“Hodah Ka Lamkaltu Ah Ka Thlah Lai?”

“Hodah Ka Lamkaltu Ah Ka Thlah Lai?”

Thimmi Baibal Relnak

Isaiah 6:8 Cun Bawipa nih, “Ahodah ka fial lai?” “Ahodah ka lamkal a si lai?” a ti kha ka theih. Keinih, “Keimah ka kal lai! Ka thlah tuah,” tiah ka leh.

Biahmaithi

Nihin ka sermon hi US ummi Chin Khrihfa mi hna kan sining hoihin timhtuah nak ka ngeih mi a si.  Pakhatnak ah caantha a kan serpiak tu Pathian cungah kaa lawm. Cun caan sunglawi a ka tinco tertu Pastor Danny cung zongah lomhnak chim cawk lo ka ngei ko.

CBCUSA in kan EM nih chungtel thar donak timi thawng a thanh poah ahhin a ho nih theih pi lo in ka feeling phun 2 in a um. Cucu lomhnak le lungnomh lonak an si. Kaa lomhnak cu CBCUSA chungah Bawipa rian tuanti dingin Khrihfabu tampi hna nih duhnak an ngeihmi nih ka lung a ka lomh ter ngai tawn nain kaa lomh khawh tawn lonak cu Laimi Khrihfabu kan i thenthek tuk mi tha pek ko a lo rua hlah maw tiin ka ruah i kaa lawm kho thlu tawn lo i a lomh zong kaa lawm ngam tawn lo. Hitluk aa remlo mi le aa dawlo mi laimi Khrihfa mi hna hi Bawipa nih  Isaiah bangin kan au ve seh law zeitindah nang le kei nih kan leh hnga? Aauhnak a umnak ah cun lehnak a herh. Thimnak a umnak zong ah teitu le teimi umphung a si. US president thimnak zongah Ramney cu mitampi nih ruahchannak he an duh i thimfung an pek. Cu bantuk in Obama zong mitampi nih a cungah ruahchannak an ngeih i thimfung an pek ve. A phi a hungchuah tik ah cun thimnak a si bantuk in Obama cu thimmi a hung si i Ramney cu a thimlomi ah a hun i cang. Pathian nih a rian caah thimmi kannih Chinmi nih tah Bawipa auhnak aw hi zeitin dah kan leh lai?

Prophet Isaiah Bawipa nih a kawh lio thilsining

Prophet Isaiah cu kan Bible chung Major prophet 4 hna lakah pakhat a si. Prophet a si lio ahhin Judah ramah siangpahrang 4 an rak i chang. Cu hna cu Uzizah, Jotham, Ahaz le Hezekiah hna an si. A tu kan Bible cangthim hi siangpahrang  Uzziah a thih kum ah a rak cang mi a si tiah Is.6:1 ah fiang ten a chim. Uzziah cu siangpahrang tuan aa thok ah kum 16 te lawng a si i kum 52 chung an ram pi cu a rak uk. A mah nih a pen lio ah hin rumnak, daihnak in Bawipa nih an ram cu thluachuah in a khah ter. Asinain caan a rauh deuh tikah Uzziah cu phorhlawtnak, ruamkainak in a khat i Bawipa duhlo ningin  a hung um (2Chanrelnak 26:16). Pathian nih Isaiah a kawh lio caan hi an ram mipi hna nunning a rawh lio caan, nun caan ziaza dawh lo in an rak nun lio caan a si (2Chan.27:2b) (Ethical and moral corruption). Isaiah Dal 5 tiang na rel ahcun an nuncaan ziaza aa dawh loning tampi hmuh khawh a si. Mirum nih sifak an nehsawh hna, nu hna cu dawhcahlo in an nung, mino hna zong nih mah pumsa duhnak ah caan an rak hmang i Pathian hnu an rak chit lio caan, mipi hnanih hruaitu zei an rel lo lio caan ah Pathian nih Isaiah a rak auh hi si dawh a si.

