POLYCARP ( 69–156 A.D)

“Kum 86 chung a rian ka ttuan chungah ka cungah palhnak zeihmanh a ngei lomi hi zeiti’ndah nautatnak ka pek khawh lai?”

Kum zabu pahnih hrawng hin Roman kuttang um ram lawng si loin Asia Minor, Europe, Chaklei Africa le Palestine hnu lei Mesopotamia tiangin Khrihfa zumhnak cu karh hram ai thawk. Cu lakah zumhnak lei ah a tthawng ngaimi hmun pakhat kan hmuh khawhnak cu Asia Minor (Tuchan ah cun Turkey tiah auh a si cang) hi a si. Sihmanhsehlaw tuchun ni ah cun hi hmun ah thawngttha bia chim hi a ngah lo tlukmi dirhmun a si cang.

Mah hi Asia Minor Khrihfabu tuanbia cu Lamkaltu Paul missionary a voithum khualtlawnnak lakah pakhat chingchang khan a rak i thawk. Jews miphun pawl nih Paul thawngttha bia chimmi kha Antioch in an cohlan duh lo tikah Gentile mi pawl caah Pawl nih rianttuan dingin biakhiahnak a ngei. Cu hnu cun hmunkip kakip ah thawngttha bia phuan hram a thawk hnu ah, Khrihfa hi hmunkip ah a rak phan i a karhnak a si.

Kum zabu pakhat dih lei ah Ephesus Khrihfabu cu Jesuh zultu Johan nih a zohkhenhmi hna an si. Sihmanhsehlaw Johan cu Patmos tikulh ah thongtlak a si i, cuka ahcun Biathlam cauk, Khrihfabu pasarih cakuat zong kha a ttial. Johan hi Rome nawlngeitu Trajan chan tiang, zultu hleihnih lakah hnu dung bik tiang a ummi le a nungmi a si. Kum zabu pahnih lioah Rome cozah nih Khrihfa pawl an karh ngaingai ti hi an van theih fian tthan. An zumhnak cu khuapi lawng ah siloin khuate tiangin a karh ngaingai caah Rome zumhnak lei he ai pehtlaimi an tuah tawnmi sattil raithawinak tuah zong hi a zawr ngaingai i sattil in chawlet chawhrawl pawl an sung ngangai. Cucaah an hruaitu Trajan sin tiang Khrihfa cawlcanghnak duh lo tiangin duhlonak an rak tuah. Cu caah Khrifa pawl hremnak tiang a rak chuah phahnak kha a si.

Antoninus ukpennak chan ah hin Marta thihnak lakah minthang cemmi cu Polycarp kong hi a si. Amah cu Smyrna Bishop, kum (69 – 156) tiang a ttuanmi a si. Polycarp cu mi sawsawhte a si, nain zumhnak tthawng ngeimi pa a si. Cu lawng siloin a chungtel inndawng (member) dihlak nih an upatmi le zumlotu tiang nih upat ttihzahnak an pekmi pa a si. Zumtu pawl nih a kedan phawihpiak hmanh hi an min chawrnak ah an duhmi a si. Zumlotu pawl nih an timi cu Khrihfa hna Pa, kan Pathian hrawktu tiah an ti tawn.

Lamkaltu pawl chan donghnak le Polycarp chan hi ai pehtlai. Johan nih a hngakchiat lioah a rak cawnpiakmi le Jesuh nun lioah an mit bak in a hmutu pawl nih Jesuh kong an chimnak `ha tein a theitu a si. John nih a cawnpiakmi a si ruangah Jesuh zultu hna dang bantuk tein upatnak midang nih an pek ve mi a si.

A.D. 155 kum ah Anecitus, Rome Bishop a tlawn lioah Marcion timi pa (Amah nih biakam hlun a cohlang lo. Pual cakuat (10) le Luke cauk edit mi hna lawng kha a cohlan. Docetist bantukin Jesuh vawlei ratnak hi ahmaan takmi a si lo. Cun amah hi a thi taktak fawn lo tiah a cawnpiak hna), zumhnak pial a si ruangah (A.D. 144) kum ah Khrihfa sinak in an chuahmi pakhat he an i tong. Marcion nih na ka thei ti maw tiah bia a hal i, ‘kan thei tuk teh, nangmah cu Satan fa hmasabik na si’ tiah Polycarp nih a leh. Rome nawlngeitu Antoninus Pius (138-161) pen lioah Khrihfa hna cu hremnak in an luat. Amah hi Khrihfa hna caah nunnem ngaingai mi a si. Sihmanhsehlaw Smyrna an umnak hmun in hremnak a chuak i khrihfa minung 12 cu Arena hmun ah thah dingah sualphawt an tong. Hi lio caan ah Khrihfa an hremnak bik hna cu sahrang sehter, nun bu in mei khangh, hngawngtan, chiti lin chung ah nun bu in rak thlak tibantuk pawl hi an si.

