ALBERT EINSTEIN (1879-1955 A.D)

“Khua tuaktannak cu thiamnak nakin a biapi deuh.” Kum zabu pakul chung ah science lei le khua tuaktannak lei minthang hna lakah Albert Einstein cu Relativity Theory (Pakhat le pakhat cuaithlainak Ruahnak fianternak) a hmuhchuahmi ruangah a minthang ngaingai mi a si. Relativity Theory (Pakhat le pakhat cuaithlainak Ruahnak fianternak) ah ai telmi theory pahnih 1905 kum ah le a tlangpi in (General Theory) timi 1915 kum ah a hmuh in a chuahpi hna. Mah cucu Einstein nih vawlei tthawnnak tiah a ti. Mah hi Theory pahnih cu a har in sullam thuk taktak a ngeimi an si. Hika ah zeidah an si tiah fianter kai tim lo. Relativity Theory (Pakhat le pakhat cuaithlainak Ruahnak fianternak) hmuh tonnak cu tampi a um ko.

“Zei zongte hi cuaithlai phung an si dih hna”. Mah hi phung cu mitampi nih theihmi an si ko. Einstein Theory cu phundangpi in va mersan le chimmi an si lem lo. Fiangte in Kanan (Mathematics) le science leiah tliangte in tuaktannak ah cuaitlai an si hna. Lungthin ah a ummi caan le a lawngmi hmun (Time and space) theihnak cu zohtu cungah ai hngat. Hramthok in mitampi nih Einstein nih a lungthin in a ruahmi a hnulei ah atak in ai hlatnak le atak a simi cu caan kha a um tiah an rak zumh i mah hna cu hriamnam in tling khitkhette in tuaktan khawh a si an ti. Einstein Theory nih hin atu caan a simi kha a elnak thawngin science ruahnak kha a thlen khawh.

Albert Einstein cu Ulm, Wurttemberg, Germany ram ah 14 March, 1879 kum ah a chuak. A chuah zarh ruk hnu ah Munich ah an i tthial i Luitpold Gymnasium ah sianginn a kai. Cu hnu ah Italy ram ah an i tthial i Albert cu Aarau, Switzerland ah fimcawnnak a peh. 1896 kum ah Zurich khua ah a ummi Swiss Federal Polytechnic School ah physics le mathematics chimtu dingah cawnnak a ngei. 1901 kum ah 95 Albert nih diploma a lak i cu kum tthiamtthiam ah Swiss rammi sinak a hmuh. Hi lio caan ah cachimtu rian a hmuh lo caah Swiss Paten zung ah sehlei bawmtu rian a ttuan. 1905 kum ah doctor degree a lak. Patent zung a um lioah Albert nih a rianttuanmi chinchiah awktlak thil tampi a tuah hna. 1908 kum ah Albert cu Berne khua ah Privatdozent rian pek a si. 1909 kum ah Albert cu Zurich Parofiser lakah mithiam cungcuang a si.

1911 kum ah Prague ah Theoretical Physics ah Parofiser a si. A hmaikum ah Zurich ah a rak kir i cu rian cu a ttuan tthiamtthiam. 1914 kum ah Berlin khua Kaiser Wilhelm Physical Institute le University of Berlin hna ah Parofiser a ttuan. 1914 kum ah German rammi sinak a hmuh i 1933 kum tiang a ttuan. 1933 kum ah ramkhelnak kong ruangah German rammi sinak a hlawt i America ram, Princeton khua ah Theoretical Physics Parofiser rian a ttuan. 1940 ah US rammi sinak a hmuh i 1945 kum ah a rianttuannak in ai din.

Vawleicung ralpi IInak a dih hnu ah Einstein cu vawleicung cozah cawlcanghnak ah a min a langsar mi pakhat a si i the State of Israel President caah rianttuan dingin rian pek a si nain cu peknak cu a cohlang lo i, Dr. Chaim Weizmann he Hebrew University of Jerusalem an dirh. Einstein cu physics lei buainak a um caan ah ruahnak ttha a ngei kho tawn i cu buainak cu a ruahnak in a phi an hmuh lengmang tawn. Amahte in khuakhan ruahnak a ngei i cu nih cun ai tinhmi lam a tluanter.

