Kaa Lungsak Ko Ka Dawt!!!!

Sianginn in inn lei ah uai taktak in ka ttin. Ka mitkuh si,ka cazoh ding tam nih si,a panh ka panh kho lo. Innka ka on le cangka ka zal ka hlonh, ka uar takmi Shana Twain hla "From This Moment" ka vun phonh ta. Kawlram lei in a kan kuat mi Monkey coffee ka phio, kaa khat hnu kaa khat ka din. Ka mitkuh fim pah deuh hnu ah ka cauk kau hram ka thok.

Tlangkhat hmanh ka rel dih manh hlan ah innka kingh thawng ka theih.  Ho ko dah si hnga tiah ka vun zuan hnawh cu vai pa (kala pa) a postman uniform he innka hmai ah a rak dir ko. " Sui na si maw?" 'Aw ka si ko ka ti bak in "hi ka ah sign' a vun ka ti.  Lau nawn in ka zoh  lio ah "Aw, na parcel kan rak pe i si" a ti.  Thank you ,uncle ka ti i TK TK a ti pah in a kal beh.  Cabawm cu ka zoh i ka lau tuk! US in si. Kan ichonhlonak kum 2 hrawng si cang mi mipate,ka philh cang ko ka ti mi cu  amin ka hmuh ah thinlung a tur thiam rih ko ai. Cello tape in an tuamnak ttha tuk kaw fawi le bai ah ka ong kho lo.

 Internet chan ah zei he facebook le Gmail zong in kuat ko awk,  ei ding le thil zong si lo mi ka ti pah khin cabawm pakhat ka vun zuh khawh cu Ayaw! ka  thi ko. Zeidang si lo, Wedding Card (thitumh sawmnak ca) a si. Kaa zumh kho lo, ka mit kaa hnuai i ka zoh than.  Ka kut in ka tlaih mi cu wedding card taktak a si ko. Voi 3 ka rel cang hnu zong ah kaa lungsak kho lo.  Atu le atu ka rel than. Ka philh bak cang tiah ka rak timi hi keimah le keimah ka rak i hlennak a si ka fiang. Zeidang a um ti hnga maw? tiah cabawm ka zoh tthan cu catlap bi te pakhat a rak um rih. Catlap te ka kau cu hi ti hin:

                   

Sui

      

                       Na dam ko lo maw? Kannih zong ka dam

                       Kan kuatmi na hmuh cang lai ka zumh

                       poi ka ti tuk e, ka biakam ka tlolh ai

                       Zei si paoh ah, rat khawh naa zuam lai mu

                       Flight ticket kan lak piak cang, gmail ah rak zoh te

                       herh hai zalh nak ah Western union in tangka tlawmpal kan kuat

                       Hope to see you soon, kan ngai tuk!

                                                                                   Lunglomhnak he,

                                                                                   Thawngpi

Ka mitthli a tla. Ka ttap lo,, ka ttap lo ka ti pah bu in ka ttap thluahmah ko. Ka laptop ka on, a dai dih cang mi ka coffee ka dih ta.  Inbox ka zoh cu a cung bik ah flight ticket cu a rak um tak ko. Ka si a vang, zeiti um awk ka hngal lo. Ka tta ka chonh, thil sining vialte a ka hngalhpi tu a si ruang ah si lai. A zaang ka fak ngai rua. Voidang nakin nem deuh in a ka chonh. "Nau, khah na lung thawng ko mu. Vawlei cung pei si cu!!... mah cu, na kal hnga maw? aw!!!!!!!  Keimah nihcun kal law ka duh ko. Khua le ram hmuh pah zong si. cun, flight man  fak tuk fawn i kal law a ttha ko lai.

 Na zuan ding ni kha zei tik?""  Thlani 23" tiah ka leh. Si le  ,na passport kha rak i put law America Embassy ah thaizing cu choi u sih mu….. Rajiv chowk metro station in kan hngah lai. Khah thaizing tu ah itong usih mu,…. mangtha" a ka ti i a off diam. Cu zaan cu thlapa zong a vang khun mi a lo.. Ka hla cauk chung i a ka ttialpiak mi hla tete ka sa tthan hna. Hmm!!!! Vawlei cung ngai hi ka ti pah. Ka hrom a ka phih, ka mitthli tla kho lo, khua zaza ka ruat.  Hla a rak ka tial piak mi ni le thla ka zoh, gmail, gtalk le facebook i kan i chonh nak ka zoh than tik ah Umm,,, a rak sau ngai ve ko.