Isaiah Dal 6

Pathian a lianhngan nak kong (6:1-4)

Isaiah nih a tlinlonak aa hmu (6:5)

Isaiah thianter a sinak (6:7-8)

Pathian nih a auhnak le Isaiah nih a lehnak (6:8)

Pathian nih tuan a fial mi (6:9-13)

Laimi Khrihfami hna caah Isaiah Dal 6

1.   Nuncaan ziaza rawhnak

Pathian nih Isaiah a rak kawh lio Judah mi hna sining le nihin laimi kan sining hi tampi aa lawhnak a um ko tiah ka ruah. Isaiah chan lio Judah miphun pawl kha Pathian nih a dawt hna caah rumnak le lianhnak a rak pek hna. Asinain cu an rumnak cu an nuncaan ziaza rawhnak ah an rak hman. Pathian nih a kan dawt i laimi hna zong kan phu kan tawk lo piin ramtha ah a kan phak ter. Zalong tein  Pathian kan thangthat kho i zalong tein tuan kawl khawh nak Pathian nih a kan pek. A tu kan umnak khua Midland le bang hi cu rian a tam ngai caah laica zong a rel thiam ve lo mi kan u nau hna zong nih hin an tuan ceomo ve tikah kan phu kan tawk lo in inn lo thatha, mawtaw thatha kan ngei hna. Kan kaa nih cu Pathian thawng in kan ti ko nain kan nunnak hi phorhlawt nak, duhpoah in sullamngei lo in a nungmi tampi kan um. Laimi tampi cu US ram kan phak hi nuncaan ziaza rawhnak ah kan hman.  Kan umnak khua Midland ah hin laimi Khrihfabu 3 kan um. Zuri, mibuai an tam ngai tawn caah voikhat cu kan pastor te 3 cu an zapi in an minung cio court ah an kal pi hna i ruah lo in biaceihzung ah cun an i tong hna. County biaceih bawi pa nih kan pathum in hmaiah a kan chuah ter i mipi lak ah bia a kan cah an ti…..”Laimi hna zu nan din tuk caah nanmah ruangah kan tha a ba tuk cang, kan rian a tamtuk. Cucaah nan community cio va chim hna uh. Hihnu hi ti lengmang in nan din ei rih ko ahcun nawlngai lomi cu nan ram ah kan in kuat han lai,” tiah a hro bak in a kan hro an ti. Mitau nak zong thei lo in an hung tin.

Rithainak le vawlei nomhnak hna he a tlongleng ko mi laimi Khrihfa mi hna hi Bawipa nih a lamkal tu ah kan fial sehlaw zeitin dah kan leh hnga? A lamtkaltu ah cun tah thim awk tlak kan si hnga maw?

2.   Bawipa riantuan tu zeirel lonak

Pahnihnak ah langhter ka duhmi cu Bawipa riantuan tu hna, kan hruaitu hna zei kan rello nak hna kong hi a si. Hihi Chinmi Khrihfa mihna kan zawtnak ngan ngaingai ah ka ruah mi a si. Capo biatak in Pastor a tuanmi ka theihhngalh sinah ka ti tawnmi hna cu, “Na title ah Pastor, Na rian tuanmi taktak cu general worker,” tiah hin ka capo theu hna. Khrihfabu hruaitu upa cheukhat kaa zongin a chuak theu mi cu kan pastor cu lahkhah kan pek mi a si kan fialmi poah a tuan lai ti rum ro a si. Dawtnak in appointment hna le kan zawt kanfah ah an kan zulhdawi mi hna hi a rian a si tiah hmuh piak loin a kan dawt caah a rian leng aa khinh titu in hmu thiam hna u sih law Bawipa riantuan tu hna hi an tha a bat tuk ko zongah khin zeitluk in dah an zaang a va dam hnga. Kan i tuah khawh lomi an kan tuan piak hleihlei loah na rian a si tiah ninghngal ngai in kan ti theu mi hna hi cu Khrihfa nun caan ziaza hrimhrim zong asi lo. Employee pakhat tluk ceo ah Bawipa nih chiti a thuh i a riantuantu ah a hmanmi kan pastor te hna kan hmuh peng mi hna hi cu ruah taktak ah cun ngaihchia ngai kan si. A ngaingai tiah cun Bawipa riantuantu hna hi fim a kan chimtu ding le lam a kan hmuhsak tuding tu an si. Kan hnulei in kan hnawmtam a char tuding men an si hrimhrim lo.

