sinah "duhdawtnak"bia ka phuan cang nain Sungsung nih bia ttha in a ka leh mi kaa khat te hmanh a um bal lo.

Ih-khun cung i zantlai hnu ah khua ka ruah tawn ahcun ka lung i a dong tawn ko.Sinain zinglei niceu a hung chuah i ni a hung linh phualmal cun Sungsung te inn ttheo ah ka kal.Sungsung hi ka ruat bak ti lai lo i ka leng bak ti lai lo tiah keimah le keimah biakamnak ka tuah zong a tam tuk cang.A sinain,duhnak taktak hi cu takpum in control khawh a rak si rua lo.

Zuun T'hing A Caam Lai Lungrawn Ah (Dal-1nk)

Semnak lungrawn khuate nih tthal khuapau hung chuah cun panh chialmal tein ai hlau tawn.Khuasik thla a hung dihka tthal caan march thla a hung det kaa hrawng semnak lungrawn khuate ah kei bang lileng le zuun ngai in a hram mi val an rak um cio hnga maw.?

Zinglei niceu dawh te cu Ngunlo lu tlang khin a hung kai ziahmah,zingnu kut chuak cerhlian ninu ceu dawh te nih duhsak tein semnak lungrawn khuate cu "Good morning" tiin a van ti.Semnak khuate zong ni ceu dawh te lawm in zaihla a sa.

Zinglei thaithawh ei hlan a chungah a leng mi hna cheu khat manh lo ngai in rawl an chuamchuang.Tlaidep sang ah a um mi tlangval pawl cheukhat nitlang to ding in Lal Ruat pa inn hmai ah ngal rual run bang a phuphu in an hung choi.Cheukhat nih ngapih hmui cur in an kio mi rim cu hnarkua chung ah duhsak tein a hung lut,mi cheu vok rawl pe ding in "kur kur,kiir kiir" tiin a au khuang mi an tam,kawmtang le chiarchak lei in vokpi rawlttam tuar in a hung ngek len cang, nu le pa nih rawlei ding ah auh-khuan mi pa hngakchia inn an hlam pah cang hna. A thaw maw thaw lo ti zong tuak lemlo in zinglei thaithawh ei cu kan i lim cio hna.

Zuun Tthing

By; Andrew Tum Tling

Palian hi Thantlang ah khuasa in a um mi a si i Mawite hi khuate leiah a um mi a si. Mawite le Palian cu Thangtlang sianginn kainak ah an ihmu an itong i ai duh ai daw mi an si. Palian le Mawite karah duhdawtnak nih faktuk in hmunhma a co tikah an ium an itthi.

Tanghra sianginn an kai lio veve a si caah an kumkhua a hngakchia ngai rih. Sihmanhsehlaw ramri a ngei lomi duhdawtnak nih hmunkhat teah chungkhar a serter hna. Palian a nulepa a chung le nih Palian cu nupi tthit an senh rih lo i curuangah a nulepa nih tthen an timh peng hna. Mawite zong a nulepa a chung le nih pasal ngeih an senh ve rih lo caah tthen an timh ve hna.

VA KAL KO LAW KEI KA CA'H ZONG,HOILO PAR KHA RAK KHIAT VE MU

By; Andrew Tum Tling

(The true story)

June 27,2015 zan suilam 10:00pm hrawng ah a si.Sungsung cellphone cu a hung ring.Hello! Sungsung si maw? Aw c ko,zeitin a herh mi um maw?"Tuzan lei suimilam 6:00pm ah khan Ceuceu nih mual a kan liam tak ee" ti a si ko.

Hnga?Zeitin e? "Tuzan lei suimilam 6:00 ah khan Ceuceu nih hi vawlei nunnak in a kan dinh tak cang"ti a si ko.Sungsung nih a zum kho lo.Zeitin,si kho lomi bia hi chim hlah tiah Sungsung nih a zum kho hrimhrim lo.Sungsung aw kan hleng lo ee,Ceuceu cu ai din cang ee,tiah biatak a hun theih tikah cun Sungsung umthuzia thiam a thiam lo.

