Vawlei Ka Hmuh Ning (30)

 By ; Stalin Tha Cung Lian

1.Khawika kan um paoh ah thil pahnih ai-awhtu kan si. Cu cu: Pathian ai kan awh, cun kan miphun ai kan awh.

2. Jesuh caah au-nak a thangbikmi pahnih cu “Hosana le Vailam ah khenh ko” ti  a si.

3.Zumhnak le nawlngaihnak hi an tli in an zaam ballo.

4.Thlarau nih a tonghmi minung kha amah kelning in a um peng ahcun cu thlarau cu lunghrin awk a um.

5.Carelnak nih mit khua hmuhnak a kan pek, cattialnak nih michawnkheng a kan siter.

6.Nunnak hi a hmang thiammi caah a sunglawi kho peng. Sihmanhsehlaw, a hman a thiam lomi caah aw-lawkchong van sannak a si.

7.Thinhunnak isum khawh hi vawleicung ralhrang bik teinak nakin a ttha deuh.

8.Lungsau tein thiltuahnak nih teinak bualrawn ah lunglawm in a kan dirter.

9.Minung a simi paoh nih leiba pathum kan ngei. Cu kan leiba cu; a kan sertu Pathian sin kan leiba, a kan hringtu kan nu le kan pa sin leiba le a kan cawmtu kan vawlei/kan ram sin leiba hna an si. Leiba cham lo cu sualnak lakah a ngan bik pakhat a si.

10.Sianghngakchia paoh nih a harbik ah an ruahmi cu cazoh hi  a si. Asinain, lungsau tein le teirial tein ca a zohtu hna cu a hnu ah an ichir ballo.

11.Zumhnak nih thazaang a tthawnter, ruahchannak nih hnangamnak a kan pek, dawtnak nih vawlei kha a daihter.

12.Minung a simi paoh nih nuamhnak kan kawl tawn. Asinain, cu nuamhnak nih zeithil ttha ngai a chuahpi ballo.

13.Lungthawh a caktukmi (atu le atu a piangtharmi) hi zeitik hmanh ah Pathian salttha taktak an ichuah kho ballo.

14.Vawlei kan nun caan hi a tawituk caah, caan a hmang thiammi lawng nih vawlei a thawtnam kha an hngalh khawh.

15.Midang pehtlaih a thiammi hi vawlei cung sipuazi ttha bik a si.

16.Mi kong ceih huam tuk hi mizei ruamram lo dirhmun a langhternak a si.

17.Lawmhnak/nuamhnak lawng a ruat mi minung hi an phichuak a ttha ballo.

18.Caan thawn a hmang mi nih zeithil hmanh an tuah taktak ballo.

19.Midang upat hi ralchiat a si lo, fim tu a si deuh.

20.Uah le mi zeirello hi taklawng in aa chokmi mihrut pa he an idannak a um lo. Cucaah mi nih an thangthat ball hna lo.

21.Thiamnak le hngalhnak paoh hi zuamnak le ttuannak ruang in a chuakmi an si. Cucaah mi thathu nih thiamnak le hngalhnak an ngeihkhawhlonak  a si.

22.Minung nih miaknak duh ah thilthalo an tuah tawn. Asinain, cu thil nihcun caan rau lo ah sio in a sio tawn hna.

23.Biachim thiam pa nih kawm chung i a ummi vate a chaih khawh lio ah Cattial thiam pa nih lamhla pi i a ummi sahrang kha a kah khawh cang.  Biachim thiam pa cu a thih tikah a biachim thiamnak zong a thi ve. Sihmanhsehlaw, catialthiam pa cu amah a thih zongah a cattialmi a thi ti lo.

24.Lungrual khawhnak dingah ahcun tinhmi goal aa khah a herh.

25.Chin miphun nih hnipuan hruk-aih cun chantiluan kan dawi kho ngai, nain chantiluan nih a chuahpi mi fimthiamnak cu kan dawi kho lo.

26.Minung a simi paoh nih Pathian kha an kawl. A ttih zong an ttih tak ko. Asinain, cu an kawlmi le an ttihmi Pathian nawl cu a hohmanh nih an ngai lo.”

27.Cawnpiaknak paoh hi an tha dih lo i, sianginn paoh zong hi nun remhtu an si thlu lo. 

28.Midang tah na duh ahcun nangmah kha i tah hmasa. Cun midang nih an in tah ding ning tiang in i tah rih.  A si khawh ahcun midang tah lo kha a ttha bik.

29.Lawmhnak hi minung kan tam deuh paoh ah a ngan deuh. Sihmanhsehlaw, ngaihchiatnak cu minung kan tam deuh tikah a fa/hme deuh ve.

30.Biachim thiam paoh hi mifim an si lem lo.

31.Midang nih dawt kan duh tlukin kanmah nih midang daw hna usihlaw, vawlei hi vanram he ai dannak a um hnga lo.

Note : Na hmuh ning rak chim ve.