FLORENCE NIGHTINGALE (1820 – 1910 A.D)

 “A hmasa bik siizung nih a herhmi cu mizaw cungah fahnak pek lo kha a si.”

Florence Nightingale cu 12 May 1820 kum ah Vialla La Columbaia, Florence ah a chuak i a chuah hnu ah an khua min lak in Florence tiah min an sak. A pa cu William Edward Nightingale a si i, 1 June 1818 ah Frances Smith he an i tthi um. Amah cu sal zuatnak dohnak leiah thapetu ngaingai a si. Fanu pahnih an ngeih hna. Parthenope le Florence an si. Parthe min an peknak cu a chuaknak Naple min an lak piakmi in a si.

Florence Nightingale cu Lea Hall ah a tthanglian. 1825 Kum ah an chungkhar Lea Hurst ah an i tthial i cuka ahcun Nightingale timi rianttuan an thawk. A pa nih 1826 ah Embley pangpar dum Hampshire ah a cawk i, 1828 ah an ram ah High Sheriff a si. An chungkhar in tthalcaan ah Lea Hurst ah an um i a kih caan ah Embley Pangpar dum an um. A caan ah London an tlawng tawn.

Florence Nightingale cu cawnnak leiah tampi hmuhtonnak a ngeimi a si i, a umnak hmun ah nu pawl nih caan ttha tlawm tuk lawng an hmuhmi a duh loh. Misifak pawl a veh tawn hna i mizaw pawl zohkhenh a huam phunte a si. London siizung pawl ah a kal i nu pawl rian hmuh kawh nakdingah hlathlainak a ngei tawn. Nurse rian hi cawnnak le thiamnak nakin a si kho bik ah a hmuh. Hi lio caan ah nurse pawl cu hlawhhlang pawl nakin a niam deuhmi rian ah ruah a si.

Nightingale nih siizung a veh tawn hi 1844 in ai thawk i kum 11 chung ai peh. 1849-50 Kum lio ah Izip ram ah chungkhar hawi hna he an um tti. Paris lei a kal pah ah St. Vincent de Paul sister pahnih a ton hna i hi sister pahnih nih Alexandria ah an convent ngeih nakding kong an chimh. Nightingale nih sikan ngeimi le tthate in cawn piakmi Sister pawl sin in nurse pawl a hmuhmi hna cu England ram nu nakin an ttha deuh tiah a ti.

31 July in 13 August 1850 kar ah Nightingale nih a voikhatnak Kaiserswerth ah a ummi Institute of Protestant Deaconesses a veh. Mah hi institute cu sifakmi hnipuan, eidin ngei lomi pawl zohkhenhnak caah 1851 ah an dirhmi a si. Cu hnu ah hi institute cu nu hna sayamah le nurse cawnpiaknak ah ai chuah. Mah hi a tlawnnak nih nu caah rian an hmuh khawh nakdingah Nigtingale thinlung ah a van chuak. 1851 kum ah thla 4 chung mizaw zohtu ding nurse caah Kaiserswerth ah cawnnak ai lak. Inn a tlun hnu ah London siizung pawl vehnak tam deuh in a ngei i, 1852 khuasik caan ah Edinburgh le Dublin siizung hna ah hlathlainak a va ngei tthan. 1953 kum ah Nightingale nih santlailo nu hna caah siizung timi ah a voikhatnak haotu sinak a hmuh.

1854 Kum ah Cimean raltuknak a um i cu ka hmun mirang camp ah mizaw harnak tuarmi le hliamhma tuarmi thawngthanhnak nih mirang pawl an thin a phawh ngaingai hna. Hliamhma tuarmi chungin British le France ralkap karah thleidannak a um tiah William Russell nih Times ah a langhter. “Mizaw le hliamhma tuarmi Scutari ral siizung ah kal in rianttuantu ding ai pumpe mi nu kan lak ah an um lo maw? Hohmanh England fanu lak ah a herh tukmi caan le dawtnak in rian ah a kal ding kan um lo maw? Kannih cu France miphun mah caah ai pumpemi le rianttuannak hngar in kan um ko rih lai maw?

14 October ah Nightingale nih ral hmun zung ah rianttuan awkah ai pe cang nain a hawikom Sidney Herbert raltuknak secretary a simi nih Nightingale sinah Crimea ah kal dingin ruahnak pek in ca a kuat. Nightingale nih a tlingmi nawlngeihnak nurse nu hna cungah a ngei lai lo. Sii lei rianttuantu sin zong in bawmhnak tling le ttuanpinak a hmu lai lo. Cucaah Sidney Herbert nih nawlngeitu hna sin in a herhmi paoh Nightingale rianttuannak caah hal dingah ruahnak a cheuh.

Nurse minung 30, Roman Catholic Sister 10, Anglican Sister 8, St. John’s Institute in Nurse 6 le siizung dangdang in ai pumpemi minung 14 he Nightingale cu ral hmun Crimea ah 21 October ah an pok. Scutari hmun 4 November ah Inkerman raltuknak laite ah an phan. Nightingale cu Nu hna hruaitu tiah ralkap pawl nih an ti. Nightingale nih umnak hmun a khuarnak cu Scutari ah ralkap pawl siizung ca i inn saupi artlang in an sakmi a ngaingai mi ah a si i hika hmun cu hmunnawn khahnak hmun damlonak atu letu a chuahnak a si. Ti chiahnak thawl an ngei lo. Rawlchuannak um-kheng zong an ngei lo. Sappia, taval, hnipuan, siizung lei thilpuan zei hman a um lo. Ralkap pawl an uniform he an ril ko hna thi le hnai in an khat. An sining cu cattial in fianh awk le tahchun awk zong a ttha lo tiangin fihnung taktak khi a si. Tthah le hrik in an khat rih. Cawhnuk dorkhatte zong hmuh a si loh. Changreu nih le a thur in an thur. Changreu hnukmi nih le fih an nung hringhran.

