PAUL (5-67 A.D)

“Khrih nawl ka cawn bantukin ka nawl ka cawng ve uh” Paul cu A.D. 5 hrawng ah Tarsus khua Cilicia (Thlanglei a lai Turkey) ah a rak chuak. 67 AD Rome khua ah a nunnak a liam tiah zumh a si. A min hmasa cu Saul ti a si. Damasakas lampi ah Jesuh le Paul an i tonnak ah Jesuh nih Saul tiah a auh. Paul nih nunthlenak a ngeih caan zeimaw zat hnu ah Paul tiah a hmasabik auh a sinak hi Cyprus tikulh ah a si (Lamkaltu 13:9). Mino a si liote ah Jerusalem khua ah a ummi Gamaliel sianginn ah fimnak cawn awkah a kal. Mah hi sianginn cu min a ngei ngaingai mi sianginn a si.

Amah cu kum zabu pakhat lioah Khrih thawngttha a rak aupitu missionary miroling a si. Amah cu Lamkaltu chan ah biapi taktak Pathian rianttuantu pakhat a si. AD 30 in AD 50 kar ah Asia Minor le Europe ram hna ah Khrihfabu tampi a rak dirh hna. Paul nih Jews miphun sin le Roman uknak tangah a ummi hna sinah thawngttha a chimnak bawmtu ah Jew miphun le Roman citizen ka si tiah a sinak a langhter tawn.

Roman pengkhat a simi Cilicia khualipi in Paul nih amah cu Hebrew hrin, Benjamine phun, Farasi le Judaism lei ah tluktu um lomi pa a sinak a cattialmi ah a langhter. Jesuh zultu pawl uangthlar ngai in a hrem hna pinah Khrihfabu dir tharmi hrawh ai zuam. Sihmanhsehlaw Damasakas lampi ah a thotthanmi Jesuh Khrih a tonnak in a nun ai thleng. A nun ai thlen hnu ah Pual nih Jesuh cu Khrih le Pathian fapa a sinak thawngttha chim hram a thawk. Judah phungbia cawnpiaknak he pehtlai in Paul nih Moses phungbia cawnpiaknak hna cu Khrih nun ah an tling dih cang asiloah Khrih hmelchunhnak a rak langhtertu an si a ti. Hi ruangah Paul le midang lamkaltu hna pehtlaihnak kar ah hmuh thiamlonak a rak um len.

Paul nih Jesuh Khrih nun le biakamthar Khrih thihnak le thawhtthannak in sermi kong cawnpiaknak a ngeih tawn hna. Biakam thar cauk chung ah Paul nih cauk13 a ttial hna i Lamkaltu cauk zatceo tluk cu Paul nun le a rian kong a lang. Lamkaltu rianttuannak lak ah Paul rianttuannak hi a kau khun i hmual zong a ngei khun tiah chim khawh a si. Paul cawnpiaknak kha Augustine nih ai chirhchanh i khamhnak cu nawlbia zulhnak in a si lo, zumhnak in a si tiah a ti. Cu bantuk tthiamtthiam in Luther Doctrine zongah Paul cawnpiaknak kha biapi in an lak ve. Baibal nih Paul thihnak a ttial lo.

Tuan Ah Rianttuannak

Paul nih nuntlennak a hmuh hnu ah Damasakas ah a kal i cuka ah cun Ananias nih tipil a pek i amit cawmi zong khuahmuh tthannak a pek tiah Lamkaltu cauk nih a ttial. Hi khua hi Paul nih thihnak in ka luat tiah a chim (I Corinthians 11:32). Paul nih lung thlennak a hmuh hnu ah Arabia ah a kal hmasa i Damasakas ah a rak kir tthan (Galatians 1: 17). Paul Arabia a tlawnnak kong he pehtlai in Baibal ah a dang hmuh khawh a si lo. Micheu nih an zumhmi cu Sinai tlang ah a kal i these rawn hmun ah daite in khuaruahnak a ngei tiah an zumh.

Galati cauk chung ah Paul nih a langhtermi cu lung thlenak a hmuh hnu kumthum hnu ah Jerusalem ah a kal. Cu ka ah James a ton i Simon Peter he ni 15 an um ti hna (Galati 1: 13-24). Cu hnu ah Paul nih a chimmi cu Sinai tlang cu Arabia ah a um a ti (Galati 4: 24-25). Paul nih thawngttha hi lamkaltu hna sin in ka hmuhmi a si lo. Jesuh khrih pumpak ttha ka cohlan tiah a thanh (Galati 1: 11-12). Cu pinah Paul nih Khrih thawngttha ruangah pumsa in hremnak siseh, cun hmurka in biachia nihsawhnak phunkip a tonnak a langhter.

