US Ramchung High School Ah Meithal Kahnak A Cang

USA ramchung, Seattle khuapi chaklei Marysville Pilchuck High School ah, October 24,2014 chun ah High School Sianghngakchia pakhat nih sianginn chungah meithal a puah i, Minung 1 a thi. Minung 4 hliamhma fakpi a tuarter hna hnu ah amah tein meithal in aa kap i a thi tiah CNN, NBC,MSN le a dang thawnglatu nih an tarlangh. Hliamhma tuartu minung 4 chungah minung 3 cu ruahchannak um set loin an um, Everett i a ummi Providence Medical Center ah zohkhenh an si hnu ah an lak i pakhat cu a zual deuh caah Seattle i Harborview Medical Center ah an thial.

A kaptu hi sianghngakchia a si i, zeiruangah a kah timi theihfian a si rih lo. October 24,2014 zingka ah meithal kahnak a tuah hi a si. 10:30 a.m. (1:30 p.m. ET) ah 911 kawh a si, Police le ambulance pawl an phak hnu ah sianghngakchia,sayate le rianttuantu pawl cu an chuahter hna. Hi Sianginn ahhin Sianghngakchia 2000 hrawng an um.

Meithal in mi a kaptu hi Jaylen Fryberg timi pa a si. Nai hrawng ah an sianginn ah hmuhsipnak/nautat deuhnak  a rak tuar. Twitter zongah a thinhunnak pawl a rak tial. August 20,2014 ah Twitter in, “ Nan ka hmuhsip/nekneih  ruang ah, keimah hmuhsipnak le nekneihnak zong nan tuar ve lai. Cucu nan duh lo tuk te lai” tiin a rak tial. Sianghngakchia pakhat nih cun CNN i  a chimnak ahcun, “Meithal a puahtu hi ka theihmi  a si, tunaite ah hmuhsipnak tuartu a si,” tiin a chim. Marysville Pilchuck High School khar a si rih lai.