MAW NUNGAK MIDANG CHUNGKHAR BUAITERTU SI HLAH!

By;HC.Chanhranga

Minung kan i theihnghalhnak hram hi zeihmanhlo te in aa thok ttheu tawn. Na hawipa/nu, na va/nupi he nan i theihnak hram kha van tuak tthan law, zeihmanh lote a si ko lai dah ka ti. Kei zong mah hi ka hawinu he hin, tu lio social media lar taktak mi facebook in kan in thei i, chatting kan ichawn i  caan a hung sau deuh i, kan cellphone number kan i hal …….mah cu cu ahram a thoknak cu a si..

Hringtu nu ah fak tlak tampi an um bantukin soi awk tampi zong an um ve tthiam tthiam. Cu bantukin hringtu pa zong an si tthiamtthiam ko. Nungak cheukhat pawl cu nupi nei cangmi pa uar hmang zong an um i, cubantuk in nutung zong nih tlangval uar a hmangmi an um tthiamtthiam ve.  Cu nihcun kan zatlang nun a hrawk ning cu keimah mit lawng in a hmutu nakin a tuartu chungkhar nih an theihthiam deuh ka zumh..

Mahcu ka hawinu tharte he zong cun kan ikom i, a caan ah Mizo  holh le mirang holh in kan in chawn tawn.  Facebook i hmaanthlak ka zoh tik ah fa pahnih te a nei ti zong kha fiangte in ka theih i ka hmuh. Va ngei liomi a si lai timi ruahnak khi ka hei ngei. Cu caah biatam ka hal duh ballo. Na fale pawl cu an mui an idawh tuk ka hei ti tawn. A nih zong a thanuam kho ngai. Zaankhat cu ka zei lungdek chuak hnga na vapa hmanthlak ka hmu bal lo e tiin ka hei ti. Harh ngai in rihzung mual a kan liamtak cang e tiah a ka ti cu ka lau ngai i, ka biahalmi kha ka chir tuk! …

Zankhat cu nungak tlangval kong kan ceih ciammam i a nungak lio caan zong kha a ka chimh viar. A fale Sunday sikul an kai tawn maw tiah ka hal ahcun an kai i caminpuai phitnak zongah mark an hmuh tthat ning kong hna a ka chimh tikah cun nufel ngai a si timi cu hal hau loin ka theih khawh.. Hrinthannak na co cang maw tiah ka hal tthan i, hrintthannak a co cangmi  ka si tiah a ka leh tthan tikah Khrihfa chungkhar ttha ngai an si ti kha fiangte in ka theih khawh.

Cun zankhat cu zinglei nazi pahnih hrawng ah ka Henfawn ah cun message tone a ring i, ka van rel cu ka hawinu message kha a si i, ka van rel tikah cun ka lau ko.. A pasal a thi cangmi naupa nih khan a rak buai hna i, inn ah an riak ngam lo caah a farnu le in ah an riaknak kong kha a si i, mah cu zaan cu ka thinhung tuk i, ka um lio cu si sehlaw, a buaitupa cu a hnapkhir zong chawiviar in bengh hnga, a baw zong phuh viar dingin tuangcar ah tengh ka duh. Hngakchia thinphang ngai i an um lio kha ka hei mitthlam i zeihmanh palhnak an ngei lo, sinain thinphang ngai in a umtertu pa kha ka hua tuk..

Kan ikom kan ikom i, a ka ingamh hnu lawngah an chungkhar kong a ka chimh cu ka lau ngai. Ka sin i an chungkhar kong a ka chimh ah khan a lungretheihnak kha a zawr deuh rua ka ti. Nungak fel ngai a si i, Virgin in pasal a ngeimi a si i, ca a cawng i a cawn thlu in i uar theng lo a vapa le chung he i biakremnak in va  ngeimi kha a si i, fa pahnih an ngeih hnu ah an pa nih hin lerh hram a thok i, an i tthen, .. cun mah cu caan rau lo ah an pa nih a thih tak hna..

Amah zong cu thihngamh in a zaw ve i, a der thluahmah, TB a si lai tiah an ti an check zei an hmu lo. Na paw, na ril a si lai tiah an ti ti an check thluahmah i, a tha dih fawn i, a donghnak ahcun a vapa le chung nih khan bia an chimsualnak ah an fapa kha AIDS zawtnak a ngei ti kha an chim tikah amah zong cu an va check tikah, a nih zong a kai ve ti kha an theih  i lungfak ngaiin a um, a fale pahnih tu kha cu  AIDS zawtnak  Pathian zaangfahnak thawng in an ngei lo. A vapa nau nih cun Ro a kan cuh sual lai tiah a hrocer pah lengmang fawn hna.. A nu le pa nih rihzung mual an liamtak  cang fawn hna… Na cungah hei chia law a fahning cu na theihthiam ko lai tiah ka ruah

Hawi dawt nupi va ngeih cang hnu ahcun nupi le va caah zumhawktlak in nun kha kan rian le kan tuah ding cu a si.. Hrichia kanmah pumpak sualnak ruangah fale nupi nih an kai theu tawn. Na nupi caah zumh awktlak in um law na chungkhar ca ah zumhawk tlak fawn. Mi fanu an duh lio cukmak mi nih nangmah an zumh caah an inn chungkhar chuahtak in an zulh i, an zulh ngam bantukte in a ca ah zumhtlak mi pa, ka pa a timi nihcun kan tuah ding kan rian khi a si.

Note: Laiholh a cawnglio mi a si....