Zeitindah Zumtu Nih Sualnak Hi Kan Tei Khawh Lai?

Sualnak kan tei khawhnak ding ah Bible nih lam tampi a kan chimh. Vawlei kan nun chung ah sualnak in kan luat taktak kho lai lo (1 Johan 1: 8), asinain sualnak tei hi kan rian taktak a si fawn. Pathian bawmhnak le a bia zulhnak thawngin duhsah tein sualnak cu kan tei khawh lai i Jesuh Khrih muisam in kan tthangcho kho lai.

Sualnak kan tei khawhnak ding ah Thiang Thlarau bawmhnak kan herh. Khrihfa kan nunnak ah teitu kan sinak ding ah cun Pathian nih Thiang Thlarau hi a kan pek. Lamkaltu Paul nih taksa le Thlarau an i ralkahnak a kan chimh (Gala 5: 16-25). Khrihfami cu Thlarau nunnak ngei ding in fialmi kan si. Jesuh Khrih a zummi poah nih cun Thiang Thlarau kan ngeih dih hna, cucaah Thlarau nun hi ngei ding in fial kan si, Thiang Thlarau hruainak hi a zul ding kan si. Taksa in a nungmi cu Bible nih Khrihfa timi ah a chia hna lo (Rom 8).

Thiang Thlarau ngeih le ngeih lo aa dannak cu Peter nunnak ah hin fiang tein theih khawh a si. Thiang Thlarau a ngeih hlan ah khan voithum tiang Jesuh Khrih a hlawt, asinain Pentecost ah Thaing Thlarau a hmuh hnu cun ttihnak a ngei ti lo. Ralttha taktak in a zumhnak a au pi ngam cang. Lamkaltu 3, 4 nih Peter kha zei bantuk minung dah a si cang timi kha hmuh khawh a si.

Bible nih Thiang Thlarau ngeihchiatter hlah u tiah a kan fial bantukin Thiang Thlarau duhning tein kan nun a hau (1 Thesalo 5: 19). Thiang Thlarau nun hi kan ngeih awk a si (Ephesa 5: 18-21). Thiang Thlarau in khah timi hi zeitindah a si? A pakhatnak ah Biakam Hlun kan zoh ahcun a mikip sinah Thiang Thlarau hi pek an rak si lo. Pathian nih a riantuan ding in a thimmi hna lawng kha Thiang Thlarau tthawnnak a pek hna (Genesis 41:38; Exodus 31:3; Numbers 24:2; 1 Samuel 10:10). Biakam Thar ah cun Jesuh Khrih a zummi poah kha Thiang Thlarau pek an si. Asinain Thiang Thlarau nun taktak kan ngeih ding ah cun Pathian bia hi kan duh a hau (Colosa 3: 16; Ephe 5: 18- 21).

Pathian bia, Bible nih a chimmi cu Pathian nih hin thil ttha kip kan tuah khawhnak ding a bia a kan pek a ti (2 Tim 3: 16-17). Zeidah kan zumh awk a si, zeitindah kan nun awk a si, timi kha a kan cawnpiak. A hman lomi lam kan zulh tikah a kan cawnpiak i lam ding kha a kan hmuhsak. Pathian duhnak kha a kan cawnpiak. Lam ding ah kan um khawhnak hnga a kan cawnpiak. Hebrews 4: 12 nih a chimmi cu “Pathian bia cu a nung i a ṭhawng. Kap hnih har vainam nakin a haar deuh. Hlang lak in a cheu khawh, nunnak le thlarau an i tonnak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha a hngalh dih” a ti. Pathian nih zeitluk indah nunnak hi a thlen khawh timi kha Salm 119 zong nih a chim. Pathian nih Joshua sinah a chimmi cu hlawtlinnak hi ralkap thazaang zongin a si lo, Pathian bia chun zan in ruah le i nun pinak in hlawhtlinnak kha hmuh khawh a si a ti (Joshua 1: 8). Cucaah Joshua nih teinak a hmuhnak bik cu Pathian bia aa nun pinak thawng khan a si.

Bible hi a pipa ngaiin kan ruat bal lo. Pumhnak ah kan i ken, kan rel sawhsawh, a taktak ah kan zah bal lo. Kan thinlung le ruahnak zongah kan i chiah bal lo. Kan ruat taktak bal lo. Kan i nun pi taktak bal fawn lo. Bible nih hin kan nunnak hi a ciah in a ciah dih ding a si. Kan Thlarau ti-rawl taktak cu Bible hi a si.

