EUSEBIUS (263-339 A.D)

“Eusebius nih Jesuh zultu hna chan dongh in A.D. 300 chung Khrihfa tuanbia hi rak ttial hlah sehlaw tuchun ah rel ding le chim ding kan ngei lai lo”

Lamkaltu hna cawlcanghnak cu kum (30) caan chung Pentecost in Paul thonginn in a luat tiang 62 A.D. tluk tiang kha a si. Cu hnu kum (300) chung cu Eusebius Khrihfa tuanbia a ttialmi ah kan i hngat. Eusebius nih hi kum (300) chung Khrihfa tuanbia hi rak ttial hlah sehlaw tuchun ah rel ding le chim ding kan ngei lai lo. Hi lio caan he pehtlai in Eusebius cattial mi ti dah lo tuanbia an ttialnak tepawl cu zeihmanh a um ti lo. 

Zeica’htiah hi kum zabu pathum lioah cattialtu hna nih Papyrus (Papyrus cu Nile tiva kam ah a ummi thingkung a hawng in tuahmi cattialnak a si) cattialnak an rak hman i, cu hna cu caansau a nguh lo. Kum zabu pali thawkka tiang hi Papyrus cattialnak cu rak hman a si. Sihmanhsehlaw kum zabu pali hnu cun Papyrus ai-ah savun cungah cattial hram an thawk tthan. Cu cattialmi pawl cu caansau deuh a nguh khawh cang.

Eusebius rianttuannak cattialmi pawl cu amah hlan ah an rak ttialmi rianttuannak nakin a nguh deuh. Hi Eusebius cattialmi chungah Khrihfa tuanbia, hremnak, Martar thihnak, cawnpiaknak hmaan lo le tthennak kong an i tel hna. Kum zabu pathum lioah Khirhfa ah a lutmi hna chungin cathiam le mirum tampi an rak i tel. Euesbius cu Palestine ah (263 A.D.) hrawng Emperor Gallienus pen lioah a chuak. Rome nawlngeitu Valeria hremnak hi a thih kum (259 A.D.) ah Khrihfa hremnak cu a dong ve. A fapa nih Khrihfa thilri le daihnak caan a chuahter.

Eusebius, no lio caan hi theih khawh tuk a si lo. Khrihfa chungkhar a si maw, si lo? tiah hngalhnak a um lo nain Khrihfa cawnpiaknak le tipilinnak cu Roling Herod nih a rak dirhmi Caeasarea khua ah a ngei. (296 A.D.) ah Eusebius nih minote Constantine hi Emperor Diocletian he Nichuah Empire an tlawn lioah a rak ton khawh men tiah zumh a si.

Eusebius a no lio caan ah Caesarea khua ah a nunnak biatak tein a rak iaptu cu Khrihfa upa Pamphilus hi a si. Pamphilus cu thiamsang (Scholar) le cawnnak `ha karhter dingah ai pe. Amah cu Alexandria in Caesarea ah a rak peem i caruk le theology sianginn a dirh hna. Pamphilus kut tangah Eusebius hi fimcawnnak a ngei i, cu hnu ah hawikomttha ah i ser dawh an si. Zeica’htiah Eusebius nih Pamphilus hi a sangbik in a chim thiam tawn i, a uar taktak mi a sinak zong a langhter tawn. Hi lio caan ah Eusebius nih zumlotu le Khrihfa cattialmi tampi a rel i cu nakcun cattial thiam ah ai chuahnak hi a si.

Februay 303 AD thawk in Diocletian timi Rome nawlngeitu nih hremnak fak a chuahter i cu hremnak cu a fak deuh caan, ai dinh caan ti’n kum (10) chung a si. Hi hremnak pumpak hrimhrim in a hmutu Eusebius nih tuanbia le Palestine Martar tiin a ttial hna. Hi lio caan ah Eusebius cu Khrihfa upa caah chiti thuh a si cang i tlaihkhihnak thladem tang ah a um. March thla ah hremnak nih Caesarea a rak phanh ve cang caah zumtu tampi an zumhnak ruangah sualphawt an si hna. Kum hnih hnu ah hremnak cu a zual chin lengmang i biakinn pawl hrawh an si. Baibal cattial pawl mei in khangh an si. Cun zumtu pawl hrem le thahnak tiang nih a den hna. “Kan mit hrimhrim in kan hmuhmi hna cu thlacamnak inn pawl an tthek, an baoh dih hna, a thiangmi le thawhchuah hnawhmi Baibal kha market hmun hna ah mei in an khangh hna, Khrihfabu hruaitu pastor pawl le midang pawl kha khatlei le khatlei ah heh tiah an zam hna,” tiah Eusebius nih a tuanbia cauk chung ah a ttial.

308 A.D. ah Pamphilus le Eusebius tlaih a si i, 309 A.D. ah Pamphilus cu thah a si. Sihmanhsehlaw Eusebius nih luatnak a hmuh. A luat hnu ah Tyre le Egypt ram hna ah a tlawng. Cu lioah cun Khrihfa an tlaihmi hna kebai, mitcaw le kut le ke aitan mi pawl vawlei khur cawhmi chung ah an tlak lio hna a hmuh hna. 311 A.D. in kumhnih hnu ah Constantine nawlchuahnak in hremnak a dih. Khuaruahhar ngai in hi kum (10) chung ah Eusebius nih a cattialnak ah theitlai tampi a rak ngeih khawh. Khrihfa chanrelnak le tuanbia, Pamphilus tuanbia, Palestine Martar in ai thawknak le adang cauk (10) Khrihfa tlangtar in a rak ttial hna.

314 A.D. ah Eusebius cu Caesarea ah Bishop caah an thim i, catial rian caan zeimaw zat ai din. Hremnak caan dih hnu ah biakinn le thilri pawl remh le zalh a herh taktak lio caan a si. Cu caah Eusebius nih thilri remh le zalhnak in a caan tampi a pek. Cu pinah Khrihfabu chung ah cawnpiaknak hmaan lo tlangbawi Arius an timi pa nih Alexandria chan in a rak thawkmi kha a lut. Cu caah Khrihfabu chung ah zumhnak hmanlo ruangah an i tthen hna. Cu cawnpiaknak cu Khrih hi Pathian tling a si lo ti a si. Hi cawnpiaknak hmaan lo ruangah Emperor Rome cozah nawlngeitu nih rualremnak a um nakhnga A.D. 325 May thla ah Bishop Council Nicaea ah a rak tuahpi hna.

Eusebius cu Rome nawlngeitu Constantine hawikomttha a si. Constantine nih Antioch khua caah Bishop rian a pek bal nain a la duh lo. Sihmanhsehlaw Tyre ah A.D. 335 ah Synod haotu lutlai (President) rian cu a cohlan. Eusebius cu caankhat lioah a cattialmi le a cawnpiaknak cu zapi nih an cohlang kho lo nain caan tlawmpal hnu ah cun zumtu nih an tlaihchan ngaingai mi zumhnak hrampi ah an hman hna.

Constantine thih hnu ah Eusebius nih Constantine tuanbia tawi a ttial. Cu chung ah cun Emperor hna biapitnak le Emperor hna cu Pathian ai-awhtu an si tiah a zumhnak a langhter. Cu hnu kum 2 ah Eusebius cu 30 May, 339 A.D. ah a nunnak a liam.

                                       .....................................

Note: Vawleicung Miroling cauk (By Mang Hlei Cung)chungta lakchinmi a si.