UNHCR A SOKMI NIH THEIH A HERHMI

(By Salai Khin Mg Shwe)

Biahramdomh
Chin mipi nih United Nations High Commissioner for Refugees (UNHCR) kan sok tikah kan herh/philh sualmi hna a um pah lengmang! Cu hna cu a tanglei bantuk in, “NAK, NAK” tiin ka rak langhter hna lai. UNHCR zung in Ralzam poah don kan si. 1951 ah vawlei cung ram tampi komh in vawlei i ralzam hna huhphenhnak/venhimnak caah tiah rak dirhmi a si.

A. UN Pi Chungah UNHCR hi Khawikadah A Um ti Zohnak

UNHCR hi UN nih a rianttuantu pakhat ah a chiahmi a si. United Nations (UN) kan timi cu ram tampi komh/fonh kan ti lai cu. UN zung lianbik (Headquarter) cu New York ah a um. UN a system cu a tanglei bantuk in a si. A tlangpi in kan ttial hna a si ahcun:

1.Trusteeship Council

2.Security Council

 3.General Assembly,

4.Economic and Social Council,

 5.International Court of Justice le

6.Secretariat tiin UN system/structure pi cu a si. Hi paruk hna an tang ahhin tengnga tampi 40 naktam an um. Kanmah nih kan theihkhawhthawk ding a si mi cu UNDP kan timi khi UN chung ah a tel mi pakhat a si ve. A tu UNHCR hi UN General Assembly le Economic and Social Council tangah a um mi a si. A tanglei ah UNHCR nih a rianttuan ning le a kong kan zoh hna lai.

B. UNHCR Thawhkehnak

Vawlei ralpi pahnihnak (Second World War) a dih tikah Europe ah ralzam in minung tampi nih harnak an tong. Cu tawlrelnak ah 1944 ah United Nations Relief and Rehabilitation an rak dirh. 1947 ah International Refugee Organization (IRO) tiah UN nih a thlen. Nain ram tampi an hna a tla lo. Cucaah 14 December 1950 ah UN Civui pi ah United Nations High Commissioner for Refugee (UNHCR) tiah an dirh tthan. Ram tampi biafunnak tthatthi an ngeih kho hoi lo. Cucaah biachahnak in kumthum lawng kalpi phot/rih ding an rak ti lengah Europe ralzam ca bik ah an rak timh rih. Nain 28 July 1951 ah UN Convention on relating to the status of refugees cu Geneva ah an kawh. Ram tampi nih minthut hnatlaknak an ngei kho cang. Refugee tahfung (Criteria) zong mumal/puitling deuh in an hun ser. Europe ram long si ti loin ram an hun kauh. 1967 ah Protocol ah an tuah tthan hnu cun ramri thleidannak um ti lo in vawlei pumpaluk ralzam caah UNHCR cu hun ser a si. Cun, UNHCR cu UN General Assembly le Economic and Social Council (ECOSOC) tangah an chiah. UN Assembly nih High Commissioner for Refugee a thim. Term khat nih kum 5 a si. Hi Commissioner nih kum tin ECOSOC le UN Assembly (3th Committee) ah report a pek. UNHCR tthihruaitu a si. UNHCR chungtel hna ram cu ram 147 nih min an thut i chungtel an lut. Asia ram in Tuluk, Korea(S), Cambodia, Japan le Philippine nih min an thut. Kawlram, India, Malay, Thai, Singapore le Bangladesh ram hna nih min an thu lo. UNHCR hi kum 1954 le kum 1981 ah Nobel daihnak laksawng voihnih a rak lak cang. UNHCR hi ram 123 ah rian an ttuan i tulio vawlei cung pumpaluk ah zung rian a ttuanmi hi 7,195 leng/nak tam an si. UNHCR zung nganbik (Headquarter) cu Geneva ah a um. Field offices cu vawlei khuaza ah a um.