Online Mitthli (Part-3)

By; Andrew Tum Tling

Ka dawtmi Fidihniang Fidi nih ka ban pahnih in a ka hruai i kan inn lei ahcun kan ttin. Inn kan phak in mawttaw accident kan tonnak kai hliam mi kha a dam rih lo caah ih-khun cungah an ka ihter colh. Fidi le a hawipa cu suimilam pakhat chung hrawng an tthu i an in lam east melbourne a hla deuh caah an tlung colh ve.

Ih-khun cungah ka dawtmi Fidi zuuncuai in ka um i cu zan cu zan khuadei kai hngilh kho lo.Ka mitthlam ah amah lawng te a cuang i ka hnathlam ah amah aw-aan lawng a thang. Fb in ca kuat tawn i a caan te lawng a ka let tawn. Kei damlo kan ti cu a caan ah Parku nih a ka zulh i siizung ahcun ka vai piah ttheu tawn. Australia phakka damlo cu ka ca'h a rak har tuk. Ka u le nih an ka zohkhenh ning a ttha i an ka dawttuk ko nain Fidi he kan umnak ai hlat tuk caah le damlo in khuaruah lawng te a si caah ka thinlung tiang in a zaw dih.

Online Mitthli (Part-2)

By; Andrew Tum Tling

Ka dawtmi Fidihniang Fidi ngai in le ruat in chantling cungah hngilh loin zan khua ka dei. Nitin ttuan zuam lo le din-ei chungpil loin ka hramnak caan a sau cang.Nikhat hnu nikhat Fidi sinin cakuat a tlawm chin lengmang.Ka kuat mi ca leh hmanh hi a caah thilhar ngai a si cang ko rua.Sihmanhsehlaw mifim le mittha a si ve caah lunglawm tein cakuat a ka leh caan zong a tam ngai ve ko.

Cuticun zeitikahdah UN nih an ka auh tthan te lai i ka dawtmi Fidihniang sinah ka phak te lai timi ruahchannak he ka nun lamthluan cu nifa tein ka zul zungzal ko. Thla thum hnu hrawng ah khin UNHCR nihcun a van ka auh tthan i ka va kal tthan.Officer nu nih interview cu a ka tuah tthan.Na file hi Australia Embassy zungah up awk a ttha lo.Zeicatiah cun,na case hi Australia cozah nih a cohlan mi si lo caah Australia ram kal awk na ttha hrimhrim lo.Cucaah cun na duh zong duh lo zongah USA ah na kal a hau ko tiah a ka ti tthan. Minute 2 chung hrawng holh lo bak in khua ka ruat.Ka cal kai domh, a caan ah van ka cau,a caan ah ka lu ka khun,ka dawtmi Boihte he tthennak caan a phan taktak ko cang hi ta ka ti.

Online Mitthli ( Part-1)

By; Andrew Tum Tling

Voikhat cu zanlei sang nawn ah a si.Ka facebook massager ah cakuat a rak lut.Zei huaha ah ka rel lem lo,mi he chatting hi ka zuam phun a si lem lo caah a si. "Hi" timi te lawng khi a si i ka let lo hrimhrim.Ka theihbal mi hmanh khi hei sisehlaw ka let hlei lai lo.

" Upa lenhloi na ttial mi a ttha tuk,a rel a nuam tuk,rak kan zuam piak peng ko mu,kan ilawm tuk"ti in a va nolh tthan.Kha ti van ti tikah a hodah si hnga tiah a facebook account tha tein ka van zoh. Fidihniang Fidi ti a si."Aw kei zong kai lawm tuk ve" tiah ka hei leh ve ko.( A ka fak le chimthiam ruangah ka chat mi si lo.Hibantkin in a ka kua mi massage amah hlan ah an tampi ko.An vehle a si tiah ka ruah.Minung pakhat kan sinak cio lawng in cakuat ka leh mi a si rih).