Ka co lo zong ah saupi kan i duh ko tiah kaa hnem. Zaanttim 1:00 ah facebook ka on cu a rak online ve. Sau ngai kan i chawn nain a chim mi bia cu a cakuat ningte kha a si ko. A dang a chap lo.  Zing lei 7:00 bakbak ah ka tta nih a ka call ",naa manh ahcun rak i thawh pah cang. US embassy cu mi an tam pah lai"."Aw, ka kholh lai i ka ra beh "ka hei ti. Rajiv chowk metro station in US embassy lei cu auto rickshaw in sau ngai kan kal rih. I chonh lo in minute 10 hrawng kan um hnu ah ka tta nih cun "Naa ngaih ma? kei cu kan hngar tak!!! US na hmu cang lai, na ka tei bak hih!!" a ka ti nain zei ka let kho lo..US embassy cu a dang embassy bantuk a si lo. Rumra ngei deuh in ka thei i ka zenh ngai. Ka tta nih visa application form le ka passport cu American nu a hei pek. Ttha tein a zoh hnu ah bank statement a kan hal. Ka tta nih bank statement a pek pah khin "visa interview a um lai maw?" tiah a hal.

 Cu American nu dawh nu nihcun,"Aw, a um lai, a ra laimi ninga ni ah" tiah a ti. Ningani cu a vun phan. Visa interview ah vun bia tam ngai a kan hal. Kawlram passport ka hman ruang ah si theu lai. Ka visa form, ka passport, ka bank statement an zoh dih cikcek hnu ah na kal kho ko lai a kan ti. .Sinain ka passport belte cu hmaizarh nikhat ni ah va laak te ding a si. Ramdang kal lai kan ti cu kaa manh lo ngai i ni le thla liam manh zong ka hngal lo.. Kal ding ni cu a hung phan,midang bantuk in thlah tu ka ngei lo.A ruang cu ka first love nupi thitnak puai i va kal ding ka simi an theih lai hrim ka phang.. Ka tta zong camipuai ngei kaw phone lawng in a ka thlah ve.

Khah.. Nang cu nangmah lawng in khualtlawng lengmang mi na si ko. Bawipa nih an um pi, na tha chia hlah, dam tein na phan lai i na phanh in thawng ka thanh ve te tiah a ka cah ta. Tutan cu voidang ka khualtlawn he aa lo hrim lo.. Airport zong a ngan khun mi a lo. Vawleicung ram minthang US ram phanh lai cu sikaw,  kaa ngaih pah thulh. Security check in vialte a dih, boarder pass ka ngah hnu waiting room ka tthut lio ah phone a ra.'Naa thawh maw?" na phanh lai cu kan i ngaih sup ko hih!! Dam tein rak phan law thil na ka phorh mi hmuh lai kaa ngaih tuk cang" tiah kani fanu, thawngpi nupi ding nihcun a ka ti i zeiti leh awk ka hngal set lo. "Awta, kei zong kaa ngaih ngai, kan i tonlonak hna a sau cang fawn i" ka ti lio ah khin flight no.A320 in United States of America lei a zuang ding poah kha vanlawng chung ah lut cang uh tiah an thanh. Ka thin tur a rang thluahmah," khah kanau,vanlawng cung ah ka lut lai hih! US tu ah dam in kan i tong te hna lai mu…thla rak ka cam piak uh bye " Ka ti vial ah vanlawng chung ka phan.

Voi dang ka khualtlawn he aa lo hrim lo. Voidang ahcun vanlawng cung ka phanh bak in kaa hngilh tawn nain tutan cu ka hrio sup ko.Voi 3 leng ka rel cang mi "Tlang chokhlei' rel kaa tim nain ka lung ah lut kho ruam lo. Indra Gandhi international airport in 1:45am ah kan chuak i New York cu 7:45am (US lei) ah kan phan.Vanlawng transit ka tuah i New York in Indiana airport cu anmah lei chun ah ka va phan.

