Ecology le Ka Cafung

Ecology le Ka Cafung

By Henry Nawl Thang Bik

Ecology hi biatak tein cawn le theih a herh. Living Church pawl nih Ecology timi hi Baptist ta phun ah ruah a si. Baptist pawl zong nih an mah ta rumro ah an ruah ve. K.C. Abraham nih, “Ecology tlakchamhnak hi thlarau lei tlakchamh zong asi ve,” a ti bantuk in Ecology hi thuk deuh le fak deuh in kan ruah cio a herh ve hrim ko. Ecology hi vawlei bia lawng si loin Bible bia (Pathian Bia) bak asi i a ho ta le rian hmanh asi hlei lo, kan dih lak in kan i bawmh cio i, “A hring dildel mi le a dawhmi kan vawlei hi ramcar le a dawh lo mi vawlei ah ser loin hring ter le dawhter peng ding hi kan rian cio asi.” Nihin kan vawleicung dirhmun zoh tikah Harnak, Lungretheinak le buainak nih a tuam. Vawlei nih himnak a kan pe kho ti lo. Scientist minthang Stephen Hawking nih, “Kan umnak vawlei nih hna ngamnak a kan pe kho ti lo—vawlei nih a chuah pimi thlichia, tilet, Tsunami, serchom virus, zawtnak phunkip ruangah himnak a tlawm tuk. Cucaah, nihin vawileicung minung kan karh peng khawhnak hnga hi hnu kum (20) ah Thlapa cung, kum (40) ah vawlei dang ah peem kho ding khuaruah le i zuam a hau,” a ti (7 day News, June 22, 2006). Hihi a hman chin lengmang. Mifim thiam nih an chimmi cu, “Vawlei caah tihnung mi phun thum a um,” an ti. (1) Ralhrang (Terrorist) (2) HIV/AIDS zawtnak (3) Pawngkam thilri rawhralnak le thurhnawmhnak (Pullution) an si i cuhna lakah pawngkam thilri rawhralnak le thurhnawmhnak hi vawlei dihlak caah ral ngan bik asi, tiah an ti.

James Martin nih, “Zabu 21^st Sullam,” (The Meaning of the 21^st Century) timi a cauk chungah vawleipi nih a ton dingmi harnak le buainak phun (16) a langhtermi ah phun (7) cu pawng kam rawhralnak he aipehtlaimi an si fawn. Pawngkam, sermi thil an rawhralnak ruang le khua caan a hman ti lonak hi Lairam zong nih a tuar tuk ve cang. Cucaah hi kong kau he pehtlaiin article tawmpal te ka van tial ve nak asi. Ecology kong hi a kautuk mi asi caah kan zoh khawh le kan rel khawh tawk tlawmpal tein ka hun chuahpi mi asi.

I.(A) Ecology Sullam

a)     Ecology timi bia fang hi Greek holh bia fang (2) fonh “Oikoslogos” in a ra mi asi. “Oikos” sullam cu “House” “Inn” tinak asi i “Logos” sullam cu “Cawnnak” asi loah “Hnalhnak” ti khawh asi. Phundang in kan chim ahcun, “Innchung khuasak tintuknak kong tha tein hngalh asiloah zohkhenh thiam” tinak asi.

b)     A sullam dang a um rih mi cu Oikos timi sullam hi ‘zohkhenh’ (Steward) he a sullam a khat ve. Cucaah a fawinak in kan chim ahcun Ecology timi cu Pathian sermi thil dawt le zumhtlak tein zohkhenh hi asi.

c)     Ecology timi cu, “A nung mi thil (Living Organiasm) pakhat le pakhat i pehtlaihnak le minung le pawngkam thil i senghtlaihnak ningcang tein dothlatnak fimnak zong asi.