Bible hi na zah/baihaat bal rih lo a si ahcun atu hin na thok cang awk a si. Bible relnak in zei tal naa miakmi a um rih lo ahcun na thok cang awk a si. Bible hi Thiang Thlarau nih a hriamnam bantuk ah a hmanmi a si (Ephe 6: 17). Na rel lengmang ah cun Thiang Thlarau nih na nunnak ah thil pakhat khat cu a tuah hrimhrim lai. Cun Bible hi kan ral dohnak hriamnam tthabik a si. Jesuh Khrih nih a hriamnam tthabik a hman zungzalmi cu Pathian bia, Bible kha a si.

Cun sualnak kan teinak dingah thlacamnak hi a tthabikmi a si. Minmen in thlacam hi kan hmang tawn i a ttha lo taktakmi a si. Biatak tein thlacamnak hi a tthat zia hi kan thei ko nain kan hman khawh lomi hi a poi taktak. Thlacamnak in kan hmuh dingmi kan hmuh lomi tam tuk a um cang lai. Khrihfa a rak si kaami hna an thlacam nun hi kan thlau chin lengmang cang (Lamkaltu 3:1; 4:31; 6:4; 13:1-3). Paul nih a Khrihbu caah a thlacamnak tampi a chimmi a um. Thlacamnak kongh pehtlai in Pathian nih biakamhmi tampi a kan ngeih (Matthew 7:7-11; Luke 18:1-8; Johan 6:23-27; 1 Johan 5:14-15), cun Thlarau raldohnak caah Paul nih zeitindah thla kan cam lai timi zong a kan chimh (Ephe 6: 18).

Sualnak kan teinak ding ah cun thlacam hi zeitluk in dah a rak biapit? Peter nih Jesuh a hlawt hlanah khan, Jesuh cu Gethsemane dum ah khan thla a cam, Peter cu aa hngilh cuahmah ko. Jesuh a ra i a hlauh, “tho law, thlacam tuah, tukforhnak ah na tluk sual nakhnga lo. Thlarau nih cun a duh ko, asinain pum cu a thazaang a der” a ti (Matthew 26: 41). Peter bantukin thil a hmaanmi tuah kan duh ko nain tuah ngamnak le thazaang kan ngei tawn ve lo. Cucaah kan kawl peng a hau, kan kingh peng a hau, kan hal peng a hau, cu hnu lawngah kan herhmi cu Pathian nih a kan pek ko lai. Thlacam a sullam cu kan chambaunak kan i theih i Pathian thawnnak le thil ti khawhnak kan halmi khi a si ko. Pathian kan bochannak kan langhter zong khi a si. Tuah hna seh tiah a kan duhmi kan tuah khawhnak hnga caah Pathian sinah thlacam nun ngeih hi a herh tukmi a si (1 Johan 5:14-15).

Sualnak kan teinak ding ah cun Khrihfabu hi a herh tuk. Zumtu he hawikomhnak le pehtlaihnak ngeih hi kan thazaang taktak a si. Jesuh Khrih nih a zultu hna thawngttha chim awk ah a thlah hna ah khan, pahnih pahnih in a thlah hna (Matthew 10: 1). Lamkaltu zongah khan a bubu in Pathian riantuannak ah thlah an si hna. Jesuh Khrih nih hin pumnak ngeih hi thazaang a kan pek lengmangmi a si. Hi ti hin hawikomhnak a um khawh lengmang ahcun unity a um lai, riantuan a nuam lai, thazaang kan tthawng lai (Hebrews 10: 24). Pakhat le pakhat karlak ah kan sualnak i chimh ding, cuticun thazaang lak tti kha duhpiakmi kan si (James 5: 16).

Khrihfami kan nunnak ah hawikom ttha ngeih hi a biapi tuk. Biaruah hawi ngeih, thlacam tti hawi ngeih, thazaang petu hawi ngeih hi a sunglawi tukmi a si. Tukforhnak hi a tam tuk (1 Korin 10: 13). Hawikom ttha kan ngeih ahcun fawi deuh in thazaang lak tti khawh a si. A caan caan ah cun sualnak hi fawn tein tei khawh a si. A caan ah cun sualnak teinak hi fawite ah hmuh khawh a si lo. Pathian nih sual-teinak caah hriamnam a kan pekmi hna hi hmang hna seh ti a kan duh. Zumh awk a thlakmi Pathian a si bantukin amah kan i bochan peng ahcun teinak kan hmu ko lai.