Vanlawng chung cun ka chuak. Hmm,, ka phan tak cang si hi mu…. Ka lungchung ah hla aasa, “This is America an ti, freedom an kan ti, kan busy an ti timi hla cu ka nolh lengmang ko. Metro in airport lei ah kan kal. Zei bantuk mithmai he dah ka chonh hna lai ti ka ruat i zeiti si paoh ah tiah washroom lei ah ka va kal…Ka hmai kaa phiah, cream kaa thuh i nih ka vun cawng ta.  A zaa cang ko ka ti hnu ah international arrival lei cu ka va panh. Aa tthi um ding nupa hna nih an rak kan hmuh colh i an baan an rak phar len ko.

Kan kut kan i tlai hna i bia kan i ruahpah in car parking (motor chiahnak) lei kan kal. Kanau cu ka thil phorh mi hmuh lai ingaih tuk kaw…. motor chung ahcun ka bag cu a tuai len ko.” Dam tein na rak phan kho i kan i lawm tuk!!  Puai ah hla na kan sak piak kho ko lai lo maw?” tiah thawngpi nih a vun ka hal. Saupi leh lo in ka um hnu ah khin “Aw, sui, saupi vanlawng naa cit i na baa tuk lai si, ihngilh pah ko’tiah a peh. Kaa hngilh si loin lehnak tha ka ngeih lo bia a si… Ka celh lo,, ka celh hrimhrim lo. A ka hmuh ah hin zeitin tal a um ve hnga maw? ti hi ka ruat. Ka pawng tthu mi ka nau ka zoh ,thil ka phorhmi cu pakhat hnu pakhat in a zoh hna, aa nuam tuk. Thawngpi nih hin zeihmanh rak chimh dawh si lo. Zeihmanh a hngal lo mi a lo ko.Sau nawn a mongh hnu ah an inn cu kanphan.

Delhi kan umnak he cun a dang taktak. Athiang hlim tuk i a nuam. Inn ka kan phanh bak in thawngpi cu a au i “kanu, hodah si? rak zoh tuah hih a ti. A rak ka dawtuk mi ka sayama, thawngpi he kan kong a thei dihtu ka sayama,a ka hmuh cangka a ka kuh i “ka fanu suisui, na dam tawn ko ti, kan ngai tuk cuta”….” Awta, kei zong kan ngai tuk ve hna.. Sayama, na rak no chin, naa dawh chin hita, thawngpi cu na u bak si ko”tiah ka leh ve. Kanau nih lakphak a kan serh mi kan din pah in bia kan i ruah, a ka hmuh hin a ka tuar pi tuk ve ko lai dah “na lung fak tuk ko lai.  Nain mu….Pathian samhrisih kan si lo ruang ah si ko, tiah ruat ko mu... Na rak rat khawh lai hi ka zum lo. Thawngpi nih cun, nek le zeirel lo ah a ruah lai a ti nain keimah hrim nih hmuh kan duh tuk , na rak phanh cu ka mang a lo”a ti i cuti bia a chim cuahmah lio ahcun Thawngpi nih” khah!! rak i kholh ta, kanu le nangmah bia ruah cu a dong ti lai lo. Zaan zong ah nan i ruah tyhan te lai “tiah kan biaruah cu a kan tan.

Zaan ah cun kanau cu ka sin ah ih ding in ka khan lei ah a rak ra i kan ih pah in Thawngpi he an i tonnak kong, an tuanbia tete tamngai a ka chimh. Saupi vanlawng i cit cu si kaw…ka baa tuk i ka rak hngilh taak diam ko rua kha. Kaa hlauh ahcun zinglei 7:30 a rak si cang. Kaa kholh dih i India lei ka chonh dih ah khin cun breakfast zong an rak timh dih ve cang. Kan ei pah in ka nau nihcun, ka u.. nihin cu mino pawl nih biakinn an ttamh lai, va zoh ve hna u sih mu….Na hla zong cu piano he na cawng pah lai cu”a ka ti. Inn le biakinn cu aa hlat lem lo. An mino hna zoh ah tha a nuam i lung a hliphlau ngai. An i biakchonh ning ka zoh ka zoh ah ka lung an tling kho tuk,. Zei hla ka sak hnga aw!!! Tiah Ka lung aa aw-ttawm ngai. Ka first love puai cu si i kan kong a hngal mi nih zei tin an ruah lai ti ka ruat. Ka thiam mi hla vialte an sullam ka ruah dih hnu ah kan hnu lei kum 4 liam hrawng i kan puai tik ah “from this moment” ka sak te lai ka rak timi kha ka hnathlam ah an cuang tthan ruangmang. Cu hla te cu sak ding in ka lung kaa khiah i ka va cawng.

