RO ṬHA CHIATU KAN PA

Rev. Van Biak Nawl

Cangthim:Hebrew.13:7;Pathian bia a rak inchimtuhna nan hruaitu hmasa hna kha philh hnahlah u.zeitindah an nuncan kha a si i zeitindah an thihning asi kha ruat than u law an zumhnakkha cawnghna u.

Biahmaiṭhi

Laimi nih kan pupa hna kan ti tik ah Biaknak lei hruaitu hna kha ka chim duhmi a si. Pathianbia a kan chimtu a kan hruai tu hmasa kan pupa hna hi philh awk a ṭha lo. Kanpupa hna  nunning ahhin Rev.Dr.David Van Bik( Kan pa Steven pa) nunning hi  vun zoh u sih ṭi  ka duh. An tuahṭuan  mi le cawnawktlak an nunning/sining pahnih hi zoh ṭi hna u sih.

1.Zeitindah a nuncan

1926,July 28 ah Tlangpi khua ah a chuak.A pa Saya Chawn Tur le a nu Pi Rent Ṭial (Renh Ṭial) an si.SiangInn kai nak hi tang 4 Tlangpi ah a kai. Tang 6-7 hi FaLam khua ah a kai.1949 ah hin Cherrapunjee,Assam state, Indai ah Serampore  Matric(Tanghra) a  awng.1956,April.23 ah Pi Moble Zo Kai he  an i thi-um.MIT  ah B.Th a rak awng.Hihi Center Baptist Theological Seminery,Kansas USA nih degree an pek mi a si.Cun Berkeley  Baptist Divinity school a tu ah cun (American Baptist Seminary of the west) Califonia  ah MA degree 1959 ah a rak lak.A rak kir i,1959-1963, Zomi Theological College (ZTC) ah Principal a tuan.1963-1976 tiang Lai Bible a let.1978 ah United Bible Society nih an chuah piak.1990-1996 tiang Chin Christian College (CCC) Principal a tuan.Cauk uk30 a tial.May 21,1994 ah American Baptist Seminary of the west nih Honorary Doctarate ,Doctor of Divinity (D.D) an pek.August,19.2000,9:05 On Saturday ah Frederick,Mary land U.S.A ah a nun nak a kan liam tak.A dawtmi a thaisung Pi Moble Zo Kai,a fale Steven,Eric,Rollin,Kenneth, Alice le tu 11 a roh hna.HBC  zapi/zaraan thlanmual ah an vui.Hihi a tawi nak in  a nunning kan hun langhter mi a si.

2.Zeitindah a thih ning

Mi pakhatkhat  a thih tik ah a zawt nak zeidah a si?zei tin  dah a thih ning a si? ti hi hal a si tawn.(Tahchunhnak ah...Zawtnak pakhatkhat ruang ah maw,zu din ruang ah maw,AIDS ruang ah maw,Drug (sii) ruang ah maw,Suicide  maw, accident maw,Ralkut in maw etc.) Zei cah tiah a thih ning hi zawtnak ṭhalo, a silo ah purthih maw, sarthihdah? ti kha(a ruang) theih duh a si tawn.Zeicah ti ahcun minung kan tuanbia hi kan thih ni ah a lang.

Kanpa  David Van Bik hi  “Thih tiang zumhtlak salṭha” (Bia.2:10) bantuk in Pathian zumbu  tein a rak thi.A thih ning hi  huhaam le rumra a ngei tuk hringhran.A chuahni  nak in a thih ni ah hin sunparnak a hmu deuh ti u sih law kan palh lem lai lo.Zeicah tiah a nun lio ah zei bantuk minungdah a si tile zeidah thliṭha a tuah ti kha a thih ni ah bia a chim tu a si.Kan pa  hi zei tluk in dah a ruak a lum ti cu  zapi theih a si.Mi cu an thi cio a si nain a mah tluk in Laimi nih an sunhsak mi ka hmu ballo.A tu in hnu lei ah an um rih lo.A tu in hmai lei zongah an um ka zumh ti lo. Ramdang riliral in Lairam  ah ruak tlunpimi  hi an um bal lo,a mah pakhat long hi a si. “Dr.Van Bik, bantuk in kan Laimi ruak a sung mi an umballo”.tiah Dr.Robert Thawng Hlei. nih a ṭial. Dr. Sangawr zong nih “A ruak nih vawlei a tawl i, kan Laimi dihlak in upat pek le thlah a si, a ruak nih a minung sinak fiang tein a kan chimh” tiah a ṭial ve.