Hitluk in Bawipa nih a mah aiawh ah a turun zoh tudingah a chiahmi a riantuan tu hna hmanh dawtawk a thei lomi laimi Khrihfa hna hi Bawipa lamkaltu cu kan si kho ngai hnga maw? Thimmi ah tah kan i tel kho hnga maw?

3.   Thencheunak

Dr. Samuel Ngun Ling nih  MIT kan kai lio ah a rak chim tawnmi cu laimi 2 an umnak ah cun ruahnak 3 a um a rak ti tawn. Bawipa ram caah zeitin dah kan tuan lai i zeitin dah hmailei kan thancho lai ti hmanh tuak taan lo in Khrihfabu thencheu cu kan thawng taktak si. Hruaitu pakhat le pakhat i rem lo zong a phung a si ko. Nain thencheu nak tiangtiang kan phak lengmang mi hi cu Khrih i a fa le kan si taktak lo hlah maw ti hi caan tampi ka ruat tawn. Cun mipi hna zong nih Pathian kan biaknak ah thazang kan lak nak Khrihfabu a si maw si lo ti tuaktaan lem lo in hi Khrhfabu ka um ahcun an kan zohkhenh khawh cem lai ti ruangah Khrihfabu pakhat in pakhat ah kal kan hman lengmang mi hna hi thil dawh lo ngaingai a si. Bu pakhat ah kan vun i hlum deuh, kan hung thawng deuh Pathian thawng in cheuhra cheukhat hna a karh deuh poah ah i thennak ah kan hman tawn. Cu bantuk Khrihah a u nau taktak le a mah miphun hawi te hmanh a daw kho lomi le a remlo mi laimi Khrihfa hna hi Pathian lamkal tu ah fial tlak teh kan si ne hnga maw?

Bawipa nih a lamkaltu ah laimi a kan thim

Isaiah nunnak kan zoh tik ah thimtlak taktak a sinak cu Pathian he an vun i ton bak in mitlamtling lo a sinak, misual a sinak aa hmu colh. Chirnak lungthin taktak he Bawipa cu a fuh. Bawipa nih a fial duhmi, fialawk a tlakmi a sal kan si khawhnak hnga dingah cun Isaiah bantuk in fih a nung tuk mi kan sining pi, a thurhnawm tuk mi kan nunning, lihchim hmangmi kan ziaza, awrduh cuainak in a khat mi kan minung sinak pi kha kan i hmuh i Bawipa sinah mitling lo kan si kan I theih i chirnak lungthin taktak he kan nun Khrih leiah kan i mer hmasa a hau ko.

Bawipa nih Isaiah hi ramleng piah, mi ramdang ah va kal awkah a fial mi a si lem lo. A mah a umnak ram chungah Pathianbia au pi, dirpi dingin a fial mi a si. Zumtu tampi cu midang sin ah thawngtha va phuanding ah kan fimthaimnak, kan ngeihchiah zong in a kal kho lo mi tampi kan um lai. Asinain kan chungkhar, kan umnak kan Khrihfabu in Bawipa fialmi hi tuan khawh thotho a si. Kan ngeih lomi tiangin Bawipa nih zeitikhmanh ah a kan halbal lo dah kaw? Kan ti khawhmi te le kan ngeih tawk te kan pekmi hi Bawipa nih a lomh tawn mi cu a si ko.

Bawipa nih a ram caah hodah ka fial lai tiah a kan sawm lengmang. Isaiah nih cun, " Bawipa, keimah ka um, ka thlah tuah tiah a leh." Nang tah zeitindah Bawipa auhnak cu na leh ve lai?