Galati cauk chung ah Paul kong a lang chapmi cu lungthlennak a hmuh Kum 14 hnu ah Jerusalme ah a kal tthan (Galati 2: 1-10). Mah hi can chung ah zeidah a cang tiah theih a si loh. Sihmanhsehlaw Lamkaltu cauk le Galati cauk nih a ttialmi cu hi caan donghlei ah Barnabas nih Paul a hruai i Antioch ah an kir (Lamkaltu 11: 26). A.D. 45-46 hrawngah Judea ram ah mangttaam a tlung i Paul le Barnabas cu Jerusalem ah bawmhnak Antioch sinin an pek hna. Lamkaltu cauk ttial ningah Antioch khua cu Stephen a thih hnu ah zumtu pawl ai tthentthekmi tonnak laifang a si a ti. Antioch khua ah Jesuh zultu pawl cu Khrihfa tiah an auhnak hmasa biknak a si (Lamkaltu 11:26).

A voikhatnak Missionary Khualtlawnnak Lamkaltu cauk nih Paul khualtlawnnak hmunthum ah a tthen. A voikhatnak cu Barnabas nih Paul kha Antioch in Cyprus le Thlang Asia Minor a kalpi i Antioch an kir tthan. Cyprus ah Paul nih mithleh thiam Elymas an cawnpiaknak a nihsawhtu a sik i, a mit a cawtter (Lamkaltu 13: 8-12). Mah hi thawk hin Paul cu an bu ah hruaitu in a lang. Cun Pamphylia chung ah a ummi Perga ah tilawng in an kal. John Mark nih a kirtak hna i Jerusalem ah a kir. Paul le Barnabas cu Pisidian Antioch ah an kal. Sabbath ni ah Senikok (Hlan lio khrihfa hna nih thangtthatnak le tonnak ah a hmanmi hmun) ah an kal. Hruaitu hna nih biachim dingah an sawm hna. Paul nih Israel miphun tuanbia Izip in David siangpahrang chan tiang a chimh hna.

Pathian nih Jesus cu David hrinsor in Israel a pek hna nak Paul nih a chim. Khuakhat hnu khuakhat in khamhnak thawngttha chim dingah khual an tlawnnak Paul nih a chim. Jesuh thihnak le thawhtthannak zong a chimh hna. Septuagint (Biakam hlun cauk Hehrew hol ttialmi kha Grik holh in ttialmi) cauk chungin Jesuh cu biakamhmi khamhtu a si i, an sual ngaihthiamnak a pek hna nak kha a chim fawn. Jews miphun le Pathian a ttihmi Gentile mi hna nih tam deuh chim dingah hmaizarh Sabbath ni ah an sawm tthan hna. Cu lioah khuami dihlak ti awk in an i pum hna i an cawnpiaknak cu an ngaih hna. Mah hi thil cangmi ruangah Jews mi cheukhat pawl an thinhung ngaingai.

A Voihnihnak Missionary Khualtlawnnak AD 49, Jerusalem Council dih hnu (Jerusalem Council ah cuarpar tannak kong elnak a um) ah Paul cu a voihnihnak missionary khualtlawn ai thawh tthan. An khualtlawn lio Mediterranean rili hrawng ah Paul le a khualtlawn hawi Barnabas cu Antioch ah an i din i cuka ah cun John Mark sawm ding le sawm lo dingah faklak in bia an i el. John Mark nih tuan an khualtlawnnak ah a kirtak hna i inn ah a tluntak hna. Paul le Barnabas cu an bia-el mi an daih khawh lo caah an khualtlawnnak i tthen dingah biakhiahnak an ngei i Barnabas nih John Mark ai kal pi i Silas cu Paul sinah ai fonh.