3.Zeitindah bia a chim

Chan le caan he aa tlak in nihin tiang a hmaan mi biaroling  a rak chim tawn mi lak ah,kaa cinken mi hna cu:

a. Lai mi cu thih hnu ah pangpar awih kan hmang .A sullam cu kan nun lio ah dawt ṭunglo in kan thih hnu ah a daw tuk pungsan in va ṭah,a si lo ah a nun lio ah thangchiat rem lo huat tung i, a thih hnu ah a thangthatnak,lawmhnak, upatpeknak va chimphuun khi a si.

 b.Pastor hi Driver he  aa lo.  Mi pakhat cu Pastor ṭuan a duh ah cun Bible a cawn hmasa(Bible sianginn a kai hmasa) a herh hrimhrim.Ṭha tein a cawn  a awn hnu ah degree a hmuh.Cu hnu long ah pastor cu a ṭuan khawh. Cuticun mipi kha Bible duh ningin lamding lamhmaan ah a kalpi a hruai khawh hna lai. Cubantuk in,mi pakhat nih Driver si a duh ah cun motor kong kha a cawn a hau ve, a thiam i,a theih a hngalh dih hnu awn nak license a hmuh.  Cuhnu long ah  Driver kha a ṭuan khawh ve. Cuti cun motor kha ṭha tein a mawngh khawh caah mipi kha lamtluang tein lamding lamhmaan ah a kal pi khawh hna. A mawngh long thiam a za lo, a chim long thiam a za lo.Bible,Pathian kong(Theology) hi cawn hrimhrim a hauh bantuk in,Machine,motor(Machinist) hi a cawn hrimhrim a hau ve.

Cu caah  cun cawnnak tlamtling a ngei lo pastor  nih mipi a hruai tik ah piah ta naa(buainak) a chuak khawh bantuk in thiamnak taktak a ngei lo driver nih motor a mongh  tik ah accident(khawndennak) a chuak kho.Mipi buainak le khawndennak a chuah ter tu si lo nak ding ah cawnnak thiamnak hi a herh tuk.Nihin ni ah mi cheu khat nih cawnnak a herh lo phun in an chim. A silo Laimi nih a lamkip in cawnnak kan bau tuk rih. Cawnnak hi a biapi tuk.Political(Ramkhel) lei ah cawn nak sang a ngei lo mi nih cun  ram thatein an hruai/an uk kholo.Religion(Biaknak) lei zong ah cawn nak sang a ngei lo mi nih cun mipi daitein an hruai/an kalpi kho ve hna lo.

c.Lai mi cu rum kan celh lo.Laimi cu kan rum kan ngeih deuh cun;kan hnar a puar,kan i uah kan i pawrhlaw.Kan bia hi a ngan i mi zei ah kan rel hna lo.Mi cheu khat caah cun an rum nak kha  zudin sa ei nak le nuamcen nak ah kan hmang i kan chancheu hlan ah kan thi, tlangvaldawh le nungakdawh hna zong mifim cathiam a sitelai  dingmi hna nih rawhral nak le thihlo nak an tong.Mino tete hna nih chanṭim hlan ah an thih an loh caah telefa zong an ngei manh ti lo i,an ci a tlau.Culengah Inn le lo ngeih le chiah zong  a ṭet i,hram a pelh, Kan rum deuhdeuh Pathian kan philh deuhdeuh kan lotlau deuhdeuh a rak ti.

d.Van le vawlei an i hnam.Hi biahi kum 100 tlin nak Centennary puaipi Zarhpi zingpumh ah a chimmi thawngṭha a si.Hi ni a sermon hi HBA nih cassette tape phel in an rak chuah piak.

“Japan ram ihphah ṭhabik cung i ka ih le Lairam  saphaw ro cung i ka ih hi, kaa  hngilh ning cu aa khat ko”.Japan ram a tlawn i a kir hnu a chimmi bia a si.Hilio ah hin Japan a hawipa nih suimilam a ṭha ngai mi laksawng a thenh.”A man zeizat dah a si”? tiah ka hal,A ka leh mi cu; “David Van Bik a man kong ah na lungrethei hlah,a caan hmaan te in an chimh khawhko lai” tiah a ka leh ti zong a rak chim.

Mirang holh innpichung luhnak tawhfung ṭhabik pakhat cu Dictionary hi a si. English-Chin Dictionary  i biahmaiṭhi a ṭial mi a si.

4.Zeitindah an upat

MIT nih Kawlram chung ah, Bawipa rian ah zumh awk tlak tein Pathian salṭha a si tiah an thim hna i,kum 25 in a cung lei, kum 35 in a cung lei,kum 45 in a cung lei upat  pekmi ah,a voi 3 in a tel.

MBC nih an pek mi a sangbik upatnak Fellow of Distinguished Christian Service (FDCS) hi Kawlram pumpi Baptist kum 175 tlin nak Civuipi ah an pek.Hi laksawng hi mi sawhsawh nih hmuh khawh mi a si lo.Laimi lak ah a mah lawng nih a hmuh.

HBA nih HBA ramchung na riantuan nak ah kan pabik na si,suttung bantuk in kan i ngatchan mi na si  an ti i,a riantuan nak kum 50 a tlinnak Jubilee zong an tuah piak i,upat nak roca an pek.

CACC nih Laica,Laiholh,Lainunphung ah kan pacem na si,Bible na kan leh piak,Dictionary na kan ṭial piak, Ca uk  30 na kan ṭial piak,Laimi lak ah cauk tambik a ṭialtu pakhatnak le B.Th a awng hmasabik  na si  ti nak upatnak roca an  pek.A dangdang Association,Area le Local Churches hna nih an pek mi upatnak roca hi a tamtuk  rih kan ṭial cawk lai lo.(Van Bik Museum ah hin  an chiah dih hna zohkhawh, hmuhkhawh an si.)