(B) Minung le Pawngkam I Pehtlaihnak

Zei ruangah dah (Ecology) pawng kam zohkhenhnak kong hi cawnle theih a herh kan ti ahcun, minung hi pawngkam thil loin a nung kho mi asi lo caah asi. “Nunnak” (Life) kan timi hi vawlei cung ah pakhat lawng a um. Cu nunnak cu minung, saram le thingkung kan i hrawm. Thli, ti, thingkung, saram le vawleipi tel loin minung hi nun khawh asi hrimhrim lo. Phundang in, nunnak a ngei mi poh hi a paakin (a bing) in nun khawh asi lo. Minung le saram nunnak dingah, Oxygen a chuahtu thingkung an herh i Carbondioxide a chuahtu minung le saram loin thingkung a nung kho ve lo. Cu bantuk nunnak a ngei mi vialte hi i pehtlaihnak a ngei dihmi lawngte kan si. Phundang in, thilnung pakhat cio i an nunnak kan timi hi a dang thilnung pawl nunnak he aipehtlai dih mi le ai sengtlai dih mi an si.

Cun ruah ding mi cu, minung nih kan hmanmi ti, mei, rawl, hnipuan, inn lo tibantuk vialte hi van in a hong tla mi pakhat hmanh an um lo. Kan pawngkam in kan hmuh mi lawngte an si dih. Cucaah minung le pawngkam timi hi, ti le nga bantuk kan si i then awk kan rak tha hrimhrim lo. Cu tluk i then awk a tha lomi kan pawng kam cu, kan then tik le zeirel loin kan um tikah, a tuartu le a temtu bik cu nangmah le kei mah thiamthiam hi kan si ko.

II. Nihin Vawleicung Sermi Thil Rawhralnak (Today’s Enviromental Problems)

 Nihin kan vawleipi hi that lei nakin rawh lei a panh chin lengmang. Thawngtha nakin, thawngchia theih deuh asi. A ruang tampi lakah, a bia pi asi tiah an ruah mi cu Ecology crisis asi. Pawngkam thilri rawhralnak tampi hna lakin tlawmpal tein kan van langhter lai.

1)     Minung Lurel Karhnak le Vawlei thazang tumhchuknak

             (Population Increase and Economic Crisis)

Minung karhning UN nih a tuakning ah, ‘1800 kum ah vawlei cung minung dih lak one billion tluk hrawng, 1900 ah 2 billion, 1975 ah 4 billion, 1996 ah 6 billion kan si i 2015 ah 8 billion kan phan diam lai’ ti asi. Kum khat ah mifim pawl nih million 84 hrawng kan karh peng ti asi. Hi tluk minung kan karh a ran lioah, a poitukmi cu vawlei a karh ti lo. Nihin minung nih kan pawcawnnak ca i kna hmanmi vawlei tha hi kum khat ah billion ton 24 lengmanh a rawk (a tlau) ti asi. Cucaah these rawn a karh chin lenmang pinah vawlei nih rian a tuan khawhnak 35% cu ramcar ah a cang dih cang.

2)     Dinti Harnak le Thurhhnawmhnak

(Lack of Drinking Water and Water Pollution)

 Dr. K. P. Johanan nih, “Nihin vawleipi nih a tih bikmi hi nuclear power asi lo. Terrorists (Ralhrang) zong asi lo. Cun HIV/AIDS zawtnak zong asi fawn lo. Nihin vawlei nih a tih bik mi cu “Dinti” kong kau asi,” ati. Vawlei i 70% nak tam deuh hi ‘ti’ nih a khuh. ‘Ti’ dihlak i 97.4% hi din awk a tha lomi Rili tii asi i din awk a tha mi cu 2.6% lawng asi. Kum khat hnu kum khat ti a tlawm chin lengmang. A rak reu bal lomi tiva hna zong thal caan chuak cun an reu cang. A ruang cu thing hau ruang, sehkhu le meiduah ruangah asi bik. ‘Ti” a tlawm tikah cinmi thlairawl a chuakmi zong a tlawm chin ve. Tah chunhnak ah, lei thuan te hna a har chinchin. Sivai, hrudenh le sehkhu, dynamo le bomh puah ruangah tii a thur (a hnawmtam)—India ram tiva dihlak i 70% hi a thur cang, Tuluk ram tiva i 78% hi minung caah tih a nung, Malaysia ram tiva 116 chungah 27% lawng hi a thiangmi asi an ti. Ti a thurhnawmh tikah nga zong an ci a mit i Acid ruah tiang a sur caah cinthlak mi tirawl a rawk pinah vawlei dawm (Natural fertility) a hrawh. Europe ram i 35% cu thei cinnak ah a tha ti lo. Europe ram lawng si loin kan Lairam hmanhah thei/rawl a chuak ve ti lo—Facang pung (1) na tuhah a luan cia mi kum hra lio ah zeitluk dah a chuah, a tu ah teh zeizat dah a chuah, tuak law, na fiang ko lai. 

