NUN NUAMHNAK BIATHLI DAL (5) NAK

THANGCHIATNAK TEI KHAWHNING

America ralkap General minthang taktak Butler an timi nih cun, cu hlan i mi nih a kong an ceihmi le a thang an chiatmi a huat khawhning, a celh loning le, aa thlen hnu i a dan khawhning a chimmi cu, “An ka thangchiatmi le ka kong an ceihmi hi voi tamtuk hringhran hi ka tong cang. Atu ah cun zeitluk hmanh in ka thang ka chiat hna sehlaw, ka thang a ka chiattu cu aho an si hmanh ka hlathlai bal ti lo,” a ti. General Butler theng hi cu kan tluk kho lai lo. Asinain, mi nih kan kong an kan ceihmi le kan thang an kan chiatmi hi kan rak hua tuk deuh tawn. Amah chimmi cu :- Voikhat cu tadinca ah ka konglam ttha lo ngai in asiloning in an rak ttial i cucu mi kip nih an hmuh dih, ka vun rel ve cu ka thinhun tuk ah a alh hin ka alh. A chuahtu cu kawl i, chalh i, a thil tuah sualnak ah ngaihthiam i halter, mi zapi theih in a sualnak cu phuanter ve colh hi ka duh. Cu ti a tuah duh lo a si ahcun biaceihnak zung ah phanh ding in timhtuahnak ka rak ngei. Cu thil cu tu hnu I ka ruah tthan ah hin ka ning a zak tuk. Ka rak i timhtuahnak ka rak tlamtlinh lomi cung ah khan ka lawm deuh. Ka ngaichih lo tuk.

Mah tadinca a relmi hnarcheu naktam nih cun cu ka zawn theng cu an rak rel lem lo i a relmi tam deuh zong nih cun zeipipa ah an rak ruat lo. An rel ka i a khuaruah a har mi hna zong nih cun zarhkhat chung hmanh an rak i cinken lem ti lo. Mi nih an kan thangchiatnak

le kan kong an kan ceihmi hi kan huatning tlukpi khi a rak si lem lo. Mi nih KEI ka thang an ka chiatnak cu zei ruangah dah an lung ah an i chiah theng lai? KEIMAH nak cun ANMAH kha an i ruat tam deuh zungzal i biapi deuh ah an i chia deuh. An rawl ei lai, an ei khim hnu, an ih lai le an zing thawh ka zong ah KEI cu an lungchung ah an ka chia lo, ANMAH kha an i ruat dih deuh cio hna.

Cucaah cun mi zeimaw nih cun an duh chungin ka kong cu ceih ko hna hmanhseh, thinhung in biapi hlapi ah la duh hlah. Bawi Jesuh hmanh a hawi 12 lakah pakhat nih a zuar i a tlaihter, pakhat nih a hlawt fawn hawi 12 lakah pahnih nih zumhtlak lo in an um tak, nang le kei nih cun a zeipipa hmanh khi hnabeisei awk kan ngei hlei lai lo. Kan thang a kan chiattu le kan kong an kan ceihnak paoh te hi zeirel lo in um ding ka ti duhnak cu a si lo. Lih pumpuluk i an kan thangchiatnak le bia dik lo in an kan ceihnak pawl hi cu zeirel lo in, tho mitbawm tluk hmanh ah ruat hna hlah usih. Cu hlei ah an kan ceihnak le an kan thangchiatnak hi cu tluk i huat awk cu a si lo; an chim sawhsawh i an i cinken peng lem lo. Kannih zong nih mi kong kan ceih, a caan ah kan fak hna, a caan ah kan thangchiat hna, kan fakmi hna zong cu tlukpi in kan i cinken peng hna lo i kan thangchiat mi hna zong cu tlukpi in kan lungchung ah kan chia hlei hna lo, kan biaruahnak ah an i tel ve menmen lawng khi an si.

Mi nih a kong an ceih mi, an thangchiatmi ah siseh, an fak ah siseh, an soisel cangmi hna cu mi zaran cunglei an si deuh i nang zong mi nih na kong an in ceih ngai ahcun, biapit ngainak na ngei ti kha i hngalh ko. Aho hmanh nih uico a thimi ruak cu an chuih huam bal lo i an kar diam ttheu ko. Mi zaran cunglei na si i mi zapi ruahnak ah ‘soisel tlak’ na si ah cun lunglawm in i porhlaw law, na ruam kai ko. Mi nih soisel le thangchiatnak menmen nih hnahnawh an pek khawhnak hmun ah um duh hlah. Mi zapi hmai ah paipertak tu ka si tiah i ruat law, hi ti deuh, kha ti deuh an rak ti cio lai i, pafa hna khacer zuar bantuk in mi chimmi paoh ngaih i a sitak men lai, na ti dih ah cun, na zuar dingmi khacer na sungh lengah na kharuh kiaklak in an perh sual ko lai.

Tiva chung lung paohpaoh nih cangai nenh hna hlah hmanhsehlaw, lung cheukhat tang ah cun cangai an um bantuk in, soiselnak tampi lakah mah nun sertharnak ca ah san a tlaimi lungtat i hman ding an um tawn. Cu hna pawl cu i lak law i tlunpi na naam har lo pawl tatnakah hmang diam ko hna. Mi faknak zong pangpar bantuk in a ziamh a tuanmi a si caah i hnangampi tuk le lunglawmhpi tuk cu ttih a nung tawn. Cucaah kan hnulei kan sirlei le kan hmailei i faknak le soiselnak awthawng hi kan nun nuamhnak hrampi an si lo. April thla le May thla thok ka nilin lio hrawng ah cun, ruahsur kho ti lo ding phun in van cu thiang in vawlei rocar ko hmanhsehlaw, June thla le July thla a rak phanh taktak ah cun ruahsur nikhua chia nih ngol hngal lo in a um tthan tawn ko. Mi nih kan kong an kan ceihnak zong tthal lio nikhua ttha bantuk men a si i, an kan faknak awka zong furpi nikhua chia bantuk men lawng an si. Kan phungthluk ah, ‘duhtu zakhat, huatu zakhat’ ti a si. A kan faktu an um ah cun a kan huatu le kan kong a kan ceihtu zong an um lai ti hi hngalcia usih.

Ni a linh i a rocar ngai ah cun, furpi a naih cang tinak a si. Ttihnung bik tu cu, aho hmanh i soisel awk tlak lo le thangchiat awk tlak lo mi si hi a si. Minung hi midang tthatnak le an vanthatnak chim nakin mi chiatnak le an tlin lonak chim a nuam ti ding in sermi hlah maw kan si ti awk in, mi chiatnak le tthatlonak chim hi kan huam tuk cio hna i thawngpang ngei bak lomi, cengkol/soksol sin i khua a sami kan silo chung cu, kan kong ceih le thangchiatnak nih hin kan min a um chung cu a kan dih tak lai lo.

Note: Pu Kio Luai nih Hawikom Serning timi cauk a tialmi chungta lakchin mi a si.