Paul le Silas nih Paul a chuahkehnak Tarsus, Derbe le Lystra an tlawn hna. Lystra ah Timothy amah cu biachim thiam an ton i an sin lak dingah biakhiahnak an ngei. Khrihfabu a karh, zumtu tampi an i chap i nifate in zumhnak leiah an tthawng chinchin. Filipi khua ah Paul nih salnu amah cu lim khuavang a ngeimi nu kha Paul nih a khuavang a chuahpiak tikah a bawile hna cu an thinhung. A ruang cu an phaisa hmuh nakding an sungh cang caah a si. (Lamkaltu 16:16-24) Hi lio caan ah hi khua mi hna nih missionary pawl an huat hna i Paul le Silas cu thong an thlak hna. Khuaruahhar in li ai hninh hnu ah thonginn kutka ai cheu i hi lio caan ah Paul le Silas hi an zam kho ko. Asinain an zam lo. Mah hi ruangah thonginn bawipa nih lungthlennak tiang a hmuh phahnak kha a si. (Lamkaltu 16: 25-40). An khualtlawnnak an peh i Berea in Athen ah an kal. Athen ah Paul nih Jews, Pathian a ttihzahmi Grik mi pawl sinah Senikok ah thawngttha a chim. Cu lawng siloin Areopagus hmun ah Grik mifim pawl sin zongah Paul nih thawngttha bia a phuan.

50-52 A.D. hrawng ah Paul hi Korin khua ah thla (18) a cam. Corinth khua ah Paul nih Aquila le Prisciall a ton hna i, anmah hi zumtlak khrihfa an si, cu pinah Paul missionary khualtlawnnak zongah a bawmtu an si rih. Hi hna nupa nih Paul le ahawi cu an zulh hna i Ephesus khua ah an kal. Ephesus khua ah Khrihfabu a tthawng ngaingaimi le zumh awktlak ngaingai a simi an dirh. Cu hnu ah 52 A.D. ah Caesarea khua ah Khrihfa pawl tonnak an ngei. Cun Antiok khua ah an kal i cuka ah kumkhat tluk a voithumnak missionary khualtlawnnak an ngeih hlan ah an um.

A Voithumnak Missionary Khualtlawnnak Galatia le Phrygia hmun hna ah Paul nih a voithumnak missionary khualtlawnnak a ngei i zumtu pawl thapeknak, cawnpiaknak le chimhhrinnak a ngeih hna. Cun Paul cu Khrihfa hna caah biapi a simi khua Ephesus ah a kal i cu khua ah cun kum thum tluk a um. Hi lio caan ah Paul nih khuaruahhar thil tampi a tuah. Mizaw a damter hna. Khuachia tuahmi an khuachia a tthawl khawh hna. Hmundang zongah missionary rianttuannak he pehtlai in cawlcanghnak tampi a ngei. Ngunsertu hna sinin dohnak Paul nih a ton hnu ah Ephesus khua a chuahtak. Paul, Ephesus khua a um lioah cakuat pali a ttial i, Korin khua Khrihfa pawl nunzia dawh lomi he pehtlai in chimhhrinnak zong a ngeih fawn hna. Paul nih Achaea chung ah a ummi Macedonia hmun hna ah a kal i, Syria ah kal ding timhtuahnak a ngei nain Jews pawl nih Paul doh dingah timhtuahnak an ngeih ruangah Macedonia lei ah a kir tthan. Mah hi lio caan A.D. 56-57 hrawng ah Paul nih Corinth khua ah a tlawng i thlathum a cam. Paul le a hawikom hna cu Jerusalem khua an rak kir pah ah ah Philippi, Troas, Miletus, Rhodes le Tyre khua pawl an pal pah hna. Paul nih a khualtlawn a dih hlan ah Caesarea khua ah a hawile he Philip sinah an cam. Philip cu thawngttha chimtu a si. A hnu bik ah Jerusalem ah an kir (Lamkaltu 21: 8-10; 21:15).

Rome Khua Kalnak Paul nih missionary voithumnak a khualtlawn donghnak ah Jerusalem khua a phan i, cuka ah cun Asia Jewspawl (Roman uknak tang ummi an si kho) sin dohnak an tong. Mah cu dohnak ruangah Paul cu an tlaih i Caesarea ah kum hnih thong an thlak. A donghnak ah Paul le a hawikom hna cu Rome khua ah Biaceihnak zung chuah dingah Lawng in an kal. Rome khua ah kum hnih chung biaceihnak hngah pah in Paul nih a inn hlannak in thawngttha chimnak a ngei.