        

3)     Dawpmi Thli Thurhnawmhnak (Air Pollution)

 Mifim hna nih vawlei hi thli nih meng (200) in a tuam. Vawlei thli i 76.6% cu nitrogen, 23.1% cu Oxygen 0.2% hi carbon, solfa, mercurt le lead an si” ati. Thli a dihin Ozone tlap (Ozane layer) nih a tuam. Ozone cu nika linhnak a tawkza in vawlei ah a rak kua tu asi. Asi nain nihin kan vawlei linhsat tuk ruangah (meikangh, thing hau, sehkhu vialte) le carbondioxide le Acid tamtuk ruangah Ozone tlap a pan ter. Asi lo ah a pem cang. Phundang in kan chim ahcun rian a tuan ding ning tlukin a tuan kho ti lo. Cu caah Ozone tlap nih nika in a ra mi Ultraviolet radiations a kham kho lo tikah thli thiang a um ti lo pin ah zawtfahnak a karh. E.g. India ram Mombay khua lipi i (a hlei in shalum area) nikhat chung tli an dawp mi khi cigarette fung (10) zuuk tlukin tih a nung an ti.

4)  Khuacaan lum Chinnak le Ningcang Loin Khuacaan thlennak (Global Warming and Climate Change)

Khuacaan lum chinnak le ningcang loin khua caan thlennak hi carbondioxide ruangah asi bik. Vawlei um tu ning hi Inn hring khuh (Green House gas) he an tahchunh tawn. Inn hring khuh sullam cu, “khuasik, khualum,fur” tleidannak um lo in ei din cin peng khawhnak ding caah, thlalang asi loah palasatik in an sakmi inn zoh tikah, hring nawnin a um mi inn, a pit dihmi, zeizong te a erh in ai erh dihmi inn asi. Kawl nih “Hmanlung Ing” an ti. Vawleipi hi, thli nih a tlaptlap in a tuam. Vawlei lumnak hi vandum le vawlei karah, innhring chung thlai erh bantuk in a erh cang caah vawlei pum umtuning hi (Green House gas) he tahchunh in a hmannak asi. Innhringkhua a karhnak bik cu, sehzung, motor, tlanglawng, vanlawng le meikhu phunkip ruangah asi. Cucu seh riantuan dotthennak (Industrial Revolution) chan in tam bik a thawk. Cu seh riantuan dotthennak hnu in vawleicung a linh bik kum 10 an thim i, voi 9 hi 1990 hnu ah asi. Innhring khu lakah vawleipi lumnak tambik a chuahtertu hi Carbondioxide (Co2) asi. Co2 ruangah vawleipi lumnak a chuak (Global Warming) timi ruahnak (theory) hi 2005 ah a thi cangmi Dr. Charles Keeling (Chemist) nih 1955/56 hrawngin a rak hmuhmi asi. Atu ah, vawleipum lumnak a chuak biktu hi Co2 asi ko tiah Scientists tampi hna le USA ram pinah UN zong nih an pom cang.

5)     Vawleipum Lumnak Raungah a Chuakmi (The Result of Global Warming)

 Vawleipum lumnak ruangah a chuakmi tampi lakin tlawm pal, atawinak in kan van zohhmanh lai.

 (a)  Khuacaan thlennak (Climate Change) a chuak. A caan lo meikangh, thlichia, tilet, tilianh ti bantuk a chuak—khuakhen zong a chuak i Laimi zong nih kan tuar tuk ve cang.