Mino biakinn ttamhmi cu aa dawh taktak. Ramsang deuh um ti cu, an ruahnak zong a sang in a kau deuh siaumau ko.Video chung lawng in ka hmuh tawnmi cu mithmuh kut tongh in kaphan ve cang. Thaizing cu an puai ni si cang kaw zeidah ka buaipi ti awk hngal loin zaan khuadei dengmang kan ituai cur ko. Sayama nu nih a ka hlauh ah cun 10 leng si cang. Midang cu an itim len cang hna. An puai ni ihruk ding i kaa cawk tharmi ka angki phor te ka hruk.. Ka hmai cu ka lungsi tiang bak ka ttamh ve.  Ka sam ka phiar len lio ah nupi tthi ding pa cu ka khan ah a rak lut i “Ka ngaithiam ko mu….ka biakam ka tlolh”a ka ti.

Ka ngeihchia lo. Kan lomh pi tuk!! Kei zong Pathian nih nangmah bantuk a ka pek ve ko lai si” tiah nih bu tein ka leh. A ka naih deuh i “ A poi e……a poi tuk!!!”a ti tthan. Khah! va kal cang. Ka nau nih an kawl sual lai ka ti vial ah khin ka cal ah a ka hnamh,”Kan colo hi cu ka thih hlan kaa lungsak lai lo”a ti pah in a mitthli a tla. Khah ka dawt, na fimtuk khah! Va kal cang, phundang in a kan ruah lai tiah nih butein ka ti ve nain ka mitthli nih ka celh lo nak cu an rak phuan dih ve cang. Puai kal cu kan i thawh hna.

US phanmi kan hawi le tam taktak he kan itong. A cheu cu ka min a ka philh cang mi zong an um. Kan hawi le tam deuh hi le kan kong a thei hngal mi lawngte..Lungthin a keh a kuai ko bu i i nihter hi cu a rak har hringhran ko. Zaanlei rawldumtti lio ah hlasa dingin an ka auh. Ka sak hlan deuh te ah stage cung in” thawngpi, lungtthat loin um hlah law…….nang le kei cu midang bantukin iduh ti lo ruang i aa tthenmi kan si tung lo. Hmun le hma nih tthenmi pei kan si ko cu…. Ka nau kha ka dawtpiak cikcek mu….” ka ti i ka hla cu ka sak.

Ka sak dih bak in ka tthutnak lei panh loin washroom ah ka tli colh. Ka hnu in ka hawi nu, A sung  nih a ka dawi.” Sui… ttap hlah! Nu… ttap hlah hen!! Innka rak ong. Rak ong zok hi!! zei na tuah? Innka kingh thawng cu a thang chin lengmang. Inn leng ah ka dirnak sau tuk cang… Ka khua lin tuk cang hi ti thawng ka theih. Ka mitthli kaa hnawt i ka mit ka au cu…….a zei US phanh bia nemmam… Ka hawi le he inn kan hlan mi room chung tein US ka va tlawnta bia a rak si. Innka ka va on ahcun Jenny cu a thlan he a rak i ciah cang,...............

Cabuai cung i ka cauk cu ka mitthli nih a rak cinh dih cang. Jenny cu ka mang ka chimh i “si le khah, kan hnu lei ah ka love story kan chimh lai na ka ti kha cazoh  hlan ah kaa dinh pah in ka chim cang”a ka ti i ka tuanbia cu hitihin;

Thawngpi hi muidawh tuk cu si lo nain  a zaa, a kum leng in a fim tiah an fak  theu mi a si. Cu pin ah ca a thiam i bawlung chuih zong a thiam ngai hoi. Thawngpi he  tang sarih kan kai in kan rak i duh cang. Ka lungfim taktak hlan in kan ti lai cu.. Cu lio ahcun a nu hi kan English sayama a rak si i a ka dawt tuk. A rianttuan hawi sayama dang sin zong ah suisui hi ka fapa hniang caah ka ham mi si a rak ti tawn. Hngakchia duh kan ti cu kan i zah tuk i a chonh hmanh kan i chawn setsai ngam bal lo. Kan mitsir te in khin kan i veng tawn i sianginn kai paoh ah muthai  kan hei i phorh . Cu  kan i phorh mi hmanh cu hmaitonh in pek hmanh kan rak ngamh lo. Dam lo ruang maw,  pakhat khat ruang i sianginn kai lo in ka um cun a ttin in phone a ka chonh tengteng. Sianginn na kai lo cun kai ka huam ve lo a ti.