Cu pin cu zei dang thawng hngalh khawhmi a um lo nain Nero nih Paul cu a luatter hnu in Rome ah thawngttha chimnak a pehzulh tiah chirhchanh dang nih a langhter ve. Hi chirhchanh nih a langhter chapmi rih tthanmi cu Spain le Britain ram hna ah Paul hi khual a tlawng kho men ti hi a si. Hlanlio Khrihfa cattialtu Clement nih Paul cu Nitlaklei ah fak pi’n Khrih thawngttha thanhtu, aupitu a si a ti. Chrysostom nih Paul cu Spain ah thawngttha a chim tiah a ttial, “Paul cu Rome a um hnu ah Spain ah a kir. Sihmanhsehlaw hi hmun ah a kir tthan le kir tthan lo theih a si lo.” Cyril nih Paul cu Rome uknak he ai pehtlai mi hmun tiang in thawngttha tlingte in Spain tiang a phuan tiah a hmuhsak.

A Donghnak Jerusalem Tlawnnak Le Tlaihnak Avoi nganak le a hnungbik Paul nih A.D. 57 ah phaisa khawlh ah Jerusalem a rak phan tthan. Lamkaltu cauk ttial ning ah Paul cu lawmte in dawn a si. Sihmanhsehlaw Jews pawl Gentile miphun lakah a ummi hna kha Moses hlawt i hngakchia pawl cuarpar tan lo ding tiah na cawnpiak hna ruangah nangmah cu nawlbia dotu na si tiah James le upa dang nih ralrinnak an rak pek (Lamkaltu 21:21). Voikhat cu Paul nih Temple ah cawnpiaknak a ngeih lioah zapi nih thah an timh nain Rome nawlngeitu nih misual chiahnak ah an chiah ruangah thihnak in a rak luat tthan. Paul cu Jews pawl hmai i, ai langh tikah thah ding tiah timhnak a ummi an theih sinin Caesarea ah zan hlan in an zamter. Cuka ahcun kum hnih chung nawlngeitu thar nih a konglam zohnak a ngeih hlan kha thong thlak a si. Nawlngeitu nih Jerusalem ah biaceihnak zung chuah tthan ding tiah a timi cu Paul nih Rome rammi a sinak a langhter hnu in Sesar sinah nawlnak tuah ding a hal.

Rome Ah Paul Hnu Bik Caan

Paul nih Caesar sinah Rome rammi sinak in nawlnak tuah ding a kal pah ah an Lawng Malta ah a rawk i hi hmun ah Paul nih Publius timi pa tikulh ummi cu a va ton i, cu pa sinah phundang ngai a simi zawnruahnak kha a hmuh (Lamkaltu 28:2). A.D. 60 ah Rome khua a phan i kum hnih chung innthong thlak in caan a rak hmang tthan.

Irenaeus kum zabu pahnih lio ca`ialtu nih Peter le Paul cu Rome Khrihfabu dirhtu an si i Linus nih bishop rian a chawn hna tiah a ti. Paul cu Rome Bishop le Khrih Thawngttha phurtu a si lo Rome khua a phanh hlan ah Khrihfa an um cang (Lamkaltu 28: 14-15). Paul nih Rome khua a tlawn hlan ah ca a kuat hna (Rom 1:1; 15: 23-29). Asinain in Paul cu Rome Khrihfa hna caah biapi thil tampi a tuahtu a si. Paul thihnak he pehtlai in Baibal le chirhchan dangin hmuh khawh mi a um lo, nain Ignatius nih Paul cu A.D. 110 ah Martar in a nunnak a liam tiah a ttial. Khrihfa mi hna nih Paul cu A.D. 60 hnu ah Nero uknak in a hngawng tan a si tiah an zumh ve.

Paul Ca ttialmi Biakam thar cauk 27 chung ah uk 13 hi Paul nih a ttialmi a si tiah zumh a si. Bible thiamsang tampi nih an chim tawnmi cu kum zabu pakhat lio ah Khrihfa mi nih Paul hi rak ngei hlah usihlaw Khrihfa hi hremnak ruangah a tlau cang hnga. A ruang cu Paul nih Khrihfa zumhnak fekte in a dirpi lawng siloin cu a zumhnak hna cu ca in tthate in a ttial hna i a kilven.

-----------------

Note: Vawleicung Miroling cauk (By Mang Hlei Cung)chungta lakchinmi a si.