(b)  Tikhal (Vur) tlang titnak (Snow Melt): – Vawleipum lumnak nih (a hlei in Ozone tlap) nih Nilinhnak a kham khawh lo caah tikhal tlang titnak a chuak. Tikhal tlang a tit tikah Saram, Thingkung le Tirawl an thih lawng si loin Rili ti a thang i tivate an zor. Ruah phak lo pi le a caan lo pi ah rili tii a than tikah Tsunami le tilet, tilian a chuak i rili kam um mi minung tampi a thah tawn hna. E.g. Indonisea, Haiti, Bangladesh,……..etc. phundang in, rili tii a than tikah din awk ti a zor tinak asi (Rili ti cu din awk a tha lo).

(c)   Tirawl zornak: – Carbondioxide a karh tikah Acid ruah tiang a sur. Cu nih cun thingkung le ram hring vialte a thah hna pinah tirawl a zorter i vawlei dawm hrimhrim a thah.

(d)  Hnawmtaam a karh: – A tu kan chan hi technology chan (Computer Era) asi bantuk in Sehzung company a karh. Hnawmtaam zong a karh ve. Cu hnawmtaam a tam deuh cu tiva ah hlonh an si tikah, tichung um thilnung—nga te hna nih zawtnak le thihnak tiang an tong. Palastik le bang cu vawlei i a tlak zong ah kum zeizat a rau hnu hmanhah vawlei ah a cang kho ti lo pinah a tlak nak vawlei a rawk. Saram nih an ei sual zongah a thi fawn. India ram Tamil Nadu le Kerala states cheu khat ahcun Palastik hmang tiang an khap cang.

(e)  Zawt fahnak a karh: – Kan vawlei ah zawtfah a tam lawng si loin zawtnak thar tete (chan thar zawtnak) a karh. A ruang tampi lakah a cheu cu hnawmtaam a karh ruang le sii in thanter mi (chemical) tirawl kan ei ruangah asi.

(f)   Thingkung hau ruang le Meikhangh ruangah harnak (Deforestation /Desertification): – Vawlei ah thingkung hi phun 242,013 tluk a um i—cu lakah phun 380 cu an ci a mit cang i phun 33, 418 cu lotlau colh an i tim cang, ti asi. Lairam hmanh ah, mifim nih a tuak tikah, lovahnak, meihol rawhnak le innsaknak ca chim loin tihthing ca bak ah kum khat ah thingkung 200,000,000 reng lo kan hau, ti asi. Thingkung a ngan mi pakhat nih ti kalan 150 in 200 tiang a zawi ti asi. Kum khat ah hi vialte thingkung kan hau ahcun ti a zor thuahmah lai ti cu chim hau lo asi. Meiduah tikah saram an thi, thingkeo, zuva, khuai an thi I vawlei dat zong a ro.

(g)  Minung Lungput rawhnak (Human Pollution): -Hiti pawngkam harnak nih a kan den tikah kan lungput a rawk chin lengmang. Kan Lairam ah Vapual lungput a zor lawng siloin peem a karhnak le Parcel a karhnak zong hi kan ram nih a kan cawm khawh lo caah asi bik. Kan lungput le kan ziaza a rawhnak nih kan thlarau (Pathian he kan i pehtlaihnak) rawhnak tiang a chuak.

III. A) Ecology hi Bible he a Kalh maw?

 Kan ram thawngtha chim tampi le khrihfa nu le pa hna nih an i palh tukmi cu pulpit cung te hna in sermi thil, dawtnak kong chim cu a herh lo, an ti. A ngai ngai ahcun, sermi thil dawt hi Bible he a kalhnak a um lo. Bible cawnpiakning asi i Pathian bia bak asi fawn. Kei ka hmuhning, ‘Ka piang thar ngai ko tiin tul le laam huam ngai, phungchim zong thiam ngai—asinain sermi thil—thingkung le saram lawng si loin ngeih cia mi thilri—phaisa, thilpuan ….a dang dang, zei i a rel lo i, duh paoh sawksaam a hmangmi cu ni hrawkhrawl, mi piangthar lo bak an si’ ka ti.

d)     Genesis Cauk cu sernak tuanbia, Ecology he a pehtlaimi asi.

e)     Pathian cu zeizong sertu asi (Gen. 1:31; Ps. 33: 6; Pr. 3:19).

