“Fahnak
um lonak hi thinlung ca men ah kai tlaih lo. Asinain ramkhelnak le a taktak
caah a si,”
Aung San Suu Kyi cu 19 June, 1945 ah
a chuak. Amah cu Kawlram ralkap cozah dotu lei in National League for Democracy
(NLD) ah chairman a si. 1990 Kawlram thimnak ah (NLD) party nih rampumpi vote
59% in teinak a hmuh i Parliament tthutden 485 ah 392, 81% a hmuh. Sihmanhsehlaw
Kawlram nawlngeitu nih Suu Kyi cu innthong an thlak. 20 July 1989 in 13
November 2010 tiang kum 21 chung ah kum 15 tluk thongthlak a si. Amah cu vawleicung
ramkhel lei rianttuannak ah minthang mi nu pakhat a si.
1990 kum ah Suu Kyi nih Rafto le
Sakharov laksawng a hmuh. Cun 1991 kum ah Nobel daihnak laksawng, 1992 kum ah
India ram nih Jawaharlal Nehru laksawng le Venezuela nih Simon Bolivar laksawng
an pek. 2007 kum ah Canada cozah nih upatnak in rammi sinak an pek. Mah bantuk
pekmi ah Suu Kyi cu minung 4nak a si. 2011 ah Wallenberg Medal a hmuh tthan. 19
September 2012 ah America ram nih an laksawng sang cemmi Congressional Sui
Medal le Presidential zalonnak Medal an pek. 1 April 2012 ah National League
for Democracy nih Pyithu Hluttaw ah Daw Suu cu palai hrangah an thim. (NLD) party
nih Lower house Parliament ah tthuden 45 chung ah 43 an hmuh. 6 June 2013 ni
Vawleicung Chawlehnak Forum tonnak ah Suu Kyi nih Kawlram president caah 2015
thimnak ah kai zuam duh tiah a phuan.
Aung San Suu Kyi cu 19 June 1945 ah
Rangoon, hlan lio Kawlram khualipi ah a chuak. A pa cu Aung San a si i amah nih
kawlram ralkap a rak dirh i British pennak in 1947 kum ah Kawlram luatnak
(independence) a rak lak. Cu kum ah Aung San cu lainawn nakin a nunnak a liam.
Daw Suu le a unau pahnih Aung San Lin le Aung San Oo cu a nu Khin Kyi nih a
cawmkenmi hna an si. Aung San Lin cu kum 8 a si ah an innpawng tidil ah a tla i
a nunnak a liam. Daw Suu a upa cu San Diego, California ah a pem i U.S. rammi sinak
a lak. Aung San Lin a thih hnu ah Daw Suu le a nu cu Inya Tikulh ah an i tthial
i cuka ah Daw Suu nih minung phunphun, ramkhel kong le biaknak kong a hmuh.
Methodist Mirang High School in fimcawnnak ai thok. Cu sianginn ahcun holh cawn
leiah pahrang a ngei ngaingai mi a si tiah an ti. Daw Suu cu phungki biaknak
Theravada Buddhist biami a si.
Suu Kyi a nu Khin Kyi nih Kawlram
cozah thar uknak chung ah hmunhma a hmuh caah 1960 kum ah Khin Kyi cu India le
Nepal ram hna ah Kawlram palai rian a ttuan. Cu hmun hna ah cun Suu Kyi nih a
nu a zulh ve. Suu Kyi cu Jesus and Mary sianginn ah ca a cawng. Hi sianginn hi
New Delhi, India ram ah a ummi a si i, 1964 kum ah Lady Shri Ram College, New
Delhi ah a um tthiamtthiam mi in Degree Politics lei in a lak. Cu hnu ah St
Hugh’s College, Oxford ah B.A. degree Philosophy, Politics le Economics in 1969
kum ah a lak tthan.
.jpg)
Cu hnu ah Suu Kyi cu New York khua a
chungkhat a simi Ma Than E amah cu Kawlram hlasak thiam sinah a um. Suu Kyi cu
United Nations sinah kum 3 rian a ttuan. 1971 kum dongh leiah Aris, Tibetan
nunphung zatlang leiah scholar a simi he an i tthi-um i Bhutan ram ah khua an
sa. A hmaikum ah Suu Kyi le Aris nih fapa Alexander Aris, London khua ah an
hrin. Cun an fapa pahnih Kim cu 1977 kum ah a chuak. 1985 in 1987 tiang Suu Kyi
cu M. Phil. degree Shool of Oriental and Africa Studies, University of London
ah Kawl holh subject in a cawng tthan. Shimla, India ram ah a ummi Indian
Institute of Advanced Studies ah hawikom sinak in kum 2 rian a ttuan.
1988 kum ah Suu Kyi cu a nu dam lo
ruangah Kawlram ah a rak kir. Cu hnu ah Kawlram Democracy cawlcanghnak ah ai
tel. Suu Kyi pasal nih 1995 kum Christmas ah Suu Kyi cu Kawlram ah a rak tlawn.
Mah hi caan hi Suu Kyi le a pasal Aris a donghnak bik hmunkhat ah caan an hman
a si. Cu hnu ah Kawlram ralkap nih Aris cu Kawlram tlawnnak visa an pe duh ti
lo. 1997 kum ah Aris cu Cancer zawtnak ngeih hram ai thok. Aris nih a nupi Suu
Kyi Kawlram ah a tlawn khawh nakdingah UN Secretary Kofi Annan le Pope John
Paul II nih Kawlram cozah an nawl nain Aris, Kawlram rak tlawnnak caah
zohkhenhnak ttha kan ngei lo caah Suu Kyi nih a duh ahcun a pasal tu va tlawng
seh an ti i visa an pe duh loh.