Roman cozah nawlngeitu pawl nih Polycarp tlaih dingin an hawl kha zumtu dang pawl nih an theih tikah an thin phang. Cu caah Polycarp nih a duh lo buin lo ah an thuhter. Asinain Pathian nih hngalhnak a pek caah ka nunnak a liam tuan lai tihi ai theih. A thih hlan nithum ai duh ah mang a manhmi cu a chantling kha mei nih a kangh. Cu caah zumtu sinah a chimmi cu ka nun bu in mei ah khangh ka si lai a ti. A nunnak hi luat kho dingin caanttha a ngei ko nain Pathian nangmah duh bang si ko seh tiah a ti. Nikhat cu Polycarp zohkhenhtu pakhat an tlaih i an hrem. A bawipa Polycarp umnak an hal tikah ttha tein Roman cozah nawlngeitu pawl cu Polycarp umnak a chimh hna.

Polycarp umnak hmun an hei phak tikah ttha tein Polycarp nih a rak chawnhbiak hna, din awk, ei awk zong khualttha bantukin a pek hna. Nawlngeitu pawl nih an hmuh tikah tarpi khabe hmulsaupi a si tikah an khuaruah a har ngaingai. Suimilam pakhat chung thlacamnak caan a hal hna i, a pawngkam ummi Khrihfa pawl kha zumhnak ah an tthawn ding le hmailei ah harnak an ton nakding kongah thazaang a pek hna. Laa an cuanter i khuachung lei ah an kalpi. Lampi ah Caesar hi Pathian si ti law zeidah harnak in luat ko ca tiah an fial. Sihmahsehlaw an fialnak nih Polycarp zumhnak a tei kho hlei lo.

Rome cozah nih lentecelhnak hmunpi chung an van luh tikah vancung in aw pakhat a rak thang, “Tthawng ngai in um, Polycarp, pa pawl hi celhnak hna,” ti a si. Cu bia cu Khrihfa a simi pawl midang nih an theih dih cio. Sihmanhsehawl ho set thla a si ti an thei kho lo i, Pathian aw tu kha a rak si deuh.

Arena hmun ah sahrang pawl sehternak le lentecelh zoh nuam pawl tuahnak cu a dih. Cutikah nawlngeitu nih Polycarp cu hi tihin a ti. “Tar na si cang. Caesar hi Pathian a si ti, Jesuh cu hlaw ko tiah a fial”. Sihmanhsehawl Polycarp nih mipi lei kha a ban a tlir hnawh hna i, “biaknak ngeilomi sinak hi kaltak cang uh” a ti hna. Rome cozah nawlngeitu nih a biachimmi cu a nolh tthan. Asinain Polycarp nih a duh hlei lo.

Cutikah Polycarp nih a lehmi cu, “Kum 86 chung a rian ka ttuan chungah ka cungah palhnak zeihmanh a ngei lomi hi zeitindah nautatnak ka pek khawh lai? Amah cu ka Pathian le a ka khamhtu a si” tiah a leh tthan. Voithum tiang Rome cozah nawlngeitu nih Jesuh hlawt dingah a fial len nain Polycarp nih Khrihfa a sinak ai let duh hlei loh. Cutikah mizapi nih sahrang sehter loin mei in khangh siseh tiah an van ti. Cucu Polycarp nih a rak chim chungmi a tlin nakding a si. Thing pawl an van pawn duahmah hna. Bishop Polycarp nih a angki fualmipi ai phawih. A taisawm le a butkedan hri a van phawih hna. “Mei-alh in khawh nakding tthawnnak a ka petu nih meikang lak dir khawh nakding tthawnnak zong a ka pek lai,” tiah Polycarp nih a phuan. Mei kangh hram an van thawk cang. Cutikah “Khrih hrai ka hrawm khawh caah Pathian ka thangtthat,” tiah Polycarp nih a ti. Sihmanhsehlaw Polycarp cu mei nih a kang kho lo. Cu caah fei in a thin zawnah an sawh i cuticun mei nih a kangh i Polycarp cu a nunnak a ciam.

Polycarp ruh pawl kha vui dingah halnak an tuah nain an senh hna lo. Asinain a hnu ah a tangmi tlawmpal tete Khrihfa pawl nih an khawmhsuat khawh tthan mi in Polycarp caah thlan an tuah i cuticun kumchiar tein Polycarp chuahcam tuak lawmhnak (birthday) an tuah. Polycarp thihnak nih cuka hrawng ah hremnak a donghter i Khrihfa pawl caah hremnak a van dih. Polycarp cu thi hmanh sehlaw a zumhnak ah ralttha tein a dirnak nih midang caah zumhnak nun tampi a pek hna.

Note: Vawleicung Miroling cauk (By Mang Hlei Cung)chungta lakchinmi a si.