f)      Pathian cu zeizong thil vialte a ngeitu asi (Ps. 24: 1; 50: 12; Lev. 25: 23; Job. 12: 10).

g)     Pathian cu sermi thil vialte dawtnak le himnak he a zohkhenhtu asi (Gen. 6: 19-21; Jonah. 4: 11; Mtt. 10: 29).

h)     Pathian cu sermi thil hna a lamkaltu ah a sertu asi (Job. 12: 7-8; Pr. 6:6; I King. 17: 4-6; Ex. 13: 21).

i)      Sermi thil vialte nih Pathian Sunparnak le lianngannak a langhter (Ps. 19: 1-2).

j)      Minung cu vawlei in sermi kan si I vawlei ah kan kir than lai (Gen. 3: 19; Ecc. 12: 7).

B) Jesuh Khrih Cawnpiaknak le Ecology

 Jesuh Khrih nih Vancung pennak kong a chim ah siseh,a cawnpiak hna nak kip ah sermi thil tampi hi tahchunhnak le bianabia ah a hman hna. Mi tampi nih, “Vawlei hi tlaihchan hlah u,” timi le Rom 12: 1-2 chung I, “Hi vawlei kalning in kal ve lengmang hlah u,” timi hi I lak riangmang in vawlei le a chung ummi sermi thil vialte dawt lo ding le zeirel lonak ah kan hman. A tawi fiannak in, Jesuh nih, “Vawlei tlaihchan hlah u,” a timi le Paul nih, “Vawlei kalning in kal hlah u,” a timi hi an sullam aa khat. An chim duhmi cu “Satan pennak chung i a um mi hna nunnak tu kha chim duh mi asi.” Cucu Efesa cakuat ahcun, “Muihnak vawlei” tiah a hman. Satan pennak le muihnak vawlei cu ‘huatnak, nahchuahnak, ziarngeihna, thatlonak, dinlonak,’ hna kha chim duh mi an si. Cu nun cu tlaihchan lo ding an si, a ti nak asi. A tak tak ahcun kan umnak vawleipi le a chung ummi thil vialte hna hi Pathian nih a dawt caah a Fapa a hun thlahnak si (John. 3: 16)—“Pathian nih vawlei a dawt caah……” (Minung a dawt caah) a ti lo. Kan palh tawnmi cu, Pathian-Bu-Vawlei (God-Church-World) ti phun khin kan ruah mi hi asi. A taktak ahcun, Pathian nih a timhning cu Pathain-Vawlei-Bu (God-World-Church) ti hi asi.

 Jesuh nih vancung pennak kong a chimnak ah, “Cite le Ceunak” (Mtt. 5: 13), Thingkung le a tlai (Mtt. 7: 15; Lk. 6: 43-44), Belh Bianabia (Mtt. 13: 24), Antam Ci Bianabia (Mtt. 13:31; Mk. 4: 30-32; Lk. 13: 18-19), Lungvar Bianabia (Mt. 13: 45), Thilnu Bianabia (Mtt. 13: 33), Sur Bianabia (Mtt. 13:47) ti bantuk tampi a chim. Sermi thil hna hmangin Pathian dawtnak zong kan theih i vancung pennak kong a fianter hna ti kha a lang.

C) Ecologists’ Pawl Mitin Innpa Dawt

 Lev. 25: 2-4 le Exo. 20: 11; 23:12 chungah, minung le sermi thil le vawlei i dinhnak nawlbia, Sabbath le Jubillee nawlbia phung hna, Pathian nih aser ti kha a kan chimh. Ecologist pawl nih innpa dawt sullam an fianter ah Pathian sermi thil vialte zohkhenh le kilven a herhnak leikap in an fianter.

(i)    In term of time: – A sullam cu a chuak rih lo mi kan tefa le tufa pawl hei dawt chung asi. A ra lai mi A. D. 2050 asi loah A.D. 3000 hrawngah (Jesuh a rat rih lo ahcun) a hung um te dingmi kan tufa hna caah a tu kan vawlei le pawngkam thilri vialte hi rak kilven le zohkhenh chung a hau. Daniel H. Henning nih, “Nihin kan vawlei hi kan pupa, nu le pa hna nih ro bantukin an kan rohmi asi lo; hmailei kan tefa hna sin in kan i cawi mi le hlan chungmi ro a si deuh,” asi.