Changreu hnukmi cu Irish in a rami a si i an thu pah cang hna. Sa nih le a cinmi khairiat bantuk an si. Hi sining cu France ram an phak hlan lo an dirhmun a si. 1854 Kum dih hlan ah Nightingale le a rianttuan hawi nurse pawl nih Scutari siizung ah thil sining an van remh ngaingai. Times nih bawmhnak an hawl piakmi an kuat hna. Cun midang rianttuantu zong Nightingale te rianttuannak caah an santlai ngaingai. December ah 46 nurse Crimea ah an kal chap. Rianrang tein Nightingale nih coka lianpi le thilsuknak a sakpi hna. Ralkap pawl nupi le hngakchia pawl a zohpiak hna i, an herhmi tiangin a pek hna. Nightingale cu nikhat ah suimilam 20 chung hi rian a ttuannak ah a ke in a dir peng. A hawile zong amah bantukin rian an ttuan ve. Nightingale cu hliamhma tuarmi pawl nih Meiinn nu/ ceunak tiah an auh.

Thianhlimhnak a chambau ruangah 1855 kum thokka ah Nightingale mizaw mi chung ah Ngal-eu le Taifot zawtnak in mi tampi an zaw. Cu lawng siloin ralkap sibawite 7 le nurse minung 3 hi zawtnak ruangah an nunnak a liam. Hi lio caan ah mizaw an karh tuk caah minung 2000 tiang an phan. Mithi zong an tam chin lengmang caah a rannak in thianhlimhnak an zuam i 1855  June thla ahcun mi thi le mizaw an tlawm deuh ngaingai cang.

1855 May ah Nightingale le a hawile Bracebridge le Alexis Soyer nih Balaclava hrawngah a ummi siizung pawl an va veh hna. Hi lio caan ah Nightingale cu ni 12 chung fak lakte in a zaw. A zawtnak a zual ngaingai. June thla thok ah Nightingale cu Scutari ah a rak kir tthan i a rianttuanmi a pehzulh tthan. Mah hi a rian pinah carelnak le nuamhnak pa pawl le chungkhar caah a tuahpiak chap hna. 1856 March thla ah Balaclava ah a rak kir tthan i cuka ahcun siizung an khar July thla tiang a cam. Cun 1856 August ah amah pumpak in England ram a tlawn. Hi lio caan hi midang theihlo tein khual a tlawn i a umnak Lea Hurst tiang a kal.

1856 September ah Queen Victoria Balmoral ah a va tlawn i ralkap siizung ah an tuarning le remh a herhmi thil kip siangpahrang nu Victoria sinah a va chim. 1855 November ah Nightingale rianttuannak le nurse pawl sianginn caah fund an hawlpiak. 1869 kum ah starling pound 50,000 an hmuhpiak i Nightingale sianginn le Nurse pawl caah inn hna cu St. Thomas’s Hospital ah an dirh. London a kir hnu 1857 kum ah Crimea ah ralkap pawl caah sii lei rianttuannak a rak ngeihmi he pehtlai i report a tuah. 1858 ah British ralkap siizung ah damlonak an tonmile thil dangdang an tonmi kong a chuah tthan. 1858 kum ah hi kong he pehtlai in hlathlaitu bu commission an dirh. Cu commission nih cun Nightingale thawngthanhnak a tuahmi he pehtlai in tehte ttha an hmuh khawh. Cu caah 1859 kum ah ralkap sii lei college Chatham an dirh. Cun a voikhatnak ralkap siizung zong Woolwich ah 1861 ah dirh a si tthan.

1879-71 kum America ramchung ralthawhnak le Franco-Prussian ral lioah Nightingale ruahnak pekmi cu acozah nih an rak hman. 1868 kum ah Nichuah London Nursing Society le 1874 kum ah Workhouse Nursing Association le Miharsa caah Nurse National Society le 1890 kum ah Queen’s Jubilee Nursing Institute dirhnak hna ah Nightingale cu biapi ngai in cawlcanghnak ah ai tel. 1857 kum ah India ram ah uktu cozah doh awkah ralkap nih ral an tho i hi lioah Nightingale rianttuannak a herh ahcun India ram kal dingah Nightingale ai tim. Hi lioah Nightingale rianttuannak a herh lo nain ralkap pawl le mizapi ralbuainak hmun ah a ummi hna caah thianhlimhnak lei rianttuan ding Nightingale nih a rak duh. Nightingale rianttuannak in India cozah nih thianhlimhnak department India ram ah an dirh ve. India ram cu a tlawng lo nain mangttaam harnak, Florence Nightingale tiluannak a herhnak le India rammi sifahnak kong pawl ca in a ttial. 1890 kum ah a cattialmi cu India khuate pawl ah phawtzamh an si. A voikhatnak Nurse kong 1580 kum ah  rak ttialmi cu Nightingale nun dam lioah voi tampi an namh (print) khawh.

Nightingale nih 1907 kum ah Order of Merit timi a hmuh. 1908 kum ah Freedom of the City of London laksawng pek a si. Hi hlan ah German order of the Cross of Merit le French Sui Meal of Secours aux Blesses Militaires a hmuh cang hna. 1910 May 10 ah Norwegian Red Cross Society nihlaksawng an pek tthan. 1910 August 13, South Street, Park Lane, London khua ah Nightingale nunnak a liam i August 20 ah East Willow, Hampshire ah an vui.

                                                      -----------------

Note: Vawleicung Miroling cauk (By Mang Hlei Cung)chungta lakchinmi a si.