Mitthli He Ttiannak Hmun Malaysia UNHCR Zung

Nichiar ka hmuh zungzalmi asi ko, nain tuchun cu phundang ngai khin ka thinlung a um…Khawmpi (Civui) zawh lai bang UNHCR zung hmai ah bag dawhdawh le suitcase a mil in a milmi pawl he minung khat thup in an i bu . Zeidang si loin kum tampi Malaysia ah harnak phunphun tuar hnu, UNHCR zung ah interview a phunphun phit hnu ah thianglawr ni hngah bang USA kal ni a rak hngak mi hna le mi thlahtu hawikom dawt hna an si. Minung nih caan kan uk khawh lo caah mithli he ai thlahmi hna cu “dam tein…” an ti pah in an kut an i tlai hna. USA ah a kal ding mi hna cu an mitthli he sian lo buin zung chung lei ah an lut diahmah hna.

Mahhi mitthli he ttiannnak ka timi ahhin a fak bik ah ka chiahmi ttiannak pahnih a um. Pakhat cu…. Pafa rual pathum an rak phan. Chungkhat le hawikom dawt nih an rak thlah hna. Zung chunglei lut ding an si caah voidang tawn bangin an min cazin ka zoh cu minung pali an si. “ Khoi na nu teh a phan ri lo maw?” tiah zei thei loin a fapa ka hal. “ A ra lio ko lai” tiah a ka leh. “ Ziah nan ra tti lo maw?” tiah zei thei loin ka hal tthan, nain ka bia a ka let ti lo. Tlawmpal a roh ah khin an nu cu a rak phan nain ai thei bal lo bang a fa le pahnih le an pa he cun ka khat hmanh an i chawn lo. USA lei a zuang dingmi hna cu IOM waiting area ah an tthu hna. Chungkhar dang cu hmunkhat te ah an tthu hna nain an nih chung belte an nu hmun dangah a tthu i phone in game ai kah, pafa rual hna hmun dangah an tthu ve i an pa cu a ke ai chuan i van lei hoih bu khin khua a ruat. Chungkhar khat asi komi hmunkhat an rat lomi nih ka khuaruah a ka harter nain, atu i chawn lo bakin hmun dangdang i an tthut ka hmuh hna tik ah fianmi ka ngei cang…... Air port kal lai ah IOM nih rawl dangh an si tawn. Hawidang hngakchia cu sunghno an nu le nih an rawl ei lioah ttha tein an zohkhenh hna nain annih unau belte sunghno an nu zohkhenhnak le kilkawinak an bau riangmang cang. Hawidang hngakchia an zoh hna ah zeitluk khin dek an nu dawtnak le zohkhenhnak thladem an hei hlam hnga ti hi ruah lo awk a ttha lo.

Arpi nih a fano hna rawltam lai phan ah cong a thai piak tawn hna le thinphang thlalau in an um caan ah a thladem in a huh hna bang zeitluk khindah sungho nu le zohkhenhnak le kilkawinak tuchun ni ahhin an hei hlam hnga mu. Caankhat lioah sungho nu le dawtnak le zohkhenhnak tangah a rak tthangmi le a rak i nuammi unau hna pahnih hna nih nihin ni ah cun tthal nilin ah Sazuk nih rial tidai a ngaih bang sungho nu dawtnak le zohkhenhnak an ngai. Hi vawlei ah kan Pathian asimi a kan hringtu sunghno nu le pa karlak ah dawtnak hri a cah ruangah nihin ni unau hna dirhmun zoh ah ngaih a chia hringhran. Ngaktah buangro hna kilkawitu le zohkhenhtu ah Pathian nih a chiah piakmi hna dawtu chungkhat hna he hmailei ah tonthannak caan a um ti hnga maw tiah sian lo buin ttiannak a tuarmi hna unau hna caah hin zeitlukindah ttiannak hi a har le a fah hnga ti lioah…….

Ttiannak timi hi ti le nga bang ho vanngai loin a rak leng ttimi ca ko ah a har khun rua ti awk khin a um hoi. USA kal ni theih duh ah uite-ekchuak bang atu le atu “ Hmunghmung, ka kal ni cu na zoh piak bal lo maw?” tiah a ka chawn lengmang tawntu Nu Sung zong tthennak kutka chunglei luh ai timh taktak hi cu a hnulei in dawh chihmi ka lawhter_innchung lei luh cu mi fanau ai harh ve ko. Moses le a ralkap hna nih ral an rak tuk i Moses nih a kut a thlir ah nika a rak dir i teinak an hmuh bantuk khan cun nihin ni ahhin ttiannak timi caan hi kutthlir in dirter chung awk le ral bang doh awk nih a tha fawn lo. Duhdawtnak timi hi caan khat lioah khan cun nuamhnak in khat hmanh seh, nihin ni le caan ah cun mitthli he lungkuai in a khatmi zaangfahnak ngei lo dawtnak hlah maw asi ti ding khin a um.

Tthennak kutka hram ah “dam tein….” timi bia chimnak caan a phanh taktak cun a biang cungah zungkhat chah dengin ai thukmi ai ttamhnak vialte zong thinlung chungin lenglei ah a rak luangmi tthennak mitthli nih furpi tilian bang a fenh dih. Donh cawk loin a luangmi mitthli hnawhnak kut nih sen dih cikcek in a hnuaimi a mit zoh ah mitfah rai nih fak ngai in a tlunhmi ko khi a lo. Tthennak caan nih cun phoih khawh ti lo dingin ai sih ko rua timi an kut zong zaangfahnak ngei loin duhsah tein a phoih piak hna. Thennak ahhin a kal mi nakin kaltaak mi ca ko ahhin rak tlonlennak hmun le hma nih zuunthing tuarter in lung a leng deuh kho men. Dawtmi he nuam tein rak tlonlennak hmunhma tthing lei ah mahlawng zuungthing tuar dingin duhsah tein kaar a hlangmi Pa Thawng ka zoh ko ah ka lungthat lo a zual khun. Riantuan lawi i an rak i don tawnnak Time Square, kutsih buin an rak lawi tawnnak lampi hna cu an hmun rih lai nain annih ca belte ah cun tuanbia bantuk asi cang lai. “Nan pum cu i tthen hmanhseh, tthen khawh ti lo dingin a hmun zungzalmi nan thinlung nih in ttemtawn zungzal ko hna seh” tiah hnemh ka duh hna nain….

Harsat ruangah atu lio Laimi kan sining ah duh zong duh lo zongah hrial awk a ttha lomi pakhat cu “tthennak” hi asi. Laimi kan mitthli a tlaknak hmun zong hi a tam ko cang. Nain, daw cukmak le nuam cukmak in caan khat lioah a rak leng ttimi chungkhat sahlawh rualchan hna le unau hna pahnih le ti le nga bang Malaysia ah a rak tlongleng mi Nu Sung le Pa Thawng Mitthli He Ttiannak Hmun Malaysia UNHCR Zung hmai kha cu…

 

Hmung Hmung
Malaysia