(ii)  In term of Life-Centerism: – A sullam cu a tu a nungmi hi kan bia pi bik. Asi lo ah minung lawng a biapi bik ti ruahnak hi asi. Phundangin anthropo-centerism ti asi i minung a lai bik, a bia pi bik ah chiah timi ruahnak asi. Hi ruahnak nih a chuah te ding tufa pawl le pawngkam zohkhenh a herh lo timi ruahnak a chuahpi caah hihi hrial a herh. Kan phung chim ning le Bible kan rel ning zong remh kan herh. Minung lawng a lai bik timi le a bia pi bik timi ruahnak lawng si lo in Pathian nih sermi vialte luatnak pek a duh tihi i fian taktak kan herh (Rom 8).

(iii)  In term of environment ethics: – Deut 22:1, 4, 6, 9 ah kan hmuhmi inn pa dawt nih a tlaumi Caw, Laa, Tuu tehna kawl le vawlei le pawngkam thancho ter asi. Kan nun can ziaza hi sermi hna cungah tha tein langh awk asi zia a lang.

(iv) Sabbath: - Mt.12:9-13 ah Jesuh nih Sabbath ni he pehtlaiin bia a chim—“a taktak ahcun Sabbath ni hi pawngkam zohkhenhnak le a luatnak ni ah kan hman ding asi” a ti. Sabbath ni ah na tuu hor ah tla sehlaw chuah loin na um hnga maw? Sabbath ni cu thiltha tuahnak ah hman ding asi. Ecologists pawl fianter ning in Sabbath sullam cu, “Luat asi loah thlah” tinak asi i sermi thil, saram, minung, thingkung, vawlei vialte kan luat i duhdim nun kan hmuhni siding a langter an ti.

Cun Pathian (Sunday) ni lawngah mi tampi cu ka fel i dawtnak le luatnak kong kan chim. Kan thlarau ngai. Thawh hlawm zong hawi nih 100 ks an sanh lio ah 200 ks kan sanh men ko lai. Asianin nikhatni (Monday) in zarhteni tiang (Saturday) tiang kan duh paoh in sermi thilri kan sawksaam, mi he kan i si, i mi kong kan ceih. Kan ziaza cu Pathian ni ca lawng le biakinn chung lawng ah asi awk asi lo. Kan lo lam, thil kan zuarnak hmun le hmun dang dang zongah asi awk asi. Pathian ni (Sunday) hi Pathian ni (Sunday) ni ah asi lo, Sunday ni hi Monday ni le Friday ni zongah asi. Monday in Saturday tiang zong Sunday an si awk asi. Kan Lairam hi Eden dum ah kan ser lai ti cu cauk chung le hmanthlak ahcun ka chim lengmang i kan ser taktak ko. Asinain Lairam taktak cu hmanthlak ah a um lo i cauk chung zongah a tlum fawn lo. Lairam taktak cu vawlei ah asi.

 D) Paul Cawnpiaknak le Sermi thil Luatnak

 Paul cakuat kan rel tikah Paul hi ecologist pakhat asinak kan hmuhnak cu Rom 8: 20-2 Kolose 1: 20 ah sermi thil hna an tem-innak le an hrum ainak kong a tial mi hna hin an si. Rom 8: 20-22 ah, “Nikhat khat cu sermi thil vialte hi thutnak sal sinak khan luatter an si lai i Pathian fa le hna luatnak a sung lawimi kha an i hrawm te lai—a tu caan tiangah hin cun sermi thil vialte cu nau nganfah bantuk in an hrum-ai…’ ati. Kolose. 1:20 ah, “…. Fapa thawng cun Pathin nih van le vawlei cu a dihlak in amah sin i kirter than kha a timh,” ati.

