Ka Pangpar Dawh Cu US Ah A Par Cang Lai!!!!!!!

By; H.C. Chan Hrang

Vawlei cung cu duhtlinlohnak vawlei, tthennak ram vawlei a si an timi cu a hmaan ning!. Al khawh a si lo ning cu ka cungah a rak phanh tikah, tuar a har i thir bantuk i sakmi lungthin cu a kekkuai dih i, mithli biangno ah a luang. Pa pei maw ka si cu zeicaah dah ka mitthli cu ka thlak lai timi bia pawr ngang i chim kha a si kho ti lo. Ngaihchia ngai in ka ttap. Zeicaah dah ti hin ka ttah?  A caah thla ka campiak tawn mi, ramthumnak a phanh khawhnak dingin cu ramthumnak i a kal lai ahcun lawmhpi ding tu khi ka si lo maw? tiin ka ruah len zong ah a si kho lo i ka mitthli cu a luang kiarmar.

Keimah lawng ka si lo i, a chung le a hawi le vialte zong nih an an tuar cio i, an ttap dih ve ko. Kan ttah dan, kan ngaihdan tu aa dang cio hna lai. A tuarbik cu keimah ttheu ka si ka zumh i, tuarlo awk zong cu ka ttha ve hrim lo. Mah le mah i zaangfahnak lungthin itthihpheih  ahcun zaan khuadei tein ttahnak ding a si., San tlaih lo a fah hi cu aw !! ti hna in khua ka ruat  i cu nihcun zei hlei a chuahpi fawn lo. Ka mitthli tu tampi a luang chin lengmang. Hla ka ngaih ah ka  lunglen a chaptu men an si. Mi nih hnemh an ka timh an ka hnem kho lo ka lunglen tu an zualter chin.

Philh itim cang law co khawh ttung lomi zunngaih cu tiin hawikom ttha hna nih an ka hnemh nain philh ding cun ka siang hrim lo e. Philh zong ka duh fawn lo tiin ka leh hna cun chim awk an thei ve hna lo. Ka dawt cu philh ka tim lai ka ti ah ka siang fawn lo.

Kan itheih kate in zohchuntlak ngaknu a si tiin an rak chim tawnmi  a si i. Kei zong nih a takin ka van hmuh tikah chim nolh hau loin ka theih. Hi tluk in kan Lainu chung ah ai zami ka hmuh tik ahcun ka khuaruahnak vialte kha a thlen dih. Zohchuntlak ngaknu le mifel nungak ka hmuh tikah thazaang tampi ka lak tawn. A chim bantuk i a ttuanmi a si bantukin ka hmaizah i, ka upat fawn i US ram caah le kan Laimi caah thlachuahnak tampi phurtu a si nak lai, a caah thla ka campiak tawn.

Mi vialte nih a um lo hnu cun an thlavai a kiang tuk lai ti an chim theu tawn. Khuaruahnak tampi a ka pek i, kei hi kan khua lei ah ka kir than ve tikah, mi nih a mah bantuk khin an ka ti ve te hnga maw? An ka ui ve hnga maw ? ti hna ka ruat. An ka ui zong ka zum fawn lo i, mi tampi nih hnahnok an kan ti men lai.  Tlung zokzok sehlaw tiin an kan ti lio caan ah a nih cu a sianglotu le a zun ngaitu an tam tuk. An tamnak a ruang  ka tuak tikah an mawh ve hrim loh e ka ti.

“Ngaihchia mi hna ngaihchiatpi i lunglawm mi hna lawmhpi” timi bia ka lungchung in a chuak i, ngaihchiatnak ding a um lo i, lawmhpi ding khi ka si ko tiin keimah le keimah ka hnem. Sinain cucu ka caah thil si kho lo a si hoi. Ttahthu mi hna ka huat tuk hna le  ka remlo tukmi tawnmi hna kha ka mitthlam ah an cuang. Tu hi ka hmu hna sehlaw an khuaruah a har dih hnga. Pa ka si ti kha a rak za hrim lo. Ka pa lo ruangah ka ttap si loin, ka dawtmi, ka dawtbikmi ka pangpar dawhte cu US ah a par cang lai timi ka ruah poh ah mitthli a luang e, ka ttap ttheu tawn e.

Note: Lai Catial a cawnnak a si..