 
C.Ralzam Hrilhfiahnak

1951 UN convention on Refugee minthutmi lengah 1967 Protocol chungtel ram hna le ramkip UNHCR nih ralzam (Refugee) timi tahfung (criteria) an ngei/ser. Cucu zeitindah a si kan ti a si ahcun minung pakhat cu 1.A Chuahkehnak ruangah, 2.A Biaknak ruangah, 3.A miphun sinak ruangah, 4.Buu pakhat khat chungtel ruangah le 5.Ramkhelrian ruangah serhsatnak le hremnak a ingtuar ding ttihnak a ngei tiah fiang tein a langfiang i cu ttihnak ruangah a chuahsemnak ram silo le a khuasak tawnnak ram in ramleng ah a phan i semnak ramah a kir kho ti lo, a kir duh ti lo, himnak a hmu kho ti lomi cu ralzam (refugee) an si, tiah tahfung an ser. Li-hninh, tilianh, meitlang puah, mangtam, kokek rawhnak (natural disaster), buainak (domestic violence) le sifah ruangah UNHCR ralzam tahfung chungluh khawh a si lo. Hi a cunglei pa-nga chungah pakhat khat tlinh hrimhrim a hau. Hi an tahfung an ngeihmi kan tlinh lo tikah reject kan tong hna. Appeal hna an kan lakter tthan tawn hna khi a cung i Pa-nga tahfung kan tlinhlo caah hin a rak si tawn. Cucaah kannih Chin mipi nih UN case kan konglam kan ser cio tikah khua ruat huaha loin ser hna hlah u sih! Case kan ser lai ah a cung i pa-nga hna hi kan mitthlam in cuanter hna usihlaw khikhi zohchih le theihbu in kan case hi kan ser/tuah hrimhrim a hau/ser hna u sih.

D.Holhleh Rianttuannak

Chin interpreters UNHCR ah a rak ttuanmi hi minung (20) tluknak tam kan si

cang lai tiah ruahdomh a si. A palh zong a palh kho men. Hi ka zawn ahhin chim ka duhmi pakhat cu Kachin le state dang hi an tlawmdeuh caah kanmah chin interpreters nih ai kan awh hna. Ralzam le ralzam dornak haltu nih registration tuahnak hmun hna cu- UNHCR zung, Vasant Vihar le a dang i rianttuan hawi zung hna ah mah duhmi holh, holhlettu ah nu maw pa maw hal khawh a si. Cu, halnak cu UNHCR nih a ttha bikin kan/nan interview tuahni ah tlamtlinter khawh an zuam lai. UNHCR le a rianttuantti hawi hna, holhlettu telin an rianttuannak hi manpek hau an si lai lo. Holhlettu rian cu holh pakhat kha a dang pakhat holh in leh a si. Biakhiahnak ah an itel lo. Holhlettu sinah pumpak na konglam he pehtlainak UNHCR zung leng ah tuah lo dingin kan in nawl hna. Holhlettu hna hrocernak siloah tthihphaihnak tuah si ahcun action lak a si lai. Mah hi kong hi UNHCR nih biatak ngai in a ruahmi a si caah a herhti ahcun phunglam ningin tuahsernak a ngeih lai.

E.Ralzam Na Si le Si Lo UNHCR Zung in Biakhiahnak (RSD)

UNHCR zung in an in pekmi form ah khan interview na tuahnak ding ni le thla a caan le a hmun tiang in aa tel dih lai. Interview tuahnak ding hmun cu C-543A, Vikaspuri, New delhi-110018 le India ramah UNHCR zungpi bik a si mi B-2/16, Vasant Vihar, New Delhi ah a si lai i nikhat ni in ninga ni tiang kal khawh peng a si. A caan cu zing 9:00 in zaan lei 5:30 tiang a si lai. Amah belte nithum ni tu hi zing lei lawng a ngah lai 9:00 in 1:00 tiang a si lai. A ni a kan pekmi ah chungkhar in a tuahmi kan si a si ahcun chungkhar tling te in kan chuah a hau. Cun, single pumpak in a si ahcun chim awk a va um lo. Interview an kan tuah hnawhnak chan a ruang cu Ralzam a si taktak maw? Si taktak lo timi hngalh duh ah a si. Phundang in kan chim a si ahcun ralzam kan sinak, silonak caah biakhiahnak tuah khi a si. Hi ka zawn te i a muru a simi cu a cung i ka ttialciami ‘Ralzam Hrilhfiahnak’ tiin ka ttialmi pa-nga lak ah khin pakhat tal cu na khen, ka khen bak/ hrimhrim a hau. Mah na khen lo ahcun direct in pomlo (reject) na si ko. Na/nan ram ah na kir tthan khawhlonak a ruang le zeiruang ahdah na rak zaam timi kha fiangte in an in hal lai i cu an in hal mi cu na tei ka tei bak a hau. A fawinak in kan chim a si ahcun, na case na fiang dih cikcek a hau tinak a si ko. Refugee Status Determination (RSD) tlam na tlinh khawh a si ahcun UN card an in pek lai. Mah RSD processes hi a tlangpi in thlathum a rau, cheukhat cu thlathumnak tam zong a rau kho ko. Kha kha chung ah khan Under Consideration Certificate (UCC) timi temporary card an in pek lai i cu card in cun India cozah siizung ah va thlawp le piah khawh a si. Hi UCC hi India Visa ai a awhtu a si lo. India ram a phanmi, Umnak nawl a halmi, Visa ti pawl cu India ram ah a lutmi a chuakmi a zoh/checktu zung Foreigner Regional Registration Office (FRRO) zung nih ttuanvo a lak lai. Cu RSD interview tuahnak ah chungkhar a si ahcun kum 12 chung lei poah poah kha mahte/adang te cio in interview tuah a si lai. RSD interview tuah na rat tikah a herhmi ca vialte khen na philh lai lo. Nan/na innchungkhar ah a thlengmi a um a si ahcun an rannak in UNHCR zung ah thawng na thanh colh lai. Na konglam (case) kha na tuahning te in a hmanning te in na chim lai. Na tuahning in na chim lo a si ahcun na caah card ngahnak an dawnkhantu a si lai. Cu thlathum processes a kal chung i right na ngeihmi hna cu na konglam (case) hi nanmah nawl tello in a leng an chuahter lai lo. Nain basic a simi na min, umnak le na phone no ti bantuk hna hi kan umnak ram India cozah sinah pek a si lai. A herhmi na ngeih a si ahcun holhlettu pakhat khat bawmhnak in na thiammi holh hmang in halkhawh le chimkhawh a si. A si lo le UNHCR Website (http://www.unhcr.org.in) ah chek/zoh khawh a si. RSD interview an zoh lai i an in pom a si ahcun UN card laknak ding ah ni le caan an in chim tthan lai. Pomlo na si sual a si ahcun ni 30 chung ah appeal na tuah khawh tthan. Hi appeal processes hi thlanga in a cun lei poahpoah ah anmah nih an zoh fel dih hnu ah thawng an in thanh tthan hna lai. Mah zong nih hal khawh a si. Mah i an in pom tthiamtthiam lo a si ahcun ‘final reject’ kan timi khi a si ko cang. UNHCR he tonnak a donghnak a si ko.