Paul hmuhning cun Pathian nih minung hi amah mui he loin a ser i a sermi thil vialte zohkhenhtu (Steward) lawng si lo in uktu kilvengtu (Quardian) ah a chiah, (Heb.2:8) a ti. Cu caah sermi thil luatnak tuanvo cu minung sinah a dihlakin pek asi. Pathian nih minung hi sermi thil dihlak duh poahin hrawhralnak (exploitation) nawl a pe lo. Rem tein zohkhenh nak le thanternak tuanvo a pek. Gen. 2:15 ah kan hmuh. Hi Bible caangah biafang pahnih a hmanmi, Hebru holhin, “Adab” le “Samas” tia n si. “Adab” ti cu “thuan”, lei thluan, riantuan (work), tuanpiak (serve), sal i can (to be slave to) ti bantukin sullam tamngai a ngei. “Sama” ti cu “conghhramh (keep, look after) zohkhenh, kilkamh (watch over), rawk lo tein chiah” (preserve, take care) tiin sullam a ngei. Cu caah Pathian nih minung tuanvo a pekmi cu sermi thilri thah le hrawhhral kha si lo in semi thil an rawhralnak hnga lo tha tein zohkhenh le karh ter kha asi deuh.

 Minung luatnak kan timi hi sermi thil hna luatnak loin a tlamtling lo. Khamhnak kan timi zong hi sermi thil vialte a huap dihmi khamhnak asi i minung thlarau khamhnak lawng asi bal lo—Bible nih a dirpi mi khamhnak cu a kau ngiangai—thlarau, thinlung,taksa le sermi thil vialte a huapmi (Holistic Salvation) asi. Luatnak hi tuanvo he a tthen kho lo—luatnak hi phunhnih in then khawh asi.

2)     Vawlei kaltak (Exodus-typed Salvation) asi. Vawlei kaltak khamhnak hi a bikin  Budhist cawnpiaknak asi i, vawlei harnak vialte hnu ah chit in hrial hi asi. Phundang cun sermi thil vialte zaamtak asi. Hi bantuk khamhnak le luatnak hi Bible cawnpiaknak asi lo.

3)     Vawlei ah nunpi (Incarnation typed salvation) mi khamhnak asi. Hihi Bible nih a kan cawnpiakmi khamhnak asi. Khrihfa mi nih kan dirpi mi khamhnak cu vawlei pumsa le thlarau, sermi thil vialte a then kho lo mi vawlei si nak chungah a lutmi (Incarnational) khamhnak asi.

IV.Zei Ruangah Dah Sermi Thil Hna Nih Rawhralnak Le Tlakchamhnak An Ton?

Thildang tampi lakah, sermi thil hna nih rawhralnak an tonnak le pawngkam thil kan dawt khawh lonak cu “duhfah hakkauhnak ruangah” a si bik. Duhfahnak mit in sermi thilri kan zoh hna tikah kan daw kho hna lo. Bishop Thomas Samuel nih, “ kan duhfahnak le kan hakkauhnak mitin pawngkam thilri kan zoh tikah  kan herh lo lengin kan hman hna i kan hrawkhral hna. Cucaah khuacaan thlennak le vawlei pum lumnak tiang a chuak” a ti. Mahatma Gandhi zong nih, “Vawlei nih kan herhmi cu tling tein a kan pek i a kan zalh khawh peng nain kan duhfahnak le hakkauhnak (greediness) tu cu a kan tlamtlinh piak kho lo” ati. An chimmi a dik hringhran. A tu lio kan vawlei pi rawhnak le zorchuknak hi vawlei nih kan herhmi a kan pekmi ruangah si loin kan duhfah hakkauh in kan hmanmi ruang tu ah asi deuh.

 K.C Abraham nih, “kan pawngkamthil–Thingkung, Saram …..tbk,  hna hi kan tlaihhrem hna” a ti. Tlaihhrem timi biafang a hmang. A chim duhnak a sullam cu a cuu za rih lo mi thingkung saram hna kha kan thah hna kan tuk hna pinah kan herhning lengin kan hman hna, tinak asi. Kan fiang rih lo mi cu, “Vawlei le a chung um mi vialte hna hi Pathian ta an si,” ti hi asi. Metropolitan of Mar Thoma Church, Bishop Chrysostom John Philip nih, “Pathian nih minung hi zohkhenhtu (steward), kilvengtu ah a kan chiahmi kan si nain kanmah zawn lawng kan i ruah ruangah nihin kan vawlei cu ramcar ah kan ser i rawhral nak nih a tlunh” a ti. Pathian nih vawlei le a chung thil um mi vialte a kan ser piak. Asi nain kan duh thimnak ruangah vawlei kan hrawh dih. Mah pumpak rum le minthan duh ruangah Pathian nih a kan tinhmi lengin thil tuah le hrawhhral hi Pathian lung kan tling hnga maw? Kan hngalh dingmi cu sermi thil vialte hna nih sinak, nawlngaihnak le luatnak an ngei dih cio.