5.Zeitindah mi nih an hmuh/ruah

 David Van Bik an hmuhning /an ruahning cio a ṭial mi hna tampi lakchungin a cheukhat an mah ṭial ningtein ka rak ṭial ve. Cu hna cu :

Mirang Holh

·         Do not forget that you Lai people have a precious gem. The gem is Dr. Van Bik.     Dr. Johnson.

·         The kingdom of God on earth has lost a patriarch of the Baptist work in the Chin hill of Burma, a Biblical and linguistic scholar, and a mentor of younger Chin leadership. I have lost of a friend of 43 years. Ken Blazier.(Hi pa hi USA sianginn a kai lio i a hoikawm thabik pakhat a si).

·         Some of you may laugh at me, but I would like to call him the Shakespeare of the Chins.   Rev. James Sangawi.

·         David, In my book, is one of the really Great ones!    Paul Clasper

·         God had greatly blessed the chin people by sending to them someone of the quality of David Van Bik.  Rev. Lloyd G. James.

·         David Van Bik was not only a theological educator for the Chins,He was also a man who wanted to improve the living standard of the Chins.   Dr. Cung Lian Hup.

·         One of  the  Church Fathers for the Laimi (chins) and the Churches in Myanmar.   Rev. Lal Pek Lian.

Lai Holh

·         David Van Bik cu,Chanthar Laimi Tukhar ṭha a si.Dr. C. Duh Kam.

·         A pum in kan thih tak hmanhsehlaw,a rianṭuan nak cu a nungzungzal lai.Dr.Sangawr

·         Dr.Van Bik,nangcu;Baptist kan zumh nak Sangphawlawng aa hren nak thir cangai bantuk a tlaitu na si. Rev. A.Za Khar.

·         Na tuanmi rianroling rian, Vawleicung mi ropui hna thlanmual an liam ning na hluan. M.Dar Zing.

·         Laimi pasalṭha,Laimi nih an lawmh.Laimi caah na rian na lim,Laiminih Ro ah an chiah. Steven Ni Kio

·         Laimi lawng si loin Lairam hrimhrim a dawtu pa upat hmaizah awk tlakbik mi. Dr.Hnuh Thang

·         Simple living,high thinking hi nangmah nih na nun nak in na langhter. Dr.Lal uk

A mah Philh lo nak ah tuah mihna lak ah Min lang deuh  hna cu:

1).David Van Bik Foundation (DVBF)

2).Van Bik Museum( HBA zung Hakha)

3).Van Bik Memory Baptist Church (Kalay),

4).Van Bik Library (Thantlang),

5).Van Bik Mini Hydro Project (HBC).

Hi lengah hin amah min bunh in riantuannak tete tampi a um ko. Hihnahi  zapi nih kan theih deuh mi in ka vun langhter mi an si.

Biafun nak

Vawlei cung fimthiam nak Innpi chung ah luhkhawhnak tawhfung Dictionary le kan thlarauzungzal nunnak lamhruaitu Vancung luhnak tawhfung Lai Bible thiang a kan ṭial piaktu a si.Cu leng ah cauk tambik a kan ṭial piaktu a si.Kan ram kan miphun caah roṭha tam pi a kan chiahpiak tu a si.A nunning, a thihning ,a zumh ning kan zoh tik ah Hoihlei, cungcuang, a zik, teitu, na si tiah Rev.Lai Ram Hu nih Hla a phuah.A hmaan tuk ka ti.

Hruaitu ṭha hi, philh an har;Mifim bia hi, ro a ling.

Fakpi i pulpitcung in au nak nak in,thilṭha tuah hi a aw a thang deuh.

Lamram kawng tampitheih nakin,Lamram caah tuan a ṭha deuh.

Nihin Lai mino hna nih kanpa Dr.David Van Bik a nun ah  cawn ding tam pi kan ngei.Zeitin dah a nuncan kha a s ii,zeitindah a thih ning kha a si ti kha ruat ṭhan u sih law a zumhnak kha cawng in, kan ram le kan miphun caah a lamkip in roṭha tampi a chia kho tu kan si khawh nak hnga i zuam cio uh sih.

Hruaitu fim hna cu van i arfi ceu bantukin an ceu lai  i,Lamding ah mizapi a hruaitu hna cu zungzal in zungzal tiang arfi bantuk an si lai.(Daniel.12:3)

References:

1).To God Be The Glory (In memory and Honor of David Van Bik)

2).David Van Bik Golden Jubilee Magazine,

3).Rev.Dr.Van Bik,Deirel Cazual;Posted On July.17,2011.

4).HaKha Tipil Khrihfabu tuanbia(copyright @HBC February,2008.

5).Lai Bible thiang

6).A mah chim mi (Sermon,Lecture,Seminal,Bible conferane tbk) chungin

7).English-Chin Dictionnary Biahmaiṭhi