Hi lio caan ah Suu Kyi cu innthong
thlaknak in a luat ko nain Kawlram ka chuahtak ahcun Kawlram ralkap cozah nih
Kawlram kir an ka senh tthan ti lai lo ti a phan caah Kawlram a chuahtak duh
loh. Aris cu 27 March 1999 ah kum 53 a tlin, a chuah ni ah a nunnak a liam. Hi
lio caan ah Suu Kyi cu inn thong chunga um lio a si. Aris nih a nupi Suu Kyi cu
voi 5 lawng tonnak caantha a ngeih khawh. A donghnak bik an iton cu 1995 kum ah
a si. Suu Kyi le a fale United Kingdom ah a ummi hna he zong an i tthen. Sihmanhsehlaw
2011 kum thokin a fale nih Suu Kyi cu Kawlram ah an rak tlawn khawh tthan.
Nagris thlichia nih 2 May 2008 ah
Kawlram a rak den lioah Suu Kyi umnak inn cihmi a choihpiak i mei Lektthik a
rawk. Mei vannak seh an pek lo caah pazawngdan zan paoh ah ai van tawn. August
2009 kum lawng ah Suu Kyi umnak inn remh dingah thawngthanhnak an tuah. Suu Kyi
cu 13 November 2010 kum in inn thongthlaknak in luatnak pek a si.
Nobel daihnak laksawng an pek lioah
Suu Kyi cu inn thongtlak in a um lio a si caah a fapa Alexander le Kim nih a nu
ai-awh ah laksawng an va lakpiak. Suu Kyi nih Nobel daihnak laksawng a hmuhmi
U.S.D. Nuai 1.3 phaisa cu Kawlram minung ngandamnak le fimcawnnak caah a hman.
Suu Kyi nih fahnak umlonak (non-violence) hi ramkhel a rianttuannak ah a hman.
“Fahnak um lonak hi thinlung ca men ah kai tlaih lo. Asinain ramkhelnak le a
taktak caah a si,” tiah Suu Kyi nih a chim. Mah hi Suu Kyi nih a chimmi cu a
bianak Theravada Buddhist cawnpiaknak he ai pehtlaimi a si.
1996 Dohnak:- November 9,1996 ah Suu Kyi le a party
hruaitu dang Tin Oo le U Kyi Maung telin khual an
tlawnnak Yangon ah dohnak an tong. Minung 200 tluk nih
motor an i cit lioah an zuanhnawh hna i thir cincik, thirfung,
lungtum le a dang hriamnam he an phomh hna. Mah hi
minung pawl hi Union Solidarity and Development Association
(U.S.D.A.) an si lai tiah zumh a si. Anmah cu hi thil
dohnak tuah dingah Rs. 500 (USD $ 0. 50) cio pekin fialmi an
si lai an ti. NLD nih Palik sinah phungningte in duhlonak an
tuah. Nawlngeitu nih hlathlainak an tuah ko nain
zeihmanh a takin a cangmi a um lo tiah Amnesty International
thawngthanhnak nih a ttial.
Innthong
Thlaknak:- Suu Kyi cu a
luancia kum 21 chung ah 15 chung hi
.jpg)
Suu Kyi cu thawnglatu pawl he zong
tonnak an khap. 1998 kum ah thawnglatu Maurizio Giuliano
nih a inn ah hman a thlakmi nawlngeitu nih an kham i a film, tape le adang note
ttialmi pawl an chuh dih. Sihmanhsehlaw hi thil an tuahmi cu Suu Kyi nih cozah
ai-awhtu pawl mileng a ngeihmi he ai ralchan. Inn thongthlak a si lio 1994 kum
ah General Than Shwe le General Khin Nyunt he 20 September ah tonnak an ngei.
Inn thongthlak a si lioah Suu Kyi nih damlonak fak a ton pah lengmang caah
siizung tiang a phan tawn.
Ralkap hnu dirmi Union Solidarity
and Development Party (U.S.D.P.) nih kawlram thimnak ah theinak an hmuh hnu,
hlan deuh thimnak in kum 20 a rauh hnu, 12 November 2010 ah Suu Kyi luatnak pek
dingah hnatlaknak minsen an thut i, 13 November 2010 ah inn thongthlaknak in
Suu Kyi nih luatnak a hmuh.
Tlaih A Ton Can:-
· 20 July 1989: Kum thum inn thongthlak dan an pek.
· 10 July 1995: Inn thongthlaknak in a luat.
· 23 September 2000: Inn thongtlak a si tthan.
· 6 May 2002: Thla 19 hnu ah luatnak a hmuh.
· 30 May 2003: Depayin mitampi thahnak in tlaih a si.
Hngalhlonak hmun ah thla 3 an chiah
hnu ah inn thongthlak a si tthan.
· 25 May 2007: Inn thongthlaknak can U.N. Secretary Kofi Annan nih
General Than Shwe sinah nawlnak a tuah bu in kumkhat an chap.
· 24 October 2007: Kum 12 inn thongthlak a si cang. Vawleicung ram
12 ah duhlonak an langhter.
· 27 May 2008: Inn thongthlaknak kum an chaptthan. Cucu vawleicung
phung le Kawlram phunglo ning a si.
· 11 August 2009: Inn thongthlaknak May 2009 buainak
ruangah thla 18 an chaptthan.
· 13 November 2010: Inn thongthlaknak in luatnak a hmuh.
Note: Vawleicung Miroling cauk (By Mang Hlei Cung)chungta lakchinmi a si.
-----------------
No comments:
Post a Comment