Asi loah “Dinak” kan timi hi teh zeidah asi? “Miding lo” kan timi hna teh ho khi dah an si? Lampi i mithah hmang le thil fir hmang lawng khi maw miding lo cu an si? Pathian sermi thil duh paoh hrawhhral tu le sawksaam tu hi teh “Miding lo,” “Mihrawkhrawl” asi ve lo maw? Dinak kan timi cu Biakinn chung le pulpit cung lawng ah a um lo. “Dinnak” timi cu biafang pa hnih fonh ‘Din’ le ‘Nak’ zongah a um fawn lo. Amin an pekmi, an sak sawhsawhmi asi. Dinnak taktak cu “Tuahsernak” asi. Nihin vawlei ah Dinti a ngei lo mi minung million in an um lio le rawl ei awk, hnipuan fenh aih awk, inn le lo ngei lomi, tampi an um lio caan ah, a um ko sawk, ka ngei ko sawk tiin—‘ti’ duh paoh hman te hna, rawl ei awk duh paoh sawksaam te hna a hmang tuk rih mi cu Pathian lung a tling bal lai lo pinah thong thlak phu an si.

Bia Donghnak

Minung nih kan tuanvo kan theih lo ruang, duhfah hakkauh ruang le hmai lei zawn kan ruah lo ruangah pawngkam harsatnak nih a den bakin a kan den cang. Kan rian taktak  kan fian a hau. Sermi thil zohkhenh le kilven hi kanmah minung kan i dawt asi—Pathian fialmi zong asi caah sermi thil zohkhenh le dawt hi kan rian ah i chiah cio ahau. Sermi thil dawt le zohkhenh cu Pathian dawt zong asi. Pawngkam zohkhenhnak he pehltaiin an chim tawnmi cu, pawngkam zohkhenh a herhnak  chimlen ko i, a ngai lo mi cu, phundang in chimh an tong te lai, an ti. Cu phundang an timi cu Tilian, Thlichia le Khuakhennak te hna hi an si. Vawlei khua caan pi, ning cang tein a um khawh lawngah vawlei i a um mi vialte hi ning cang tein khua kan sa kho ve.

Kan theih dingah: Cunglei rumor (thlaurau lei) lawngte a zoh i a cuanmi cu “Dingdi” kawl pa he ani lo anti. Cucaah “Dingdi” kawl khrihfa ti khawh an si. Cun tanglei lawngte (vawlei) rumor a zoh i a cuanmi cu “Saphu” kawl pa he an i lo anti ve hna, an ti. Cucaah cubantuk i a ummi cu “Saphu” kawl khrihfa ti khawh an si ve.

 

Hi pahnih ah pakhat hmanh kan duh lo ahcun an pahnih in kan fonh hna i kan than a herh—thlarau lei zongin, fimnak lei zongin, vawlei lei zongin, Pathian hmai zongah, minung hmai zongah, a lam kip in kan than a herh cang.

Chirhchan laknak:

 C.P Lian Chawn, cawnpiaknak chungin.

 K.C. Abraham, Eco-ethics chungin.

 C.P Lian Chawn, Global Hnephnop cauk chungin.

 Chrysostom John Philipose, Mission in the Market Place chungin.

 Samuel Thomas, Our Response to Ecological Crisis chungin.

 J. No Mang, Silver Jubilee Magazine chungin.

 Joeling, “Editor Hmurka,” Muko Magazine chungin.

 Cung Lian Hup, “Eco-Justice,” The Chin Journal chungin.

 K.P. Johanan cawnpiaknak chungin