1921 kum ah Einstein nih Nobel laksawng a hmuh. Hi laksawng a hmuhnak cu relativity timi a hmuhchuahnak siloin photoelectric effect a tuahnak in a si. Hi lio caan ah vawleicung hmunkip ah khualtlawnnak a ngei. 1922 kum ah Paris a tlawng i 1923 kum ah Palestine a tlawng. A donghnak bik scientist lei hlathlainak a ngeihmi Tilet konglam hnu ah 1925 kum ah Thlang America a tlawng. Einstein nih laksawng dang lian a hmuhmi hna cu Copley Medal of Royal Society, 1925 kum ah le Royal Astronomical Society Sui Medal 1926 kum ah an si hna.

1928 kum ah Einstein nunnak cu hnahnawk luri ngai in damlonak ruangah a cang.Sihmanhsehlaw kum donghlei ah cun damnak tlamtling a hmuhkhawh ve tthan. 1930 hrawng ah vawleicung khualtlawnnak a ngei tthan i US ah a rak kir tthan. Mah hi U.S. a rak tlawn cu avoithumnak a si cang. Hi lio caan ah Princeton ah rian an pek hi a si. Tinhmi cu Berlin ah thla sarih caan pek i Princeton ah thlali caan pek ding ti kha a si. Cu caah 1932 kum in Germany a chuahtak i U.S. ah a kal. Cu thla cun Nazis pawl Germany ram ah nawlngeihnak an hmuh caah Einstein cu German ram ah a kir ti lo. 1933 kum chung ah Einstein nih Europe ram tlawnnak a ngei Oxford, Glasgow, Brussels le Zurich khua hna a va tlawn hna. 1901 kum lioah rian a rak har ngaimi cu a caah rian a tam lengluang cang. Jerusalem, Leiden, Oxford, Madrid le Paris in rian pekmi tampi a don.

Princeton rian a ttuannak ah physics phung pawl fonhtthan ai zuam. Hi lio caan ah a buai ngaingai i hiti hin ca a ttial, “Science lei buaibainak ah ka caan dihlak ka pek. Tarpa keimah lawng mibu he ai hlat in ka um ko,” tiah a ti. 1940 kum ah Einstein nih U.S. rammi sinak a hmuh i cu bu in Swiss rammi si a duh chih fawn. A nunchung ah daihnak caah thil tampi a tuah hna. 1944 kum ah Einstein nih ral thazaang chuahnak ah pekchanhnak caah ti’n 1905 kum ah a kut in a rak ttialmi special relativity timi cu thil cawk cuhnak ah a rak pek i U.S.D Nuairuk a rak chuak kho. Mah cu ca ttialmi cu Congress Caruk ah nihin chung tiang hmuh khawh awkin chiah peng a si rih.

1949 kum hrawng in Einstein cu dam lo ngai in a um. Siizung ai thlawpbulnak nih dam deuhnak a pek ko nain 1950 kum ah a zual ngaingai tthan. Science lei he pehtlai in a cattialmi cu Jerusalem khua ah aummi Hebrew University ah a kaltak hna. Hi Sianghleiruun cu a hawipa he an rak dirhmi le amah pumpak in U.S.A.ram ah bawmhnak a rak halmi in rak dirhmi a si. 1925 – 1928 tiang hi sianghleiruun hoatu a rak.

Israel ram president hmasabik 1952 kum a thih ah Einstein cu a voihnihnak president si dingah Israel cozah nih president rian an pek nain a el hna kha a si. Einstein nih a thih hlan zarhkhat ah cakuat ah min a thutta mi a um. Cu cakuat cu Bertrand Russell kuatmi a si i, cozah nih tuah dingah thawng an thanhmi ah an min telh dingah a lungtling, cucu ram dihlak nih nuclear hriamnam hman lo ding kha a si. A nunnak donghnak ah ralrin a pekmi cu a nunnak dihlak in a tuahmi cu vawleicung daihnak caah a si ti kha a si. 18 April 1955 kum ah Einstein cu a thih ni zanlei suimilam 4 pm ah Trenton New Jersey ah a ruak an vui.

 -----------------

Note: Vawleicung Miroling cauk (By Mang Hlei Cung)chungta lakchinmi a si.