F. India UNHCR nih Amah Bawmtu Ding I A Chiahmi Hna He An Rianttuannak/ning

A tu lio i India UNHCR i Chief of Mission cu German mi Mr. Dominic a si.

Amah hi nawl ngeitu bik cu a si. A bawmtu hna he an rianttuantti dang cu hi ti hin a si. India UNHCR zung lian bik cu B-2/16, Vasant Vihar, New Delhi ah a um i department dangdang in an um cio Information Technology (IT) department, RSD department, Senior Protection Officer (SPO) department, Receptionist etc… in an um cio. Hi zung lianbik hi Office of Chief of Mission (OCM) ti zong in kan auh. Chim ding le ttial ding a tampi ko nain hi vial in hin si rih sehlaw caan hna um si le mah kong lawng in kan peh/ttial tthan te hna lai. A rianttuantti hawi hna cu 1.SLIC, 2. BOSCO le 3.WPC (Outreach ti zong in an awh a tu ah) kan theih lo mi zong a um kho men a ruang cu UNHCR hi a thlite in rianttuan hi aa tim zungzal mi a si caah a si. Atu a ralai mi 2015 ah hin, NGO thar pakhat lakchap a timh. A ttuantti hawi pakhat a simi Social Legal Information Centre (SLIC) hi huhphenhnak venhimnak lei in rian a ttuanmi an si. An zung lian bik hi 576, Masjid Road, Jangpura, Bhogal, New Delhi-110014 ah a um a tu kanmah an kan zohkhenhtu bik hna cu a tu Vikaspuri i a ummi khi a si. An ttuanbikmi cu ralzam hna nih kan nun huhphenhnak/venhimnak caah bawmtu bik an si. Cun, card extension, renew zong ttuanvo an lak chih. Renew nak hmun cu Bhogal office ah a si. Vikaspuri SLIC zung ah advance thlakhat in thawng theihter khawh hna a si ahcun a ttha.

Huhphenhnak/venhimnak kan ti tikah a phun a tampi tahchunhnak ah an lakbikmi hna cu an in tlaihhrem maw an in velh maw a si lo ah na thil hna an firpiak maw tite hna i an ttuan deuh hna etc... A ummi pakhat tu cu kan tonmi harsatnak kha an zung ah va chimphuan a hau. Anmah nih rat riangmang in an rak in tawlrelpiak lai lo na theihter hna hrimhrim kha na rian ka rian a si ve. A ttuantti hawi si tthiamtthiam mi BOSCO hi a hman ngaimi a si. BOSCO nihhin departments’ dang dang a ngeih ve. Cu hna cu Community Animator (CA), Community Service Provider (CSP) Sii (Medical) lei, Fimcawnnak (Education) lei, Psychosocial lei, Youth Club, Sponsorship, Placement, Income Generation Activities (IGA), Small Business Grant (SBG), Learning Train (LT) tiin rian an ttuantti hna. Ralzam nih va fuhpanh khawh an si kanmah le herhmi zawn cio in. Naite kha Sponsorship, Placement, IGA, SBG le LT timi pawl an dinhter rih hna. Women Protection Centre (WPC) hi kan harsatnak kong kan chimnak a si i ralzam nih kan harnak kan chimmi vialte a sang deuhnak officer hna sin ah phakter ding in ttuanvo a lami a si. Women a si bantuk in nu pawl le ngakchia a sunhsak bak mi a si.