Cuticun,tang riat tang kua  kan dih tiang dawtnak fek dawtnak thiang he a ho van ngai lo in kan rak i duh kan rak i daw ko. Kan kar ah zeibantuk thlichia a hran hmanh ah kan tei khawh peng. Tanghra hi Pyin Oo Lwin lei ah sianginn kai tti kan rak i tim nain tlamtlin lo nak tete ruang ah kei cu Hakha ah ka rak kai than. Hmun dang ka dang ah a kai ko nain a ka philh bal lo. Boarder in chuah caan an ngeih paoh ah phone a ka chonh nain kan chuah caan i lo hlah kaw tam deuh cu ka nu he an i chawn tawn. Ka philh khawh lomi a bia cu “ka pawng ah na um cun kaa nuam tuk i ca ka zoh kho lo. Ka pawng na um lo ah le kan ngai tuk i ca ka zoh kho hoi lo. A buaithlak taktak” a ti mi te hi nihin tiang ka hna thlam ah a cuang peng rih ko.Tanghra kan awn in cun Mandalay ah university kan kai tti lai tiah saduh kan rak  that.

Cu ti nuam tuk i kan len tti lio ah cun chantiluan (ramdang kal) nih chan sin ah a kan luan pi i zaangfahnak ngei loin a kan tthen ruangmang ko. A pate nih an chungkhar in a auh hna i ruah lo piin kal colh ding an si ti kha an kal lai nikhat aa duh lawng ah a ka chimh. A kal hlan ah bia tampi a ka kamh ta. Ni le thla cu an liam i university kai zong cu a hun cu ve. Kan kai tti lai kan rak tinak Mandalay lei ahcun keimah te lawng ka panh. Sianginn ka kai chung ka rak inuam ngai nain “um ve seh law” timi ruahnak nih ka thinlung a kehkuaiter peng. Ka nuamh ding tluk in ka rak i nuam kho bak lo.

IT chan cu si cang i Gtalk in kan i chat i gmail in ca kan i kua peng. A lungdong lai ti a ka phang tuk i thazang peknak ca kuat hi a hrelh ballo. Nang le kei cu kan i co hrimhrim lai. Khoi ka khua le ram na phanh zong ah kan kawl lai. Pathian nih keimah caah an sermi na si  a rak ka ti tawn. College kum khatnak ka dih hnu ah mirang holh zong ka thiam deuh lai tiah Delhi lei sianginn kai ding in ka ra. Hi ka ka phanh hnu hrim hin cun kan i naih chin cang mi ka lawhter. Sinain mu… kan i hlatnak a sau cang i kan karlak ah thli a rak tamtuk cang. Hi tluk zumhawktlak in ka ummi zong hi a ka zum setsai ti lo mi a lo cang.

Khuazei ka hmun na phanh poah ah kan kawl lai a rak ka ti tu nih khan a mah kaa thiamthiam in kan i hlat tuk e a ka ti cang.  A hnu bik ka hmuh ni May 19,2009 thok in nihin ni tiang ah zumhawktlak te in ka hngah ko. Amah belte,thawngpi  nih a zaa cang ko a ti hnu ah cun keimah lei in nawl len awk zong um ti lo cu mu!!.. Kum pi kum nga, kum ruk chung ka rak duh i rak kir than sual ah tiin kum hnih chung  zumhtlak taktak in ka rak hngahmi, amah lengleng ka rak ti tawn mi pa nih hiti a biakam a tlolh cang  hnu ah hin cun a ho pa hmanh khi ka zum kho ti hna lai lo. I hmuh lo le  itonlonak a hun sau deuh hin cun kan i duhdawtnak hi a zor i hmun le hma nih ruah awk kan hngalh setsai hlan ah second pakhat hnu pakhat a kan tthen ko ee……….. Zei si poah ah caan saupi kan rak iduh i nu pakhat dirhmun in zumhtlak tein ka rak hngah ko bu ah kir caan hngal loin a liam cang ko mi cu… zei khom va si ai kun,   “Kaa Lungsak Ko Ka Dawt” tiin ka mitthli  he…….

Note: Hi cattialtu hi Nungak Sui Meng Par a si. A lawn le lawn lo  kong belte cu nangmah nih halte.