G.India Ram Um Chungah Ralzam Hna Nih Kan Ngeihmi Zalonnak

Hi hi kan ngeihmi zalonnak hi a tlawmtuk hringhrang. Cu chung in kan ngeih khawh ve mi hna cu Harsatnak kan ton tik ah kan duh caan poah ah Police Station kan phan kho i kan tonmi kan i report kho. Palek cu harnak a tongmi hna bawmtu ding ah India Cozah nih a chiahmi hna an si. Palek hi a ttih in kan ttih hna awk a si lo. Kan upat hna i an rianttuanmi zong hi kan theihpiak ve hna hau. UNHCR zung ah kan duh caan poah ah kan kal kho hna. Harsatnak kan tontik ah Direct in SLIC ah kal in a phuan/chimh khawh a si. India ram nih an ngeihmi phung hrampi (law) ning in kan ton mi harsatnak he pehtlai in kan hman khawh hna. India cozah siizung ah man loin i piahnak nawl kan ngei hna. Kan UN card hman in. UNHCR rianttuan a bawmtu sin BOSCO sin ah kal in holhlettu zong hal khawh a si. Anmah le umnak he aa neihbikmi Cozah sianginn ah hngakchia kum (5) chung a simi poah sianginn kaiter khawh an si. India ram phunghrampi ning in hngakchia vialte nu le pa nih sianginn kaiter kha an rian a si. Cucaah hi kan ngeihmi zalonnak hna hi a hmanzia thiam ngai zong kan hau hna tiah, ka ruah! kan mipi nih caan ttha hi tlawlhti hna hlah u sih ti zong hi forhfial kan duh fawn hna.

 
H. Semnak Ramah Kirternak (Repatriation)

Kan chuahsemnak ramah daihnak a um i a zaammi hna caah himnak a um hnu longah ralzam kirter phung cu a si. Ralzam caah himnak le daihnak a um maw tiah phun tampi in zohnak tahfung an ngei. Ralzam pom cang hnu ah hramhram in kirter an timh lo. An phung zong a si lo. Kirter tikah thutdirnak le zohkhenhnak tawlrelpi hmasa a si fawn. 1951 convention minthu ram nih ralzam nunnak a him rih lo ahcun hramhram in kan kirter lai lo, timi tlaihtleng ‘principal of non-refoulement’ biakamnak an ngei. Hi tlaihtleng hi International Law a tengnge pakhat a si caah minthu lo ram hna zongnih nan upat hrim lai, tiah an forh ve nak a si. Kan kawlram Peace Processes hi zumh a si rih lo caah hi phung hi UNHCR nih a hman lai hi cu zumh a si rih lo. A ruang cu Peace Processes hi dotthum in kawl cozah nih a chiah i a tu ah a pakhatnak hmanh hi an lim rih lo va si kaw, pahnihnak le pathumnak nih caan zeizat kum zeizat dah a lak rih hnga.

Biadonghnak
Hi a cunglei i ka ttialmi hna hi kan miphun (A Hlei in Delhi Um Chinmi Caah) nih tthathmemhnak tampi a kan pek naklai tiah, heh! keimah nih ka banhkhawh tawk tein ka rak ttialmi a si. Mipi tampi nih kan tuahmi hi zeidah a si ti hi kan fiang lo caan le kan fiang lomi hi a rak um pah leng tawn. Cucaah kan mipi nih mah bantuk kan tlawlh ti nakhnga lo kan theih hrimhrim ding a simi! kan theih lomi theihthannak ding caah tiah, siaherhnak nganpi he ka rak ttial vemi a si. A tling lomi le a chambau mi tampi a um ko lai. Sihmanhsehlaw a chambaunak le a tling lomi vialte cu cattial tu nih mawhphorh ko sehlaw thilttha pakhat hnih a um a si ahcun careltu le mipi kan caah a nungmi, kan biakmi kan Pathian tu nih a ttha bik in thluachuahnak kan pek piak ko seh! Tiin ka capar ka donghter.

Note: UNHCR website, Files, Booklets, Salai Van Lian Thang Capar le Keimah Hmuhtonmi (Experiences) chungin Chin mipi nih kan hngalh awk tiah, saduhthahnak nganpi le siaherhnak nganpi in ka rak ttialmi a si.